Makani Aakalembwa aaLukka
7 Naakamaninsya kubuzya bantu nzyaakali kuyanda kubabuzya, wakanjila muKkapenawume. 2 Kwakali mupati wamasoja wakali aamuzike ngwaakali kuyanda loko. Muzike ooyo wakali kuchiswa loko zyakuti wakali waamba kufwa. 3 Mupati wamasoja naakamvwa atala aJesu, wakatuma bamwi baalumi bapati bamaJuda, kuti bakamukumbile kuti aze azooponie muzike wakwe. 4 Bakasika kuli Jesu mpawo bakasaanguna kumukombelezya amoyo woonse kabati: “Mwaalumi ooyu uleelela kuti umuchitile chintu eechi, 5 nkaambo ulachiyanda chisi chesu alubo nguwe wakayaka chikombelo chesu.” 6 Mpawo Jesu wakayinkaabo. Pesi naakali waba aafwiifwi ang’anda, mupati wamasoja wakali wabatuma kale beenzinyina kuti bakamubuzye kuti: “Mwaami, utalikataazyi pe, nkaambo ime tandeeleli pe kuti usike kung’anda yangu. 7 Nchindatasika kulinduwe nkaambo ndabona kuti tandeeleli pe. Pesi amba jwi biyo mubelesi wangu apone. 8 Nkaambo andime kuli bantu bandeendelezya alubo ndili aamasoja ngindeendelezya. Kuti ndabuzya ooyu kuti: ‘Yinka!’ ulayinka, mpawo kuti ndabuzya umwi kuti, ‘Kuza!’ ulasika, alubo kuti ndabuzya muzike wangu kuti, ‘Chita eechi!’ ulachichita.” 9 Jesu naakamvwa majwi aaya, wakagamba mpawo wakachengunuka, walanga nkamu yabantu bakali kumutobela mpawo wakati: “Ndimubuzya kuti, tandinajana muntu ulaalusyomo lupati oobu nikuba mu-Israyeli.” 10 Baalumi bakatumidwe nibakabweeda kung’anda, bakajana muzike kali wapona.
11 Mbuzyakayinda biyo zintu eezi, wakayinka kumuunzi uutegwa Nayini alubo basikwiiya bakwe ankamu mpati yabantu yakali kweendaawe. 12 Naakasika aafwiifwi ageedi lyamuunzi, lino bona, kwakali mwaalumi uufwide wakanyampwidwe kalikugwisigwa aanze, ooyo wakazyedwe aalikke kuli banyina. Banyina bakali mukamufu. Alubo nkamu mpati yabantu yakali aamukamufu ooyo. 13 Mwaami naakabona mukamufu ooyo, wakamweetelela mpawo wakamubuzya kuti: “Utalili pe.” 14 Mpawo wakaswena aafwiifwi, wajata bulo* mpawo bantu bakabunyampwide bakayimikila. Mpawo Jesu wakati: “Mulombe, ndikubuzya kuti, buka!” 15 Mpawo mwaalumi ooyo wakafwide wakabuka, wakkala mpawo wakasaanguna kwaambuula alubo Jesu wakamupa kuli banyina. 16 Bantu boonse bakayoowa mpawo bakasaanguna kulumbayizya Leza kabati: “Mupolofita mupati wasika aakati kesu.” Alubo bakali kuti, “Leza wabayeeya bantu bakwe.” 17 Makani aaya aali atala anguwe, akazula muJudiya yoonse amumyuunzi yoonse yamundawu eeyo.
18 Basikwiiya baJohane bakamubuzya zintu zyoonse eezi. 19 Nkinkaako, Johane wakayita basikwiiya bakwe babili mpawo wakabatuma kuMwaami kuti bakamubuzye kuti: “Nduwe Ooyo Ulikuza na, naakuti tweelede kulangilila uumbi?” 20 Nibakasika kulinguwe, baalumi aabo bakati: “Johane Mubbabbatizi watutuma kulinduwe kuzoobuzya kuti: ‘Nduwe Ooyo Ulikuza na, naakuti tweelede kulangilila uumbi?’” 21 Mu-awa njiyeeyo, wakasilika bantu biingi bakali kuchiswa malwazi aasiyene-siyene, abakali kuchiswa malwazi malemu, wakatanda myuuya mibi alubo wakapa kuti boofu babone. 22 Mpawo wakabasandula kuti: “Amwiinke mukabuzye Johane nzimwabona anzimwamvwa: Boofu baabubona, bateendi baabweenda, basizipele balikusalazigwa, batamvwi kumatwi balikumvwa, bafwide balikubusigwa alubo bafwaba balikubuzigwa makani mabotu. 23 Ulabotelwa ooyo uutajani kaambo kapa kuti alebwe mulindime.”
