Aajanika Makani aaKabbuku Kamuswaangano waBuumi Amulimu Wesu
MARCH 1-7
LUBONO LUZWA MUJWI LYALEZA | MYEELWE 7-8
“Nzitwiiya kuKkeempu yamaIsrayeli”
it-1 497 ¶3
Mbungano
Kwakali bantu bakasalidwe kuti bazulwide chisi chamaIsrayeli. (Ezr 10:14) Nkinkaako, “basilutwe bamisyobo” mbabo bakali kutola zipo nilyakali kumana kuyakwa tente lyakukombela. (My 7:1-11) Alubo bantu bakabikka chidindo ‘kuchizuminano chisyomeka’ muchiindi chakapona Nehemiya bakali bapayizi, maLevi ‘abasilutwe babantu.’ (Ne 9:38–10:27) Chiindi maIsrayeli nibakali munkanda, baalumi bana Israyeli bali 250 baswaanizya “basilutwe bambungano, baalumi basalidwe, basimpuwo” bakatobelezya Kkora, Datani, Abbiramu aOni mukupapila Mozesi aAroni. (My 16:1-3) Mozesi wakaswiilila malayilile ngaakabuzigwa aaLeza, kwiinda mukusala baalumi bapati bachiIsrayeli bali 70 kuti bamugwasye “mukuli wabantu,” ngwaakatali kukonzya kuchita kalaalikke. (My 11:16, 17, 24, 25) Mulugwalo lwa Levitiko 4:15 kwaambidwe atala ‘abaalu bambungano’ bakali kuzulwida maIsrayeli alubo kuyeeyelwa kuti baalu aaba bakali kuswaanizya baalumi bakomena, basilutwe, babetesi abamwi balemekwa.—My 1:4, 16; Jos 23:2; 24:1.
it-2 796 ¶1
Rubbeni
Mukkeempu yamaIsrayeli musyobo waRubbeni wakali kukkala aakati kamusyobo waSimeyoni amusyobo waGadi, misyobo eeyi kayili 3 yakali kukkala Kumusanza (South) kwatente lyakukombela. Chiindi nibakali kweenda musyobo waRubbeni nguwo wakali kuzulwida musyobo waSimeyoni awaGadi mpawo yakali kutobela misyobo iitatu, musyobo waJuda, waIsakkara awaZebbuloni. (My 2:10-16; 10:14-20) Misyobo eeyi yakali kutobelezya mabambe aaya nibakali kutola zipo mubuzuba bwakupeda tente lyakukombela.—My 7:1, 2, 10-47.
w04 8/1 25 ¶1
Makani Aazwa muBbuku lyaMyeelwe
8:25, 26. Kuti baalumi beelela babikkwe aamulimu uuchitwa aamaLevi alubo kwiinda mukubikkila maanu kuchiimo chabo, bakachembeede bakalayililwa kuti batanoobeleki mulimu uuminia. Nikuba boobo, bakali kukonzya kulipeda kugwasya maLevi bambi. Nikuba kuti taakwe muntu uuleka kuchita mulimu wakwaambilizya makani mabotu mazubaano, njiisyo yamulawu ooyu ituyiisya chiiyo chiyandikana loko. Kuti umwi muKristu katachikonzyi kuchita imwi milimu akaambo kakuchembaala, ulakonzya kuchita imwi milimu njachikonzya kuchita.
Kuyanduula Lubono muJwi lyaLeza
it-1 835
Butaanzi kuzyalwa, Zitaanzi
Mbukunga bana bamaIsrayeli bachaalumi bataanzi mbabo bakali kusalwa kuti babe basilutwe, bakali kwiiminina chisi. Jehova wakaamba kuti chisi chamaIsrayeli “imutaanzi kuzyalwa” akaambo kachizuminano nchaakachita aAbrahamu. (Ku 4:22) Akaambo kakuti Jehova wakabafutula, wakabalayilila kuti “umwi aumwi mwana musankwa mutaanzi akati kabana Israyeli. Mwana musankwa mutaanzi kuzyalwa, wamuntu awamunyama” basalazigwe. (Ku 13:2) Eezi zyakapa kuti bana bachaalumi bataanzi bapegwe Jehova.
