Nkamboonzi Nitweelede Kulemeka Bweendelezi?

1, 2. (a) Tweelede kuswiilila malayilile aani? (b) Njiili mibuzyo njitutalange-lange muchaandano eechi?

KUCHILI muniini, chimwi chiindi bazyali bako bakali kukubuzya kuti uchite zimwi zintu nzwaakatali kuyanda kuchita. Wakali kubayanda bazyali bako alubo wakalizi kuti wakeelede kubaswiilila. Pesi chimwi chiindi teewakali kuyanda pe kubaswiilila.

² Tulizi kuti Taateesu Jehova ulatuyanda. Ulatubikkila maanu akutupa zintu ziyandikana kuti tubotelwe mubuumi. Ulatupa malayilile aatugwasya kuti tuzwidilile. Chimwi chiindi ubelesya bantu kuti batupe malayilile. Nkinkaako, tweelede kubulemeka bweendelezi bwakwe. (Tusimpi 24:21) Nikuba boobo, nkamboonzi chimwi chiindi nikutuyumina kuswiilila malayilile? Nkamboonzi Jehova nayanda kuti tuswiilile malayilile? Alubo, kujana twatondeezya biyeni kuti tulabulemeka bweendelezi bwakwe?—Langa Makani Aakumamanino 9.

NKAMBOONZI NIKULI KUYUMU?

3, 4. Niinzi chakapa kuti bantu babe achibi? Nkamboonzi chimwi chiindi nikutuyumina kuswiilila malayilile aazwa kuli bamwi?

³ Chimwi chiindi kulakonzya kutuyumina kuswiilila malayilile. Eezi zyakatalika chiindi Adamu aEva nibakabisya. Nikuba kuti bakalimaninide, pesi bakapapila bweendelezi bwaLeza. Kuzwa waawo, bantu boonse bazyalwa kabali achibi. Kutamaninina kulakonzya kupa kuti kutuyumine kuswiilila malayilile aazwa kuli Jehova naakuti kubantu. Alubo chimwi chiindi kulatuyumina nkaambo Jehova ubelesya bantu batamaninide.—Matalikilo 2:15-17; 3:1-7; Intembauzyo 51:5; BaRoma 5:12.

⁴ Chimwi chiindi tulakonzya kulisumpula nkaambo tatumaninide pe. Kulisumpula kulakonzya kupa kuti kutuyumine kuswiilila malayilile. Muchikozyano, Jehova wakabelesya Musa kuti azulwide maIsrayeli. Mwaalumi utegwa Kkora wakalisumpula kwiinda mukutalemeka Musa nikuba kuti Kkora wakali waba achiindi chilamfu kakomba Jehova. Pesi Musa taakali kulisumpula pe nikuba kuti wakasalidwe aLeza kuti azulwide bantu. Musa wakazibidwe kuti wakali kulibombya kwiinda bantu boonse. Pesi Kkora wakakaka kuswiilila malayilile ngaakabuzigwa aMusa. Kkora wakapa kuti bantu biingi bapapile Musa. Niinzi chakachitika kuli Kkora abamwi bakamutobela? Boonse bakanyonyoonwa. (Myeelwe 12:3; 16:1-3, 31–35) MuBbayibbele muli zikozyano zyiingi zitondeezya kuti kulisumpula kunjizya mumapenzi.—2 Makani 26:16-21; langa Makani Aakumamanino 10.

5. Bamwi bantu bakaabelesya biyeni manguzu aabo munzila iitali kabotu?

⁵ Amwi wakali wamvwa bantu kabaamba kuti, “Kuba amanguzu miingi kulanyongania.” Kuzwa chiindi, bantu biingi balakachilwa kwaabelesya kabotu manguzu aabo. (Bala Mukambausi 8:9.) Muchikozyano, Sawulu naakasalwa aJehova kuti abe mwaami wamaIsrayeli wakali kulibombya. Pesi kulisumpula abbivwe zyakapa kuti apenzye Davida wakaluleme. (1 Samuele 9: 20, 21; 10:20-22; 18:7-11) Mukuya kwachiindi, Davida wakazooba mwaami wakali kabotu kwiinda maami woonse muIsrayeli. Chimwi chiindi Davida taakabelesya kabotu manguzu aakwe. Wakachita bwaamu aBbatishebba mukayintu waUriya, mpawo wakasisa chibi chakwe kwiinda mukuchita mabambe akuti Uriya akafwe munkondo.—2 Samuele 11: 1-17.

NKAMBOONZI NITWEELEDE KULEMEKA BWEENDELEZI BWAJEHOVA?

