Lugwalo Luya kuBakkolose
1 Ndime Pawulu, mwaapostoli waKkristu Jesu kwiinda mukuyanda kwaLeza, aTimoti mukombima, 2 ndilikumulembela nibasalali anibakombima basyomeka bajisini aaJesu Kkristu bali kuKkolose:
Amube aaluzyalo lupati aluumuno kuzwa kuli Leza Taateesu.
3 Tukkala katumulumba Leza, Wisi waMwaami wesu Jesu Kkristu chiindi nitumukombela, 4 mbukunga twakamvwa atala alusyomo lwanu muli Kkristu Jesu aluyando ndumulaalo kubasalali boonse, 5 akaambo kabulangilizi mbumubambilidwe kujulu. Chiindi, mwakamvwa atala abulangilizi oobu, kwiinda mumulumbe wakasimpe kamakani mabotu 6 aayo aasika kulindinywe. Mbukunga makani mabotu alikuzyala michelo akuvula munyika yoonse, eezi nzizyo nzyaalikuchita aakati kanu kuzwa mubuzuba nimwakamvwa akuluziba kabotu luzyalo lupati lwaLeza mukasimpe. 7 Eezi nzizyo nzimwakayiya kumuzikema uuyandwa Epafra, mubelesi uusyomeka waKkristu wiiminina ndiswe. 8 Alubo wakatubuzya atala aluyando lwanu lwakumuuya.
9 Nzizyo zipa kuti, kuzwa mubuzuba nitwakamvwa atala azintu eezi, tutaleki pe kumukombela akukumbila kuti muzuzigwe luzibo lwachoonzyo luli atala akuyanda kwakwe mubusongo boonse amukumvwisisisya zintu zyamuuya, 10 kuchitila kuti mweende bweelede mbuli bantu bakomba Jehova,* mumubotezye munzila iizwide, nimwiinkilila kunembo kuzyala michelo mumilimu mibotu yoonse amukuyungizya luzibo lwachoonzyo atala aLeza, 11 amusimisigwe amanguzu woonse kweendelana amanguzu aakwe aagambya, kuchitila kuti mulisimye chakumaninina amoyo mulamfu akukondwa, 12 nimulumba Taata ooyo wakapa kuti mweelele kutola lubazu mulukono lwabasalali bali mumumuni.
13 Wakatuvuna kuzwa kubweendelezi bwamudima, mpawo wakatweeta kubwaami bwaMwanaakwe ngwayandisya, 14 ooyo ngutwakaangununwa kwiinda mulinguwe achinunuzyo, nkukwaamba kulekelelwa kwazibi zyesu. 15 Nchikozyano chaLeza uutaboneki, nguwe wakusaanguna kulengwa kuzintu zyoonse zyakalengwa, 16 nkaambo kwiinda mulinguwe zimwi zintu zyoonse zyakalengwa kujulu aanyika, zintu ziboneka azintu zitaboneki, kufumbwa kuti nzyuuno naakuti mbwaami naakuti nimfulumende naakuti mbweendelezi. Zimwi zintu zyoonse zyakalengwa kwiinda mulinguwe alubo zyakalengelwa nguwe. 17 Alubo wakabawo zimwi zintu zyoonse kazitanabawo, alubo kwiinda mulinguwe zimwi zintu zyoonse zyakabawo. 18 Alubo ngunguwe mutwe wamubili, nkukwaamba mbungano. Ngunguwe matalikilo, wakusaanguna kubusigwa kuzwa kubafu, kuchitila kuti abe wakusaanguna muzintu zyoonse, 19 nkaambo Leza wakabona kazili kabotu kuti kuzula koonse kukkale mulinguwe, 20 akuti kwiinda mulinguwe, ape kuti zimwi zintu zyoonse zimvwanane lubo anguwe kwiinda mukupa kuti kube luumuno akaambo kaganzi ndyaakatila aachisamu chakupenzezya,* kufumbwa kuti nzintu zili aanyika naakuti nzintu zili kujulu.
21 Kwaamba choonzyo, inywe nimwakaanzeene aaLeza alubo nimwakali basinkondonyina aali chimwi chiindi, akaambo kakuti mizeezo yanu yakali kuyeeya milimu mibi, 22 lino wapa kuti mumvwanane lubo anguwe kabelesya mubili wanyama wayooyo kwiinda mulufu lwakwe, kuchitila kuti amwiimikizye kunembo lyakwe kamusalala, kamutakwe bubi alubo kamutakwe mulandu— 23 kufumbwa kuti mwayinkilila kunembo mulusyomo, mwakkalilila aantalisyo, kamwiimvwi nji alubo kamutasunzuki kubulangilizi bwamakani mabotu ngimwakamvwa alubo aakakambawukwa kuzilenge zyoonse aansi aajulu. Ime ndiPawulu ndakaba mubelesi wamakani mabotu aaya.
24 Lino ndilikubotelwa mumapenzi aangu akaambo kandinywe alubo ndilikuswaana mapenzi aaKkristu aatanamaninina pe mumubili wangu akaambo kamubili wakwe, nkukwaamba mbungano. 25 Ndakaba mubelesi wambungano eeyi akaambo kamulimu wabulangizi ngundakapegwa aaLeza akaambo kandinywe, kuti ndikambawuke jwi lyaLeza munzila iizwide, 26 nkukwaamba nsiswa iisalala yakasisidwe kuzwa mubwiime bwazintu bwachiindi* amumazyalani aakayinda. Pesi lino yayubunwidwa basalali bakwe, 27 aabo Leza mbaakayanda kuzibya aakati kabantu bazisi, bunoti bugambya bwansiswa eeyi iisalala, iili nguKkristu uujisini aandinywe, nkukwaamba bulangilizi bwabulemu bwakwe. 28 Ngunguwe ngutulikwaambilizya, katulikuchenjezya bantu boonse akuyiisya bantu boonse mubusongo boonse, kuchitila kuti tukonzye kwiimikizya muntu woonse uujisini aaKkristu kakkwene kunembo lyaLeza. 29 Kwaamba choonzyo, asunu ndichibeleka changuzu kandilikulipeda amoyo woonse, kwiinda mumanguzu aakwe aalikubeleka mulindime.