Aajanika Makani aaKabbuku Kamuswaangano waBuumi Amulimu Wesu
JUNE 3-9
LUBONO LUZWA MUJWI LYALEZA | BAGALATIYA 4-6
“Makani ‘Aali Mbuuli Chikozyano’ Ayimininaanzi?”
it-1 1018 ¶2
Hagari
Kweendelana azyakaambwa aamwaapostolo Pawulu, Hagari uuwambidwe mumakani aali mbuuli chikozyano, wakali kwiiminina maIsrayeli bakunyama bakali aansi aachizuminano chaMulawu chakapangwa kuChilundu chaSinayi. Chizuminano eecho chakapa kuti maIsrayeli babe “bana babuzike.” Akaambo kakuti maIsrayeli bakali aachibi, bakali kukachilwa kutobelezya chizuminano eechi. Chizuminano eechi chakapa kuti maIsrayeli bataangunuki alubo bakali kweelela kuti bafwe nkaambo bakali bazike. (Joh 8:34; Ro 8:1-3) Muunzi waJerusalemu wamuchiindi chaPawulu uleendelana aHagari nkaambo wiiminina maIsrayeli bakunyama bakali bazike abana babo. MaKristu bananikidwe aamuuya mbana ‘baJerusalemu wakujulu,’ wiiminina mukayintu waLeza wakukozyanisya. Jerusalemu wakujulu, uli mbuuli Sara mukayintu waangunukide nkaambo taakwe naakali muzike. Mbuuli Izaka wakapenzegwa aaIshmayeli, bana baJerusalemu wakujulu bakaangununwa aaJesu ambabo bakapenzegwa abana baJerusalemu bakali bazike. Nikuba boobo, kugwisigwa kwaHagari amwanaakwe mulombe kwiiminina Jehova mbaakakaka maIsrayeli bakunyama.—Ga 4:21-31; alubo langa Joh 8:31-40.
w14 10/15 10 ¶11
Amube Aalusyomo Lusimide muBwaami
Nikuba kuti chizuminano chaAbrahamu chakazuzikizigwa chiindi bana baAbrahamu nibakakona Nyika Yachisyomezyo, Magwalo atondeezya kuti chizuminano eecho chakali kuyoozuzikizigwa lubo muliimwi nzila. (Gal. 4:22-25) Mwaapostolo Pawulu naakazulwidwa atala akuzuzikizigwa kwachibili, wakaamba atala azipanzi zibili zyabana baAbrahamu. Chipanzi chakusaanguna, nguKristu alubo chabili, maKristu bananikidwe aamuuya bali 144 000. (Gal. 3:16, 29; Ciy. 5:9, 10; 14:1, 4) Mwanakazi uutumbuka bana aaba ngu ‘Jerusalemu wakujulu’ wiiminina mbunga yaJehova yakujulu yazilenge zyamuuya zisyomeka. (Gal. 4:26, 31) Mbuuli mbukwakasyomezedwe muchizuminano chaAbrahamu, bana bamukayintu bayoopa kuti bantu bakajane zilongezyo.
Kuyanduula Lubono muJwi lyaLeza
w09 4/1 13
Mwalizi Na?
Nkamboonzi Jesu naakayita Jehova kuti “Abba, Taata” chiindi naakali kukomba?
Bbala lyachiAramu lyakuti ʼab·baʼʹ lilakonzya kwaamba kuti “Ndeende” naakuti “Inche kaka, Ndeende.” Kwaziindi zitatu nilyakabelesegwa bbala eeli muMagwalo, lyakali kubelesegwa kukukomba alubo lyakali kubelesegwa kwaamba Taata wakuJulu Jehova. Nkamboonzi Jesu naakabelesya bbala eeli?