6, 7. (a) Kuyanda Jehova kupa kuti tuchiteenzi? (b) Chikozyano chaJesu chitugwasya biyeni kuti tukkale katuswiilila Leza nikuba kuti chimwi chiindi nkuyumu?

⁶ Tuswiilila malayilile Jehova ngatupa nkaambo tulamuyanda. Alubo kuyanda Jehova kwiinda zintu zyoonse kuyoopa kuti tuchite zintu zimubotezya. (Bala Tusimpi 27:11; Marko 12:29, 30.) Kuzwa Adamu aEva nibakachili mumuunda waEdeni, Saatani tanaleka pe kuyunga bantu kuti bataswiilili bweendelezi bwaJehova. Dyabbulosi uyanda kuti tubonaanga Jehova takwe cheelelo chakutubuzya nzitweelede kuchita. Pesi tulizi kuti makani aaya taachoonzyo pe. Majwi aaya ngamasimpe aakuti: “Nduwe uuelede, O mwami, kutambula bulemu alulemeko anguzu, nkaambo nduwe wakalenga zintu zyoonse.”—Ciyubunuzyo 4:11.

⁷ Kuchili muniini, wakayiisigwa kuti uswiilile bazyali bako, nikuba kuti chimwi chiindi teewakali kuyanda pe. Nkinkaako, chimwi chiindi teekuuba pe kuti bakombi baJehova baswiilile malayilile. Kuyanda Jehova kuyoopa kuti tumuswiilile akumulemeka. Jesu wakatusiila chikozyano chili kabotu. Wakali kuswiilila Jehova nikuba kuti chimwi chiindi kwakali kuyumu kuchita oobo. Eezi nzizyo zyakapa kuti abuzye Wisi kuti: “Akucitwe kuyanda kwako, kutabi kwangu.”—Luka 22:42; langa Makani Aakumamanino 11.

8. Jehova ubelesyaanzi kuti atuzulwide? (Langa bbokesi liti “Swiilila Lulayo.”)

⁸ Mazubaano, Jehova utuzulwida munzila zisiyene-siyene. Wakatupa Bbayibbele. Alubo, wakasala baalu batugwasya mumbungano. Kulemeka bantu Jehova mbasalide, kutondeezya kuti tulabulemeka bweendelezi bwakwe. Kutaswiilila lulayo ndubatupa kutondeezya kuti tulikupapila Jehova. Jehova taakabotelwa pe chiindi maIsrayeli nibakapapila Musa. Wakababona kuti bakali kupapila nguwe kutali Musa.—Myeelwe 14:26, 27; langa Makani Aakumamanino 12.

9. Kuyanda bakombima kuyootugwasya biyeni kuti tuswiilile malayilile?

⁹ Kulemeka bweendelezi kutondeezya kuti tulabayanda bakombima. Yeeya atala achikozyano chitobela. Kuti kwaba penzi lyalichitikila, bamukabunga kakugwasilizya babelekelaamwi kuti bagwasye bachitikilwa penzi. Kuti bamukabunga aako babeleke kabotu, kweelede kuba umwi uubapa malayilile akuti boonse bamukabunga baatobelezye. Pesi, niinzi chikonzya kuchitika kuti umwi wamukabunga aaka waleka kutobelezya malayilile akuchita nzyayeeya? Eezi zilakonzya kupa kuti bamwi boonse bali mukabunga aako bakataazikane. Nkinkaako, zilakonzya kubanyongania bamwi kuti twaleka kuswiilila malayilile Jehova ngatupa kabelesya bantu mbasalide. Pesi kwaaswiilila kutondeezya kuti tulabayanda bakombima akuti tulabulemeka bweendelezi bwaJehova.—1 BaKorinto 12:14, 25, 26.

10, 11. Tulalanga-langaanzi?

¹⁰ Zintu Jehova nzyatubuzya kuti tuchite, zigwasya ndiswe. Kulemeka bweendelezi mumpuli, mumbungano, anitwaambuula abalupati-pati banyika kupa kuti toonse tugwasigwe.—Deuteronomo 5:16; BaRoma 13:4; BaEfeso 6:2, 3; BaHebrayo 13:17.

¹¹ Kuziba kaambo Jehova nayanda kuti tulemeke bamwi, kuyoopa kuti tubalemeke. Atulange-lange mbutukonzya kulemeka bamwi muzyiimo zitatu.

