Jehova Wakakwabilila Jesu

Bantu bakali kukkala kujwe lyamaIsrayeli bakali kusyoma kuti nyenyeezi zilakonzya kutondeezya bantu nzila. Bumwi busiku, baalumi bazwa Kujwe bakabona nyenyeezi yakali kumwekesya kiiyabweenda kujulu mpawo bakiitobela. “Nyenyeezi” eeyo yakabasisya kuJerusalemu. Baalumi aaba bakali kuyabubuzya kuti: ‘Uli kuli mwana uzyedwe uyooba mwami wamaJuda? Twaza kuzoomukomba.’

Mwaami wakuJerusalemu Herodi naakamvwa atala amwaami mupya, wakakataazikana loko. Wakabuzya bapayizi kuti: ‘Nkuukuli nkwayoozyalilwa mwaami?’ Bakamubuzya kuti: ‘Basinsimi bakaamba kuti wakali kuyoozyalilwa muBbetelehemu.’ Herodi wakiita baalumi bakazwa kujwe akubabuzya kuti: ‘Kamuya kuBbetelehemu mukamuyanduule mwana. Mwaakumujana, muboole muzoondibuzye. Kuchitila kuti ambebo ndiinke nkamukombe.’ Pesi wakali kubeja.

“Nyenyeezi” yakasaanguna kweenda lubo. Baalumi aabo bakiitobela kusika kuBbetelehemu. “Nyenyeezi” yakayimikila atala ang’anda imwi alimwi baalumi aabo bakanjila mung’anda. Bakajana Jesu kali abanyina Mariya. Bakamukotamina akumupa zipo ziswaanizya ngolida, tununkilizyo amura. Jehova nguwe wakatumide baalumi aaba na kuti bakayanduule Jesu? Peepe.

Busiku oobo, Jehova wakabuzya Josefa kwiinda muchiloto kuti: ‘Herodi uyanda kujaya Jesu. Tola mwana abanyina muchijile kuEgepita. Mukakkale nkuko kusikila ndizoomubuzye kuti mubweede.’ Chakufwambaana, Josefa ampuli yakwe bakiinka kuEgepita.

Jehova wakabuzya baalumi Bakujwe kuti batabweedi kuli Herodi. Herodi wakanyema naakabona kuti tabasiki. Naakakachilwa kujana Jesu, wakalayilila kuti bana boonse balombe bakali basela lyaJesu bajayigwe. Pesi Jesu taakajayigwa nkaambo wakali kuEgepita.

Mukuya kwachiindi, Herodi wakazoofwa. Jehova wakabuzya Josefa kuti: ‘Lino ulakonzya kubweeda.’ Josefa, Mariya aJesu bakabweeda kuIsrayeli alimwi bakaakukkala kuNazareta.