Makani Aakalembwa aaJohane
20 Mubuzuba bwakusaanguna bwamviki, Mariya Magadalina wakasika kukabanda* kuseeni kakuchisiya-siya mpawo wakajana bbwe kalili lyagwisigwa kale aakabanda.* 2 Nkinkaako, wakachijaana kaya kuli Simoni Petro akuli umwi sikwiiya Jesu ngwaakali kuyanda loko mpawo wakati kulimbabo: “Mwaami bamugwisya mukabanda, alubo tatuzi pe kuti baakumulazika kuli.”
3 Mpawo Petro awumwi sikwiiya, bakazwa baya kukabanda. 4 Basikwiiya aaba babili bakasaanguna kuchijaana pesi umwi sikwiiya wakachijaana kwiinda Petro mpawo wakamwiindila kusika kukabanda. 5 Nikuba oobo, taakanjila pe, wakasondela biyo mukati, wabona malembo aansi. 6 Anguwe Simoni Petro wakasika kalikumutobela mpawo wakanjila mukabanda. Naakanjila, wakabona malembo aansi. 7 Mulembo wakalambilide mutwe waJesu wakabikkidwe kumbali awulikke, teewakalaamwi pe aamwi malembo. 8 Mpawo sikwiiya wakasaangunide kusika kukabanda anguwe wakanjila, wabona alubo wasyoma. 9 Nkaambo basikwiiya teebakalinalumvwisisisya pe lugwalo lwaamba kuti weelede kubusigwa kuzwa kubafu. 10 Nkinkaako, bakabweeda kumyuunzi yabo.
11 Pesi Mariya wakaliimvwi aanze, aafwiifwi akabanda kalikulila. Kachilila, wakaswena kuti asondele mukabanda, 12 mpawo wakabona ngilozi zibili zyakazweete zigogo zituba kazikkede mpuwakalazikidwe mubili waJesu. Imwi yakali kumutwe alubo imwi yakali kumawulu. 13 Mpawo ngilozi eezyo zyakati kulinguwe: “Yoomwanakazi, ulilaanzi?” Mariya wakati: “Mwaami wangu bamubweza alubo tandizi pe kuti baakumulazika kuli.” 14 Naakamana kwaamba majwi aaya, wakachengunuka mpawo wakabona Jesu kayimvwi mpawaawo, pesi taakaziba pe kuti wakali Jesu. 15 Mpawo Jesu wakati kulinguwe: “Yoomwanakazi, ulilaanzi? Ngwani ngulikuyanduula?” Mariya kayeeya kuti muntu uubeleka mumuunda, wakati kulinguwe: “Kuti kuli nduwe wamubweza, ndibuzye kuti waakumulazika kuli, kuchitila kuti ndikamubweze.” 16 Mpawo Jesu wakati kulinguwe: “Mariya!” Naakachengunuka, wakati kulinguwe muchiHebberu: “Rabboni!” (nkukwaamba kuti “Muyiisi!”) 17 Jesu wakati kulinguwe: “Utandijatilili pe, tandinayinka pe kuli Taata. Pesi kuya kuli basikwiiya bangu ukababuzye kuti: ‘Ndilikutanta kuya kuli Taata, Wuso akuli Leza wangu, Leza wanu.’” 18 Mpawo Mariya Magadalina wakasika wabuzya basikwiiya kuti: “Ndamubona Mwaami!” Alubo wakababuzya nzyaakabuzigwa aaJesu.
19 Nilyakaba goko mubuzuba mbuboobo, mubuzuba bwakusaanguna bwamviki, milyango yamaanda basikwiiya mubakabede yakalikkiidwe akaambo kakuyoowa maJuda. Mpawo Jesu wakasika, wayimikila aakati kabo alubo wakati: “Amube aaluumuno.” 20 Naakaamba majwi aaya, wakabatondeezya maboko aakwe akulubazu lwakwe. Basikwiiya bakabotelwa loko nibakabona Mwaami. 21 Mpawo Jesu wakababuzya lubo kuti: “Amube aaluumuno. Mbuli Taata mbaakandituma, andime ndilikumutuma.” 22 Naakaamba majwi aaya, wakabafulida mpawo wakati kulimbabo: “Amutambule muuya uusalala. 23 Kuti mwalekelela zibi zyamuntu, zilalekelelwa alubo kuti teemwalekelela zibi zyamuntu, tazikoolekelelwa pe.”
24 Pesi Tomasi, umwi wabali Kkumi Ababili, ooyo wakali kutegwa Mumbile, taakaliwo pe Jesu naakasika. 25 Nkinkaako, bamwi basikwiiya bakali kumubuzya kuti: “Twamubona Mwaami!” Pesi wakati kulimbabo: “Ime biya tandikoosyoma pe kuti teendabona mpuzyakayinda zipikili mumaboko aakwe mpawo ndinjizye kanwe kangu mukati alubo ndinjizye kuboko kwangu kulubazu lwakwe.”
26 Nikwakayinda mazuba aali musanu aatatu, basikwiiya bakwe bakali mung’anda lubo, alubo Tomasi wakalaamwi ambabo. Jesu wakasika nikuba kuti milyango yakalikkiidwe mpawo wakayimikila aakati kabo, wati: “Amube aaluumuno.” 27 Mpawo wakabuzya Tomasi kuti: “Ngaya maboko aangu, njizya kanwe kako alubo unjizye kuboko kwako kulubazu lwangu, uleke kuzumbuuzya pesi usyome.” 28 Mpawo Tomasi wakati kulinguwe: “Mwaami wangu, Leza wangu!” 29 Jesu wakati kulinguwe: “Wasyoma na lino akaambo kakuti wandibona? Balabotelwa aabo basyoma nikuba kabatanabona pe.”
30 Kwaamba choonzyo, Jesu wakachita zimwi zitondeezyo zyiingi kunembo lyabasikwiiya, zitalembedwe pe mubbuku eeli lyakupeta. 31 Pesi makani aaya akalembelwa kuti musyome kuti Jesu nguKkristu Mwana waLeza, akuti mube aabuumi kwiinda muzina lyakwe akaambo kakusyoma.