Nga Ulachita Biyeni Kuti Ube Mweenzinyina WaLeza?

1, 2. Mbaani bamwi bakali beenzinyina baJehova?

NGWANI nguyanda kuti abe mweenzinyokwe? Muntu nguyanda. Muntu ngumumvwanana. Muntu ulaabuntu abube mbuyanda.

² Jehova Leza usala bamwi bantu kuti babe beenzinyina. Muchikozyano, Abrahamu wakali umwi wabeenzinyina baJehova. (Isaya 41:8; Jakobo 2:23) Alubo Jehova wakali kumuyanda Davida. Jehova wakaamba kuti Davida “mwaalumi wakumoyo wangu.” (Incito 13:22) Alimwi musinsimi Daniele wakali muntu “uuyandwa loko” aJehova.​—Daniele 9:23.

3. Nkaamboonzi Abrahamu, Davida, aDaniele nibakali beenzinyina baJehova?

³ Munzila iili Abrahamu, Davida, aDaniele mbubakaba beenzinyina baJehova? Jehova wakati kuli Abrahamu: “Nkaambo kakuti waswiilila ijwi lyangu.” (Matalikilo 22:18) Jehova uba mweenzinyina kuli babo bamuswiilila chakulibatamika. Nichiba chisi chabantu chilakonzya kubaa bweenzinyina aJehova. Jehova wakaambila chisi chabaIsrayeli kuti: “Amuswiilile ijwi lyangu, lino njooba Leza wanu, anywebo muyooba bantu bangu.” (Jeremiya 7:23) Anduwe weelede kuswiilila Jehova ikuti kuyanda kuba mweenzinyina.

JEHOVA UKWABILILA BEENZINYINA

4, 5. Jehova utukwabilila biyeni?

⁴ IBbayibbele lyaamba kuti Jehova uyanduula nzila “kuti aliyumye kukugwasya abo balulama mumoyo kumeso aakwe.” (2 Makani 16:9) Mubbuku lyaIntembauzyo 32:8, Jehova usyomezya beenzinyina kuti: “Njookulaya akukutondezya nzila njoelede kutola. Njookweenzya kukubika liso lyangu alinduwe.”

⁵ Sinkondoma ulaanguzu uyanda kuti atulesye kuba beenzinyina baLeza. Pesi Jehova uyanda kutukwabilila. (Bala Intembauzyo 55:22.) Mbutuli beenzinyina baJehova, tulamubelekela amyoyo yesu yoonse. Tulasyomeka kuli nguwe nikuba chiindi nituli mubuyumu-yumu. Alimwi tulaa choonzyo mbubonya mbuli sintembauzyo nchaakalacho. Wakalemba kuti atala aJehova: “Uli kululyo lwangu kuti entazunganizigwa.” (Intembauzyo 16:8; 63:8) Muunzilaanzi Saatani mweezya kutulesya kuba beenzinyina baLeza?

KUTAMIKIZYA KWASAATANI

6. Niinzi Saatani nchakaamba atala abantu?

⁶ Muchaandano 11 twakiiya kuti Saatani wakabukila Jehova akumutamikizya kuti wakali mubeji alimwi akuti talulamisyi pe, kwiinda mukutazumizya Adamu aEva kuti balisalile abalikke chibotu achibi. Ibbuku lyaBbayibbele lyaJobu lituyiisya kuti Saatani wakatamikizya bantu bayanda kuba beenzinyina baLeza. Saatani wakaamba kuti bantu babelekela Leza akaambo kazintu nzibajana kuli Nguwe, kutali akaambo kakuti balamuyanda. Alimwi Saatani wakaamba kuti ulakonzya kuchincha kufumbwa muntu kuti abukile Leza. Kwalino atubone nchitukonzya kwiiya kuzwa kuli Jobu akuti Jehova wakamukwabilila biyeni.

7, 8. (a) Jehova wakalimvwa biyeni atala aJobu? (b) Saatani wakaambaanzi atala aJobu?