24 Bantu mbaakatumide Johane nibakeenda, Jesu wakasaanguna kubuzya makamu aabantu atala aJohane kuti: “Nimwakaya munkanda, mwakali kuya kukubonaanzi? Mwakali kuya kukubona tete kalili kutontwa aaluuwo na? 25 Ani mpo mwakali kuya kukubonaanzi? Muntu uuzweete zigogo ziteteete* na? Bantu bazwaata zigogo zibotu alubo bakkede kabotu, bakkala mumaanda aabwaami. 26 Ani mpo mwakali kuya kukubonaanzi? Mupolofita na? Kwaamba choonzyo, ndimubuzya kuti, muntu ooyo mupati kwiinda mupolofita. 27 Ooyo ngunguwe uulembedwe atala anguwe kuti: ‘Bona! Ndilikutuma mutumwa wangu kunembo lyako,* ooyo uutazookubambile nzila kunembo lyako.’ 28 Ndimubuzya kuti, aakati kabantu bakazyalwa aabanakazi, taakwe muntu mupati kwiinda Johane, pesi muntu muniini muBwaami bwaLeza, mupati kwiinda nguwe.” 29 (Bantu boonse abasimutelo nibakamvwa makani aaya, bakaamba kuti Leza uliluleme, nkaambo bakabbabbatizidwe aaJohane. 30 Pesi baFarisi abaabo bakazi Mulawu bakaakaka malayilile aaLeza ngibakapedwe, nkaambo teebakabbabbatizidwe aaJohane pe.)
31 “Bantu bazyalani eeli kujana ndabakozyanisyaani, alubo bali mbulini? 32 Bali mbuli bana baniini bakkede kumusika, balikubuzya beenzinyina kuti: “Twakamusibila nyeele pesi inywe teemwakazyana pe, twakoomoka pesi inywe teemwakalila pe.’ 33 Munzila iikozyenie, Johane Mubbabbatizi wakaza katalyi chinkwa alubo katanywi wayini pesi inywe mwaamba kuti: ‘Ulaadimoni.’ 34 Mwanaamuntu wakaza kalya alubo kanywa pesi inywe mwaamba kuti: ‘Amubone! Muntu ooyu mutangazu, uyandisya kunywa wayini alubo mweenzinyina wabasimutelo abasizibi!’ 35 Nikuba oobo, busongo bulaboneka kuti buliluleme kwiinda mubana babo boonse.”*
36 Umwi muFarisi wakaliswini kumukumbila kuti akalyaamwi aanguwe. Nkinkaako, wakanjila mung’anda yamuFarisi mpawo wakakkala aatebbulu. 37 Mpawo umwi mwanakazi wakazibinkene kuti ngusizibi mumuunzi ooyo, wakamvwa kuti Jesu ulikulya* mung’anda yamuFarisi. Nkinkaako, wakaza aakabbodela ka-alabbasta kakali aamafuta aanunkilila. 38 Mpawo wakazida kusule, wafugama kumawulu aaJesu akutalika kulila alubo wakasaanguna kutetya mawulu aaJesu amisozi yakwe mpawo wakaapukuta aamasusu aakwe. Alubo wakamyonta mawulu aakwe akwaatila mafuta aanunkilila. 39 MuFarisi wakamutambide naakabona zintu eezi, wakati mumoyo wakwe: “Kaansinga mwaalumi ooyu mupolofita choonzyo, walikunooziba kuti mwanakazi wamujata ngwani akuti ulibiyeni. Walikunooziba kuti ngusizibi.” 40 Pesi Jesu wakati kulinguwe: “Simoni, ndiyanda kukubuzya chimwi chintu.” Mpawo wakati: “Amba, Muyiisi!”
41 “Kwakali baalumi babili bakali aachikwelete kuli umwi sikukweletesya. Umwi wakali aachikwelete chamadinari aali 500, pesi umwi aali 50. 42 Nibakabula chintu chakumubbadalaacho, wakabalekelela boonse amoyo woonse. Nkinkaako, aakati kabaalumi aaba babili, nguuli uutazoomuyande loko?” 43 Mpawo Simoni wakasandula kuti: “Ndibonaanga ngooyo wakalekelelwa chikwelete chipati.” Mpawo Jesu wakati: “Wasandula kabotu.” 44 Mpawo Jesu wakachengunuka, walanga mwanakazi ooyo, mpawo wakati kuli Simoni: “Ulimubwene na mwanakazi ooyu? Ndanjila mung’anda yako, teewandipa maanzi aakusamba kumawulu. Pesi mwanakazi ooyu watetya mawulu aangu amisozi yakwe mpawo waapukuta aamasusu aakwe. 45 Iwe teewandimyonta pe, pesi mwanakazi ooyu walikundimyonta kumawulu kuzwa kuchiindi nindasika. 46 Iwe teewanditila mafuta mumutwe pesi mwanakazi ooyu wanditila mafuta aanunkilila kumawulu. 47 Akaambo kazeezi, ndikubuzya kuti, mwanakazi ooyu walekelelwa zibi zyakwe nikuba kuti nzyiingi* nkaambo watondeezya luyando lupati. Pesi ooyo uulekelelwa kantu kaniini, ulaaluyando luche.” 48 Mpawo Jesu wakati kumwanakazi ooyo: “Zibi zyako zyalekelelwa.” 49 Mpawo bantu mbaakakkede aabo aatebbulu bakatalika kubuzyania kuti: “Muntu ooyu ngwani biya uunga ulalekelela zibi?” 50 Pesi wakati kumwanakazi ooyo: “Lusyomo lwako lwakufutula, yinka muluumuno.”