Joshuwa AbanaGibbiyoni

Zimwi zisi zyakuKkenani zyakamvwa atala azyakachitika kumuunzi waJerikko. Maami azisi zyakuKkenani akayeeya kuti ajatane kuchitila kuti alwane maIsrayeli. Pesi banaGibbiyoni bakayeeya kuchita chimwi chintu chakasiyene azyakali kuyeeyegwa abaami aabo. Bakazwaata zigogo zizakede, mpawo bakiinka kuli Joshuwa akumubuzya kuti: ‘Tuzwa kuchisi chili kule loko. Twakamvwa atala azintu Jehova nzyaakamuchitila kuEgepita akuMowabbu. Amutangane chizuminano andiswe kuti tamukooyootujaya alimwi tuyooba babelesi banu.’

Joshuwa wakasyoma nzibakaamba alimwi taakabalwana pe. Pesi nikwakiinda mazuba atatu, wakamvwa kuti teebakali kukkala kule pe. Bakali kukkala munyika yaKkenani. Mpawo Joshuwa wakabuzya banaGibbiyoni kuti: ‘Nkamboonzi nimwakatweena?’ Mpawo bakati: ‘Twakali kuyoowa! Nkaambo twakamvwa kuti Jehova Leza wanu ulikumulwanina. Tukumbila kuti mutatujayi.’ Joshuwa wakazuzikizya chisyomezyo chakwe kwiinda mukutabajaya.

Nikwakiinda mazuba, baami bakuKkenani bali musanu abasilumamba babo, bakayanda kulwana banaGibbiyoni. Joshuwa abasilumamba bakwe bakeenda busiku boonse kuti bakavune banaGibbiyoni. Mpawo bakasaanguna kulwana mubuzuba bwakatobela kuseni loko. Bantu bakuKkenani bakachijila mumasena asiyene-siyene. Pesi kufumbwa nkubakachijila, Jehova wachita kuti bajayigwe achivulamabwe. Kuzwa waawo, Joshuwa wakakumbila Jehova kuti achite kuti zuba lyiimikile. Nkamboonzi Joshuwa naakakumbila Jehova kuti ayimikizye zuba nikuba kuti taakwe nizyakachitikide zili boobo? Nkaambo Joshuwa wakali kusyoma muli Jehova. Buzuba oobo, zuba teelyakabbila pe kusikila maIsrayeli nibakazunda baami bakuKkenani abasilumamba babo.