⁷ Jobu wakali ni? Wakali mwaalumi uuli kabotu wakapona mukati kaminyaka iili 3 600 yakiinda. Jehova wakamba kuti muchiindi eecho, taakwe muntu wakali mbuli nguwe pe aanyika. Jobu wakali kumulemeka loko Leza, alimwi wakali kubusulayika bubi. (Jobu 1:8) Nisimpe, Jobu wakali mweenzinyina waLeza.

⁸ Saatani wakaamba kuti Jobu wakali kubelekela Leza akaambo kazintu nzyaakalaazyo. Saatani wakati kuli Jehova: “Teewakamuyakilide kabotu, walo abang’anda bakwe azyoonse nzyajisi? Wakamukupusya mumulimo wakwe, alimwi matanga aakwe avula munyika. Pele, kuti kotambika janza lyalulyo akuguma ncajisi uzookusinga kubusyu bwako.”​—Jobu 1:10, 11.

9. Jehova wakamuzumizyaanzi Saatani?

⁹ Saatani wakatamikizya Jobu kuti wakali kukomba Jehova akaambo kazintu nzyakali kujana. Alimwi wakaamba kuti wakali kukonzya kulesya Jobu kutegwa abelekele Jehova. Jehova taakazuminana aSaatani, pesi wakamuzumizya kuti asunke Jobu kutegwa kuboneke kuti wakali mweenzinyina alubo wakali kumuyanda Jehova.

SAATANI MBWAKASUNKA JOBU

10. Saatani wakamusunka biyeni Jobu, alimwi Jobu wakachita biyeni?

¹⁰ Chakusaanguna, Saatani wakanyonyoona zivuubwa zyaJobu zyoonse. Kuzwaawo Saatani wakajeya babelesi baJobu biingi. Kumane Jobu wakasweekelwa zintu zyoonse. Kukusunka kwamamanino, Saatani wakajeya bana baJobu bali kkumi aguwo naa kuti kambizi. Pesi Jobu wakakkala kasyomekede kuli Jehova. “Mulizyoonse ezi Jobu takwaakabija, takwaakakolomena Leza.”​—Jobu 1:12-19, 22.

11. (a) Niinzi chimbi Saatani nchaakachitila Jobu? (b) Jobu wakachita biyeni?

¹¹ Tachiteyi mulenga, Saatani wakakazya Leza kwiinda mukuti: “Pele kuti kotambika janza lyako akuguma nyama azifuwa zyakwe uzookusinga kubusyu bwako.” Aboobo Saatani wakapa kuti Jobu achiswe bulwazi buchisa loko. (Jobu 2:5, 7) Nikuba boobo, Jobu wakalisyomekede kuli Jehova. Wakaamba kuti: “Kusikila ndikafwe, tandikaleki kusyomeka pe!”​—Jobu 27:5, NW.

12. Jobu wakatondeezya biyeni kuti Saatani mubeji?

¹² Taakwe nchaakazi Jobu atala akufubaazya kwaSaatani naa chakapede kuti kali mumapenzi. Wakayeeyela kuti Jehova ngunguwe wakamupa mapenzi. (Jobu 6:4; 16:11-14) Nikuba boobo, Jobu wakakkala kasyomekede kuli Jehova. Chakutayeeyela, Jobu teensi wakali kukomba akaambo kazintu nzyakali kujana, pesi wakali mweenzinyina waLeza. Ooku kwakali kutamizya luzutu!

13. Nimpinduunzi njaakajana Jobu akaambo kakusyomeka?

¹³ Nikuba kuti Jobu taakwe nzyaakazi zyakali kuchitika kujulu, wakakkala kasyomekede kuli Leza alimwi wakatondeezya kuti Saatani mubi. Jehova wakamulongezya akaambo kabweenzinyina bwachoonzyo.​—Jobu 42:12-17.

NZILA SAATANI NJAKUTAMIKIZYAAYO

14, 15. Nkutamikizyaanzi Saatani nkwaalako kubaalumi abanakazi boonse?