MARCH 8-14
LUBONO LUZWA MUJWI LYALEZA | MYEELWE 9-10
“Jehova Mbabazulwida Bakombi Bakwe”
it-1 398 ¶3
Kkeempu
Kulonga-longa nkubakali kuchita maIsrayeli kwakali kutondeezya kuti bakalibambikene. Muli Myeelwe 33 Mozesi wakatondeezya kuti bakalonga kwaziindi zisika ku40. Kufumbwa joba nilyakali kwiimikila aajulu aatente lyakukombela, maIsrayeli teebakali kweenda pe. Kuti joba lyeenda ambabo bakali kweenda. “Jehova abalailila bana Israyeli kuti banyamuke, bakali kunyamuka akweenda.” (My 9:15-23) Bantu bakali kubuzigwa kuti beende naakuti bayimikile kakubelesegwa myeembo iibili. (My 10:2, 5, 6) Kuli nzila mweembo njiwakali kulizigwaayo, chiindi maIsrayeli nibakali kumvwa musabilo wamweembo ooyo bakali kuziba kuti chaba chiindi chakweenda. Kulizigwa kwamweembo munzila eeyi, kwakasaanguna “mubuzuba bwa 20 bwamwezi wabili mumwaka wabili” [mu1512 B.C.E.]. Bbokesi lyachizuminano lyakali kunembo mpawo kwakali kutobela misyobo iitatu, musyobo waJuda, waIsakkara awaZebbuloni, misyobo eeyi yakali kuzulwidwa aamusyobo waJuda. Mpawo bakali kutobelwa amusyobo waGerisoni amusyobo waMerari kababwezede zyakuyasya tente lyakukombela. Mpawo kwakali kutobela misyobo iitatu, musyobo waRubbeni waSimeyoni awaGadi, misyobo eeyi yakali kuzulwidwa aamusyobo waRubbeni. Kuzwa waawo, kwakali kutobela musyobo waKkohati wakali kunyampula tente lyakukombela mpawo kwakali kutobela misyobo iitatu, waEfrayimu, waManase awaBbenjamini. Mpawo kumamanino kwakali kutobela musyobo waDani, waAseri awaNafutali, misyobo eeyi yakali kuzulwidwa aamusyobo waDani.—My 10:11-28.
w11 4/15 4-5
Zilatondeezya Na Kuti Weendelezegwa aaLeza?
Kujana twatondeezya biyeni kuti tulakuyanda kweendelezegwa aaLeza? Mwaapostolo Pawulu wakaamba kuti: “Kamubamvwida aabo basololela akati kanu alimwi kamulibombya.” (Heb. 13:17) Pesi kuchita oobo teekuuba pe chiindi choonse. Mucikozyano: Amweezeezye kamuli maIsrayeli muchiindi chaMozesi. Amuyeeye kuti mwaba aachiindi chilamfu kamuyobweenda mpawo joba lyayimikila. Mulakonzya kulibuzya kuti, Tulakkala kwachiindi chilamfu biyeni? Kwabuzuba na? Kwamviki? Naakuti kwamweezi? Alubo mulakonzya kulibuzya kuti, ‘Ndizilongonone na zintu zyoonse?’ Mulakonzya kusaanguna kulongonona zintu ziyandikana. Mukuya kwachiindi, mulakonzya kuzilongolola zyoonse. Mbumutamane kulongolola, mpawo mwabona joba lyayenda, eezi zyaamba kuti mweelede kusaanguna lubo kulongela zintu nzimwali mwalongonona. Kuchita oobo teekuuba pe. Nzizyo nzibakeelede kuchita maIsrayeli chiindi nibakali ‘kulonga.’—My. 9:17-22.
Iswe tuchita biyeni nitweendelezegwa aaLeza? Tulamuswiilila na? Naakuti nga twasala kuchita zintu kweendelana aambutujayide? Tulaatobela na malayilile mapya aali atala ambutweelede kuchitisya zyiiyo zyaBbayibbele, kukambawukila bantu bazwa kuli zimwi zisi, kuchita kukomba kwampuli, kubelekela aamwi abaKkomiti yaHospital Liaison akulijata munzila iilikabotu kumiswaangano yabbooma? Alubo tutondeezya kuti tulayanda kweendelezegwa aaLeza kwiinda mukutambula lulayo. Chiindi nituyanda kusala zyakuchita mubuumi, tweelede kubelesya malayilile aazwa kuli Jehova ambunga yakwe. Mbuli mwana mbayanda kukwabililwa abazyali bakwe nikuli mvula mpati, andiswe tulakwabililwa ambunga ya Jehova chiindi mapenzi aali mbuli mvula mpati naatusikila.
