Kuli Tito
2 Pesi iwe yinkilila kunembo kwaambuula zintu zyeendelana aanjiisyo iilikabotu.* 2 Baalumi bapati ababe bantu balinyona muzintu nzibachita, batawubaansyi zintu, bali aamizeezo iilikabotu, basimide mulusyomo, muluyando amukulisimya. 3 Munzila iikozyenie, banakazi bapati abapone munzila iisalala, batabejelezyi bamwi, batabi bazike bawayini nyingi, ababe bayiisi bazintu zibotu, 4 kuchitila kuti balaye* banakazi bachiniini kuti bayande balumi babo, bayande bana babo, 5 babe aamizeezo iilikabotu, basalale mukulijata, babeleke changuzu mumaanda aabo,* babe bantu babotu, balibombye kubalumi babo, kuchitila kuti bantu bataambuuli bubi atala ajwi lyaLeza.
6 Munzila iikozyenie, yinkilila kunembo kusungwaazya baalumi bachiniini kuti babe aamizeezo iilikabotu, 7 ulitondeezye kuti ulichikozyano mukuchita milimu mibotu muzintu zyoonse. Yiisya zintu zisalala,* kawutawubaansyi zintu, 8 kulikwaamba majwi aali kabotu* aatakonzyi kujaninwa kaambo kabi, kuchitila kuti aabo bakazya babe aabweeme, babule zintu zibi zyakwaamba atala andiswe. 9 Bazike abalibombye kuli basimalelaabo muzintu zyoonse, beezye kubabotezya kutali kubasandula bubi, 10 batababbidi pe, pesi abatondeezye kuti balasyomeka chakumaninina, kuchitila kuti munzila zyoonse, babotye njiisyo yaMufutuli wesu, Leza.
11 Nkaambo luzyalo lupati lwaLeza lwayubununwa, mpawo lwapa kuti bantu bamisyobo yoonse bafutulwe. 12 Lutuyiisya kuti tukake kutayoowa Leza azintu ziyandwa aanyika akuti tupone katuli aamizeezo iilikabotu, abululami, akulipeda kuli Leza mubwiime bwazintu oobuno,* 13 nituchilindide bulangilizi bubotu akuyubununwa kwabulemu kwaLeza mupati akwaMufutuli wesu Jesu Kkristu, 14 ooyo wakapa buumi bwakwe akaambo kandiswe kuti atwaangunune* kumisyobo yoonse yabubi akulisalazizya bantu bakwe bayandikana, basungwaalila milimu mibotu.
15 Yinkilila kunembo kwaambuula zintu eezi akusungwaazya akululamika kweendelana amanguzu woonse ngwaakapegwa. Kutabi muntu uukulangila aansi pe.