Makani Aakalembwa aaLukka
9 Mpawo wakayita bali Kkumi Ababili akubapa manguzu aakuti batande madimoni woonse akuti basilike bakali kuchiswa. 2 Mpawo wakabatuma kuti bakakambawuke atala aBwaami bwaLeza akuti bakaponie, 3 mpawo wakati kulimbabo: “Mulweendo lwanu, mutabwezi chintu pe, ibe nkoli, chibe chikwama chakubikkila chakulya, chibe chinkwa, ibe mali,* alubo mutabwezi zigogo zibili.* 4 Pesi kufumbwa ng’anda njimunjila, amukkale mumo kusikila mukazwe kundawu eeyo. 5 Alubo kufumbwa nkubataleke kumutambula, nimwazwa mumuunzi ooyo, amukunkumune lusuko kumawulu aanu kuti bube bukamboni kulimbabo.” 6 Mpawo bakeenda kabayabunjila muunzi amuunzi muchilawu eecho, kabalikwaambilizya makani mabotu akusilika bantu koonse-koonse.
7 Herodi* mweendelezi wabbooma* wakamvwa atala azintu zyoonse zyakali kuchitika, alubo wakakataazikana loko nkaambo bamwi bakali kwaamba kuti Johane wabusigwa kuzwa kubafu. 8 Pesi bamwi bakali kuti Elija waboneka alubo bamwi bakali kuti umwi wabapolofita bachiindi wabusigwa. 9 Herodi wakati: “Johane ndakamudyunkula mutwe. Ani ngwani ooyu ngundilikumvwa kuti ulikuchita zintu eezi?” Nkinkaako, wakali kuyanda kumubona.
10 Baapostoli nibakaboola, bakabuzya Jesu zyoonse nzibakachita. Mpawo Jesu wakayinka aambabo kuti bakabe aabalikke mumuunzi uutegwa Bbetisayida. 11 Pesi makamu aabantu naakaziziba, akamutobela. Wakabatambula kabotu, mpawo wakasaanguna kubabuzya atala aBwaami bwaLeza alubo wakaponia aabo bakali kuyanda kusilikwa. 12 Zuba kalili lyaba aafwiifwi kubbila, bali Kkumi Ababili bakasika kulinguwe mpawo bakamubuzya kuti: “Buzya bantu beende, kuchitila kuti baye mumyuunzi ilaafwiifwi amutuunzi, kuti bakayanduule aakoona achakulya, nkaambo ookuno nkulusaka.” 13 Pesi wakati kulimbabo: “Inywe amubape chakulya.” Bakati: “Tuli aazinkwa zili musanu abaswi babili kupela, kunze kwakuti iswe twiinke tukawulile bantu boonse aaba chakulya.” 14 Kwaamba choonzyo, kwakali baalumi basika ku 5 000. Pesi wakabuzya basikwiiya bakwe kuti: “Amubakkazike mutubunga twabantu basika ku 50.” 15 Basikwiiya bakachita oobo alubo bakabakkazika aansi bantu boonse. 16 Naakabweza zinkwa zili musanu abaswi babili, wakalanga kujulu wazilongezya. Mpawo wakazikwamuna akusaanguna kuzipa basikwiiya kuti bazibikke kunembo lyankamu yabantu. 17 Nkinkaako, boonse bakalya bakkuta, alubo bakabwezelela chakulya chakasyaala mpawo bakazuzya mabbasikiti aali 12.
18 Nikwakayinda chiindi, basikwiiya bakasika kulinguwe naakali kukomba alikke, mpawo wakababuzya kuti: “Bantu batii ndimeni?” 19 Mpawo bakamusandula kuti: “Bamwi bati nduwe Johane Mubbabbatizi, bamwi bati nduwe Elija nikuba oobo, bamwi bati uli umwi wabapolofita bachiindi wakabusigwa.” 20 Mpawo wakati kulimbabo: “Ani inywe muti ndimeni?” Petro wakasandula kuti: “Nduwe Kkristu waLeza.” 21 Mpawo wakabalayilila kuti bataabuzyi muntu pe makani aaya, 22 pesi wakati: “Mwanaamuntu weelede kuswaana mapenzi miingi akukakwa aabaalu abapati babapayizi abalembi akujayigwa mpawo mubuzuba bwachitatu azoobusigwe.”
