Makani Aakalembwa aaJohane
11 Umwi mwaalumi uutegwa Lazaro wakali kuchiswa alubo wakali kuzwa kuBbetaniya, mumuunzi mwakali kukkala Mariya amukulanaakwe Marta. 2 Mariya ooyu, nguwe wakatila Mwaami mafuta aanunkilila akumupukuta mawulu kabelesya masusu aakwe. Munyaandumaakwe Lazaro nguwe wakali kuchiswa. 3 Mpawo bachizi bakwe bakamutumina mulayizyo wakuti: “Mwaami, bona, ooyo nguyanda loko, ulikuchiswa.” 4 Pesi Jesu naakamvwa makani aaya, wakati: “Kuchiswa ooku takugoleli aalufu pe pesi kuzoopa kuti Leza alemekwe, kuchitila kuti Mwana waLeza alemekwe kwiinda mulinkuko.”
5 Jesu wakali kumuyanda Marta, amwanikaakwe Mariya aLazaro. 6 Pesi naakamvwa kuti Lazaro ulikuchiswa, wakakkala kundawu nkwaakabede kwamazuba aambi aabili. 7 Mpawo wakabuzya basikwiiya kuti: “Atubweede lubo muJudiya.” 8 Mpawo basikwiiya bakati kulinguwe: “Rabbi, lino-lino bantu bakuJudiya bakali kuyanda kukutulula mabwe, mpawo uyanda kubweeda lubo?” 9 Jesu wakasandula kuti: “Buzuba buli aama-awa aali 12 aamumuni, teembubo na? Nkinkaako, muntu weenda sikati, taakwe chintu chimulebya pe nkaambo nga ubwene mumuni wanyika eeyi. 10 Pesi muntu weenda mansiku ulalebwa, nkaambo taakwe mumuni pe mulinguwe.”
11 Naakazwa kwaamba zintu eezi, wakayungizya kuti: “Mweenzuma Lazaro woona, pesi ndiya nkuko kuti ndikamubusye.” 12 Mpawo basikwiiya bakati kulinguwe: “Mwaami, kuti kalikoona, ulaba kabotu.” 13 Pesi Jesu wakali kwaambuula atala alufu lwaLazaro. Nikuba oobo, basikwiiya bakayeeya kuti ulikwaamba koona kwakupumuna. 14 Mpawo Jesu wakabazwida aantanganana kati: “Lazaro wafwa 15 pesi ndilabotelwa akaambo kandinywe kuti teendaliko pe, kuchitila kuti musyome. Nikuba oobo, atwiinke kulinguwe.” 16 Nkinkaako, Tomasi ooyo wakali kutegwa Mumbile, wakabuzya bamwi basikwiiya kuti: “Andiswe atwiinke, kuchitila kuti tukafwaamwi anguwe.”
17 Jesu naakasika, wakajana Lazaro kali waba aamazuba aane kali mukabanda.* 18 Bbetaniya yakali aafwiifwi aJerusalema, kwamusinzo uulampa makkilomita aasika ku 3.* 19 Alubo maJuda biingi bakalisikide kuli Marta aMariya kuti bazoobawumbulizye, nkaambo bakali bafwidwa munyaandumaabo. 20 Marta naakamvwa kuti Jesu ulikuza, wakayinka kuyoomutambula pesi Mariya wakasyaala kung’anda kakkede. 21 Mpawo Marta wakati kuli Jesu: “Mwaami, kaansinga wakali kookuno, nikuli munyaandumaangu tafwide pe. 22 Pesi ndilizi kuti nikuba lino, kufumbwa nchukumbila kuli Leza, Leza ulakupa.” 23 Mpawo Jesu wakati kulinguwe: “Munyaandumaako ulabuka.” 24 Mpawo Marta wakati kulinguwe: “Ndilizi kuti uzoobuka baakubusigwa bantu mubuzuba bwamamanino.” 25 Jesu wakati kulinguwe: “Ndime ndibusya bafu alubo ndime ndibapa buumi. Ooyo uuli aalusyomo mulindime, nikuba kuti wafwa uzooba muumi lubo 26 alubo muntu woonse uupona alubo uuli aalusyomo mulindime, tazoofwi pe. Ulazisyoma na zintu eezi?” 27 Mpawo Marta wakati kulinguwe: “Iiyi Mwaami, ndilasyoma kuti nduwe Kkristu, Mwana waLeza ooyo wakali kuzooza munyika.” 28 Naakaamba zintu eezi, wakazwa waakwiita mwanikaakwe Mariya mpawo wakaambuulaawe kumbali kati: “Muyiisi wasika, ulikukwiita.” 29 Mariya naakamvwa oobo, wakanyampuka chakufwambaana mpawo wakaya kuli Jesu.
