Inzila Iili Njiyo Yakukomba Leza

1. Ngwani weelede kutubuzya nzila iili njiyo yakukomba Leza?

ZIKOMBELO ziingi zilyaamba kuti ziyiisya kasimpe atala aLeza. Pesi eechi tee choonzyo pe, nkaambo zikombelo ziyiisya zintu zisiyene-siyene atala aLeza akuti tweelede kumukomba biyeni. Nga tulayiziba biyeni nzila iili njiyo yakukomba Leza? Jehova nguwe alikke uukonzya kutubuzya nzila njitweelede kumukombaayo.

2. Ngatulayiziba biyeni nzila iili njiyo yakukomba Leza?

² Jehova wakatupa Bbayibbele kuchitila kuti twiiye nzila iili kabotu yakumukomba. Nkikaako yiiya Bbayibbele, alimwi Jehova ulakugwasya kwiinda munjiisyo zyakwe nkaambo ulandaba anduwe chachoonzyo.​—Isaya 48:17.

3. Leza uyanda kuti iswe tuchiteenzi?

³ Bamwi bantu baamba kuti Leza ulabutambula bukombi boonse, pesi eezi teensi nzizyo pe nzyakatuyiisya Jesu. Wakati: “Boonse bandaambila kuti Mwami, Mwami, teensi mbabo bayoonjila mu-Bwami bwakujulu, ngooyo uucita luyando lwa-Taata ulikujulu.” Aboobo nchintu chiyandikana loko kuti tuzibe kuyanda kwaLeza akuti tukuchite. Aaka nkaambo kapati loko akaambo kakuti bantu bataswilili Leza, Jesu wakabakozyanisyaa basimilandu, ‘basimucita zibi.’​—Matayo 7:21-23.

4. Niinzi Jesu nchaakaamba atala akuchita kuyanda kwaLeza?

⁴ Jesu wakatuchenjezya kuti chiindi nituyanda kuchita kuyanda kwaLeza tuyooswaana buyumu-yumu naa mapenzi. Wakati: “Amunjile mumulyango uumanikide, nkaambo mulyango uukwazeme anzila impati njitola kukunyonyooka, nkabela abo banjila mulinjiyo mbanji-banji. Mulyango uumanikide anzila iipatide njitola kubuumi, nkabela abo biijana mbace.” (Matayo 7:13, 14) Inzila imanikide, naa inzila iili njiyo yakukomba Leza, njiitola kubuumi butamani. Inzila iikwazeme naa iitali njiyo yakukomba Leza itola kulufu. Pesi Jehova tayandi nikuba umwi muntu kuti afwe. Upa muntu woonse cheelelo chakwiiya atala anguwe.​—2 Petro 3:9.

INZILA IILI NJIYO YAKUKOMBA LEZA

5. Kujana twabaziba biyeni aabo bakomba Leza munzila iili njiyo?

⁵ Jesu wakaamba kuti tulakonzya kubaziba aabo bakomba Leza munzila iili njiyo. Tuchita eezi kwiinda mukulanga-langa nzibasyoma anzibachita. Wakaamba kuti: “Micelo yabo njiiti muzibye mbubabede.” Alimwi wakayungizya kuti: “Musamu umwi aumwi mubotu ulazyala micelo mibotu.” (Matayo 7:16, 17) Eezi tazyaambi kuti aabo bakomba Leza balimaninide pe. Pesi babelesi baLeza baleezya kuchita zili kabotu. Lino tulabona chiyootugwasya kuziba aabo bakomba Leza munzila iili njiyo.

6, 7. Nkaamboozi bukombi bwakasimpe nibuyeeme muBbayibbele? Chikozyano chaJesu chituyiisyaanzi?

⁶ Bukombi bwesu bweelede kuyaama muBbayibbele. IBbayibbele lyaamba kuti: “Magwalo aya oonse akazwa [akasololelwa] kuli-Leza, alikondede kukufundisya akukulaya, akukuolola akukupandulula makani aabululami, kuti muna-Leza alibambe, azulile kukumana milimo mibotu yoonse.” (2 Timoteo 3:16, 17) Mwaapostolo Paulo wakalembela maKristu kuti: “Ciindi ncimwakatambula makani aa-Leza ngomwakamvwa kulindiswe, tamukwe mwakaatambula mbuli makani aabantu, mwakaatambula mbuli mbwaabede ncobeni, mbuli makani aa-Leza.” (1 BaTesalonika 2:13) Bukombi bwakasimpe buyeeme muJwi lyaLeza luzutu, iBbayibbele. Tabuyeeme mumizeezo yabantu pe, nikuba muziyanza zyabo naa zimwi zintu.

⁷ Zyoonse zintu Jesu nzyaakali kuyiisya zyakayeeme muJwi lyaLeza. (Bala Johane 17:17.) Chiindi chiingi wakali kuzubulula zyakali kuzwa muMagwalo. (Matayo 4:4, 7, 10) Babelesi baLeza bakasimpe batobelezya chikozyano chaJesu alimwi injiisyo zyabo zyoonse ziyeeme muBbayibbele.

