Makani Aakalembwa aaJohane
18 Naakazwa kwaamba zintu eezi, Jesu wakazwa abasikwiiya bakwe mpawo bakazubuka Kkuti lyaKkidroni,* baya kubbazu kwakali muunda. We abasikwiiya bakwe bakanjila mumuunda ooyo. 2 Anguwe Judasi sikumuuzya wakaliizi ndawu eeyo, nkaambo Jesu nkwaakali kubonana aabasikwiiya bakwe ziindi zyiingi. 3 Judasi wakaza aankamu yamasoja abalindi babapati babapayizi ababaFarisi, kabali aamalambe azilwanisyo. 4 Mpawo Jesu kazi zintu zyoonse zyakali kuzoochitika kulinguwe, wakaza kunembo mpawo wakababuzya kuti: “Mulikuyanduulani?” 5 Bakati: “Jesu wakuNazareta.” Mpawo wakati kulimbabo: “Ndime.” Aachiindi eecho, Judasi sikumuuzya wakayimvwi aamwi ambabo.
6 Nikuba oobo, Jesu naakababuzya kuti, “Ndime,” bakabweeda musule mpawo bakawidaansi. 7 Nkinkaako, wakababuzya lubo kuti: “Mulikuyanduulani?” Bakati: “Jesu wakuNazareta.” 8 Jesu wakati: “Ndamubuzya kale kuti ndime. Kuti kamulikuyanduula ndime, amubaleke baalumi aaba beende.” 9 Eezi zyakachitika, kuchitila kuti kuzuzikizigwe majwi ngaakaambide aakuti: “Kuli baabo mbwaakandipa, taakwe naaba uumwi wakasweeka pe.”
10 Mpawo Simoni Petro, ooyo wakali aapanga, wakalisomona mpawo wakwapula kutwi kwachilisyo kwamuzike wamupayizi mupati. Muzike ooyo wakali kutegwa Malikko. 11 Pesi Jesu wakabuzya Petro kuti: “Bweedezya panga munkomo yalyo. Tandeelede kwiinywa na nkomeki Taata njaandipa?”
12 Mpawo, masoja kabalaamwi amweendelezi wamasoja abalindi bamaJuda, bakajata Jesu mpawo bakamusunga. 13 Bakamutola kuli Anasi saansi, nkaambo wakali wisizyala aaKkayafasi, ooyo wakali mupayizi mupati mumunyaka ooyo. 14 Kkayafasi nguwe wakabuzizye maJuda kuti zyakali kuzoogwasya mbabo kuti muntu uumwi afwide bantu.
15 Simoni Petro awumwi sikwiiya, bakali kuyabutobela Jesu. Sikwiiya ooyo wakazibidwe aamupayizi mupati alubo wakanjilaamwi aJesu mulubuwa lwamuunzi wamupayizi mupati, 16 pesi Petro wakaliimvwi aanze kumulyango.* Nkinkaako, sikwiiya ooyo wakazibidwe aamupayizi mupati wakazwa, wakwaambuula aamulindi wamulyango mpawo wakanjizya Petro mukati. 17 Mpawo umwi musimbi mubelesi, wakali kulinda mulyango wakati kuli Petro: “Tawuli umwi wabasikwiiya bamuntu ooyu na?” Mpawo Petro wakati: “Peepe.” 18 Babelesi abalindi bakaliimvwi kabalikuyota mulilo ngubakali bakunka, nkaambo kwakali kutontola. Anguwe Petro wakayimvwaabo kalikuyota mulilo.
19 Nkinkaako, mupayizi mupati wakabuzya-buzya Jesu atala abasikwiiya bakwe, kuswaanizya azintu nzyaakali kuyiisya. 20 Mpawo Jesu wakati: “Ndakali kwaambuula kunyika aantanganana. Chiindi choonse, ndakali kuyiisya muchikombelo amutempele, nkubabunganina maJuda boonse alubo taakwe nchindakaamba kandilikusisa pe. 21 Nkinkaako, undibuzizyaanzi? Buzya aabo bakamvwa nzindakali kubabuzya. Bona! Mbabo bazi nzindakaamba.” 22 Jesu naakaamba majwi aaya, umwi mulindi wakayimvwi aafwiifwi anguwe, wakamuuma lubayi mpawo wakati: “Kujana wamusandula oobo na mupayizi mupati?” 23 Mpawo Jesu wakati kulinguwe: “Kuti ndaamba zitali kabotu, amba nzindabisya,* pesi kuti ndaamba zili nzizyo, unduuminaanzi?” 24 Mpawo Anasi wakamutola kumupayizi mupati Kkayafasi, kasungidwe.
