Aajanika Makani aaKabbuku Kamuswaangano waBuumi Amulimu Wesu
MAY 3-9
LUBONO LUZWA MUJWI LYALEZA | MYEELWE 27-29
“Tobelezya Chikozyano chaJehova Chakutasaluula”
w13 6/15 10 ¶14
Lumba Jehova Akaambo Kabuntu Bwakwe
Bana basimbi bali 5 bakayinka kuli Mozesi akumubuzya kuti: “Sena izina lyataata lyeelede kufwidilila muciinga cakwe akaambo buyo kakuti tanaakazyala mwana musankwa? Amutupe lukono akati kabanabokwabo ataata.” Mozesi wakabavwiila kuti na: ‘Taakwe mabambe aali boobo pe mumulawu.’ Teembakasandula pe, pesi “wakaatola makani aabo kuli Jehova.” (My 27:2-5) Jehova wakachita biyeni? Wakabuzya Mozesi kuti: “Bana ba Zelofehadi baamba kabotu. Ncobeni weelede kubapa lukono akati kabanabokwabo ausyi, alimwi weelede kubapa lukono lwausyi.” Jehova taakagolela waawo pe. Wakapa kuti kukumbila kwabo kube mumulawu, wakalayilila Mozesi kuti: “Ikuti naa mwaalumi wafwa katajisi mwana musankwa, mweelede kupa lukono lwakwe kumwanaakwe musimbi.” (My. 27:6-8; Jos. 17:1-6) Kuzwa waawo, bana basimbi bamuIsrayeli boonse bakali aapenzi eeli bakatalika kukwabililwa.
w13 6/15 11 ¶15
Lumba Jehova Akaambo Kabuntu Bwakwe
Mabambe aaya akali kutondeezya kuti Jehova ulaaluzyalo akuti tasaluuli pe. Jehova wakabajata munzila yabulemu basimbi aaba bakatalikwe uubagwasya, nzyaakachita zyakagwasya maIsrayeli boonse. (Int. 68:5) Eechi nchiimwi chazyiiyo zyamuBbayibbele chitondeezya kaambo aaka kabotezya kakuti: Jehova ulabagwasya bakombi bakwe boonse katasaluuli.—1 Sam. 16:1-13; Mil. 10:30-35, 44-48.
w13 6/15 11 ¶16
Lumba Jehova Akaambo Kabuntu Bwakwe
Kujana twachitobelezya biyeni chikozyano chaJehova chakutasaluula? Mutalubi kuti, kutasaluula kuswaanizya zintu zibili. Kuti twaba bantu batasaluuli ziyootugwasya kuti tutabasaluuli bamwi. Nisimpe kuti toonse tuyanda kuba bantu bamvwanana aabamwi alubo batasaluuli. Teekuba pe kuti tubone zintu nzitulubizya. Niinzi nzitweelede kuchita kuti tuzibe kuti tulasaluula na naakuti pe? Chiindi Jesu naakali kuyanda kuziba bamwi bantu nzibakali kwaamba atala anguwe, wakabuzya beenzinyina basyomeka kuti: “Ino bantu baamba kuti Mwanaamuntu nguni?” (Mt. 16:13, 14) Andiswe tulakonzya kutobelezya chikozyano chaJesu. Tulakonzya kubuzya mweenzuma ngutusyoma kuti atubuzye kuti tulasaluula na naakuti pe. Kuti wakubuzya kuti uli aakakusaluula, niinzi nzweelede kuchita? Komba kuli Jehova kumubuzya mbulimvwa, kukumbila kuti akugwasye kuti utobelezye chikozyano chakwe chakutasaluula.—Mt. 7:7; Kol. 3:10, 11.
Kuyanduula Lubono muJwi lyaLeza
it-2 528 ¶5
Zituuzyo
Zituuzyo Zinywigwa. Zituuzyo zinywigwa zyakali kupegwa aamwi azimwi zituuzyo, kapati maIsrayeli nibakanjila muNyika Yachisyomezyo. (My 15:2, 5, 8-10) Zituuzyo zinywigwa zyakali kuswaanizya wayini (“cakunywa cikola”) alubo yakali kutilwa aachipayililo. (My 28:7, 14; kozyanisya a Ku 30:9; My 15:10.) Mwaapostolo Pawulu wakalembela maKristu bakuFilipi kuti: “Kuti ndili mbuli cituuzyo cakunywa citilwa acipaizyo alimwi aamulimo uusetekene eezyo lusyomo lwanu nzyolwakamukulwaizya kucita, ndilasekelela alimwi ndilakondwa andinywe nyoonse.” Mulugwalo oolu, Pawulu wakabelesya kanonia mulaka kachituuzyo chinywigwa katondeezya mbaakalipedelede kubelekela bakombinyina. (Flp 2:17) Naakali waba aafwiifwi kufwa, wakalembela Timoteyo kuti: “Nkaambo ndatalika kale kutilwa aacipaililo mbuli cituuzyo cinyugwa, alimwi ciindi cakuti ndaangununwe caswena afwaafwi.”—2Ti 4:6.