8. Jesu wakatuyiisyaanzi atala akukomba Jehova?

⁸ Tweelede kukomba Jehova luzutu. Ibbuku lyaIntembauzyo 83:18 lyaamba kuti: “Nduwe olike oojisi izina lya-Jehova, nduwe Mupatikampatila atala anyika yoonse.” Jesu wakali kuyanda kuti bantu bazibe kuti Leza wakasimpe ngwani, alimwi wakabayiisya zina lyaLeza. (Bala Johane 17:6.) Jesu wakati: “Nguwe Jehova Leza wako ngoelede kukomba, nguwenya alike ngoelede kumanina milimo.” (Matayo 4:10) Aboobo mbutuli babelesi baLeza tutobelezya chikozyano chaJesu. Tukomba Jehova luzutu, tubelesya zina lyakwe alimwi tuyiisya bamwi zina lyaLeza anzyayootuchitila.

9, 10. Tulutondeezya biyeni luyando kuli umwi awumwi?

⁹ Tweelede kubaa luyando lwachoonzyo kubantu. Jesu wakayiisya basikwiiya bakwe kuti kabayandana. (Bala Johane 13:35.) Tazikwendaba kuti tuzwa kuli, tulaa ziyanza zili biyeni, tuli notede na, naa kuti tulafwaba. Luyando lwesu kuli umwi awumwi lulatujatania mbuli bakwesu abachizi. (BaKolose 3:14) Aboobo tatwiinki pe kunkondo kutegwa tukajaye bamwi bantu. Nkaambo iBbayibbele lyaamba kuti: “Lino bana ba-Leza abana ba-Saatani balazibwa boobu: Umwi aumwi uutaciti bululami tali wa-Leza, naba oyo uutayanda mweenzinyina.” Alimwi liyungizya kuti: “Tuleelede kuyandana, tutabi mbuli Kaini, iwakali wa-mubi, wakajaya munyina.”​—1 Johane 3:10-12; 4:20, 21.

¹⁰ Tubelesya chiindi, nguzu zyesu, azintu nzitulaazyo kutegwa tugwasyanie akuti tusungwaazyanie. (BaHebrayo 10:24, 25) ‘Tulabachitila bantu boonse milimo mibotu.’​—BaGalatiya 6:10.

11. Nkaamboonzi nituzumina kuti Jesu ninzila iiya kuli Leza?

¹¹ Tweelede kuswiilila Jesu nkaambo njiinzila iiya kuli Leza. IBbayibbele lyaamba kuti: “Takukwe lufutuko kuluumbi naba omwe pe, nkaambo takukwe zina limbi ansi ilipegwa bantu, ndotweelede kufutulwa andilyo.” (Incito 4:12) Muchaandano 5 chabbuku eeli, twakayiiya kuti Jehova wakatuma Jesu kutegwa ape mubili wakwe kawuli chinunuzyo kubantu basyomeka. (Matayo 20:28) Alimwi Jehova wakasala Jesu kutegwa ayeendelezye kali Mwaami wanyika yoonse. Nchinchicho iBbayibbele nchilitubuzya kuti tweelede kuswiilila Jesu ikuti katuyanda kupona kukabe kutamani.​—Bala Johane 3:36.

12. Nkamboonzi nitutanjilili mutwaambo twachisi?

¹² Tatweelede kunjilila mutwaambo twachisi. Jesu taakwe naakanjilila mutwaambo twachisi. Chiindi naakali kubetekwa munkuta, wakabuzya mweendelezi wamaRoma Pilato kuti: “Bwami bwangu tabuli bwaansi ano.” (Bala Johane 18:36.) Mbuli Jesu, aswebo tulasyomeka kuBwaami bwaLeza bwakujulu, kaambo aaka katupa kuti tutanjilili mutwaambo twachisi nikuba kuti tukkala kuli. Munzila imwi iBbayibbele litubuzya kuti tweelede kuswiilila ‘maami aazisi,’ izyaamba imfulumende. (BaRoma 13:1) Tulayiswiilila milawu yanyika mutukkede. Pesi ikuti mulawu wakazyania amulawu waLeza, tutobelezya chikozyano chabaapostolo bakaamba kuti: “Tuleelede kumvwa Leza kwiinda bantu.”​—Incito 5:29; Marko 12:17.

13. Niinzi nchitukambawuka atala aBwaami bwaLeza?

¹³ Tusyoma kuti Bwaami bwaLeza mbombubo abulikke butakamane mapenzi aali munyika. Jesu wakati “makani mabotu aa-Bwami” ayookambawukwa munyika yoonse. (Bala Matayo 24:14.) Taakwe mfulumende yabantu iikonzya kutuchitila eezyo zitakachitwe amfulumende yaLeza. (Intembauzyo 146:3) Jesu wakatuyiisya kukombela Bwaami bwaLeza kuti: “Abuze Bwami bwako. Alucitwe luyando lwako ansi ano mbubonya mbuli kujulu.” (Matayo 6:10) IBbayibbele lyakasinsima kuti Bwaami bwaLeza buyoonyonyoona mfulumende zyabantu akuti “bwalo buyooima nji kukabe kutamani.”​—Daniele 2:44.

