Ajanika Makani aKabbuku Kamuswaangano waBuumi Amulimu Wesu

June 5-11

LUBONO LUZWA MUJWI LYALEZA | JEREMIYA 51-52

“Zyoonse Nzyaamba Jehova Zilazuzikizigwa”

it-2 360 ¶2-3

MaMede

AmaPersiya bakazunda Bbabbiloni. Mumwaanda wamunyaka wachi 8 B.C.E., musinsimi Isaya wakaambilizya kuti Jehova wakali kuyoolwana Bbabbiloni kabelesya “ba-Medi . . . Aba tabayeeyi insiliva, tabayandi ingolida mata aabo ayoopwayaula bakubusi.” (Is 13:17-19; 21:2) Bbala lyakuti, “ba-Medi” mulugwalo oolu, lilaswaanizya amaPersiya mbuli basikulemba zyachiindi maGirikki bakabelesya bbala eeli kwaamba maMede amaPersiya. Kutayanda nsiliva angolida kwakali kutondeezya kuti bakali kubikkila maanu kukuzunda Bbabbiloni, kutali kuyanda chisinka-mulomo chakali kukonzya kupa kuti batazuzikizyi makanze aabo. Chiindi chiingi, maMede amaPersiya bakali kubelesya twaanta munkondo. Twaanta twakapangidwe azisamu ansimbi (kozyanisya aInt 18:34) bakatubelesya ‘kupwayawula bakubusi bakuBbabbiloni,’ alubo bakali kutunona kuchitila kuti katubbila nibayasa.​—Jer 51:11.

Chimwi chiindi, Jeremiya (51:11, 28) wakaamba kuti “bami ba-Medi” bakaliwo chiindi Bbabbiloni nilyakanyonyoonwa. Bbala lyakuti baami, litondeezya kuti bamwi baami bakali kugwasilizya maMedi bakachiliwo nikuba kuti Kkoresi nguwe wakali mwaami mupati alimwi eezi teezyakajayilikene pe. (Kozyanisya aJer 25:25.) Alubo, chiindi Bbabbiloni nilyakazundwa abasilumamba bamaMedi, maPersiya, maElamu abamwi bakali afwiifwi, pesi Dariyo muMedi nguwe ‘wakatola bwami bwachisi chabaKkasidi,’ nkaambo nguwe wakabikkidwe aKkoresi mwaami wakuPersiya.​—Dan 5:31; 9:1; langa lubo DARIUS No. 1.

it-2 459 ¶4

Nabonidus

Malembe aamba atala abusiku Bbabbiloni nilyakazundwa ati: “Basilumamba baKkoresi bakanjila muBbabbiloni kabatalwanide pe.” Makani aaya atondeezya kuti bakali kuyoonjila kabatalwanide alubo ayendelana abusinsimi bwaJeremiya bwaamba kuti, ‘basilumamba baBbabbiloni bakali kuyooleka kulwana.’​—Jer 51:30.

it-1 237 ¶1

Bbabbiloni

Mpuwo yaBbabbiloni yakamana mumunyaka wa539 B.C.E., nilyakazundwa. Bantu bakuBbabbiloni bakalwana aMwaami wakuPersiya, Dariyo I (Hystaspis), pesi bakazundwa nibakalwana kachibili. Bamwi bakasyeede mumuunzi ooyu bakalwana aXerxes I, pesi bakazundwa. Alexander Mupati wakali kuyanda kuyaka muunzi wakwe mupati muBbabbiloni pesi wakafwa katanawuyaka mu323 B.C.E. Nicator wakazunda muunzi ooyu mu312 B.C.E., mpawo wakatola zintu zyakali kuBbabbiloni kunkomwe yakuTuro kuti zikabelesegwe kuyaka muunzi wakwe mupati mupya kuSeleucia. Nikuba boobo, imwi myuunzi yamaJuda yakaliwo chiindi chamaKristu akusaanguna alubo eezi zyakapa kuti mwaapostolo Petro aswaye kuBbabbiloni mbuli mbukulembedwe mulugwalo lwakwe. (1Pet 5:13) Malembe akajanika kuBbabbiloni atondeezya kuti tempele lyaBbel lyakali kuBbabbiloni, lyakaliwo kusikila kuma75 C.E. Pesi mumwaanda wamunyaka wane C.E., muunzi ooyu wakali waba tongo kawutachikkalwi abantu. Bbabbiloni lyakaba ‘chitantaala chamabwe’ biyo.​—Jer 51:37.