¹⁴ Ulakonzya kwiiya ziiyo zyiingi zigwasya kuli zeezyo zyakachitikila Jobu. Mazuba aano, Saatani ututamikizya kuti tubelekela Jehova akaambo kazintu nzitujana kuli Jehova. Mulugwalo lwaJobu 2:4, Saatani wakaamba kuti: “Muntu uyakupa zyoonse kuti akabe abuumi bwakwe mwini.” Aboobo, Saatani wakatamikizya baalumi abanakazi boonse akaambo kazintu ziingi, kuteensi Jobu alikke. Nikwakiinda minyaka iili myaanda kuzwa Jobu naakafwa, Saatani wakachili kutukila Jehova alimwi akutamikizya babelesi bakwe. Muchikozyano, mulugwalo lwaTusimpi 27:11, tubala kuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.”

¹⁵ Ulakonzya kusala kuswiilila Jehova akuba Mweenzinyina uusyomeka kutondeezya kuti Saatani mubeji. Nikuba kuti eezi zyaamba kuti weelede kuchincha buumi bwako, pesi nkokusala kuyandikana loko nkokonzya kuchita mubuumi! Aaka nkaambo kapati. Saatani waamba kuti tukonzyi pe kusyomeka kuli Leza chiindi nolaamapenzi. Uleezya kutweena kuti tutasyomeki kuli Leza. Uzichita biyeni?

16. (a) Ninzilaanzi Saatani nzyabelesya kutegwa alesye bantu kubelekela Jehova? (b) Diabolosi uchita biyeni kuti akulesye kubelekela Jehova?

¹⁶ Saatani ubelesya nzila zisiyene-siyene kuti atulesye kuba beenzinyina baLeza. Ujata “mbuli syuumbwa wabutambo akuya buyandaula ngwati lume.” (1 Petro 5:8) Utagambi pe chiindi beenzinyokwe, bamumpuli, nikuba bamwi nibeezya kukulesya kuti wiiye Bbayibbele alimwi akuchita zintu zili kabotu. Ulakonzya kubona nga balikukulwana.a (Johane 15:19, 20) Alubo Saatani mwini “ulalisandula mbuli angelo wamumuni.” Mukuchita oobo, ulakonzya kutweena kuti tutaswiilili Jehova. (2 BaKorinto 11:14) Imwi nzila Saatani njabelesya kutulesya kubelekela Jehova njakutupa kuyeeya kuti tatweeleli pe kubelekela Leza.​—Tusimpi 24:10.

SWIILILA MILAWU YAJEHOVA

17. Nkaamboonzi nitumuswiilila Jehova?

¹⁷ Chiindi nituswiilila Jehova, tutondeezya kuti Saatani mubeji. Niinzi chiyootugwasya kuba bantu baswiilila? Bbayibbele litii: “Uleelede kuyandisya Jehova Leza wako amoyo wako woonse, amuuya wako woonse, anguzu zyako zyoonse.” (Deuteronomo 6:5) Jehova tulamuswiilila akaambo kakuti tulamuyanda. Mbwanga luyando lwesu kuli Jehova luyabulakomena, tuyooyanda kuchita kufumbwa nzyatukumbila kuti tuchite. Mwaapostolo Johane wakalemba kuti: “Oku nkokuyanda Leza kuti twabamba milazyo yakwe, alimwi milazyo yakwe tiili miyumu.”​—1 Johane 5:3.

18, 19. (a) Nziizili zimwi zintu Jehova nzyati nzibi? (b) Tuzi biyeni kuti Jehova tatukumbili kuchita zintu nzitutakonzyi kuchita?

