Lwabili kuBakkorinte
3 Tusaangune lubo na kulilumbayizya kulindinywe? Tweelede kuza kulindinywe amagwalo aatulumbayizya na mbuli mbubachita bamwi naakuti ndinywe mweelede kutupa magwalo? 2 Inywe muli lugwalo lwesu lwakalembwa mumyoyo yesu luzibinkene alubo lulikubalwa abantu boonse. 3 Nkaambo mubonwa kuti muli lugwalo lwaKkristu lwakalembwa aandiswe tubabelesi, teelwakalembwa aa-inki pe, pesi amuuya waLeza uupona, talulembedwe aamabwe aachoonzyo aapapalete pe, pesi aamabwe aanyama aapapalete, mumyoyo.
4 Eechi nchiichoonzyo nchitulaacho kuli Leza kwiinda muli Kkristu. 5 Tatulikwaamba kuti iswe tuleelela buzwide kuchita mulimu ooyu, pesi kweelela kwesu buzwide kuzwa kuli Leza, 6 ooyo wakapa kuti choonzyo tweelele buzwide kuba babelesi bachizuminano chipya chamuuya kutali chamulawu uulembedwe, nkaambo mulawu uulembedwe weeta lufu, pesi muuya upa buumi.
7 Kuti kakuli kuti mulawu ooyo weeta lufu alubo wakalembedwe aamabwe wakasika aabulemu buli boobo, zyakuti bana ba-Israyeli bakakachilwa kulanga kumeso kwaMozesi akaambo kabulemu bwakali kumeso kwakwe, nkukwaamba bulemu bwakali kuzoogwisigwa, 8 ani mpo kupegwa kwamuuya kulakachilwa biyeni kuba aabulemu bupati loko? 9 Nkaambo kuti kakuli kuti mulawu uupa bantu mulandu wakali aabulemu, nkukwaamba kuti, mulimu weeta bululami wakali kuzooba aabulemu bupati loko! 10 Kwaamba choonzyo, nichiba eecho chakali aabulemu chakagwisigwa bulemu akaambo kabulemu buchiinda. 11 Nkaambo kuti kakuli kuti eecho chakali kuzoogwisigwa chakasika aabulemu, nkukwaamba kuti, eecho chakali kuzookkalilila chakali kuzooba aabulemu bupati loko!
12 Mbukunga tuli aabulangilizi buli boobu, tuli aalwaangunuko lupati loko lwakwaambuula. 13 Tutachiti mbuli mbaakachita Mozesi chiindi naakali kulivumba kumeso amulembo, kuti bana ba-Israyeli batalangisisyi mamanino aacheecho chakali kuzoogwisigwa. 14 Nikuba oobo, mizeezo yabo yakatindibala. Nkaambo kusikila sunu, mulembo ooyo tawunagwisigwa pe chiindi nikubalwa chizuminano chachiindi, nkaambo ugwisigwa biyo kwiinda muli Kkristu. 15 Kwaamba choonzyo, kusikila sunu kufumbwa chiindi Mozesi nabalwa, mulembo ooyo nga uliivumbide myoyo yabo. 16 Pesi kuti muntu wasandukila kuli Jehova,* mulembo ooyo ulagwisigwa. 17 Jehova* Muuya, alubo ooko kuli muuya waJehova* kuli lwaangunuko. 18 Toonse nitutavumbidwe mulembo kumeso nitutondeezya bulemu bwaJehova* mbuli magilazi, tulikuchinchwa kuti tube muchikozyano chakwe, kuzwa kuli bumwi bulemu kuya kuli bumwi busumpukide, mbuli mbachita Jehova,* Muuya.*