Kuyanduula Lubono muJwi lyaLeza

it-2 444 ¶9

Chilundu

Chiiminina mfulumende. MuBbayibbele, zilundu ziiminina bwaami naa mfulumende zyeendelezya. (Dan 2:35, 44, 45; kozyanisya aIs 41:15; Ciy 17:9-11, 18.) Bbabbiloni lyaambwa kuti ‘nchilundu chinyonyoona’ nkaambo lyakali kuzunda zimwi zisi. (Jer 51:24, 25) Ntembawuzyo yaambuula atala amilimu yaJehova kubantu bayandisya zyakulwana yaamba kuti “uli abulemu kwiinda zilundu ziteeli.” (Int 76:4) “Zilundu ziteeli” zilakonzya kwiiminina mfulumende zili amanguzu. (Kozyanisya aNah 2:11-13.) Davida wakati atala aJehova: “Wakandiimikizya acilundu ciyumu,” kaamba kuti Jehova wakapa kuti bwaami bwaDavida busime. (Int 30:7; kozyanisya a2Sam 5:12.) Kukozyanisigwa kwazilundu abwaami bweendelezya kulakonzya kutugwasya kumvwisisisya zyaambwa alugwalo lwaCiyubunuzyo 8:8 lwaamba kuti kwakaboneka “cintu cili mbuli cilundu cipati ciyaka mulilo.” Kukozyanisya achilundu chiyaka kutondeezya kuti bwaami oobu bwakali kunyonyoona mbuli mulilo.

it-2 882 ¶3

Lwizi

Basilumamba bali mbuli lwizi lweenda. Jeremiya wakakozyanisya musabilo wabasilumamba bakalwana aBbabbiloni mbuli “kuvuuma kwalwizi.” (Jer 50:42) Naakati ‘lwizi’ lwakali kuyoolwana amuunzi waBbabbiloni, wakali kwaamba kuvula kwabasilumamba bamaMede amaPersiya bakali anguzu.​—Jer 51:42; kozyanisya aDan 9:26.

JUNE 12-18

LUBONO LUZWA MUJWI LYALEZA | MALILO 1-5

“Kulindila Kutugwasya Kuti Tulisimye”

w12 6/1 14 ¶3-4

“Yebo . . . Uyakooka Kutegwa Undigwasye”

Nikuba kuti Jeremiya waakali mubuumba, pesi wakaba abulangizi. Wakakwiila kuli Jehova kati: “Masimpe yebo [Jehova] uyooyeeya, eelyo uyakooka kutegwa undigwasye.” (Vesi 20, NW) Jeremiya taakali kuzumbuuzya pe. Wakalizi kuti Jehova taakali kuyoomuluba, nikuba kuluba bantu bakwe bakali kuyootondeezya kweempwa. Niinzi chakali kuyoochitwa aLeza Singuzuzyoonse?​—Ciyubunuzyo 15:3.