Bbuku litegwa The International Standard Bible Encyclopedia lyakati: “Mumulaka wakali kwaambuula muchiindi chakapona Jesu, bbala lyakuti ʼabbāʼ lyakali kubelesegwa loko abantu bakali kumvwanana alubo lyakali kubelesegwa aabana kuti batondeezye kuti balabayanda akuti balabalemeka mawisi.” Bbala eeli lyakali kubelesegwa kumuntu nguyandisya loko alubo lilaakati aamabala aakusaanguna mwana ngaakali kuyiisigwa. Jesu wakabelesya bbala eeli chiindi naakali kwaambuula aaWisi. Kakusyeede ma-awa mache biyo kuti afwe, Jesu wakabelesya majwi aakuti “Abba, Taata” chiindi naakali kukomba kuli Jehova mumuunda waGesemane.—Marko 14:36.
Bbuku lyaambwa aajulu lyakayungizya kuti: “[Bbala lyakuti] ʼAbbāʼ mumabbuku aamaJuda bakapona muchiindi chamaGrikki amaRoma teelyakabelesegwa loko pe kukwiita Leza nkaambo bakali kubonaanga talitondeezyi kumulemeka.” Nikuba boobo, chiindi “Jesu naakabelesya bbala eeli naakali kukomba, wakali kutondeezya kuti wakali kumvwanana loko aLeza.” Bbala lyakuti “Abba” lilajanika muMagwalo aabili aakalembwa aamwaapostolo Pawulu, eezi zitondeezya kuti maKristu bakapona mumwaanda wamunyaka wakusaanguna, bakali kulibelesya nibakali kukomba.—Baroma 8:15; Bagalatiya 4:6.
w10 11/1 15
Mwalizi Na?
Zyaambaanzi kuti mwaapostolo Pawulu wakali aamamakki naakuti ‘zibata zitondeezya kuti muzike waJesu’?—Bagalatiya 6:17.
▪ Kubantu bakali kuswiilila Pawulu mumwaanda wamunyaka wakusaanguna, majwi aaya alakonzya kuti akali kwaamba zintu zisiyene-siyene. Muchikozyano, bantu bakali kubba zintu mutempele, basungwa abazike bakali kuzwa kuli zimwi nyika, bakali kubikkwa makki ansimbi yakali kupya. Kubikkwa makki ansimbi eeyi kwakali kusampawula muntu ooyo.
Nikuba boobo, mamakki taakali kubelesegwa munzila zitali kabotu luzutu. Bantu biingi bakapona chiindi bakali kubelesya mamakki kuti batondeezye kuti mbamusyobo uuli naakuti batondeezye kuti banjila chili chikombelo. Muchikozyano, kweendelana aTheological Dictionary of the New Testament lyakaamba kuti: “Bantu bakuSiriya bakali kukomba baleza bategwa Hadad aAtargatis bakali kubikkwa makki aakuboko naakuti munsingo . . . Bantu bakali kukomba Dionysus bakali kubikkwa makki yalimwi tu lyamusamu wakali kukkala kawuli green.”
Basikulanga-langa twaambo bamazubaano, bayeeyela kuti Pawulu wakali kwaamba zibata zyazilonda nzyaakabaazyo chiindi bantu nibakali kumupenzya naakali kubeleka mulimu wakwe wabumishinali. (2 Bakorinto 11:23-27) Nikuba boobo, zilakonzeka kuti Pawulu taakali kwaamba zibata zyachoonzyo pesi wakali kutondeezya kuti nzila njaakali kuponaayo yakali kutondeezya chaantanganana kuti wakali muKristu.
