Lwabili kuBakkorinte
2 Nkaambo ndachincha mizeezo yangu, kuti nditazi kulindinywe kanduuside pe. 2 Nkaambo kuti ndapa kuti muuse, ngwani uutape kuti ndibotelwe, kunze kwayooyo ngundakapa kuti awuse? 3 Ndakalemba zintu eezi, kuchitila kuti nindaza kulindinywe nditawusi akaambo kabantu beelede kupa kuti ndikondwe, nkaambo ndili aachoonzyo chakuti zintu zipa kuti ndikondwe, nzizyo zipa kuti andinywe moonse mukondwe. 4 Akaambo kamapenzi miingi akuchisa kwamoyo, ndakamulembela lugwalo amisozi myiingi, kutali kuti ndipe kuti muuse pe, pesi kuti muzibe mbululi lupati luyando lwangu kulindinywe.
5 Kuti kakuli muntu wapa kuti kube kuusa, taawusisya ndime andilikke pe, pesi wapa kuti andinywe muuse—tandiyandi kuti munyeme pe akaambo kanzindaamba. 6 Kukalalilwa nkwaakachitwa aabiingi banu muntu ooyo, kulikkwene, 7 pesi lino mweelede kumulekelela amoyo woonse alubo mumuumbulizye, kuchitila kuti atazundwi aakuusa kwiindilide. 8 Nkinkaako, ndimusungwaazya kuti mumutondeezye kuti mulamuyanda. 9 Nkaambo chimwi chakapa kuti ndimulembele lugwalo nchakuti, ndakali kuyanda kubona kuti mulaswiilila na muzintu zyoonse. 10 Kuti mwalekelela muntu kufumbwa chintu nchaakachita, andime ndilamulekelela. Kwaamba choonzyo, kufumbwa nchindalekelela (kuti kakuli chintu nchindakalekelela), ndakazichita akaambo kandinywe kunembo lyaKkristu, 11 kuchitila kuti tutazundwi* aaSaatani nkaambo nzila zyakwe tulizizi.*
12 Nindakasika kuTrowa kuti ndaambilizye makani mabotu aali atala aKkristu, anindakajulikilwa mulyango muMwaami, 13 moyo* wangu wakakataazikana loko nkaambo mukombima Tito teendakamujana pe. Nkinkaako, ndakalaya mpawo ndakaya kuMakkedoniya.
14 Pesi alumbwe Leza, uutuzulwida chiindi choonse mbuli masoja aazwa kukuzunda kunkondo aamwi aKkristu, alubo kwiinda mulindiswe upa kuti bweema bununkilila bwaluzibo luli atala anguwe buzule ndawu yoonse. 15 Nkaambo kuli Leza, tuli bweema bununkilila bwaKkristu aakati kabaabo balikufutulwa alubo aakati kabaabo balikunyonyoonwa. 16 Kuli baabo balikunyonyoonwa, tuli mununko walufu uutola kulufu, pesi kuli baabo balikufutulwa, tuli bweema bwabuumi butola kubuumi. Ngwani weelela buzwide kuchita zintu eezi? 17 Ndiswe, nkaambo tatuli basikuuzya jwi* lyaLeza mbuli mbubachita bamwi bantu, pesi twaambuula aamoyo woonse mbuli bantu bakatumwa aaLeza, kunembo lyaLeza alubo katulaamwi aKkristu.