Jeremiya wakali achoonzyo kuti Jehova “uyakooka” kubantu bakali kuyootondeezya kweempwa amoyo woonse. Bumwi busanduluzi bwaamba kuti: “Kondiyeeya, akukotama kuti undigwasye.” Majwi aaya atondeezya kuba aluse. Jehova “Mupatikampatila atala anyika yoonse,” uyookotama kuti agwasilizye bantu bakwe bamukomba bali muzyiimo ziyumu akuti babotelwe lubo. (Intembauzyo 83:18) Bulangizi oobu bwakasimya Jeremiya wakakataazikene. Musinsimi ooyu uusyomeka wakalilibambilide kulindila chiindi Jehova naakali kuyoovuna bantu bakwe bakali kuyootondeezya kweempwa.​—Vesi 21.

w11 9/15 8 ¶8

Jehova Nchaabilo Changu

⁸ Musyobo wamaLevi wakeelede kubona kuti Jehova nchaabilo chawo. Pesi muLevi umwi awumwi wakabelesya majwi atii “Jehova ncecaabilo cangu,” kutondeezya kuti bakalilipedelede kuli Leza amoyo woonse akuti bakali kumusyoma. (Malo. 3:24) Umwi wamaLevi aayo, wakali mwiimbi asikwaanza nyimbo. Tulakonzya kumwaamba kuti nguAsafu, nkaambo wakali waluzubo lwamung’anda yaAsafu, muLevi wakali kuzulwida basikwiimba muchiindi chamwaami Davida. (1 Mak. 6:31-43) Muli Intembauzyo 73, tubala kuti Asafu (naa umwi waluzubo lwakwe) wakali kataazikene kapati. Wakalombozya bantu bakali kuchita zibi, bakali kupona buumi buli kabotu alimwi eezi zyakapa kuti aambe kuti: “Ma! Candigwasyanzi kusalazya moyo wangu? Ndasanzisyanzi maanza aangu atakwe kaambo?” Maboneno aatali kabotu akapa kuti atabotelwi amulimu ngwaakali kuchita alubo zyakapa kuti ataboni kuti Jehova nchaabilo chakwe. Wakalikataazikene ‘mane lumwi naakanjila muchikombelo chaLeza.’—Int. 73:2, 3, 12, 13, 17.

w07 6/1 11 ¶4-5

Makani Aazwa Mubbuku lyaMalilo

3:21-26, 28-33. Kujana twalisimya biyeni nikuba katuli mumapenzi mapati? Jeremiya ulabutuzya. Tatweelede kuluba kuti Jehova ulaaluse lwiingi. Alubo, tweelede kuyeeya kuti kuba bawumi kutupa kuti tukkale katuli abulangizi alimwi tweelede kulindila, katutatongooki kuti Jehova uyootuvuna. Kuyungizya waawo, tweelede ‘kubikka mulomo wesu aansi,’ chaamba kuti tweelede kwaatambula masunko ngituswaana nkaambo, kuli kaambo Leza nchalekela kuti twaaswane.

3:27. Bachikula balakonzya kuswaana buyumu-yumu akusekwa. Pesi “ncibotu kuti muntu ayumune ijoko mubwanike bwakwe.” Nkamboonzi? Nkaambo kulisimya chiindi chabukubusi kugwasya kuti muntu akonzye kuzunda mapenzi ngaswaana nayabukomena.

Kuyanduula Lubono muJwi lyaLeza

w07 6/1 9 ¶4

Makani Aazwa Mubbuku lyaMalilo

2:17—Ngaali majwi Jehova ngaakazuzikizya atala aJerusalemu? Makani aaya ayendelena amajwi alembedwe mulugwalo lwaLevitiko 26:17, lwaamba kuti: “Njomulanga cankayikayi, nkabela muyoozundwa kulibasinkondonyokwe. Basikumusula mbebayoomweendelezya, nkabela muyoocija nekuba kuti taakwe uumutanda.”

w07 6/1 11 ¶1

Makani Aazwa Mubbuku lyaMalilo

5:7—Jehova ubeteka bantu kweendelana akubisya kwamawisi na? Peepe, Jehova tasubuli bantu akaambo kakubisya kwamawisi. Nkaambo Bbayibbele lyaamba kuti: “Toonse buyo tuleelede kulyaambilila makani esu kubusyu bwaLeza.” (Rom 14:12) Nikuba boobo, mpindu zyeetwa akaambo kakubisya kwamawisi zilakonzya kwiindilila mumazyalani atobela. Muchikozyano, kukomba mituni nkubakali kuchita maIsrayeli kwakapa kuti kubayumine maIsrayeli bakali kusyomeka kuti bachite zintu zili kabotu.​—Kulonga 20:5.