MAY 10-16
LUBONO LUZWA MUJWI LYALEZA | MYEELWE 30-31
“Zuzikizya Zikonke Zyako”
it-2 1162
Chikonke
Nchakulipeda Pesi Kuti Chachitwa Chilayandikana. Zikonke zyakali kuchitwa chakuliyandila. Nikuba boobo, kuti muntu wachita chikonke, mulawu wakali kwaamba kuti wakeelede kuchizuzikizya. Muntu woonse wakeelede kuchita zyoonse nzyaakakonka kuti ulazichita alubo taakeelede kuchincha majwi aakwe. (My 30:2; alubo langa Ro 1:31, 32.) Mbukunga nkani yakuchita chikonke yakali kukonzya kunjizya buumi bwamuntu mupenzi, nchicho chipa kuti Bbayibbele lichenjezye bantu bayanda kuchita chimwi chikonke kuti basaangune kuyeeyesesya saansi kabatanasala kuchita chikonke eecho. Mulawu wakali kwaamba kuti: “Ikuti naa wakonka cikonke kuli Jehova . . . Leza wako uyoociyanda kulinduwe; buyo-buyo uyooba amulandu. Pele naa tiiwakonka, tokabi amulandu pe.”—Dt 23:21, 22.
it-2 1162
Chikonke
Nchisyomezyo chakuliyandila chichitwa kuli Leza, pesi chisyomezyo eechi chilayandikana alubo muntu ulakonzya kuchichita kwiinda mukupa chituuzyo naakuti chipo, kuchita umwi mulimu naakuti kulipeda kuleka kuchita zimwi zintu nikuba kazizumizigwa. Bantu bakali kuchita zikonke, bakali kuchita oobo chakuliyandila. MuBbayibbele bbala lyakuti ‘kukonka’ libelesedwe kwaziindi zyiingi, eezi zitondeezya kuti zisyomezyo zyakali kuchitwa zyakali kuyandikana loko. (My 30:2; Mt 5:33) Kuchita chikonke kwakali kozyenie akuchita chizuminano.—Mtl 26:28; 31:44, 53.
w04 8/1 27 ¶3
Makani Aazwa muBbuku lyaMyeelwe
30:6-8—Mwaalumi wachiKristu weelede kuzizumina na zikonke zichitwa aabanakwe? Jehova ulanga chikonke chichitwa aamukombi wakwe umwi awumwi. Muchikozyano, kulipeda kuli Jehova nchikonke chichitwa aamuntu kalaalikke. (Bagalatiya 6:5) Mwaalumi takwe manguzu pe aakukasya banakwe kuti bachite chikonke chili boobu. Pesi eezi tazyaambi kuti mwanakazi weelede kuchita zikonke zikazyania aaBbayibbele pe naakuti kuleka kuchita milimu njayelede kuchitila mulumaakwe.
Kuyanduula Lubono muJwi lyaLeza
it-2 28 ¶1
Jefita
Bantu bakali kukonzya kupedwa kuli Jehova kuti bamubelekele kabali kutente lyakukombela. Alubo bazyali bakali aacheelelo chakusalila bana babo. Samiyele ulaakati kabantu bakasyomezegwa kupedwa kuli Jehova alubo chikonke eechi chakachitwa aabayina katanazyalwa. Chikonke eechi, chakachitwa aaHana wakachitambula Elikkana. Chiindi Samiyele naakalesegwa, Hana wakamutola kutente lyakukombela. Alubo Hana wakayinka aamunyama wakuyoopa chipayizyo. (1Sa 1:11, 22-28; 2:11) Samsoni anguwe wakapedwa kuli Jehova kuti abeleke kali muNaziri.—Bab 13:2-5, 11-14; bona zimwi nguzu nzyaakalaazyo wisi kumwanaakwe musimbi zyaambidwe muli My 30:3-5, 16.