Kuyanduula Lubono muJwi lyaLeza
it-1 199 ¶3
Muswaangano
Mbukuyandikana Kunjila Muswaangano. Zyakali kuchitwa kuPobwe lyaPasika lyakali kuchitwa munyaka amunyaka zitondeezya mbukuyandikana kunjila miswaangano kuchitila kuti tujane chakulya chamubukombi. Kufumbwa mwaalumi wakali kusalala wakali kuleka kusekelela Pobwe lyaPasika achaali wakali kujayigwa. (My 9:9-14) Chiindi Mwaami Hezekkiya naakabuzya maIsrayeli kuti baye kuJerusalemu kukusekelela Pobwe lyaPasika, wakaamba kuti: “Nobana Israyeli, amupiluke kuli Jehova . . . mutayumyi myoyo yanu mbuli mbobakacita bamauso. Amulibombye kuli Jehova akuboola kutempele lyakwe ndyaasalazya kukabe kutamani, mubelekele Jehova Leza wanu kutegwa bukali bwakwe buyaka mbuli mulilo bumuleke. . . . Jehova Leza wanu ngusiluse alimwi ngusilweetelelo, alimwi takamufwutatili ikuti naa mwapiluka kulinguwe.” (2Mk 30:6-9) Kuleka kusekelela mapobwe aaya achaali kwakali kutondeezya kutaba aandaba aLeza. Nikuba kuti maKristu tabachisekeleli mapobwe aaya pesi Pawulu wakabasungwaazya kuti kabanjila miswaangano, wakati: “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katukulwaizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.”—Heb 10:24, 25; langa CONGREGATION.
MARCH 15-21
LUBONO LUZWA MUJWI LYALEZA | MYEELWE 11-12
“Nkamboonzi Nituteelede Kung’ung’una?”
w01 6/15 17 ¶20
Mutabi Basikuswiilila Luzutu Ibaluba
MaKristu biingi balabuchija bwaamu. Pesi tweelede kuchenjelela kuti tutabi bantu bang’ung’una zikonzya kupa kuti tube abweenzuma butali kabotu aLeza. Pawulu wakaamba kuti: “Alimwi tutamusunki Jehova, mbubonya bamwi babo mbobakamusunka, cakuti bakajaigwa anzoka. Alimwi tutabi basikutongooka, mbubonya bamwi babo mbobakatongooka, cakuti bakajaigwa asikunyonyoona.” (1 Bakorinto 10:9, 10.) MaIsrayeli bakapapila Mozesi aAroni, kuswaanizya aLeza kumugama alubo bakang’ung’una akaambo kamana njibakali kupegwa munzila yachigambyo. (Myeelwe 16:41; 21:5) Jehova wakabanyemena bantu bakali kung’ung’una mbuli mbaakanyemena bantu bakachita bwaamu. Bbayibbele lyaamba kuti bantu biingi bakang’ung’una bakafwa kwiinda mukulumwa aanzoka. (Myeelwe 21:6) Kazitana chitika eezi, bantu bayinda ku14 700 bakali kung’ung’una bakanyonyoonwa. (Myeelwe 16:49) Eezi zitondeezya kuti tatweelede kusunka Jehova kwiinda mukutalemeka zintu nzyatupa.
w06 7/15 15 ¶7
‘Mutanoong’ung’uni’
MaIsrayeli bakachincha munzila iigambya! Kumatalikilo, bakatondeezya kuti balamulumba Jehova akaambo kakubafutula kuEgepita akuLwizi Lusalala kwiinda mukumutembawula kabali kwiimba. (Kulonga 15:1-21) Akaambo kamapenzi ngibakaswaanana aawo munkanda akuyoowa bantu bakuKkenani, kwakapa kuti maIsrayeli basaangune kung’ung’unina Jehova. Muchiindi chakulumba Leza akaambo kakubaangununa, bakasaanguna kumupapila kabaamba kuti wakali kubayima zintu nzibayanda. Kung’ung’una ooku kwakali kutondezya kuti teebakali kumulumba pe Jehova akaambo kazintu nzyaakali kubachitila. Eezi nzizyo zyakapa kuti aambe kuti: “Ino nkamu eeyi mbyaabi ilaleka lili kunditongookela?”—Myeelwe 14:27; 21:5.
it-2 719 ¶4
Kukazyania
Kung’ung’una. Kung’ung’una kupa kuti muntu amane manguzu. Kabatanaba aachiindi chilamfu kabazwide kuEgepita, maIsrayeli bakang’ung’unina Jehova kwiinda mukupapila Mozesi aAroni. (Ku 16:2, 7) Kupapila kwabo kwakamuchisa loko Mozesi zyakuti wakakumbila kuti afwe. (My 11:13-15) Kung’ung’una kulakonzya kupa kuti sikung’ung’una anjile mumapenzi. Kung’ung’unina Mozesi nkubakalikuchita maIsrayeli, Jehova wakali kukubona kakuli kupapila bweendelezi bwakwe. (My 14:26-30) Kung’ung’una kwakapa kuti bantu biingi bafwe.