KULEMEKA BWEENDELEZI MUMPULI

12. Mwaalumi nga ulatondeezya biyeni kuti ulabulemeka bweendelezi?

¹² Jehova nguwe wakatalisya bubambe bwampuli alubo boonse mumpuli ubapede zyakuchita. Bamumpuli balabotelwa kuti boonse batobelezya malayilile mumpuli. (1 BaKorinto 14:33) Jehova wakasala mwaalumi kuti abe mutwe mumpuli. Eezi zyaamba kuti Jehova uyanda kuti mwaalumi ayilanganie kabotu mpuli yakwe. Nkinkaako, mwaalumi uyoolyiiminina kuli Jehova atala ambayilangania mpuli yakwe. Mwaalumi muKristu weelede kuba aluzyalo, kuyanda mpuli yakwe akwiilangania mbuuli Jesu mbayilangania mbungano. Kuti mwaalumi wachita oobo, zitondeezya kuti ulamulemeka Jehova.—BaEfeso 5:23; langa Makani Aakumamanino 13.

13. Mukayintu nga ulatondeezya biyeni kuti ulabulemeka bweendelezi?

¹³ Mukayintu muKristu alakwe uli amulimu mupati mumpuli. Ugwasilizya mulumaakwe kuti akonzye kwiilangania kabotu mpuli. Ubelekelaamwi amulumaakwe mukuyiisya bana. Kulemeka nkwatondeezya kulabagwasya bana. (Tusimpi 1:8) Ulamulemeka mulumaakwe akubelekelaamwi anguwe muzintu nzyasala. Kuti kwaba zimwi nzyatazuminani amulumaakwe, weelede kwaamba maboneno aakwe munzila yabulemu. Pesi mukayintu muKristu uukwetwe amwaalumi uutakombi, uswaanana abuyumu-yumu busiyene abwamukayintu uukwetwe amwaalumi uukomba. Nikuba boobo, ulamulemeka mulumaakwe, nkaambo chimwi chiindi kuchita oobo kuyoopa kuti mulumaakwe azooyande kwiiya atala aJehova akumukomba.—Bala 1 Petro 3:1.

14. Bana nga balatondeezya biyeni kuti balabulemeka bweendelezi?

¹⁴ Bana bayandikana loko kuli Jehova, nkinkaako beelede kukwabililwa akuyiisigwa. Bazyali balabotelwa kuti bana babo kababaswiilila. Jehova ulabotelwa kuti bana batondeezya kumulemeka kwiinda mukuswiilila bazyali babo. (Tusimpi 10:1) Mazubaano, bana bamwi bakomezegwa amuzyali uumwi. Eezi zilakonzya kupa kuti muzyali abana baswaanane abuyumu-yumu. Nikuba boobo, kuti bana baswiilila muzyali wabo akubelekelaamwi anguwe, boonse mumpuli balabotelwa. Pesi simpe ndyakuti taakwe mpuli iili abantu bamaninide. Nikuba boobo, boonse mumpuli balakonzya kubotelwa kuti babelesya malayilile aazwa kuli Jehova. Eezi zipa kuti Jehova abotelwe nkaambo nguSikutalisya bubambe bwampuli.—BaEfeso 3:14, 15.

KULEMEKA BWEENDELEZI MUMBUNGANO

15. Kujana twatondeezya biyeni kuti tulabulemeka bweendelezi mumbungano?

¹⁵ Jehova ulatuyiisya kabelesya mbungano yachiKristu alubo wakasala Jesu kuti ayiyendelezye. (BaKolose 1:18) Alubo Jesu wakapa “muzike musyomesi uucenjede” mulimu wakulangania bakombi baLeza bali aanyika. (Matayo 24:45-47) “Muzike musyomesi uucenjede” mbaabo bali muKabunga Keendelezya. Kabunga Keendelezya katupa zyakulya zitugwasya mubukombi kuti tukkale katuli alusyomo lusimide. Baalu, babelesi babelekela abalangizi bamabazu bajana malayilile kuKabunga Keendelezya kuti balanganie mbungano munyika yoonse. Bakwesu aaba, bali amulimu wakutulangania. Balalyiiminina kuli Jehova atala ambubazilangania mbungano. Kulemeka bakwesu aaba kutondeezya kuti tulamulemeka Jehova.—Bala 1 BaTesalonika 5:12; BaHebrayo 13:17; langa Makani Aakumamanino 14.

