Lwabili kuBakkorinte
5 Nkaambo tulizi kuti ng’anda yesu yaanyika, tente eeli kuti lyamwayigwa, Leza uzootupa ng’anda iitamani kujulu iitayakidwe aamaboko aabantu pe. 2 Nkaambo kwaamba choonzyo, tulamimila mung’anda eeyi, katuli aachiyandisyo chipati chakuzwaata ng’anda yesu iizwa kujulu,* 3 kuchitila kuti, kuti twayizwaata, tutajaniki katutazweete pe. 4 Kwaamba choonzyo, iswe nituli mutente eeli tulikumimila akulemenwa nkaambo tatuyandi pe kuzwaatununa tente eeli, pesi tuyanda kuzwaata eeliya, kuchitila kuti eecho chifwa chimenwe aabuumi. 5 Ooyo wakatubambila chintu eechi nguLeza, ooyo wakatupa muuya mbuli chijatisyo chazintu zilikuza.*
6 Nkinkaako, taakwe nchitunooyoowa pe alubo tulizi kuti twanooli aamuunzi wesu mumubili, tatunoolaamwi pe aMwaami, 7 nkaambo tulikweenda aalusyomo kutali aazintu nzitubona. 8 Pesi taakwe nchituyoowa pe alubo tusala kutaba mumubili, kuchitila kuti muunzi wesu ubaamwi aMwaami. 9 Nkinkaako, kufumbwa kuti tulaamwi anguwe naakuti tatulaamwi anguwe, makanze eesu ngakuti tutambulike kulinguwe. 10 Nkaambo toonse tweelede kuyooyimikila* kunembo lyachuuno chakubetekela chaKkristu, kuchitila kuti umwi awumwi akapegwe zimweelede kweendelana azintu nzyaakachita naakachili mumubili, kufumbwa kuti nzibotu naakuti nzibi.
11 Nkinkaako, mbukunga tulizi kuti kuyoowa Mwaami kwaambaanzi, tulikwiinkilila kunembo kukombelezya bantu, pesi Leza utuzi kabotu. Nikuba oobo, ndisyoma kuti niiba myoyo yanu ituzi kabotu. 12 Tatuli kulilumbayizya lubo pe kulindinywe pesi tulikumupa kaambo kakuti mulidunde akaambo kandiswe, kuchitila kuti mukonzye kusandula aabo balidunda akaambo kanzila njibabonekaayo aanze, kutali mbubabede mumoyo. 13 Nkaambo kuti kakuli kuti twakalipengede, twakaba oobo akaambo kaLeza, pesi kuti katunambene mumizeezo, zigwasya ndinywe. 14 Nkaambo luyando Kkristu ndwalaalo lulatusungwaazya, nkaambo twabona kuti, muntu uumwi wakafwida bantu boonse, nkinkaako boonse bakalifwide. 15 Alubo wakafwida bantu boonse, kuchitila kuti aabo bapona batachiliponeni pe, pesi baponene ooyo wakabafwida alubo wakabusigwa.
16 Nkinkaako, kuzwa lino taakwe muntu ngutuzi kweendelana amaboneno aabantu banyama. Nikuba kuti chiindi, Kkristu twakamuzi kweendelana amaboneno aabantu banyama,* pesi lino tatuchimuzi munzila eeyo pe. 17 Nkinkaako, kuti muntu kajisini aaKkristu, nchilenge chipya. Zintu zyachiindi zyayinda, lino bona, zintu zipya zyaba. 18 Pesi zintu zyoonse zizwa kuli Leza, ooyo wakapa kuti tumvwanane lubo anguwe kwiinda muli Kkristu akutupa mulimu wakugwasya bantu kuti bamvwanane lubo anguwe, 19 nkukwaamba mulimu wakwaambilizya kuti Leza wakali kupa kuti nyika imvwanane lubo anguwe kwiinda muli Kkristu, katachibabalili milandu yabo pe alubo wakatupa mulimu wakuti bantu bamvwanane lubo anguwe.
20 Nkinkaako, tuli bayiminini bayiminina Kkristu alubo zili mbuli kuti Leza ulikukombelezya bantu kabelesya ndiswe. Mbuli bayiminini baKkristu, tukombelezya bantu katuti: “Amumvwanane lubo aLeza.” 21 Ooyo wakatazi chibi, wakapa kuti abe chibi* akaambo kandiswe, kuchitila kuti tube bululami bwaLeza kwiinda mulinguwe.