JUNE 19-25

LUBONO LUZWA MUJWI LYALEZA | EZEKIELE 1–5

“Ezekkiyele Wakali Achiyandisyo Chakwaambilizya Mulumbe waLeza”

w08 7/15 8 ¶6-7

Kuzunda Buyumu-yumu Bwakukambawuka Kung’anda Ang’anda

⁶ Bbuku lyaEzekkiyele lyaamba chimwi chintu chikonzya kutugwasya kuti tukambawuke katutayoowi pe. Muchilengaano, Jehova wakapa Ezekkiyele bbuku lyamajwi aakwe lyakalembedwe koonse-koonse ‘majwi aakulila amajwi aakoomoka amajwi aakuusa’ akumubuzya kuti alye. Mpawo Jehova wakayungizya kuti: “O mwana amuntu, Lisya ida lyako eli ibbuku ndindakupa, uzuzye mala aako ndilyo.” Eezi zyakali kwaambaanzi? Ezekkiyele wakeelede kumvwisisisya mulumbe ngwakeelede kukambawuka. Mulumbe ooyu wakeelede kuba mulinguwe, akunjila mumoyo wakwe. Musinsimi wakiinkilila kunembo kati: “Mpawo ndakalya, nkabela mukanwa lyangu lyakalwela lwee mbuli buci.” Kwaambilizya mulumbe waLeza aantanganana kwakali kunona mbuli buchi kuli Ezekkiyele. Wakalimvwa kayandikana kwiiminina Jehova akuzuzikizya mukuli ngwakapedwe aLeza, nikuba kuti eezi zyakali kwaamba kukambawukila bantu bakatali kuswiilila pe.​—Bala Ezekiele 2:8–3:4, 7-9.

⁷ Chilengaano eechi chilakonzya kugwasya babelesi baLeza mazubaano. Andiswe tuli amulayizyo ngutweelede kubuzya bantu batawutambuli pe chimwi chiindi. Kuti twiinkilile kunembo kubona mulimu wakukambawuka mbuli chilongezyo chizwa kuli Leza, tweelede kulya zyakulya zitugwasya mubukombi kusikila tukkutile. Kubala katutamvwisisisyi naa katutakwe pulogilamu njitutobela, takukonzyi kutugwasya kuti tumvwisisisye Jwi lyaLeza munzila iizwide. Niinzi nchukonzya kuchita kuti uyungizye nzila njubalaayo chiindi nubala Bbayibbele anuchita chiiyo chako chaBbayibbele awulikke? Niinzi nchukonzya kuchita kuti ube achiindi chiingi chakuyeeyesesya nzubala?​—Int. 1:2, 3.

it-1 1214

Mala

Chakulya nchitulya chinjila mumala. Makani aaya naakali kwaambwa, akali kwiimikilila kunjila kwachakulya chabukombi mumizeezo yesu, chiindi Ezekkiyele naakabuzigwa muchilengaano kuti alye bbuku lyakali amajwi aLeza akuzuzya mala (Heb., me·ʽimʹ) aakwe. Ezekkiyele wakali kuyoojana manguzu mubukombi kwiinda mukuyeeyesesya akuchita kuti majwi akalembedwe mubbuku akkale mumizeezo yakwe. Nkinkaako, wakakkutila azintu zyabukombi alimwi wakabuzigwa nzyakeelede kwaambuula.—Ezk 3:1-6; kozyanisya aCiy 10:8-10.

w07 7/1 12 ¶3

Makani Aazwa Mubbuku lyaEzekiele—I

2:9–3:3—Nkamboonzi bbuku lyakupeta lyakali aamajwi aakulila amajwi aakoomoka nilyakali kunona mbuli buchi kuli Ezekkiyele? Chakapa kuti bbuku lyakupeta linone kuli Ezekkiyele nchakuti wakali amaboneno aali kabotu atala amulimu ngwakapedwe. Ezekkiyele wakali kubotelwa kubeleka kali musinsimi waJehova.