JUNE 10-16
LUBONO LUZWA MUJWI LYALEZA | BAEFESO 1-3
“Bweendelezi bwaJehova Ambububeleka”
it-2 837 ¶4
Nsiswa Iiyandikana
Bwaami bwaMesiya. Magwalo aakalembwa aaPawulu akayubununa nsiswa iiyandikana atala aKristu. Muli Baefeso 1:9-11 Pawulu wakatondeezya kuti Leza wakazibya nsiswa iiyandikana naakuti “maseseke” aamakanze aakwe. Wakati: “Maseseke aayo aleendelana aceeco cimubotela ncaakakanza lwakwe mwini kuti cakkwana ciindi cibikkidwe ayendelezye zintu ikutegwa aziyobolole zintu zyoonse antoomwe muli Kristo, izintu zili kujulu alimwi azintu zili anyika. Inzya, mulinguwe, ooyo ngotukamantene limwi alimwi ngotwakasalwa limwi kuba basikukona, mbwaanga twakasalilwa limwi kweelana amakanze aayooyo uusala kucita zintu zyoonse kweelana akuyanda kwakwe.” Nsiswa eeyi iswaanizya Bwaami bwaLeza buyooyendelezegwa aaMesiya. “Izintu zili kujulu” zyakali kwaambwa aaPawulu zyiiminina maKristu bali aabulangilizi bwakuyooyendelezya aaKristu muBwaami bwakujulu. ‘Izintu zili munyika’ mbaabo bayookkala aalinjiyo bayooyendelezegwa aaBwaami bwaLeza. Jesu wakatondeezya basikwiiya bakwe kuti nsiswa eeyi yakali aachakuchita aBwaami naakati: “Nywebo mulaamvwisya maseseke aa Bwami bwa Leza.”—Mk 4:11.
w12 7/15 27-28 ¶3-4
‘Jehova Uumwi’ Ulikubungania Mpuli Yakwe
Mozesi wakabuzya maIsrayeli kuti: “Jehova Leza wesu, ngu Jehova omwe buyo.” (Dt. 6:4) Zintu nzyachita Jehova amakanze aakwe zileendelana. Nichakakkwana “ciindi cibikkidwe,” Leza wakabikka ‘bweendelezi’ naakuti wakapa kuti zilenge zyakwe zili kujulu azili aanyika kuti zijatane. (Bala Baefeso 1:8-10.) Makanze aabweendelezi oobu, alikuzuzikizigwa muzipanzi zibili. Muchipanzi chakusaanguna, Jehova ulikugwasya maKristu bananikidwe aamuuya kuti balibambile kuyoopona kujulu kabeendelezegwa aaJesu Kristu. Jehova wakasaanguna kubungania maKristu batakeendelezye aaKristu kujulu muPentekkoste ya33 C.E. (Mil. 2:1-4) Mbukunga maKristu bananikidwe aamuuya baambwa kuti baliluleme kwiinda muchinunuzyo chaKristu, bali aachoonzyo chakuti bakaba “bana ba Leza.”—Rom. 3:23, 24; 5:1; 8:15-17.
Muchipanzi chachibili, Jehova ulikugwasya bantu batakakkale muParadayizi bayooyendelezegwa aaBwaami bwaMesiya. “Nkamu mpati” njiyo iipanga bantu batakapone muparadayizi. (Ciy. 7:9, 13-17; 21:1-5) MuBweendelezi bwaKristu Bwaminyaka Iili Chuulu, bankamu mpati bayoojoyinwa aamabbiliyoni aabantu batakabusigwe. (Ciy. 20:12, 13) Kubusigwa kwabantu bakafwa kuyoopa kuti tukajatane. Bwaakumana Bweendelezi bwaMinyaka iili 1 000, ‘zintu zili aanyika’ naakuti bantu bayoosunkwa kwakumamaninsizyo. Bantu batakakkale kabasyomekede bayooba “bana ba Leza” baanyika.—Rom. 8:21; Ciy. 20:7, 8.
Kuyanduula Lubono muJwi lyaLeza
w13 2/15 28 ¶15
Utazumizyi Kufumbwa Chintu Kuti Chikukachizye Kujana Bulemu
Kuzumanana kuchita kuyanda kwaJehova kupa kuti bamwi bajane bulemu. Naakali kulembela mbungano yakuEfeso, Pawulu wakati: “Ndimulomba kuti mutatyompwi pe akaambo kamapenzi ngondipengela ndinywe, nkaambo mapenzi aaya mbulemu kulindinywe.” (Ef. 3:13) Nkamboonzi Pawulu nakaamba kuti mapenzi ngaakali kuswaana bwakali ‘bulemu’ kumaKristu bakuEfeso? Kuzumanana kubelekela maKristu bakuEfeso nkwaakachita Pawulu nikuba kuti wakali kuswaana mapenzi, kwakagwasya maKristu aaya kuti babone kuti kukomba Jehova kuyandikana loko. Kaansinga Pawulu wakaleka kubeleka chiindi naakali kuswaana mapenzi, zyakali kuyootondeezya kuti kukomba Jehova nkubakali kuchita, kukambawuka kwabo abulangilizi mbubakali aabo zyakali zyabuyo. Kulisimya nkwaakachita Pawulu kwakasumpula bukombi bwakasimpe alubo kwakatondeezya kuti kuba sikwiiya kuyandikana loko kwiinda zimwi zintu.