MAY 17-23
LUBONO LUZWA MUJWI LYALEZA | MYEELWE 32-33
“Amubatande ‘Bantu Boonse Bakkala Munyika’”
w10 8/1 23
Mwalizi Na?
‘Masena aakukombela aamumalundu’ aajanika kwaziindi zyiingi muMagwalo aachiHebbrayo niinzi?
Chiindi maIsrayeli nibakali baba aafwiifwi kunjila muNyika Yachisyomezyo, Jehova wakababuzya kuti bakanyonyoone masena woonse ngibakali kukombela bantu bakuKkenani. Wakabalayilila kuti: “Mweelede kubatanda bantu boonse bakkala munyika eeyi kuzwa kubusyu bwanu akunyonyoona zikozyanyo zyabo zyamabwe azyalubulo alimwi akunyonyoona masena aabo aakukombela aamumalundu. (Myeelwe 33:52) Kulakonzeka kuti masena aaya aabukombi bwakubeja akayakilidwe muzilundu, munsi aamisamu naakuti mumadolopo mapati. (1 Bami 14:23; 2 Bami 17:29; Ezekieli 6:3) Kulakonzeka kuti mumasena aaya kwakali zipayililo, minsemu iisalala naakuti mapoolu, zifanikisyo, zyiimikililo zyatununkilizyo azimwi zilaachakuchita abukombi.
w08 2/15 27 ¶5-6
Atwiiye Kuzwa Kukulubizya KwamaIsrayeli
Mazubaano, tuswaana masunko miingi aakozyenie aangibakali kuswaana maIsrayeli. Bantu bamazubaano ambabo bakomba baleza basiyene-siyene. Baswaanizya mali, kuyandisya zyakulikondelezya, basimpuwo muzisobano, zyapolitikisi, bapati bazikombelo abamumpuli. Chimwi aakati kazintu eezi, chilakonzya kupa kuti tuchibikkile maanu kapati mubuumi bwesu. Kumvwanana aabantu batakombi Jehova kulakonzya kupa kuti tutabi aabweenzuma bulikabotu anguwe.
Bakombi baBbaala bakali kubona kachitali chibi pe koonana kutali mumulawu alubo eezi zyakapa kuti maIsrayeli biingi boongelezegwe kuti bachite chibi. Bamwi bakombi baLeza bachichegwa atukole ootu. Muchikozyano, kuti muntu kali kubelesya kkompiyuta nkuuba kuti asaangune kulanga zintu zitali kabotu. Nkinkaako, kuti muKristu walanga zifanikisyo naakuti kubala makani aayetela muzeezo wakoonana, unooli wachita chibi chipati.
it-1 404 ¶2
Kkenani
Joshuwa “kunyina ncaatakacita akati kazintu zyoonse Jehova nzyaakalailila Musa” atala akunyonyoonwa kwabantu bakuKkenani. (Jos 11:15) Pesi maIsrayeli teebakaatobelezya pe malayilile aaya alubo teebakabatanda pe bantu bakuKkenani boonse. Mbukunga bantu bakuKkenani teebakaandwa pe boonse, eezi zyakapa kuti maIsrayeli biingi baliswaanizye aabantu aaba alubo maIsrayeli biingi bakafwa (akaambo kamilandu, kuchita bwaamu akukomba mituni). Kaansinga bakaaswiilila malayilile aaya, nikuli teezyakachitika pe eezi. (My 33:55, 56; Bab 2:1-3, 11-23; In 106:34-43) Jehova wakali wachenjezya maIsrayeli kuti taakali kuyooleka pe kubasubula kuti baliswaanizya aabantu bakuKkenani, bakwatilana aambabo, bakomba baleza babo akuchita zintu nzibakali kuchita. Eezi zyakali kuyoopa kuti ‘batandwe akaambo kakusofwaazya nyika.’—Ku 23:32, 33; 34:12-17; Le 18:26-30; Dt 7:2-5, 25, 26.
