Lwabili kuBakkorinte

6 Mbukunga tubelekaamwi anguwe, tumusungwaazya kuti mutatambuli luzyalo lupati lwaLeza mpawo mukachilwe kubona makanze aandulo. 2 Nkaambo waamba kuti: “Muchiindi chakutambulwa ndakakumvwa, alubo mubuzuba bwalufutuko ndakakugwasya.” Lino amubone! Eechi nchichiindi chakutambulwa. Amubone! Oobuno mbuzuba bwalufutuko.

3 Tatuchiti chintu nichiba chimwi chilebya bamwi, kuchitila kuti mulimu wesu utajaninwi mulandu, 4 pesi muzintu zyoonse, tutondeezya kuti tuli babelesi baLeza, kwiinda mukulisimya muzintu zyiingi, mumapenzi, muziindi zyakubula, mubuyumu-yumu, 5 mukuumwa, mukusungwa, mulupyopyongano, mukubeleka changuzu, mukutoona mansiku, muziindi zyakubula chakulya. 6 Tutondeezya kuti tuli babelesi baLeza kwiinda mukusalala, mukuba aaluzibo, mukuba aamoyo mulamfu, mukuba aaluzyalo, mukuba aamuuya uusalala, mukuba aaluyando lutali lwakuupa-wupa, 7 mukwaambuula makani aachoonzyo, mumanguzu aaLeza, mukuba aazilwanisyo zyabululami mukuboko kwachilisyo* akwachimweensi,* 8 mukulemekwa amukutalemekwa, mumakani mabotu amumakani mabi. Bantu batubona mbuli kuti tulibasilweeno kakuli twaamba kasimpe, 9 mbuli kuti tatuzibinkene pe kakuli tulizibinkene, mbuli kuti tulikufwa* pesi amubone tulibawumi, mbuli kuti tulikusubulwa* pesi tatuli kutolwa kukujayigwa, 10 mbuli bantu bawuside pesi tukkala katubotelwa, mbuli bantu bafwaba pesi tulikunotya bantu biingi, mbuli bantu batakwe nchibalaacho kakuli tuli aazintu zyoonse.

11 Twakajula milomo yesu kuti twaambuule aandinywe* nibantu bakuKkorinte alubo twakawujula loko moyo wesu. 12 Iswe tulamuyanda amoyo woonse, pesi inywe tamutuyandi amoyo woonse pe. 13 Nkinkaako, ndilikwaambuula aandinywe mbuli kuti muli bana bangu, andinywe amwiijule loko myoyo yanu.

14 Mutasungwi mujokwe limwi abantu batasyomi. Nkaambo bululami bunjililanaali akutatobela mulawu? Naakuti, mumuni unjililanaali amudima? 15 Mukuyungizya, Kkristu aBbeliyali banjililanaali?* Naakuti musyomi* amuntu uutasyomi bamvwanana mulikali? 16 Tempele lyaLeza linjililanaali azibumbwa? Nkaambo tuli tempele lyaLeza uupona, mbuli mbaakaamba Leza kuti: “Ndizookkala aakati kabo, akweenda aakati kabo, ndizooba Leza wabo mpawo ambabo bazooba bantu bangu.” 17 “‘Nkinkaako, amuzwe aakati kabo alubo mutaliswaanizyi pe ambabo,’ mbaamba Jehova* ‘alubo mutagumi chintu chitasalali pe,’” “‘alubo ndizoomutambula.’” 18 “‘Alubo ndizooba wuso, mpawo inywe muzooba bana bangu balombe abasimbi,’ mbaamba Jehova* Singuzuzyoonse.”