23 Mpawo wakayinkilila kunembo kubuzya bantu boonse kuti: “Kuti muntu kayanda kunditobela, aleke kupona mbuli mbayanda, mpawo anyampule chisamu chakwe chakupenzezya* buzuba abuzuba, ayinkilile kunembo kunditobela. 24 Nkaambo kufumbwa muntu uuyanda kufutula buumi bwakwe, uzoosweekelwa aambubo pesi kufumbwa muntu uusweekelwa aabuumi bwakwe akaambo kangu, nguwe uutazoobufutule. 25 Kwaamba choonzyo, zigwasyaanzi kuti muntu ajane nyika yoonse pesi asweekelwe aabuumi bwakwe naakuti anyonyooke? 26 Nkaambo kufumbwa muntu uuba aabweeme akaambo kangu amajwi aangu, anguwe Mwanaamuntu uzooba aabweeme kumuntu ooyo aazoosika mubulemu bwakwe amubulemu bwaWisi abwangilozi zisalala. 27 Pesi ndimubuzya choonzyo kuti, kuli bamwi bayimvwi aano, batazooluboni pe lufu kusikila basaangune kubona Bwaami bwaLeza.”
28 Kwaamba choonzyo, nikwakayinda mazuba aasika kuli aali musanu aatatu kali waamba majwi aaya, wakabweza Petro aJohane aJakkobo mpawo wakatanta chilundu kuti akakombe. 29 Naakali kukomba, kumeso kwakwe kwakachincha alubo zigogo zyakwe zyakatuba buu, zyang’ayima. 30 Mpawo baalumi babili bakali kwaambuula aanguwe. Baalumi aabo nguMozesi a-Elija. 31 Baalumi aaba bakaboneka mubulemu alubo bakasaanguna kwaambuula atala akuzwa kwakwe, ooko kwakali kwaba aafwiifwi kuzuzikizigwa kuJerusalema. 32 Petro abaabo mbaakali aabo bakali koona, pesi nibakabuka, bakabona bulemu bwakwe abaalumi babili bakayimvwi aanguwe. 33 Baalumi aaba nibakali kuzwa aalinguwe, Petro wakati kuli Jesu: “Muyiisi, chabota kuti tulaano. Atuyake matente aatatu, lyako, lyaMozesi alya-Elija.” Nikuba oobo, Petro taakazizi pe nzyaakalikwaamba. 34 Pesi naakachili kwaambuula zintu eezi, kwakaba joba alubo lyakasaanguna kubavumba. Nibakaba mujoba, bakayoowa. 35 Mpawo mujoba eelyo mwakazwa jwi lyakati: “Ooyu Mwanaangu uusalidwe. Amumuswiilile.” 36 Ijwi eelyo nilyakachili kwaambuula, Jesu wakasyaala kali aalikke. Pesi bakawumuna alubo mumazuba aayo taakwe muntu ngubakabuzya zintu nzibakali babona.
37 Mubuzuba bwakatobela nibakazwa kuchilundu, nkamu mpati yabantu yakamutambula. 38 Mpawo umwi mwaalumi wakali munkamu yabantu aabo, wakoompolola kati: “Muyiisi ndakombelela, zoolange mwanaangu nkaambo nguwe alikke ngundilaawe. 39 Bona, kuti muuya mubi wamujata, nga wakwiila alubo ulamugwigwimya akupa kuti azwe fulu* kumulomo. Muuya ooyu ulakataazya kuzwa alubo ngawazwa kawuli wamuchisa. 40 Ndakombelezezye basikwiiya bako kuti bawutande pesi bakachilwa.” 41 Mpawo Jesu wakati: “Inywe nizyalani litakwe lusyomo alubo lipilingene, ndeelede kukkala aandinywe kwachiindi chilamfu biyeni? Alubo ndeelede kumutondeezya moyo mulamfu kusikila lili? Mweete ookuno mwanaako.” 42 Pesi nikuba naakali kuya kuli Jesu, dimoni lyakamuzintila aansi akumugwigwimya changuzu. Pesi Jesu wakakalalila muuya mubi ooyo akuponia mulombe ooyo mpawo wakamutola kuli wisi. 43 Mpawo bantu boonse bakagamba loko akaambo kamanguzu mapati aaLeza.
