Jehova Wakamukkazikila Moyo Jona

Bantu bakuAsiriya bakali kukkala mumuunzi waNineve bakali kuchita zintu zibi. Jehova wakatuma musinsimi wakwe Jona kuti aye kuNineve kuchitila kuti akabachenjezye kuti baleke kuchita zintu zibi. Pesi Jona wakachija akwiinka kumbi. Wakanjila mubwaato bwakali kuya kuTarisi.

Bwaato nibwakali mulwizi, kwakaba guwo pati loko alimwi bantu bakali kweenzya bwaato bakayoowa. Bakakomba kuli baleza babo kabaamba kuti: ‘Nkamboonzi nitwachitikilwa zintu zili boobu?’ Kumamanino Jona wakababuzya kuti: ‘Ndime ndabisya. Ndachija kuti ndichite mulimu Jehova ngwaakandituma. Amundiwaalile mulwizi alimwi guwo lilamana.’ Basikweenzya bwaato teebakali kuyanda pe kuwaalila Jona mumaanzi, pesi wakabakombelezya kuti bachite oobo. Guwo lyakaleka nibakamuwaalila mumaanzi.

Jona wakali kubonaanga ulafwa. Naakali kuyabubbila mumaanzi wakakomba kuli Jehova. Mpawo Jehova wakatuma muswi mupati loko. Muswi ooyo wakamena Jona, pesi teewakamujaya pe. Kali mwida lyamuswi, Jona wakakomba kati: ‘Ndasyomezya kunookuswiilila chiindi choonse.’ Jehova wakapa kuti Jona apone kwamazuba atatu mwida lyamuswi alimwi wakapa kuti muswi ooyo ukabulule Jona anyika njumu.

Mbukunga Jehova wakafutula Jona, eezi zyaamba kuti Jona wakeelede kuleka na kwiinka kuNineve? Peepe. Jehova wakamutuma lubo kuti ayinke kuNineve. Chiindi eechi Jona wakaswiilila. Wakayinka kumuunzi ooyo akubuzya bantu bakali kuchita zintu zibi kuti: ‘Kwayinda mazuba aali 40 muunzi waNineve uzoonyonyoonwa.’ Pesi kwakachitika chintu nchaakatali kuyeeyela pe, nkaambo bantu bakuNineve bakaswiilila alimwi bakasiya nzila zyabo zibi. Mwaami wakuNineve wakabuzya bantu kuti: ‘Amukombe Leza, musanduke. Amwi ulaleka kutunyonyoona.’ Jehova naakabona kuti bantu basanduka, taakawunyonyoona pe muunzi waNineve.

Jona wakanyema loko naakabona kuti muunzi wakaleka kunyonyoonwa. Yeeya atala azeezi: Jehova wakali kumukkazikila moyo Jona alimwi wakamutondeezya luse, pesi Jona taakali kuyanda kubatondeezya luse bantu bakuNineve. Kanyemede, Jona wakakkala aanze amuunzi munsi amunsamu wabbonobono. Pesi munsamu ooyo wakayuma mpawo Jona wakanyema. Mpawo Jehova wakabuzya Jona kuti: ‘Nkamboonzi nufwida nsoni munsamu ooyu kutali kuti ufwide nsoni bantu bamuNineve? Pesi ime ndabafwida nsoni alimwi bafutuka.’ Zyakali kwaambaanzi eezi? Zyakali kwaamba kuti bantu bakuNineve bakali kuyandikana loko kwiinda munsamu.