Timoteo Wakali Kuyanda Kugwasya Bantu

Timoteo wakali mulombe wakalaa ciyandisyo cakugwasya bantu. Wakiinka kumasena aasiyene-siyene kuyoogwasya bantu. Akaambo kazeezi, wakapona buumi bubotezya loko. Ulayanda na kumvwa atalaa nzizyo?—

Timoteo wakakomenena kudolopo lyaLustra. Ciindi naakali muniini, banenaakwe baLoidi abayina baEunike, bakatalisya kumuyiisya atalaa Jehova. Naakali kuyabukomena, Timoteo wakali kuyanda kugwasya bamwi kwiiya atalaa Jehova.

Ciindi Timoteo naakali mulombe, Paulo wakamukumbila kuti bayiinkaamwi kuyookambawuka kulaamwi masena. Timoteo wakazumina, alimwi wakalilibambilide kuyoogwasya bamwi.

Timoteo wakiinkaa Paulo kudolopo lyakuMakedoniya litegwa Tesalonika. Ikuti bakasike nkuko, bakeelede kweenda musinzo mulamfu amawulu kuti bakatante bwaato. Nibakasika nkuko, bakagwasya bantu biingi kuti bayiiye atalaa Jehova. Pesi bamwi bantu bakabanyemena alimwi bakayanda kubacisa. Nkinkaako, Paulo aTimoteo bakeelede kuzwa muTesalonika kuti bakakambawukile kulaamwi masena.

Myeezi yakatobela, Paulo wakakumbila Timoteo kuti abweede kuTesalonika kuti akalange bazyalwanyina kuti bakali biyeni. Kwakali kuyandika busicamba kuti abweede kudolopo eelyo lyakali kuyoosya! Pesi Timoteo wakiinka nkaambo wakalikatazikene atalaa bazyalwanyina bakali nkuko. Wakabwedaa makani mabotu kuli Paulo. Bazyalwanyina bakuTesalonika bakali kucita kabotu loko.

Timoteo wakabelekaamwi aPaulo kwaminyaka myiingi loko. Paulo wakazoolemba kuti Timoteo wakali muntu wakali kweelela kuti amutume kuyoogwasya mbungano zisiyene-siyene. Timoteo wakali kumuyanda Jehova alimwi wakali kubayanda bantu.

Ulabayanda na bantu alimwi ulayanda na kubagwasya kwiiya atalaa Jehova?— Ikuti wacita oobo, uyoobaa buumi bubotezya loko mbuli bwaTimoteo!