Kuyanduula Lubono muJwi lyaLeza
it-2 309
Mana
Mbuyakabede. Mana yakali “mbuli tunseke tuniini-niini tutuba.” Yakali kunona mbuli “tunkwa tuvwelene abuci” naakuti “tunkwa tuvwelene amafwuta.” Niyakali kumana kuziigwa naakuti kutwigwa, mana yakali kukonzya kujikwa, kujika makkekke naakuti kwiiyoka.—Ku 16:23, 31; My 11:7, 8.
MARCH 22-28
LUBONO LUZWA MUJWI LYALEZA | MYEELWE 13-14
“Lusyomo Mbulutugwasya Kuti Tube Aachibindi”
w06 10/1 16-17 ¶5-6
Kuba Aachibindi Kwiinda Mukusyoma Akuyoowa Leza
Basikutwela babili, Joshuwa aKkalebbu bakali aachiyandisyo chakunjila muNyika Yachisyomezyo. Bakati, bantu bakuKkenani “bali mbuli cinkwa kulindiswe. Bukwabilizi bwabo bwagwisyigwa kulimbabo, swebo Jehova ulaandiswe. Mutabayoowi pe.” (Myeelwe 14:9) Eezi zyaamba kuti Joshuwa aKkalebbu bakali kusyoma zintu nzibatakazi na? Peepe! Kabali chisi choonse bakabona Jehova mbaakasampawula Faro abaleza bamuEgepita chiindi naakeeta Zipenzyo Zili 10. Alubo bakabona Jehova naakayinkizya Faro amasoja aakwe muLwizi Lusalala. (Intembauzyo 136:15) Teekwakalikwe kaambo pe kakali kupa kuti basikutwela bali 10 abamwi bakaba kubbazu lyabo bayoowe bantu bakuKkenani. Jehova wakanyema zyakuti wakaamba kuti: “Ino bayooleka lili kutandisyoma nokuba kuti ndakacita zitondezyo zyoonse eezyi akati kabo?”—Myeelwe 14:11.
Jehova wakabona kuti kuyoowa kwabantu aaba kwakali kutondeezya kuti teebakalikwe lusyomo pe. Lusyomo achibindi zyeendaamwi, mwaapostolo Johane wakalembela mbungano yachiKristu atala ankondo yamubukombi, wakati: “Oolu ndoluzundo ilwazunda nyika, ilusyomo lwesu.” (1 Johane 5:4) Mazubaano, lusyomo luli mbuli lusyomo ndwakalaalo Joshuwa aKkalebbu lulikupa kuti kukambawukwe makani mabotu aaBwaami munyika yoonse aBakamboni baJehova bayinda ku6 miliyoni, baswaanizya bana, bapati, bali aamanguzu abatakwe manguzu. Taakwe sinkondo wakonzya kukazya impi eeyi yamasoja bali aachibindi.—Baroma 8:31.
Kuyanduula Lubono muJwi lyaLeza
it-1 740
Nyika Leza Njaakapa maIsrayeli
NYIKA Leza njaakapa maIsrayeli yakali mbotu loko. Chiindi Mozesi naakatuma basikutwela kuti bakalange mbuyakabede Nyika Yachisyomezyo akuti bakaze aazintu zijanika kunyika eeyo, basikutwela bakaza aankuyu, mapomegranite azikama zyamisaansa zipati zyakali kunyampulwa aabaalumi babili. Nikuba kuti bamwi basikutwela bakali kuyoowa akaambo kakubula lusyomo pesi bakaamba kuti: Iilya “ninyika iikunka buci amukupa.”—My 13:23, 27.
MARCH 29–APRIL 4
LUBONO LUZWA MUJWI LYALEZA | MYEELWE 15-16
“Chenjelela Kuti Utalisumpuli Akulisyoma”
w11 9/15 27 ¶12
Jehova Ulikuzi Na?
Nikuba boobo, chiindi maIsrayeli nibakali mulweendo kabaya kuNyika Yachisyomezyo, Kkora wakabonaanga kuli zintu zyakatali kweenda kabotu mubweendelezi. Kuzwa waawo, bamwi baalumi bakali kuzulwida bakali 250 bakaba kubbazu lyaKkora kabali aamakanze aakubambulula zintu. Kuyeeyelwa kuti Kkora abeenzinyina bakali kubonaanga balikwabililidwe akaambo kakuti bakali aabweenzinyina bulikabotu aJehova. Bakabuzya Mozesi kuti: “Mwaciindizya! Bantu boonse mumbungano balasalala alimwi Jehova mpali akati kabo.” (My. 16: 1-3) Kkora wakatondeezya kuti ulalisumpula akuti wakali kulisyoma! Mozesi wakababuzya kuti: “Jehova uyootondezya uuli kulubazu lwakwe.” (Bala Myeelwe 16:5.) Kumamanino aabuzuba bwakatobela, Kkora abeenzinyina bakali kupapila, bakafwa.—My. 16:31-35.
w11 9/15 27 ¶11
Jehova Ulikuzi Na?