Kuyanduula Lubono muJwi lyaLeza
it-1 359 ¶2
Mugaano
Chiindi chisolo nichakali kutondeezya kuti umwi musyobo wakali kuyookkala kuli, bakali kubelesya nzila yachibili, chaamba bupati bwamusyobo ooyo. “Mweelede kwaabana nyika mumikwasyi yanu kuti ibe lukono lwanu kwiinda mukuuma cisolo. Kunkamu iijisi bantu banji mweelede kuyungizya lukono, eelyo kunkamu iijisi bantu basyoonto mweelede kucesya lukono. Busena bwaumwi aumwi oobo ikwawida cisolo, buyooba lukono lwakwe.” (My 33:54) Nibakali kuziba kuti umwi awumwi musyobo wakali kuyookkala kuli, bakali kupa musyobo ooyo nyika yeendelana alukono ndwayelede kujana. Eezi nzizyo zyakapa kuti chiindi nikwakabonwa kuti musyobo waJuda wakapegwa nyika mpati, bakazoonengela musyobo waSimeyoni limwi bbazu.—Jos 19:9.
MAY 24-30
LUBONO LUZWA MUJWI LYALEZA | MYEELWE 34-36
“Jehova Abe Mayubilo Aako”
Ulikuyubila Kuli Jehova Na?
Pesi niinzi chakali kuchitwa kuti muIsrayeli wajaya umwi katayeeyelede? Nikuba kuti wajaya muntu katayeeyelede, pesi wakachili amulandu wakujaya. (Matl. 9:5) Muchiimo chili boobo, sikujaya wakeelede kuchijila kuli umwi wamyuunzi iili 6 yakuyubila. Wakali kukonzya kukwabililwa kuti wachijila kuli umwi wamyuunzi eeyo. Pesi wakeelede kukkala mumuunzi ooyo kusikila mupayizi mupati akafwe.—My. 35:15, 28.
Ulikuyubila Kuli Jehova Na?
Ikuti muIsrayeli wajaya muntu katayeeyelede, wakeelede kuchijila kumuunzi wakuyubila mpawo “aambe makani aakwe mumatwi aabapati bamunzi.” Bapati bamuunzi naa baalu bakeelede kumutambula. (Jos. 20:4) Nikwayinda chiindi, bakali kumubweedezya kulimbabo kuti mulandu wakwe ukalangwe-langwe abaalu bankuko. (Bala Myeelwe 35:24, 25.) Ikuti baalu bakulimbabo babona kuti wajaya muntu katayeeyelede, bakali kumubweedezya kumuunzi wakuyubila.
Ulikuyubila Kuli Jehova Na?
Muntu wajaya umwi katayeeyelede wakali kukonzya kukwabililwa kuti wiinka kumuunzi wakuyubila. Jehova wakaambide kuti myuunzi eeyo, “iyoomubeda cicijilo.” (Jos. 20:2, 3) Jehova taakali kuyanda kuti muntu ooyo abetekwe lubo akaambo kamulandu nguyooyo. Alubo, muntu wakali kuyanda kubweedezya taakali kuzumizigwa pe kunjila mumuunzi wakuyubila kuti ajaye sikubisya. Jehova wakali kumukwabilila sikubisya kuti wayinka kumuunzi wakuyubila. Taakali mbuli muntu uli muntolongo. Wakali kukonzya kuchita imwi milimu, kugwasya bamwi akukomba Jehova muluumuno. Wakali kupona buumi bulikabotu!
Kuyanduula Lubono muJwi lyaLeza
w91 2/15 13 ¶13
Chinunuzyo Chabantu Boonse
Nikuba boobo, chinunuzyo tachibeleki pe kuli Adamu aEva. Mulawu waMozesi wakali kwaamba kuti: “Tamweelede kubweza cinunuzyo cakununuzya mujayi iweelela lufwu.” (Myeelwe 35:31) Adamu taakwe naakeenwa pe, wakachita chibi achaali. (1 Timoteyo 2:14) Bantu boonse bakaba aachibi akaambo kakubisya kwaAdamu alubo nzizyo zipa kuti bafwe. Zilaantanganana kuti Adamu wakali kweelela kufwa nkaambo wakalimaninide, wakasala kutaswiilila Leza achaali. Kaansinga chinunuzyo chilabeleka kuli Adamu zyakali kunookazyania aamalayilile aaJehova aabululami. Chinunuzyo chakapa kuti bana baAdamu banununwe kuzwa kulufu. (Baroma 5:16) Mabambe aaya, akapa kuti chibi chibule manguzu. Jesu ‘wakafwida muntu uuli woonse.’—Bahebrayo 2:9; 2 Bakorinto 5:21; 1 Petro 2:24.