25 Simoni Petro wakaliimvwi mpawaawo kalikuyota mulilo, mpawo bakati kulinguwe: “Iwe tawuli umwi wabasikwiiya bakwe na?” Mpawo wakakazya kati: “Tandili umwi wabo pe.” 26 Mpawo umwi wabazike bamupayizi mupati, wakali bbululu wamwaalumi wakakwapulwa kutwi aPetro, wakati kulinguwe: “Teenduwe na ngundabona kulaamwi anguwe mumuunda?” 27 Nikuba oobo, Petro wakakazya lubo, alubo aachiindi nchicheecho, mukombwe wakakokolika.
28 Mpawo bakazwa aaJesu kuli Kkayafasi bamutola kung’anda yamweendelezi. Aachiindi eechi, kwakali kwaba kuseeni. Pesi teebakanjila pe mumuunzi wamweendelezi, nkaambo zyakali kuyoopa kuti batasalali nkaambo bakali kuyanda kulya Pasika. 29 Pilato wakazwa aanze, waya nkubakabede mpawo wakati: “Muntu ooyu wakabisyaanzi?” 30 Mpawo bakamusandula kuti: “Kaansinga muntu ooyu teesikubisya,* teetwali kunoomweeta pe kulinduwe.” 31 Pilato wakababuzya kuti: “Amumubweze mukamubeteke kweendelana amulawu wanu.” Mpawo maJuda bakati kulinguwe: “Mulawu tawutuzumizyi pe kujaya muntu.” 32 Eezi zyakachitika kuchitila kuti kuzuzikizigwe jwi Jesu ndyaakaamba lyakali kutondeezya mbaakali kuzoofwa.
33 Nkinkaako, Pilato wakanjila lubo mung’anda yabweendelezi, mpawo wakayita Jesu wamubuzya kuti: “Uli Mwaami wamaJuda na?” 34 Mpawo Jesu wakati: “Nzulikubuzya eezi waliyeeyela biya na, naakuti kuli bamwi bantu bakubuzya atala andime?” 35 Pilato wakati: “Tandili muJuda pe me. Bantu bakulindinywe abapati babapayizi mbabo bakweeta kulindime. Wakachitaanzi?” 36 Jesu wakati: “Bwaami bwangu teebwanyika eeyi pe. Kaansinga Bwaami bwangu mbwanyika eeyi, batobeli bangu balikunoondilwanina kuti nditatolwi kumaJuda. Pesi lino Bwaami bwangu teebwanyika eeyi pe.” 37 Pilato wakati kulinguwe: “Ani mpo ulimwaami na?” Jesu wakati: “Iwe nduwe nulikwaamba kuti ndili mwaami. Nzindakazyalilwa alubo zyakapa kuti ndize aanyika nzyakuti, ndipe bukamboni atala akasimpe. Muntu woonse uuli kubbazu lyakasimpe, ulaliswiilila jwi lyangu.” 38 Pilato wakati kulinguwe: “Kasimpe niinzi?”
Naakaamba oobo, wakazwa lubo aanze waya kumaJuda mpawo wakababuzya kuti: “Taakwe mulandu ngundajana pe mulinguwe. 39 Mukuyungizya, inywe muli aachiyanza chakuti ndeelede kumwaangunwida muntu muchiindi chaPasika. Muyanda kuti ndimwaangunwide Mwaami wamaJuda na?” 40 Bakoompolola lubo kabati: “Tatuyandi ooyu pe, tuyanda Bbarabbasi.” Bbarabbasi wakali chigwebenga.