Chiteyo Chiyaka

Musa wakakkala kuMidiyani kwaminyaka iili 40. Wakakwata nkuko akuba abana. Limwi zuba kali kweembela mbelele afwiifwi akuChilundu chaSinayi, wakabona chintu chigambya. Wakabona chiteyo chamumvwa kachili kuyaka, pesi kachitapyi pe! Chiindi Musa nakaswena afwiifwi, wakamvwa jwi lyakali kuzwa muchiteyo kaliti: ‘Musa! Utasweni afwiifwi pe. Gwisya nsangu zyako, nkaambo wiimvwi abusena busalalisya.’ NguJehova wakali kwaambuula kabelesya mungelo.

Musa wakayoowa, mpawo wakalivumba kumeso. Jwi eelyo lyakati: ‘Ndilikubwene kupenzegwa kwamaIsrayeli. Ndiyoobagwisya munyika yaEgepita akubatola kunyika mbotu. Ndasala nduwe kuti ukagwisye bantu bangu kuEgepita.’ Ubonaanga Musa taakayoowa na?

Musa wakabuzya kuti: ‘Ndiyootyeni bantu bakundibuzya kuti ngwani wandituma?’ Leza wakamusandula kati: ‘Ukababuzye kuti Jehova, Leza waAbrahamu, Leza waIzaka aLeza waJakkobo nguwe wandituma.’ Mpawo Musa wakati: ‘Ani kuti bakakake kundiswiilila?’ Jehova wakatondeezya Musa chitondeezyo chakuti wakali kuyoogwasya Musa. Wakabuzya Musa kuti awaale nkoli yakwe aansi. Mpawo nkoli yakwe yakaba nzoka! Chiindi Musa naakajata muchila wanzoka, yakachincha akuba nkoli lubo. Mpawo Jehova wakati: ‘Wakuchita chitondeezyo eechi, bayooziba kuti ndime ndakutuma.’

Musa wakati: ‘Tandikonzyi pe kwaambuula kabotu.’ Pesi Jehova wakamusyomezya kuti: ‘Ndiyookubuzya nzweelede kwaamba alimwi ndiyoobuzya mwanike wako Aroni kuti akugwasye.’ Chiindi Musa naakaziba kuti Jehova wakali kuyoomugwasya, wakabweeda kuEgepita kali amukayintu wakwe abana bakwe.