¹⁸ Nziizili zimwi zintu Jehova nzyatubuzya kuti nzibi? Kuli zimwi zikozyano zili mukabbokesi kakuti “Sulayika Zintu Jehova Nzyasulayika.” Kumatalikilo, ulakonzya kuyeeya kuti zimwi zyazintu eezi teezibi loko pe. Pesi chiindi nubala mavesi aamuBbayibbele akwaayeeyesesya, uyoomvwisisisya busongo bwakuswiilila milawu yaJehova. Alubo uyoobona kuti weelede kuchincha maponeno aako. Nikuba kuti chimwi chiindi kuchincha ooku kulakonzya kukuyumina, pesi kuti wachita oobo, uyoobaa luumuno akubotelwa kweetwa akaambo kakuba mweenzinyina waLeza uusyomekede. (Isaya 48:17, 18) Tuzi biyeni kuti kuchincha ooku kulakonzyeka?

¹⁹ Jehova tatukumbili kuti tuchite zintu nzitutakonzyi pe kuchita. (Deuteronomo 30:11-14) Mbuli mweenzuma wacoonzyo, utuzi kabotu kwiinda mbutulizi swebo. Ulizi mputukonzya ampututakonzyi. (Intembauzyo 103:14) Mwaapostolo Paulo utusungwaazya kuti: “Leza wasyomeka, ikuti takoozoozumina kuti mutepaulwe kwiinda inguzu zyakwe, pele antoomwe alutepauzyo ulacita cipolelo, kuti mukabe alukolelo.” (1 BaKorinto 10:13) Tulaachoonzyo chakuti Jehova ulatupa nguzu zyakuchita zintu zili kabotu. Ulakupa “inguzu zigambya” zikonzya kukugwasya kuti uliyumye muzyiimo zikataazya. (2 BaKorinto 4:7) Naakazwaa kubona lugwasyo lwaJehova muchiimo chili boobo, Paulo wakati: ‘Zintu zyoonse buyo, ndazikonzya nkaambo kanguzu nzipedwe kwiinda muli yooyo uundipa nguzu.’​—BaFilipi 4:13.

YIIYA KUYANDA ZINTU LEZA NZYAYANDA

20. Mbube buli mbuwelede kutobelezya, alimwi nkaamboonzi?

²⁰ Ikuti katuyanda kuti tube beenzinyina baJehova, tweelede kuleka kuchita zintu Jehova nzyaamba kuti nzibi, pesi tweelede kuchita zimwi ziindaawo. (BaRoma 12:9) Beenzinyina baLeza bachita nzyayanda. Balapandululwa mulugwalo lwaIntembauzyo 15:1-5. (Bala.) Beenzinyina baJehova batobelezya bube bwakwe alimwi batondeezya “luyandano, lukondo, luumuno, busichamba, buuya, bubotu, lusyomo, lubombo, kulyeendelela.”​—BaGalatiya 5:22, 23.

21. Kujana wayiiya biyeni kuti utondeezye bube Leza mbwayanda?

²¹ Nga ulayiiya biyeni kutondeezya bube bubotu oobo? Weelede kwiiya eezyo Jehova nzyayanda kwiinda mukwiiya akubala Bbayibbele chiindi choonse. (Isaya 30:20, 21) Mbuyabuchita oobo, luyando lwako kuli Jehova luyookomena, alimwi mboluyabukomena, uyooyanda kumuswiilila.

22. Nimpinduunzi njuyoojana kuti waswiilila Jehova?

²² Kuchincha nkuyanda kuchita mubuumi bwako, kulakonzya kukozyanisigwa akugwisya zisamo zyachiindi mpawo kuzwaata zipya. IBbayibbele lyaamba kuti weelede ‘kulisamunwida buntu bukulukulu’ alimwi ‘usame buntu bupya.’ (BaKolose 3:9, 10) Nikuba kuti chimwi chiindi tachili chuuba pe, aawo nituchincha maponeno eesu akuswiilila Jehova, utusyomezya kutupa “bulumbu bupati.” (Intembauzyo 19:11) Nichoonzyo, sala kuswiilila Jehova, alimwi utondeezye kuti Saatani mubeji. Belekela Jehova kutali akaambo kakuti ulangilila bulumbu, pesi akaambo kakuti uyanda kumubelekela kutali kuti uyanda zintu ziingi loko. Mpawo uyooba mwenzinyina waLeza!