Mozesi aKkora bakalisiyene kapati kunzila njibakali kububonaayo bweendelezi bwaJehova akuchita kuyanda kwakwe. Maboneno ngibakalaawo atala abweendelezi bwaJehova ngawo aakali kupa kuti batambulike kuli Jehova naakuti batatambuliki. Kkora wakali muLevi wamusyobo waKkohati alubo wakali aazilongezyo zyiingi, zyakali kuswaanizya kubona lufutuko lwamaIsrayeli nibakazubuka Lwizi Lusalala, wakaba kubbazu lyaJehova chiindi Jehova naakali kubeteka maIsrayeli bakatali kutobela milawu kuChilundu chaSinayi alubo wakatola lubazu mukubweza bbokesi lyachizuminano. (Kul. 32:26-29; My. 3:30, 31) Zilantaanganana kuti wakali waba aminyaka myiingi kasyomeka kuli Jehova alubo maIsrayeli biingi bakali kumubona kali chikozyano chibotu.
Kuyanduula Lubono muJwi lyaLeza
w98 9/1 20 ¶1-2
Amubikke Zintu Ziyandikana Mubusena Bwakusaanguna!
Jehova wakali kubona kuti ooyo wakali mulandu mupati. Bbayibbele lyaamba kuti, “Mpoonya Jehova wakaambila Musa kuti: ‘Muntu ooyo weelede kujaigwa.’” (Myeelwe 15:35) Nkamboonzi Jehova nakaamba kuti zintu zyakachitwa aamuntu ooyo, wakali mulandu mupati?
Bantu bakali aamazuba aali 6 aakutebba nkuni akuchita imwi milimu iili mbuli kuyanduula chakulya, zyakuzwaata akuyaka maanda. Buzuba bwachi 6 bwakali buzuba bwakasalidwe kuti kakuchitwa zintu zyabukombi luzutu. Nikuba kuti kutebba nkuni teekwakali kubisya pe pesi teekwakali kabotu pe kutebba nkuni mubuzuba bwakeelede kuchitwa zintu zyabukombi. Nikuba kuti maKristu tabachili aansi aaMulawu waMozesi, zintu zyakachitikila maIsrayeli tazitondeezyi na kuti tweelede kubikka zintu ziyandikana mubusena bwakusaanguna?—Bafilipi 1: 10.
APRIL 5-11
LUBONO LUZWA MUJWI LYALEZA | MYEELWE 17-19
“Mebo Ndendime Lukono Lwako”
w11 9/15 13 ¶9
Mulamuzumizya Na Jehova Kuti Abe Chaabilo Chako?
Amuyeeye maLevi bakatapegwa lukono lwanyika. Mbukunga kukomba nchiichintu nchibakali kuyandisya, bakali kusyoma Jehova kuti ulabapa zyakulya, nkaambo wakababuzizye kuti: “Ndendime caabilo cako.” (My. 18:20) Nikuba kuti tatubelekeli mutempele mbuli bapayizi amaLevi mbubakali kuchita, tulakonzya kutobelezya chikozyano chabo katuli aalusyomo lwakuti Jehova uyootupa nzituyanda. Lusyomo ndutulaalo lwakuti Leza ulakonzya kutupa nzituyanda lulasima kapati mbukunga twaba kumamanino aamazuba aakumamanino.—Ciy. 13:17.
w11 9/15 7 ¶4
Jehova Nchaabilo Changu
Kuchita mulimu ooyu kwakali kwaambaanzi kumaLevi? Jehova wakaamba kuti wakali kuyooba chaabilo chabo mukuti bakapegwa chilongezyo chakubeleka kabatafoli pe alubo teebakali kujana lukono lwanyika pe. Kuba ‘bapayizi baJehova’ ndulwakali lukono lwabo. (Jos. 18:7) Lugwalo lwa Myeelwe 18:20 lutondezya kuti eezi teezyakapa kuti bafwabe pe. (Bala Myeelwe 18:19, 21, 24.) MaLevi bakeelede kupegwa “cipaanzi cakkumi cili coonse mu Israyeli kuti cibe lukono lwabo akaambo kamilimo yabo.” Bakeelede kutambula chipanzi cha10 pesenti chazintu nzibakatebula maIsrayeli abanyama bavubwa bakayungizigwa. Ambabo maLevi bakeelede kupa chipanzi chakkumi chazintu nzibakapegwa, “kuzwa kuzipego zyoonse iziinda kubota” kuchitila kuti bagwasilizye mulimu wabapayizi. (My. 18:25-29) Bapayizi bakali kupegwa “kazili cintu cisalala,” maIsrayeli nzibakali kweeta kuli Leza aabusena bwakukombela. Bapayizi bakeelede kusyoma Jehova kuti uyoobapa nzibayanda.
