Mungelo waJehova Wakakwabilila Hezekkiya

BanaAsuri bakali kweendelezya misyobo iili kkumi yabwaami bwaIsrayeli. Nkinkaako, mwaami wabanaAsuri, Senakkeribbu, wakali kuyanda kubweza misyobo iibili yabwaami bwaJuda. Wakasaanguna kubweza imwi myuunzi yaJuda. Pesi wakali kuyanda kubweza muunzi waJerusalemu. Senakkeribbu taakazi pe kuti Jehova wakali kuukwabilila muunzi waJerusalemu.

Mwaami wamaJuda, Hezekkiya wakapa Senakkeribbu mali nyingi loko kachitila kuti Senakkeribbu atabwezi muunzi waJerusalemu. Nikuba kuti Senakkeribbu wakapegwa mali, pesi wakatuma basilumamba bakwe balaamanguzu kuti bakalwane muunzi waJerusalemu. Bantu bamuJerusalemu bakali kuyoowa, nkaambo basilumamba babanaAsuri bakali kuza buswena afwiifwi. Mpawo Hezekkiya wakababuzya kuti: ‘Mutayoowi pe. Nikuba kuti banaAsuri balaamanguzu, pesi Jehova uyoopa kuti tube amanguzu kwiinda mbabo.’

Senakkeribbu wakatuma mutumwa wakwe, Rabbisakke kuJerusalemu kuti akasampawule bantu bankuko. Rabbisakke wakiimikila aanze amuunzi alimwi wakoompolola kati: ‘Jehova takonzyi kumuvuna. Mutazumini kuti Hezekkiya amweene. Taakwe leza ukonzya kumuvuna mumaanza aangu.’

Hezekkiya wakakumbila Jehova kuti amugwasye. Jehova wakati: ‘Mutayoowi nkaambo kamajwi aambwa aRabbisakke. Muunzi waJerusalemu tukooyoowabwa mumaanza aSenakkeribbu.’ Kuzwa waawo, Hezekkiya wakapegwa magwalo akali kuzwa kuli Senakkeribbu. Magwalo aayo akali kwaamba kuti: ‘Ndipe muunzi ooyu ube wangu. Nkaambo Jehova takonzyi kumuvuna.’ Hezekkiya wakakomba kati: ‘Jehova kotuvuna, kuchitila kuti bantu boonse bazibe kuti nduwe awulikke Leza wakasimpe.’ Mpawo Jehova wakamubuzya kuti: ‘Mwaami wabanaAsuri takooyonjila mumuunzi waJerusalemu. Ndiyoowuvuna.’

Senakkeribbu wakali achoonzyo chakuti wakali kuyoowubweza muunzi waJerusalemu. Pesi mubusiku mbuboobo, Jehova wakatuma mungelo wakwe kuti ayinke kubusena kwakali basilumamba babanaAsuri. Mpawo mungelo wakajaya basilumamba bali 185 000! Basilumamba bamwaami Senakkeribbu bakasimide bakafwa. Nkinkaako, wakabweeda kumuunzi wakwe, nkaambo wakali wazundwa. Jehova wakakwabilila Hezekkiya amuunzi waJerusalemu, mbuli mbakaambide. Kaansinga wakaliwo kuJerusalemu muchiindi eecho, wakali kuyoosyoma Jehova na?