14. Mbaani mbusyoma kuti bakomba Leza munzila iili njiyo?

¹⁴ Nwaamana kwiiya twaambo ootu, libuzye kuti: ‘Mbaani balanjiisyo ziyeeme muBbayibbele? Mbaani babuzya bamwi atala azina lyaLeza? Mbaani batondeezya luyando lwachoonzyo kuli umwi awumwi alimwi kabasyoma kuti Leza wakatuma Jesu kuti azotufutule? Mbaani batanjilili mutwaambo twachisi? Mbaani bakambawuka kuti Bwaami bwaLeza mbubo abulikke bukonzya kutumanina mapenzi?’ Mbaakamboni baJehova luzutu.​—Isaya 43:10-12.

UYOOCHITAANZI?

15. Niinzi nzitweelede kuchita kuti Leza abutambule bukombi bwesu?

¹⁵ Tazimanini akuti usyoma muli Leza. Naaba madimoni alawo alamusyoma Leza, pesi taamuswilili pe. (Jakobo 2:19) Ikuti katuyanda kuti Leza abutambule bukombi bwesu, tatweelede kumanina akumusyoma biyo pe, pesi tweelede kuchita nzyaamba.

16. Nkaamboonzi nitweelede kubukaka bukombi bwakubeja?

¹⁶ Kutegwa Leza abutambule bukombi bwesu, tweelede kubukaka bukombi bwakubeja. Musinsimi Isaya wakalemba kuti: “Amuzwe mulinguwo, musalale.” (Isaya 52:11; 2 BaKorinto 6:17) Nchichicho nchitweelede kubukaka bukombi bulaazyakuchita abukombi bwakubeja.

17, 18. “Babuloni Mupati” niinzi, alimwi nkaamboonzi nikuyandikana kumusiya chakufwambaana?

¹⁷ Bukombi bwakubeja niinzi? Nchikombelo choonse chiyiisya kukomba Leza munzila iikazyania aJwi lyakwe. IBbayibbele lyiita zikombelo zyoonse zyakubeja kuti “nguBabuloni Mupati.” (Ciyubunuzyo 17:5) Nkaamboonzi? Nilyakamana Zambangulwe lyaNowa, injiisyo zyiingi zyakubeja zyakatalikila mumuunzi waBbabbiloni. Injiisyo eezyo zyakubeja zyakazula nyika yoonse. Muchikozyano, bantu bakali kukkala muBbabbiloni bakali kukomba zibunga zyabaleza batatu. Mazuba aano, zikombelo zyiingi ziyiisya kuti Leza uli butatu, pesi iBbayibbele liyiisya zyaantanganana kuti kuli Leza omwe biyo, akuti Jesu mwanaakwe. (Johane 17:3) Bantu bakali kukkala muBbabbiloni abalabo bakali kusyoma kuti muuya uleendelela kuupona chiindi muntu naafwa akuti muuya ooyo ulazwa kuti ukapenzegwe mugehena. Pesi ooku nkubeja.​—Langa Makani Aakumamanino 14, 17, a 18.

¹⁸ Leza wakaambilizya kuti lino-lino zikombelo zyakubeja zyoonse ziyoonyonyoonwa. (Ciyubunuzyo 18:8) Ulakamvwisisisya na kaambo kapede kuti ufwambaane kusiya bukombi bwakubeja? Jehova uyanda kuti uchite oobo chakufwambaana.​—Ciyubunuzyo 18:4.

19. Chiindi nusala kubelekela Jehova, uyookulangania biyeni?

¹⁹ Chiindi nusala kusiya bukombi bwakubeja akubelekela Jehova, beenzinyokwe bamwi naa kuti bamumpuli yanu tabakoyookumvwisisisya pe kusala kwako alimwi balakonzya kukupenzya. Pesi Jehova takakusiyi pe. Uyooba akati kamamiliyoni aabantu bayandana chamoyo woonse, alimwi uyoobaa bulangilizi bwakuyoopona kutamani munyika mpya yaLeza. (Marko 10:28-30) Bamwi beenzinyokwe abamumpuli yako batabotelwi akusala kwako kwakubelekela Jehova, balakonzya kuzoosala kwiiya Bbayibbele muchiindi chili kunembo.

20. Nkaamboonzi nikuyandikana kukomba Leza munzila iili njiiyo?

²⁰ Lino-lino, Leza uyoobunyonyoona bubi boonse alimwi Bwaami bwakwe buyooyeendelezya nyika yoonse. (2 Petro 3:9, 13) Chiyooba chiindi chibotu loko! Muntu woonse uyookomba Jehova munzila Jehova njayanda. Aboobo chilayandikana kapati kuli nduwe kubweza ntaamu lino akukomba Leza munzila iili njiiyo.