Kuyanduula Lubono muJwi lyaLeza
g02 6/8 14 ¶2
Munyo Nchintu Chiyandikana Loko
Alubo munyo wiiminina chintu chikkala kwachiindi chilamfu. MuBbayibbele, chizuminano chakali kuyandikana chakali kwiitwa kuti “ncizuminano camunyo.” Bantu bakali kuswaanizigwa muchizuminano eechi, bakali kulyaamwi chakulya chilaamunyo zyakali kutondeezya kuti chizuminano chabo chakali kuyookkala kwachiindi chilamfu. (Myeelwe 18:19) Kweendelana aMulawu waMozesi, munyo wakali kubikkwa aazintu zyakali kupayizigwa achipayililo wakali kwiiminina kutafwa naakuti kutabola.
APRIL 12-18
LUBONO LUZWA MUJWI LYALEZA | MYEELWE 20-21
“Kkala Kulibombya Zintu Nizitali Kweenda Kabotu”
Belekela Kuba Aamoyo Uubombede Kuti Ubotezye Jehova
Tatukabisyi pe. Yeeya lubo atala azyakachitika kuli Musa. Kwaminyaka myiingi, wakali aamoyo uubombede alubo wakali kuchita zintu zibotezya Jehova. Pesi kumamanino aaminyaka iili 40 maIsrayeli kabali munkanda, Musa wakakachilwa kuba aamoyo uubombede. Muchizi wakwe Miriyamu, uuyeeyelwa kuti nguwe wakavuna buumi bwakwe kuEgepita, wakali waba achiindi chifwiifwi kafwide akuzikkwa kuKkadesi. Mpawo maIsrayeli bakang’ung’una lubo kabati teebakali kujatwa kabotu. Achiindi eechi, ‘bakakalalila Musa’ akaambo kakubulika kwamaanzi. Nikuba kuti Jehova wakachitide zigambyo zyiingi kabelesya Musa akuti Musa wakali waba aachiindi kabazulwida kabotu pesi bantu bakang’ung’una. Teebakang’ung’unina kubulika kwamaanzi luzutu pesi aMusa, kabachitaanga nguwe wakapede kuti babule maanzi.—My. 20:1-5, 9-11.
Belekela Kuba Aamoyo Uubombede Kuti Ubotezye Jehova
Musa wakabilila mpawo wakakachilwa kuba aamoyo uubombede. Nikuba kuti Jehova wakabuzizye Musa kuti aambuule aabbwe pesi Musa wakanyema akukalalila bantu kati uyanda kubachitila chigambyo. Kuzwa waawo, wakawuma bbwe tubili mpawo maanzi miingi loko akatalisya kubbobboma. Kulisumpula akubilila zyakapa kuti Musa abisye. (Int. 106:32, 33) Musa taakazumizigwa pe kunjila muNyika Yachisyomezyo nkaambo wakakachilwa kuba aamoyo uubombede muchiindi eecho.—My. 20:12.
Zintu eezi zyakachitika zituyiisya zyiiyo ziyandikana. Chakusaanguna, tweelede kubeleka changuzu kuti tukkale katuli aamoyo uubombede. Kuti twalyiiba kwachiindi chifwiifwi biyo, tulakonzya kusaanguna kulisumpula kwiinda mukwaambuula akuchita zintu chabufuba-fuba. Chachibili, kukataazikana kulakonzya kupa kuti kutuyumine kuba aamoyo uubombede, nkinkaako, tweelede kubeleka changuzu kuti tukkale katuli abuntu oobu nikuba nituli azyiingi zyakuchita.
w09 9/1 19 ¶5
Mubetesi Uuyanda Kuti Kuchitwe Zintu Zilikabotu
Chakusaanguna, Leza taakwe naakabuzya Mozesi kuti akalalile bantu. Chachibili, Mozesi aAroni bakakachilwa kupa kuti Leza alemekwe. Leza wakati: ‘Teemwakandilemeka pe.’ (Vesi 12) Majwi aakuti “tumugwisizye maanzi” atondeezya mbuli kuti Mozesi aAroni mbabo bakapa kuti maanzi azwe munzila yachigambyo kutali Leza. Chachitatu, chisubulo nchibakapegwa chakalikozyenie achakapegwa bamwi musule. Bantu bakasaanguna kupapila, Leza wakababuzya kuti teebakali kuyoonjila pe muKkenani alubo nzizyo nzyaakabuzya Mozesi aAroni. (Myeelwe 14:22, 23) Chachi 4, Mozesi aAroni bakali bazulwidi bamaIsrayeli. Bantu bazulwida kuti babisya, mulandu wabo nga mupati loko kuli Leza.—Luka 12:48.
