Ndiilili Nikweelela Kuzwaata Ngwaani Naa Kwaanga Nduku Alimwi Nkamboonzi?

Ndiilili alimwi nkamboonzi nikweelela kuti mwanakazi muKristu azwate ngwaani naa aange nduku? Atulange-lange zyakalembwaa mwaapostolo Paulo kasololelwaa muuya uusalala atalaa kaambo aaka. Utupa busolozi buyandikana bukonzya kutugwasya kuti tusale munzila iili kabotu yeeta bulemu kuli Leza. (1 BaKorinto 11:3-16) Paulo wakaamba twaambo tutatu ntutweelede kubikkila maanu: (1) milimu iyanda kuti mwanakazi aange nduku, (2) bukkale mpayelede kuchita oobu, alimwi (3) chipa kuti achite oobu.

Milimu. Paulo wakaamba milimu iibili: kukomba akusinsima. (Vesi 4, 5) Masimpe, tulizi kuti nkombyo ninzila yakwaambulaa Jehova. Mazubaano, kusinsima kuswaanizya kufumbwa mulimu wakuyiisya Bbayibbele uchitwaa muKristu. Ino majwi aaPaulo atondeezya kuti mwanakazi weelede kuzwaata ngwaani naa kwaanga nduku, kufumbwa nali kukomba naa kali kuyiisya umwi muntu Bbayibbele na? Peepe. Mpakomba naa mpayiisya mpimpawo atape kuti azwaate ngwaani naa kuti atazwaati.

Bukkale. Majwi aaPaulo atondeezya zyiimo zibili: mumpuli amumbungano. Paulo wakaamba kuti: “Mutwe wamwanakazi ngumwaalumi, . . . mwanakazi uukomba nanka kusinsima atanoovumbidwe kumutwe ulaubausya mutwe wakwe.” (Vesi 3, 5) Mumpuli, Jehova upede mwaalumi mulimu wakuti abe mutwe wamwanakazi. Ikuti mwanakazi wachita milimu yeelede kuchitwaa mulumaakwe pesi katatondeezyi kulemeka busilutwe bwakwe, unooli ulikulangilaansi mukuli wamulumaakwe ngwapedwaa Jehova. Muchikozyano, ikuti kayiisya muntu Bbayibbele mulumaakwe kaliwo, ulakonzya kutondeezya kulemeka busilutwe bwamulumaakwe kwiinda mukuzwaata ngwaani naa kwaanga nduku. Weelede kuchita oobo nikuba kuti mulumaakwe uulibbabbatizidwe naa kuti tabbabbatizidwe, nkaambo ngumutwe wampuli.a Ikuti kayanda kukomba mwanaakwe mulombe uubbabbatizidwe kaliwo weelede kuzwaata ngwaani naa kwaanga nduku ikutali akaambo kakuti mwanaakwe ngusilutwe wampuli pesi akaambo kakuti Jehova upede baalumi babbabbatizidwe milimu yamumbungano.

Paulo wakaamba atalaa bukkale bwamumbungano, naakati: “Kuti kuli muntu uuyanda kukazya aya, ndaamba kuti tatujisi ciyanza cimbi, swebo niziba imbungano zya-Leza.” (Vesi 16) Mumbungano yachiKristu, baalumi babbabbatizidwe mbabo bapedwe busilutwe. (1 Timoteo 2:11-14; BaHebrayo 13:17) Baalumi mbabo luzutu basalwa kuba baalu naa babelesi babelekela kuti bachite mulimu wakulangania butanga bwaLeza. (Incito 20:28) Nikuba boobo, chimwi chiindi mwanakazi muKristu ulakonzya kuchita imwi milimu iichitwaa baalumi babbabbatizidwe. Muchikozyano, ulakonzya kusololela muswaangano wamulimu wakukambawuka ikuti kakutakwe mwaalumi uubbabbatizidwe. Alubo ulakonzya kuchitisya chiiyo chaBbayibbele, muntu wachaalumi ubbabbatizidwe kaliwo.b Akaambo kakuti milimu iili boobo, ilaswaanizigwa mumilimu yambungano yachiKristu, mwanakazi weelede kuzwaata ngwaani naa kwaanga nduku kutondeezya kuti ulikuchita mulimu weelede kuchitwaa muntu wachaalumi.

Kuli lumwi lubazu, kuli imwi milimu yabukombi kutayandikani kuti muchizi azwaate ngwaani naa kwaanga nduku. Muchikozyano, muchizi teelede kuzwaata ngwaani naa kwaanga nduku chiindi nali kutola lubazu kumiswaangano yachiKristu, nali kukambawuka ang’anda ang’anda amulumaakwe naa awumwi mwaalumi ubbabbatizidwe alimwi chiindi nali kwiiya naa kukomba abana bakwe batabbabbatizidwe. Chimwi chiindi muchizi ulakonzya kutamvwisisisya makani woonse kujatikizya kaambo aaka, nkinkaako weelede kuyanduulisisya.c Ikuti katakwe choonzyo, alimwi manjezeezya aakwe kamuzumizya, ulakonzya kuzwaata ngwaani naa kwaanga nduku mbuli mbukutondezedwe muchifanikisyo.

Zipa kuti achite oobo. Muvesi 10, muli twaambo tubili tupa kuti mwanakazi azwaate ngwaani naa aange nduku. “Mwanakazi uleelede kuba acitondezyo cakulibombya kumutwe wakwe nkaambo kabaangelo.” Chakusaanguna, yeeyesesya majwi aakuti, “citondezyo cakulibombya.” Kuzwaata ngwaani naa kwaanga nduku nchitondeezyo chakuti mwanakazi ulabulemeka bweelendezi Jehova mbwapede baalumi babbabbatizidwe mumbungano. Aboobo, muchizi unooli utondeezya kusyomeka akuyanda Jehova Leza.Kaambo kabili kajanika mumajwi aakuti, “nkaambo kabaangelo.” Kuzwaata ngwaani naa kwaanga nduku kwamwanakazi kubajatikizya biyeni bangelo?

Bangelo balabotelwa chiindi nibabona bweendelezi bwaJehova kabulemekwa mumbungano yakwe, kujulu amunyika. Balagwasigwaa chikozyano chabantu batamaninide mukaambo aaka. Kuyungizya waawo, bangelo abalabo beelede kulibikka aansi aabubambe bwabweendelezi bwaJehova, nkaambo kuli bamwi bangelo bakakachilwa kuswiilila chiindi. (Juda 6) Bangelo balazibona chiindi mwanakazi muKristu ulaaluzibo, uulamaanu kwiinda mwaalumi ubbabbatizidwe mumbungano kalibikka aansi aabweendelezi bwamulumaakwe. Chilakonzeka kuti mwanakazi ooyo nguumwi wamaKristu aananikidwaa muuya uusalala uutakeendelezye aKristu. Alubo, uyoobaa chuuno chilaa julu kwiinda chabangelo alimwi uyooyeendelezyaa Kristu kujulu. Eechi nchikozyano chili kabotu loko nchibabona bangelo mazubaano! Eechi nchoolwe chabachizi bachiKristu chakutondeezya bangelo biingi basyomeka kuti balaswiilila kwiinda mukusyomeka akulibombya kubweendelezi!