Kuyanduula Lubono muJwi lyaLeza

w07 7/1 11 ¶6

Makani Aazwa Mubbuku lyaEzekiele—I

1:4-28—Nkalaki yiimininaanzi? Nkalaki yiiminina chipaanzi chambunga yaJehova iili kujulu chilaabangelo basyomeka. Ibelesya muuya uusalala uuzwa kuli Jehova. Sikwiitanta nguJehova alimwi ulaabulemu bupati. Fulichoongo utondeezya kubatama kwakwe.

w07 7/1 12 ¶4

Makani Aazwa Mubbuku lyaEzekiele—I

4:1-17—Ezekkiyele wakachichita na chitondeezyo chakusinkilizigwa kwaJerusalemu kwakali kuyoochitika? Kukumbila nkwaakachita Ezekkiyele kuti achinche zyakujisya akuzumizigwa nkwaakachitwa aJehova, kutondeezya kuti wakachichita chitondeezyo. Koona abbazu lyachimwesi kwakali kwiminina minyaka ili 390 yakubisya kwamisyobo iili kkumi yabwaami kuzwa mu997 B.C.E. kusikila mu607 B.C.E., Jerusalemu nilyakanyonyonwa. Koona abbazu lyachilisyo kwakali kwiiminina minyaka ili 40 maJuda ngibakabisya, yakasaangunina mu647 B.C.E., Jeremiya nakabikkwa kuba musinsimi kuzoosika mu607 B.C.E. Kwaminyaka iili 430 Ezekkiyele wakapona achakulya chiche amaanzi, kutondeezya kuti kwakali kuyooba nzala chiindi muunzi waJerusalemu nwakali kuyosinkilizigwa.

JUNE 26–JULY 2

LUBONO LUZWA MUJWI LYALEZA | EZEKIELE 6-10

“Uyoobikkwa Chitondeezyo Chakufutulwa Na?”

w16.06 16-17

Mibuzyo Yabasikubala

Muchilengaano chaEzekkiyele, ngwani wakali kwiiminina mwaalumi wakajisi nkomo yazilembyo yamulembi abaalumi bali 6 bakajisi zilwanisyo zyakunyonyoona?

▪ Bayiminina bangelo bakujulu bakaswanikizigwa mukunyonyoona Jerusalemu abayakutola lubazu mukunyonyoona nyika mbi yaSaatani, lyaAmagedoni. Nkamboonzi kuchincha kumwvisisisya makani aaya nchikuyandikana?

Kawutanasika munyaka wa607 B.C.E., Jehova wakatondeezya Ezekkiyele chilengaano chakali kutondeezya zyakali kuyoochitika muJerusalemu, kawutananyonyoonwa muunzi ooyu. Muchilengaano eecho, Ezekkiyele wakabona baalumi bali 6 bakali azilwanisyo zyakunyonyoona zikali. Alubo, wakabona umwi mwaalumi “wakasamide masani aatuba” ‘kajisi zyakulembya.’ (Ezk. 8:6-12; 9:2, 3) Mwaalumi ooyu wakabuzigwa kuti “inda akati kamuunzi, . . . ukalembe citondeezyo ankumu zyabantu boonse balila akutongela nkaambo kazisesemyo zyoonse zicitwa mukati kawo.” Mpawo baalumi bakali azilwanisyo bakabuzigwa kuti bajaye bantu boonse bakali mumuunzi bakatalikwe chitondeezyo. (Ezk. 9:4-7) Chilengaano eechi chituyisyaanzi alimwi ngwani mwaalumi wakajisi nkomo yazilembyo yamulembi?