Kuyanduula Lubono muJwi lyaLeza
w14 6/15 26 ¶12
Kubisya Kwabantu Mukubona Mbwakubona Na Jehova?
Muzyiimo zyoonse eezi, Jehova taakasala kusubula Aroni mpawaawo-mpawaawo. Pesi wakabona kuti Aroni taakali muntu mubi pe akuti taakaliyandila pe kuti abisye. Kweelede kuti Aroni wakabisya akaambo kachiimo chakaliwo aachiindi eecho naakuti wakeenwa aabamwi. Nikuba boobo, chiindi naakabuzigwa kuti wabisya wakazumina chakufwambaana alubo wakagwasilizya chiindi Jehova naakali kubeteka bantu. (Kul. 32:26; My. 12:11; 20:23-27) Jehova wakabikkila maanu kulusyomo ndwaakalaalo Aroni akuzumina mulandu wakwe. Nikwakayinda minyaka myiingi, Aroni aluzubo lwakwe bakali kuyeeyegwa kuti mbantu bayoowa Jehova.—Int. 115:10-12; 135:19, 20.
APRIL 19-25
LUBONO LUZWA MUJWI LYALEZA | MYEELWE 22-24
“Jehova Wakachincha Lutuko Kuti Lube Chilongezyo”
bt 53 ¶5
Kwaambilizya “Makani Mabotu Aajatikizya Kristo Jesu”
Nikuba mazubaano, kupenzegwa takuli kupa kuti Bakamboni baJehova bakachilwe kukambawuka makani mabotu. Kwazyiindi zyiingi, kubabikka mumajele Bakamboni baJehova naakuti kupa kuti balongele mulizimwi ndawu kupa kuti bantu bamundawu eezyo bamvwe makani mabotu. Muchikozyano, muchiindi chaNkondo yaNyika Yoonse Yabili Bakamboni baJehova bakakambawuka makani mabotu mumajele aamaNazi. Umwi muJuda wakabona Bakamboni baJehova wakati: “Chibindi nchibakalaacho Bakamboni bakasungidwe chakapa kuti ndibone kuti lusyomo lwabo lwakayeeme muMagwalo, eezi zyakapa kuti andime ndibe Kamboni.”
it-2 291
Bufuba-fuba
Bufuba-fuba Bwakukazyania aaJehova. Mupolofita Bbalamu wakatondeezya bufuba-fuba kwiinda mukuyanda kutukila maIsrayeli kuchitila kuti apegwe mali aMwaami wakuMowabbu, Bbalakki. Pesi Jehova wakapa kuti nzyaakali kuyanda kuchita Bbalamu zitazwiidilili pe. Mwaapostolo Petro naakali kwaambuula atala aBbalamu, wakalemba kuti: “Imunyama uutaambauli uunyamuna ntundu wakaambaula ajwi lyamuntu ikulesya makanze aabufwubafwuba aamusinsimi ooyu.” Naakali kwaambuula atala abufuba-fuba bwaBbalamu, mwaapostolo Petro wakabelesya bbala lyachiGrikki liti pa·ra·phro·niʹa ligwisya muzeezo “wakuliyunga.”—2Pe 2:15, 16; My 22:26-31.
Kuyanduula Lubono muJwi lyaLeza
w04 8/1 27 ¶2
Makani Aazwa muBbuku lyaMyeelwe
22:20-22—Nkamboonzi Jehova naakanyemena Bbalamu? Jehova wakabuzizye mupolofita Bbalamu kuti taakeelede kusingaania maIsrayeli. (Myeelwe 22:12) Pesi mupolofita Bbalamu wakayinka abaalumi baBbalakki kabali aamakanze aakuyoosinganya maIsrayeli. Bbalamu wakali kuyanda kubotezya mwaami wakuMowabbu kuchitila kuti ajane zimwi zintu. (2 Petro 2:15, 16; Juda 11) Nikuba chiindi Bbalamu naakabuzigwa kuti alongezye maIsrayeli kutali kuti abasinganie, wakayanda kubotezya mwaami kwiinda mukupa muzeezo wakuti banakazi bakomba Bbaala boongelezye baalumi bachiIsrayeli. (Myeelwe 31:15, 16) Eezi, zyakapa kuti Leza amukalalile Bbalamu nkaambo kakuti wakaleka kuswiilila kuchitila kuti ajane zimwi zintu.