Bantu boonse kabachigambide kuzintu zyoonse nzyaakali kuchita, wakati kuli basikwiiya bakwe: 44 “Amuswiilisisye alubo mwayeeye majwi aaya nkaambo Mwanaamuntu uzoowuzigwa mumaboko aabantu.” 45 Pesi teebakazimvwisisisya pe nzyaakali kwaamba. Kwaamba choonzyo, zyakalisisidwe kulimbabo kuchitila kuti batazimvwisisisyi pe alubo bakayoowa kumubuzya atala amakani aaya.
46 Mpawo kwakaba kukazyania aakati kabo atala akuti ngwani wakali mupati kwiinda boonse. 47 Jesu kazi nzibakali kuyeeya mumyoyo yabo, wakabweza mwana muniini mpawo wakamwiimikizya kumbali lyakwe, 48 mpawo wakati kulimbabo: “Kufumbwa muntu uutambula mwana muniini ooyu muzina lyangu, ulanditambula andime. Alubo kufumbwa muntu uunditambula, ulamutambula aYooyo wakandituma. Nkaambo ooyo uulichita kuba muniini aakati kanu moonse, ngunguwe mupati.”
49 Mpawo Johane wakati: “Muyiisi, twabona umwi muntu kalikutanda madimoni muzina lyako, tweezya kumukasya nkaambo talikukutobelaamwi andiswe pe.” 50 Pesi Jesu wakati kulinguwe: “Muteezyi kumukasya pe, nkaambo kufumbwa muntu uutamulwani ulikubbazu lyanu.”
51 Naakali kuswena* mazuba aakuti atolwe kujulu, wakakanza amoyo woonse kuya kuJerusalema. 52 Nkinkaako, wakatuma batumwa kunembo lyakwe. Alubo bakayinka baakunjila mumuunzi wamaSamariya kuti bamubambile zintu. 53 Pesi teebakamutambula pe nkaambo wakaliyandide amoyo woonse* kuya kuJerusalema. 54 Basikwiiya bakwe, Jakkobo aJohane nibakabona zintu eezi bakati: “Mwaami, ulayanda na kuti twiite mulilo kuzwa kujulu uzoobanyonyoone bantu aaba?” 55 Pesi wakachengunuka, wabakalalila. 56 Nkinkaako, bakaya kuli umwi muunzi.
57 Nibakali kuya bweenda munzila, umwi muntu wakati kulinguwe: “Ndilakutobela kufumbwa nkuya.” 58 Pesi Jesu wakati kulinguwe: “Bamwaaba balaampako alubo bayuni bakujulu balaazitendele, pesi Mwanaamuntu takwe aakubikka mutwe wakwe pe.” 59 Mpawo wakabuzya umwi kuti: “Ba mutobeli wangu.” Mwaalumi ooyo wakati: “Mwaami, ndizumizye saansi ndiinke ndikazikke ndeende.” 60 Pesi Jesu wakati kulinguwe: “Leka bafwide bazikke bafwide babo pesi iwe yinka ukaambilizye Bwaami bwaLeza koonse-koonse.” 61 Alubo umwi wakati: “Mwaami ndilakutobela pesi ndizumizye saansi ndikalaye bamung’anda yangu.” 62 Jesu wakati kulinguwe: “Taakwe muntu uujata jamba lyang’ombe akuboko kwakwe mpawo alange zintu zili musule, weelela kuba muBwaami bwaLeza.”