Ezekkiyele wakabona chilengaano eechi mu612 B.C.E. alimwi kuzuzikizigwa kwakusaanguna kwabusinsimi oobu kwakali kuyoochitika muminyaka iili 5 yakali kunembo, chiindi Jerusalemu nilyakali kuyoonyonyonwa abasilumamba bakuBbabbiloni. Nikuba kuti bantu Bbabbiloni teebakali kukomba Leza wakasimpe, bakabelesegwa kulunyonyoko oolu pesi bakazumizidwe aJehova. (Jer. 25:9, 15-18) Eezi zyakachitika nkaambo Jehova wakababelesya kusubula bantu bakwe bakali bamupapila. Pesi kunyonyoona ooku tekwakeelede kuchitwa kakutabikkilwi maanu. Baluleme teebakeelede kunyonyoonwa amwi abataluleme. Jehova wakachita nzila zyakufutula maJuda bakatazumina nzila zibi zyakali kuchitika mumuunzi ooyu.

Muchilengaano eechi, Ezekkiyele lwakwe, taakwe naakatola lubazu mukubikka chitondeezyo ankumu zyabantu naa kukunyonyoona muunzi. Pesi, bangelo mbabo bakasololela mukunyonyoona muunzi waJerusalemu. Nkinkaako, kwiinda mubusinsimi oobu tujana chilongezyo chakuziba zichitika kujulu. Jehova wakaambila bangelo bakwe kuti batasololeli mukunyonyoona basizibi biyo, pesi akubona kuti baluleme bafutulwa.

Chiindi, twakali kupandulula kuzuzikizigwa kwabusinsimi oobu kuti, mwaalumi wakajisi nkomo yazilembyo yamulembi wakali kwiiminina bananike bachipona anyika. Alimwi twakali kwaamba kuti bantu baswiilila chiindi nibakambawukilwa, babikkwa chitondeezyo chalufutuko. Pesi lino, zyakaba antangalala kuti twakeelede kuchincha mbutubupandulula businsimi oobu. Kweendelana alugwalo lwaMatayo 25:31-33, Jesu nguwe uubeteka bantu. Uyoochita oobu lyamapenzi mapati. Kuchiindi eecho, bayoobetekwa mbuli mbelele bayoofutuka, pesi bayoobetekwa mbuli mpongo bayoonyonyoonwa.

Aboobo, kweendelana akumvwisisya ooku kupya, twiyaanzi kuchilengaano chaEzekkiyele? Nzeezi ziiyo zili musanu:

(1) Muunzi waJerusalemu kawutananyonyoonwa, Ezekkiyele aJeremiya bakachenjezya bantu kujatikizya chakali kuyoochitikila muunzi ooyu, mbuli mbaakachita Isaya, alubo boonse bakali balindi. Mazubaano, Jehova ubelesya kakamu kabananike kuti kabayiisya babelesi bakwe akuchenjezya bantu kaatanatalika mapenzi mapati. Alubo babelesi baLeza boonse, nkukuti, babelesi baKristu bamung’anda yakwe, balatola lubazu mumulimu ooyu wakuchenjezya bantu.​—Mt. 24:45-47.

(2) Ezekkiyele taakwe naakabikka chitondeezyo ankumu zyabantu bakali kuyoofutuka, abalo babelesi baLeza mazubaano tabachiti oobo. Mulimu wabo ngwakukambawukila buyo bantu kwiinda mukuzulwidwa abangelo.​—Ciy. 14:6.