30 Jesu taakalinanjila pe mumuunzi pesi wakachili kundawu eeyo Marta nkwaakamutambula. 31 MaJuda bakali aaMariya alubo bakali kumuumbulizya mung’anda, nibakamubona kalikunyampuka chakufwambaana akuzwa, bakamutobela nkaambo bakabonaanga uya kukabanda* kuti akalilile nkuko. 32 Mariya naakasika kundawu Jesu nkwaakabede, wakamubona mpawo wakawida kumawulu aakwe alubo wakati kulinguwe: “Mwaami kaansinga wakali kookuno, nikuli munyaandumaangu tafwide pe.” 33 Jesu naakabona Mariya amaJuda mbaakazidaabo kabalikulila, wakapengaana mumoyo alubo wakakataazikana loko. 34 Mpawo wakati: “Mwakamulazika kuli?” Bakati kulinguwe: “Mwaami, kuza uzoobone.” 35 Mpawo Jesu wakalila. 36 MaJuda nibakamubona kalila, bakati: “Amubone mbaakali kumuyanda!” 37 Pesi bamwi bakati: “Muntu ooyu wakajula meso aamoofu, walikunookachilwa na kupa kuti mwaalumi ooyu atafwi?”
38 Jesu wakapengaana lubo mumoyo mpawo wakasika kukabanda.* Kabanda* aako yakali mpako alubo yakajalidwe aabbwe. 39 Mpawo Jesu wakati: “Amugwisye bbwe.” Pesi Marta, muchizi wasikufwa wakati kulinguwe: “Mwaami, lino kweelede waabununka, nkaambo waba aamazuba aane.” 40 Mpawo Jesu wakamubuzya kuti: “Teendakubuzya na kuti, kuti wasyoma ulabona bulemu bwaLeza?” 41 Mpawo bakagwisya bbwe. Jesu wakalanga kujulu mpawo wakati: “Ndilakulumba Taata, nkaambo wandimvwa. 42 Nisimpe, ndilizi kuti ulandimvwa chiindi choonse pesi ndaamba oobo akaambo kankamu yabantu iindizyungulukide, kuchitila kuti basyome kuti wakandituma.” 43 Naakaamba majwi aaya, wakoompolola ajwi pati kati: “Lazaro, zwa oomo!” 44 Mpawo mwaalumi ooyo wakafwide wakazwa kalambilidwe malembo kumawulu akumaboko alubo wakavumbidwe mulembo kumeso. Mpawo Jesu wakati: “Amumulambunune mumuleke ayende.”
45 MaJuda biingi bakazide kuli Mariya alubo bakabona nzyaakachita Jesu, bakaba aalusyomo mulinguwe 46 pesi bamwi babo bakayinka kubaFarisi baakubabuzya nzyaakali wachita. 47 Nkinkaako, bapati babapayizi abaFarisi bakabungania bamuNkuta Mpati yamaJuda, mpawo bakati: “Tuchite biyeni, nkaambo mwaalumi ooyu ulikuchita zitondeezyo zyiingi? 48 Kuti twamulekela kalikuchita oobo, bantu boonse balaba aalusyomo mulinguwe, mpawo maRoma balasika kuzoobweza ndawu yesu* achisi chesu.” 49 Pesi umwi wabo uutegwa Kkayafasi, ooyo wakali mupayizi mupati mumunyaka ooyo, wakababuzya kuti: “Taakwe nchimuzi pe, 50 ani tamukubwene na kuti zigwasya ndinywe kuti muntu uumwi afwide bantu, kwiinda kuti chisi choonse chinyonyoonwe?” 51 Nikuba oobo, taakaamba zintu eezi akaambo kakuti wakaliyeeyela biya pe, pesi akaambo kakuti wakali mupayizi mupati mumunyaka ooyo, wakapolofita kuti Jesu wakali kuzoofwida chisi, 52 kutali kufwida chisi kupela pesi kuti abeetaamwi bana baLeza bakamwayikide, kuti babe nkamu iimwi. 53 Kuzwa mubuzuba oobo, bakazwa aamuzeezo wakuti bamujaye.
54 Nkinkaako, Jesu taakachili kweenda aantanganana pe aakati kamaJuda, pesi wakazwa mundawu eeyo mpawo wakayinka kundawu iili aafwiifwi ankanda, mumuunzi uutegwa Efremu alubo wakaakukkala nkukooko abasikwiiya. 55 Aachiindi eecho, Pasika yamaJuda yakali yaba aafwiifwi, mpawo bantu biingi bamuliimwi myuunzi bakatanta kabaya kuJerusalema kayitanasaanguna Pasika, kuti bakalisalazye kweendelana amulawu. 56 Bantu aaba bakali kuyanduula Jesu alubo nibakayimvwi mutempele, bakali kwaambuula muli chabo-chabo kabati: “Muzibona biyeni? Mubonaanga takoosika na kupobwe?” 57 Pesi bapati babapayizi abaFarisi bakaambide kuti, kufumbwa muntu wakali kuzooziba nkwaakabede Jesu, wakeelede kubabuzya kuchitila kuti bamujate.*