MAY 31–JUNE 6
LUBONO LUZWA MUJWI LYALEZA | DEUTERONOMO 1-2
“Nomubeteka Mwiiminina Leza”
w96 3/15 23 ¶1
Jehova Uyanda Bululami
Baalu bapedwe mulimu wakubeteka muntu wachita chibi chipati mumbungano. (1 Bakorinto 5:12, 13) Chiindi nibabeteka, beelede kuchita oobo munzila yabululami alubo kabatondeezya luzyalo. Pesi kuti muntu ooyo wazumanana kubisya, tayelede kufwidwa luzyalo pe. Mabambe aakugwisya muntu mumbungano teensi akumusubula pe pesi ngakugwasya sikubisya kuti abone kuti zintu nzyachita tazili kabotu pe akuti azileke. (Kozyanisya a Ezekieli 18:23) Chiindi baalu nibabeteka munzila yabululami, baba “mbuli busena bwakutijila muwo.” (Isaya 32:1, 2) Nkinkaako, tabeelede kusaluula pe.—Deuteronomo 1:16, 17.
w02 8/1 9 ¶4
Libombye Kubweendelezi bwaLeza
Nikuba boobo, kubeteka wakali mulimu mupati kwiinda kuziba Mulawu. Akaambo kakutamaninina, baalu bakeelede kuchenjela kuchitila kuti bakonzye kuleka michito imwi yakupapila mbuli kuliyanda, kusaluula abutangazu zyakali kukonzya kubapambanisya kubeteka kwabo. Mozesi wakababuzya kuti: “Tamweelede kusalulula mukubeteka kwanu. Mweelede kubeteka muntu buyo mbubonya mbuli muntu uulemenede. Tamweelede kuyoowa muntu pe, nkaambo nomubeteka mwiiminina Leza.” Nisimpe, babetesi bachiIsrayeli bakali kubetekela Leza. Mulimu ngubakali kubeleka wakali mupati!—Deuteronomo 1:16, 17
Kuyanduula Lubono muJwi lyaLeza
w13 9/15 9 ¶9
Milawu yaJehova Ilasyomeka
Chiindi maIsrayeli nibakatalika kweenda lweendo lulamfu lwakatola minyaka iili 40 kabali kwiinda ‘munkanda iiyoosya,’ Jehova taakabapa malayilile aali aantanganana pe aali atala ambaakali kuyoobazulwida, kubakwabilila akubabikkila maanu. Nikuba boobo, chakwiindulula-yindulula wakatondeezya kuti bakali kukonzya kumusyoma akusyoma malayilile aakwe. Kwiinda mukubelesya musumpuululu wajoba sikati amusumpuululu wamulilo mansiku, Jehova wakayeezya maIsrayeli kuti wakali ambabo naakali kubazulwida mulweendo oolu. (Dt. 1:19; Kul. 40:36-38) Alubo wakabapa zintu zyakuponaazyo. “Zisani zyabo tiizyakazakala alimwi maulu aabo tanaakazimba.” Masimpe, “tiibakabula cintu pe.”—Neh. 9:19-21.
JUNE 7-13
LUBONO LUZWA MUJWI LYALEZA | DEUTERONOMO 3-4
“Milawu yaJehova Itondeezya Busongo Alubo Ililuleme”
it-2 1140 ¶5
Kumvwisisisya
Kubala Jwi lyaLeza akubelesya nzwaazwa aakubala kupa kuti muntu abe aaluzibo kwiinda bayiisi bakwe alubo kupa kuti amvwisisisye kwiinda bakomena. (In 119:99, 100, 130; kozyanisya a Lk 2:46, 47.) Milawu yaLeza igwasya muntu kuti abe musongo akuti amvwisisisye. Chiindi maIsrayeli nibakali kuyooswiilila milawu yaLeza, zimwi zisi zyakali kuyoobabona kuti “mbantu basongo alimwi bamvwisya.” (Dt 4:5-8; In 111:7, 8, 10; kozyanisya a 1Ba 2:3.) Muntu uumvwisisisya ulizi kuti tayelede kusotoka milawu iili muJwi lyaLeza, uleezya kupona kweendelana amilawu eeyo alubo nga wakomba kuli Leza kakumbila kuti amugwasye. (In 119:169) Uzumizya Jwi lyaLeza kuti limusike aamoyo (Mt 13:19-23), nzyaabala uzilemba mumoyo wakwe (Tu 3:3-6; 7:1-4) alubo nga wasaanguna kuzonda “nzila zyoonse zitaluzi” (In 119:104). Nikuba Mwana aaLeza, naakali aanyika wakatondeezya kuti ulamvwisisisya nkaambo taakwe naakakaka kujeegwa munzila iichisa akaambo kakuti Magwalo akali kutondeezya kuti wakeelede kufwa munzila eeyi kuti azuzikizigwe.—Mt 26:51-54.