cl 299 ¶21
‘Kuziba Luyando lwaKristu’
Bbala lyachiGrikki lyakasandululwa kuti “kuziba” lyaamba “kuziba chintu kwiinda mukuchichita.” Kuti katuyanda kutobelezya zintu nzyaakali kuchita Jesu, tuyooba bantu balipeda kugwasya bamwi abalekelela kazizwa aansi aamoyo. Kuti twachita zintu eezi tunooli tulikutondeezya kuti tuliluzi “luyando lwaKristu lwiinda luzibo loonse.” Tweelede kukkala katuyeeya kuti, kuti twazumanana kutobelezya chikozyano chaJesu, tuyooswena aafwiifwi aLeza wesu siluyando, Jehova.
JUNE 17-23
LUBONO LUZWA MUJWI LYALEZA | BAEFESO 4-6
“Amusame Zilwanyo Zyoonse Zizwa Kuli Leza”
Nibachikula Amuzumanane Kumukazya Dyabbulosi
MWAAPOSTOLO Pawulu wakaamba kuti maKristu balikozyenie abasilumamba. Nkondo njitulwana teeyanyama pe njamuuya. Alubo basinkondoma mpubali choonzyo. Saatani amadimoni aakwe mbaasilumamba bali aluzibo. Tulakonzya kubonaanga tatukonzyi kubazunda. Alubo kulakonzya kubonekaanga maKristu bachikula tabakonzyi kubazunda. Niinzi chikonzya kubagwasya kuti bazunde myuuya eeyi mibi, iili amanguzu? Chibotezya nchakuti, bachikula balakonzya kuzunda alubo biingi balikuzunda. Nkamboonzi nibazunda? Nkaambo ‘mbayumu muMwaami amunguzu zyakwe.’ Balakonzya kuchita zyiingi kutali kugwasigwa amanguzu aLeza luzutu. Balilibambilide kulwana. Kuti bachikula bazunde, bazwaata “zilwanyo zyoonse zya-Leza” mbuuli basilumamba bayiisidwe kabotu.—Bala BaEfeso 6:10-12.
Nibachikula Amuzumanane Kumukazya Dyabbulosi
Munzila iikozyenie, kasimpe nkitwiiya muJwi lyaLeza kalatukwabilila kuti tutanyonganisigwi anjiisyo zyabukombi bwakubeja. (Joh. 8:31, 32; 1 Joh. 4:1) Kuyanda kasimpe kazwa muBbayibbele kuyootugwasya kuti tulizwaatike “cikwabilizyo,” chaamba kupona kweendelana azyeelelo zyaLeza ziluleme. (Int. 111:7, 8; 1 Joh. 5:3) Alubo kuti twakamvwisisisya kasimpe kazwa muJwi lyaLeza, tulakonzya kukakwabilila kubantu bakakazya.—1 Pet. 3:15.
Chikozyano eechi chileendelana azyeelelo zyaJehova ziluleme zikwabilila moyo wesu wakukozyanisya! (Tus. 4:23) Mbuuli mbuzyakatali kuchita kuti silumamba ayande chigogo chakukwabilila chitali chansimbi, andiswe tatweelede kuchita nzituyanda kutali kutobela zyeelelo zyaJehova. Tatukonzyi kuzwidilila nkaambo tatumaninide pe. (Tus. 3:5, 6) Chiindi choonse tweelede kubona kuti ‘tunsimbi’ Jehova ntwatupede tuliikwabilide myoyo yesu.