APRIL 26–MAY 2
LUBONO LUZWA MUJWI LYALEZA | MYEELWE 25-26
“Zilachita Na Kuti Muntu Uumwi Atatobelezyi Zichitwa Aabamwi?”
“Amucije Bwaamu”
SIKUTEYA wiinka kubusena nkwakonzya kuyoocha baswi mbayanda. Ulasekka bulisyo aakalobyo akukawaalila mumaanzi. Ulalindila mpawo muswi naalida, uladonsa kalobyo akugwisya muswi.
Bantu balakonzya kuchegwa mbuuli baswi. Muchikozyano, chiindi maIsrayeli nibakali baba afwiifwi kunjila muNyika Yachisyomezyo, bakakkala Mumabuwa akuMowabbu. Mwaami wakuMowabbu wakasyomezya kupa Bbalamu mali nyingi kuti wakonzya kujana nzila yakuti maIsrayeli bataswiilili Leza wabo. Mpawo Bbalamu wakajana nzila yakapa kuti maIsrayeli bataswiilili. Wakabelesya bulisyo bwakeelede. Wakakumbila basimbi bakuMowabbu kuti bayinke kwakali kukkala maIsrayeli kuti bakabeene.—Myeelwe 22:1-7; 31:15, 16; Ciyubunuzyo 2:14.
“Amucije Bwaamu”
Nkamboonzi maIsrayeli biingi nibakeenwa amuzeezo waBbalamu? Nkaambo bakali kuyanda kuzuzikizya zisusi zyabo luzutu alubo bakaluba zintu zibotu Jehova nzyaakabachitilide. Nzyiingi zintu zyakali kukonzya kupa kuti maIsrayeli bakkale kabasyomeka kuli Leza. Wakabagwisya mubuzike kuEgepita, wakabasanina munkanda akubasisya afwiifwi akuNyika Yachisyomezyo. (BaHebrayo 3:12) Nikuba boobo, bakeenwa kwiinda mukuchita bwaamu. Mwaapostolo Pawulu wakalemba kuti: ‘Tutachiti bwaamu mbuuli bamwi mbubakachita bwaamu, chakuti kwakafwa bantu.’—1 BaKorinto 10:8.
Kuyanduula Lubono muJwi lyaLeza
it-1 359 ¶1-2
Mugaano
Kuli nzila zibili zyakali kubelesegwa misyobo yamaIsrayeli niyakali kupegwa nyika. Imwi yakali yakuuma chisolo alubo imwi kwakali kulangwa kuti musyobo ooyo mupati biyeni. Chisolo chakali kugwasya kubona kuti musyobo umwi awumwi wakali kuyookkala kubbazu lili, mbuli kuti umwi musyobo wakali kuyookkala Kunyika na, Kumusanza na Kubuzwezuba na, Kububbila na, mumbali aamulonga na naakuti muzilundu. Jehova nguwe wakali kupa kuti chisolo chiwide kuli, eezi zyakali kugwasya kuti misyobo eeyi itachitilani bbivwe. (Tu 16:33) Kubelesya nzila eeyi kwakali kuyoopa kuti Leza ape musyobo umwi awumwi kweendelana anzibakabuzigwa asyayinakulu Jakkobo naakali waba aafwiifwi kufwa, nzyaakaamba Jakkobo zilembedwe muli Matalikilo 49:1-33.
Chiindi chisolo nichakali kutondeezya kuti umwi musyobo wakali kuyookkala kuli, bakali kubelesya nzila yachibili, chaamba bupati bwamusyobo ooyo. “Mweelede kwaabana nyika mumikwasyi yanu kuti ibe lukono lwanu kwiinda mukuuma cisolo. Kunkamu iijisi bantu banji mweelede kuyungizya lukono, eelyo kunkamu iijisi bantu basyoonto mweelede kucesya lukono. Busena bwaumwi aumwi oobo ikwawida cisolo, buyooba lukono lwakwe.” (My 33:54) Nibakali kuziba kuti umwi awumwi musyobo wakali kuyookkala kuli, bakali kupa musyobo ooyo nyika yeendelana alukono ndwayelede kujana. Eezi nzizyo zyakapa kuti chiindi nikwakabonwa kuti musyobo waJuda wakapegwa nyika mpati, bakazoonengela musyobo waSimeyoni limwi bbazu.—Jos 19:9.