(3) Muchiindi chaEzekkiyele, bantu taakwe nibakali azitondeezyo ankumu zyabo. Mbukubede nikuba mazubaano. Bantu beelede kuchitaanzi kuti babe azitondeezyo zyakufutuka lyamapenzi mapati? Beelede kwaatambula makani mabotu aliikukambawukwa, kuba abuntu buyandikana kumaKristu, kulipeda kuli Jehova akubelekela antoomwe abananike kwiinda mukukambawuka makani mabotu. (Mt. 25:35-40) Bantu bachita zintu eezi bayoobikkwa chitondeezyo kuti bafutuke lyamapenzi mapati.

(4) Mwaalumi uujisi chilembyo wiiminina Jesu alimwi nguwe uyoobikka chitondeezyo chakuti bantu bafutuke. Bankamu mpati bayoobikkwa chitondeezyo chiindi nibayoobetekwa kuti nimbelele, lyamapenzi mapati. Eezi ziyoopa kuti bakapone aanyika kukabe kutamani.​—Mt. 25:34, 46.

(5) Mazubaano, baalumi bali 6 bali azilwanisyo zyakunyonyoona bayiminina makamu aabangelo alimwi bazulwidwa aJesu. Lino-lino, bayoonyonyoona bantu boonse akugwisya bubi boonse.​—Ezk. 9:2, 6, 7; Ciy. 19:11-21.

Kumvwisisisya makani aaya kutupa kuba alusyomo lwakuti Jehova takooyoonyonyoona baluleme antoomwe abasizibi. (2 Pet. 2:9; 3:9) Alubo, kutugwasya kubona kuti mulimu wakukambawuka uyandikana loko mazubaano. Muntu woonse weelede kuchenjezegwa mamanino kaatanasika!​—Mt. 24:14.

Kuyanduula Lubono muJwi lyaLeza

w09 9/15 23 ¶10

Lwiiyo Luzwa Kuli Leza Ndubotu Loko

¹⁰ Jehova nguwe ukonzya kutugwasya kuti tulibambile lyajuunza nkaambo nguuzi kuti litwetelaanzi. Nguwe ubamba kuti lyajunza lili biyeni. (Is. 46:9, 10) Businsimi buli muBbayibbele butondeezya kuti “buzuba bupati bwa-Jehova buli kufwaafwi.” (Zef. 1:14) Mubuzuba oobo, majwi ajanika muli Tusimpi 11:4 ayoozuzikizigwa aakuti: “Imbono tazigwasyi mubuzuba bwabukali, pele bululami bulavuna kulufu.” Chiindi bukali bwaJehova nibuyoosika kuzoonyonyoona nyika yaSaatani, chiyandikana, mbweenzinyina aJehova. Mali tikooyoogwasizya pe. Lugwalo lwaEzekiele 7:19 lwaamba kuti: “Bayoosowa insiliva yabo mumigwagwa, ayalo ingolida yabo iyooba mbuli cintu cisofweede.” Kuziba makani aaya kakuchili chiindi, kutugwasya kuti tusale kabotu lino.

w11 4/15 26 ¶14

Ulikuuzumizya Na Muuya waLeza Kuti Ukweendelezye?

¹⁴ Kubaa lusyomo chaamba kubaachoonzyo chakuti Jehova mpali. Ikuti Leza teetwamubona kuti ngwachoonzyo, tulakonzya kutayoowa kuchita chibi. Atubone zyakachitika kubabelesi baLeza chiindi. Jehova wakabuzya musinsimi Ezekkiyele kuti zintu zisesemya zyakali kuchitwa chakusisikizya chiindi naakati: “O mwana amuntu, sa wabona bapati baluzubo lwa-Israyeli mbubacita mumudima, umwi aumwi mung’anda yazifwanikisyo? Balaamba kuti, Jehova tatuboni pe, Jehova walekelezya nyika.” (Ezk. 8:12) Mwabona na kuti niinzi chimwi chakali kupa kuti kube penzi lili boobu? Nkaambo teebakali kusyoma pe kuti Jehova wakali kuzibona nzibakali kuchita. Jehova teebakamubona kuti ngwachoonzyo pe.