Nsangu zyabasilumamba bakuRoma bakali kuzizwaata kabaya kunkondo pesi nsangu zyakukozyanisya zizwaatwa amaKristu, zibagwasya kuti baambilizye mulumbe waluumuno. (Is. 52:7; Rom. 10:15) Pesi kwaambilizya mulumbe waluumuno takuyandiki kuti katuyoowa. Mukwesu Bo, uuli aminyaka iili 20 wakati: “Ndakali kuyoowa kukambawukila mbindiiyaabo nkaambo ndakali abweeme. Kuti ndayeeya mbundakabede chiindi, tandizi pe kuti nkamboonzi nindakali oobiya. Pesi lino ndakaangunuka kukambawukila mbindiiyaabo.”
Nibachikula Amuzumanane Kumukazya Dyabbulosi
Imwi ‘mimvwi iipya’ Saatani njakonzya kubelesya, nkwaamba makani aakubeja atala aJehova kuti tatubikkili maanu akuti tatuyandi. Muchizi Ida, uuli aminyaka iili 19 wakali kulimvwa kuti nzyachita tazigwasyi pe. Wakati, “Ndakali kumvwa mbuuli kuti Jehova uli kule andime akuti tayandi pe kuti ndibe Mweenzinyina.” Ida wakalizunda biyeni penzi eeli? Wakayungizya kuti, “Kunjila miswaangano kusimya lusyomo lwangu. Teendakali kusandula pe kumiswaangano nkaambo ndakali kuyeeya kuti taakwe uuyanda kumvwa nzindiyanda kwaamba. Pesi lino, ndilalibambila miswaangano alubo ndileezya kusandula tubili naakuti tutatu. Kulandiyumina kuchita oobo, pesi kupa kuti ndibotelwe. Alubo bakombima balandisungwaazya. Niyamana miswaangano, ngandalimvwa kuti Jehova ulandiyanda.”
Mbuuli ngowani yasilumamba mbiimukwabilila boongo, “lufutuko ndotulangila” lukwabilila mizeezo yesu ambutuyeeya. (1 Tes. 5:8; Tus. 3:21) Kuba abulangilizi kupa kuti tulangilile kuzisyomezyo zyaLeza alubo kupa kuti twaabone munzila iilikabotu mapenzi ngituswaana. (Int. 27:1, 14; Inc. 24:15) Kuti katuyanda kuti ‘ngowani’ yesu ibeleke kabotu, tweelede kwiizwaata kumutwe kutali kwiijatila mumaboko.
Pawulu wakakozyanisya Jwi lyaLeza apanga ndyatupede Jehova. Pesi tweelede kulibelesya kabotu chiindi nitupandulwida bamwi nzitusyoma anitulibelesya mubuumi. (2 Kor. 10:4, 5; 2 Tim. 2:15) Kujana wachita biyeni kuti ulibelesye kabotu? Mukwesu Sebastian, uuli aminyaka iili 21 wakati: “Nindibala Bbayibbele ngandalemba vesi yomwe muchaandaano chimwi achimwi. Nindajana vesi yandinoneezya ndilayilembaansi. Eezi zipa kuti ndibe amaboneno aali mbuuli aJehova.” Daniel, waambwa ajulu wakati: “Nindibala Bbayibbele, ngandalemba mavesi ngindibona kuti alakonzya kugwasya bantu mbindikambawukila. Alubo ndakabona kuti bantu balaswiilila kuti babona kuti ulaliyanda Bbayibbele akuti ulikubeleka changuzu kuti ubagwasye.”