16. Nkamboonzi nitukonzya kwaamba kuti baalu ababelesi babelekela basalwa amuuya uusalala?

¹⁶ Baalu ababelesi babelekela babeleka changuzu kuti bamumbungano bakkale kabasyomekede akuti kabajisini. Nikuba boobo, bakwesu aaba tabamaninide pe mbuuli ndiswe. Bakwesu aaba basalwa biyeni? Beelede kuzuzikizya zyeelelo zijanika muBbayibbele. (1 Timoteo 3:1-7, 12; Tito 1:5-9) Jehova wakabelesya muuya uusalala kugwasya bantu bakalemba Bbayibbele kuti balembe zyeelelo eezi. Chiindi baalu nibalanga-langa umwi mukwesu kuti abe mwaalu naakuti mubelesi uubelekela, balakomba kabakumbila Jehova kuti abape muuya uusalala. Eezi zitondeezya kuti mbungano zyeendelezegwa aJesu aJehova. (Incito 20:28) Nkinkaako, bakwesu aaba batugwasya akutulangania, nzipo zizwa kuli Leza.—BaEfeso 4:8.

17. Kuti muchizi kabeleka imwi milimu iichitwa abakwesu mumbungano, weelede kuchitaanzi zitondeezya kuti ulalemeka?

¹⁷ Chimwi chiindi mumbungano mulakonzya kuti taakwe mwaalu naakuti mubelesi uubelekela uukonzya kubeleka imwi milimu mumbungano. Kuti kakuli boobo, bamwi bakwesu bakabbabbatizigwa balakonzya kwiibeleka, pesi kuti kakutakwe bakwesu, muchizi ulakonzya kubeleka milimu iichitwa abakwesu mumbungano. Nabeleka milimu eeyi, muchizi weelede kwaanga nduku naakuti kuzwaata ngowani. (1 BaKorinto 11:3-10) Kuchita oobo kutondeezya kuti ulabulemeka bubambe bwaJehova bwabusilutwe mumpuli amumbungano.—Langa Makani Aakumamanino 15.

KULEMEKA BALUPATI-PATI BANYIKA

18, 19. (a) Lugwalo lwaBaRoma 13:1-7 lutuyiisyaanzi? (b) Kujana twatondeezya biyeni kuti tulabalemeka balupati-pati banyika?

¹⁸ Tweelede kubalemeka balupati-pati banyika nkaambo Jehova uzumizizye kuti beendelezye. Mfulumende zilangania nyika kuchitila kuti zintu zyeende kabotu akuti bantu bagwasikane. MaKristu beelede kutobela malayilile aali mulugwalo lwaBaRoma 13:1-7. (Bala.) Kufumbwa nkutukkala, tulaalemeka ‘maami aachisi’ akutobela milawu iibikkidwe. Milawu eeyi ilatugwasya mumpuli, muli zyabbizinesi akulubono. Muchikozyano, tweelede kubbadala mitelo akuba amapepa ayandikana. Pesi tweelede kuchita biyeni kuti balupati-pati banyika batubuzya kuti tuchite zintu ziteendelani amalayilile aLeza? Mwaapostolo Petro wakati: “Tuleelede kumvwa Leza kwiinda bantu.”—Incito 5:28, 29.

¹⁹ Tweelede kutondeezya kulemeka chiindi nitwaambuula abalupati-pati banyika bali mbuuli babetesi naakuti mapulisa. MaKristu bachikula beelede kulemeka bayiisi abamwi babeleka achikolo. Tweelede kulemeka mbitubelekela nikuba kuti bamwi mbitubelekaabo tababalemeki. Kuti twachita oobo, tutobelezya chikozyano chamwaapostolo Pawulu wakali kulemeka beendelezi nikuba kuti bamwi bakali alunya. (Incito 26:2, 25) Tweelede kubalemeka bantu nikuba kabatatujati kabotu.—Bala BaRoma 12:17, 18; 1 Petro 3:15.

20, 21. Nimpinduunzi nzitujana kuti twalemeka bantu?

²⁰ Mazubaano bantu tabachilemeki pe. Nikuba boobo, bakombi baJehova teembubabede pe. Tweelede kubeleka changuzu kuti katulemeka bamwi. Tutobelezya malayilile akaambwa amwaapostolo Petro aakuti: “Atubalemeke bantu boonse.” (1 Petro 2:17) Bantu balabona kuti katulemeka bamwi. Jesu wakati: “Mbubonya obo mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu.”—Matayo 5:16.

²¹ Bamwi balakonzya kuba achiyandisyo chakwiiya zyiingi atala aJehova kuti babona mbutulemeka bweendelezi mumpuli, mumbungano, akuzintu zimwi. Kulemeka bamwi kutondeezya kuti tulamulemeka Jehova. Eezi zipa kuti Jehova abotelwe alubo zitondeezya kuti tulamuyanda.