Kuyanduula Lubono muJwi lyaLeza
it-1 1128 ¶3
Kusalala
Muuya uusalala. Muuya uusalala manguzu aaJehova ngabelesya kuti azuzikizye makanze aakwe. Muuya ooyu ulasalala, tukwe tombe, tusofweede alubo Leza uubelesya munzila iilikabotu. Nkinkaako, utegwa ‘muuya uusalala’ naakuti ‘muuya wabusalali.’ (In 51:11; Lk 11:13; Ro 1:4; Ef 1:13) Muuya uusalala ugwasya muntu kuti achite zintu zilikabotu. Kuti muntu wachita zintu zitali kabotu, muuya uusalala ‘ulawusa.’ (Ef 4:30) Mbukunga muuya uusalala tawuli muntu, pesi utondeezya buntu bwaJehova busalala, nkinkaako tulakonzya kupa kuti ‘uwuse’. Kuti muntu kakkala kachita zintu zibi “mulilo wamuuya” ulazima. (1Te 5:19) Kuti sikubisya taaleka michito mibi, kuli mbuuli kuti ‘ulikupenzya’ muuya uusalala waLeza. Kumamanino, Leza nga waba sinkondonyina wasikubisya. (Is 63:10) Muntu uupa kuti muuya uusalala waLeza uwuse, ulakonzya kuchita chibi chipati chakuusampawula. Jesu wakati, muntu uusampawula muuya waLeza takalekelelwi pe kuchiindi eechino naakuti kuchiindi chiza.—Mt 12:31, 32; Mk 3:28-30; langa MUUYA.
it-1 1006 ¶2
Kutangala
Kutangala Kuboneka Mumichito. Zintu nzyachita muntu zilakonzya kutondeezya aantanganana kuti ulaachiyandisyo chitali kabotu atala achimwi chintu. Jakkobo wakalemba kuti, chiyandisyo chitali kabotu kuti chamita, chizyala chibi. (Jak 1:14, 15) Nkinkaako, muntu uutangala uboneka aazintu nzyachita. Mwaapostolo Pawulu wakaamba kuti muntu uutangala, ulikozyenie amuntu uukomba zibumbwa. (Ef 5:5) Chintu nchayandisya muntu uutangala nga wachibikka mubusena bwakusaanguna akuchikomba kwiinda kuti akombe Mulengi.—Ro 1:24, 25.
JUNE 24-30
LUBONO LUZWA MUJWI LYALEZA | BAFILIPI 1-4
“Mutalibiliki Acintu Nociba Comwe”
w17.08 10 ¶10
“Luumuno Lwa Leza . . . Lwiinda Maano Oonse”
Niinzi chikonzya kutugwasya kuti tutakataazikani pesi tube ‘aaluumuno lwaLeza’? Majwi Pawulu ngaakalembela mbungano yakuFilipi atondeezya kuti kukomba ngomusamu mupati wakukataazikana. Nkinkaako, chiindi nitukataazikene, tweelede kukomba kuli Jehova tumubuzye zitukataazya. (Bala 1 Petro 5:6, 7.) Chiindi nuli kukomba, weelede kusyoma kuti Jehova ulakumvwa nkaambo ulaandaba anduwe. Toyelede kuluba ‘kulumba’ zilongezyo nzulaazyo chiindi nuli kukomba. Kuziba kuti Leza ulakonzya “kucita zintu zinji kapati kwiinda aali zyeezyo nzyotumulomba naa nzyotuyeeyela” kusimya lusyomo lwesu.—Ef. 3: 20.
w17.08 10 ¶7
“Luumuno Lwa Leza . . . Lwiinda Maano Oonse”
Bakwesu bakuFilipi nibakabala lugwalo lwakazwa kuli Pawulu, zili aantanganana kuti bakayeeya atala amapenzi ngaakaswaana akuti teebakali kuyeeyela pe kuti Jehova wakali kuyoomugwasya mbuuli mbaakamugwasya. Pawulu wakali kubayiisyaanzi? Wakali kubayiisya kuti: Mutakataazikani. Mweelede kukomba mpawo muyoojana luumuno lwaLeza. Mulugwalo oolu kwaambidwe kuti “luumuno lwaLeza . . . lwiinda maano oonse.” Aambaanzi majwi aaya? Bamwi basanduluzi bakasandulula majwi aaya kuti “luumuno lwiinda busongo boonse” naakuti “luumuno lwiinda miyeeyo yoonse yabantu.” Mulaamwi majwi, Pawulu wakali kwaamba kuti “luumuno lwaLeza” ndubotu loko kwiinda nzitukonzya kuyeeyela. Nkinkaako, chimwi chiindi bantu balakonzya kubula nzila yakuzwa mumapenzi, pesi Jehova taakwe chimukachila alubo ulakonzya kuchita zintu nzitutayeeyeli kuti atugwasye.—Bala 2 Petro 2:9.
w17.08 12 ¶16
“Luumuno Lwa Leza . . . Lwiinda Maano Oonse”
Niinzi nzitujana kuti twaba ‘aaluumuno lwa Leza lwiinda maano oonse’? Bbayibbele lisandula kuti, luumuno lwa Leza lwiinda maano oonse, “luyookwabilila myoyo yanu amizeezo yanu kwiinda muli Kristo Jesu.” (Flp. 4:7) Bbala lyakusaanguna lyakasandululwa kuti, ‘kukwabilila’ lyakali kubelesegwa kuchisoja. Bbala eeli lyakali kwaamba masoja aakali kuchita mulimu wakulinda muunzi uuyakilidwe. Muunzi waFilipi wakali aamasoja akali kuulinda. Bantu bakali kukkala mumuunzi ooyu, bakali kulyiiba mansiku nibalede, nkaambo bakalizi kuti taakwe chikonzya kubasikila. Munzila iikozyenie, kuti twaba ‘aluumuno lwaLeza,’ myoyo yesu amiyeeyo yesu iyookkalikana. Tulizi kuti Jehova ulaandaba andiswe alubo uyanda kuti zintu zitweendele kabotu. (1 Pet. 5:10) Kuziba kuti Jehova ulaandaba andiswe akuti uyanda kuti zintu zitweelede kabotu, kutugwasya kuti tutakataazikani loko nitwasikilwa mapenzi.
Kuyanduula Lubono muJwi lyaLeza
it-2 528 ¶5
Zituuzyo
Zituuzyo zinywigwa. MaIsrayeli bakali kupa Jehova zipo zyakunywa kuswaanizya azimwi zipo, kapati nibakasika Kunyika Yachisyomezyo. (My 15:2, 5, 8-10) Zipo zyakunywa zyakali kuswaanizya wayini (naakuti “cakunywa cikola”) alubo wayini eeyi yakali kutilwa aachipayililo. (My 28:7; 14; kozyanisya a Ku 30:9; My 15:10.) Mwaapostolo Pawulu wakalembela maKristu bakuFilipi kuti: “Nokuba kuti ndili mbuli cituuzyo cakunywa citilwa acipaizyo alimwi aamulimo uusetekene eezyo lusyomo lwanu nzyolwakamukulwaizya kucita, ndilasekelela.” Mulugwalo oolu, wakabelesya maambilambali aachipo chinywigwa kuti apandulule chiyandisyo nchaakalaacho chakulipeda kugwasya bakombinyina. (Flp 2:17) Kakuli kwasyaala chiindi chiniini kuti afwe, Pawulu wakalembela Timotewo kuti: “Ndatalika kale kutilwa aacipaililo mbuli cituuzyo cinyugwa, alimwi ciindi cakuti ndaangununwe caswena afwaafwi.”—2Ti 4:6.
w07 1/1 26-27 ¶5
‘Bubuke bwakusaanguna’ Bwakatalika kale
Kuzwa waawo, maKristu bananikidwe naakuti “Iba Israyeli ba Leza,” beelede kuswaanana aJesu Kristu kujulu ooko nkubayookkala “a Mwami lyoonse.” (Bagalatiya 6:16; 1 Batesalonika 4:17) Kubusigwa ooku kwiitwa kuti ‘bubuke bwakusaanguna.’ (Bafilipi 3:10, 11; Ciyubunuzyo 20:6) MaKristu bananikidwe baakumana kubusigwa, mamiliyoni aabantu bakafwa bayoobusigwa kabali aabulangilizi bwakupona muParadayizi aanyika kukabe kutamani. Kufumbwa naa tulangilila kuyoopona kujulu naakuti aanyika, tubulangilila aameso aasalala ‘bubuke bwakusaanguna.’ Bubuke bwakusaanguna niinzi? Buyoochitika lili?