w99 11/1 20 ¶6-7
Kupa
Nzyaakamvwa anzyaakabona zyakamugambya mwanakazi ooyu zyakapa kuti asandule kuti: “Bali acoolwe bantu bako alimwi bali acoolwe babelesi bako ibaima kumbele lyako lyoonse kabaswiilila busongo bwako!”. (1 Bami 10:4-8) Nikuba kuti babelesi baSolomoni bakalinotede pesi mwaami mwanakazi ooyu taakali kwaamba kuti bunoti oobu mbubo bwakali kupa kuti babotelwe. Pesi wakali kwaamba kuti babelesi aaba bakalilongezedwe akaambo kakuswiilila busongo bwaSolomoni. Mwaami mwanakazi ooyu nchikozyano chibotu loko kubakombi baJehova babotelwa akaambo kabusongo bwaMulengi abwaMwanaakwe Jesu Kristu!
Kuzwa waawo, mwanakazi mwaami wakazoobuzya Solomoni kuti: “Aatembaulwe Jehova Leza wako.” (1 Bami 10:9) Zilaantanganana kuti wakabona kuti Jehova nguwe wakali kupa kuti Solomoni abe musongo akuti azwidilile. Eezi zileendelana anzyaakali wasyomezya maIsrayeli Jehova kuti baswiilila milawu yakwe. Wakababuzya kuti: “Kucita boobu kulamupa busongo akumvwisya kumeso aabantu ibayoomvwa milawo eeyi yoonse, alimwi bayakwaamba kuti, ‘Masimpe musyobo ooyu mupati, mbantu basongo alimwi bamvwisya.’”—Deuteronomo 4:5-7.
w07 8/1 29 ¶13
Uli “Muvwubi Kuli Leza” Na?
Chiindi Jehova nalongezya bakombi bakwe, chiindi choonse ubapa zintu zibotu loko. (Jakobo 1:17) Muchikozyano, Jehova naakapa maIsrayeli nyika yakukkala, yakali nyika “iikunka buci amukupa.” Nikuba kuti nyika yakuEgepita anjiyo yakali kwaambwa munzila eeyo,pesi nyika Jehova njaakapa maIsrayeli kuli mpuyakasiyene ayakuEgepita. Mozesi wakabuzya maIsrayeli kuti yakali “nyika Jehova Leza wanu njabamba kabotu.” Muliimwi nzila, bakali kukonzya kwiinkilila kunembo kabachita milimu yabo nkaambo Jehova wakali kubabamba. Kufumbwa kuti maIsrayeli kabasyomeka kuli Jehova, bakali kukonzya kulongezegwa anguwe akuba abuumi busumpukide kwiinda bantu bakabazyungulukide. Nisimpe kuti chilongezyo chaJehova “ncecivwubya.”—Myeelwe 16:13; Deuteronomo 4:5-8; 11:8-15.
Kuyanduula Lubono muJwi lyaLeza
w04 9/15 25 ¶3
Makani Aazwa muBbuku lyaDeuteronomo
4:15-20, 23, 24—Mbukunga maIsrayeli bakali kukasigwa kuti bapange zikozyano zibezedwe naakuti zifwalidwe, eezi zyaamba kuti maKristu tabeelede kuba azikozyano zibezedwe na? Peepe. Mulawu ooyu wakali kukasya maIsrayeli kuti batabezi zintu kuchitila kuti bazikombe. Magwalo taakasyi pe kubeza zintu naakuti kupenta zintu kuchitila kuti tubotye maanda.—1 Bami 7:18, 25.
JUNE 14-20
LUBONO LUZWA MUJWI LYALEZA | DEUTERONOMO 5-6
“Amuyiisye Bana Banu Kuti Bayande Jehova”
w05 6/15 20 ¶11
Nibazyali, Amupe Mpuli Zyanu Zintu Ziyandikana
Atala amakani aaya, kulakonzeka kuti taakwe lumwi lugwalo lukonzya kubelesegwa kutali lwa Deuteronomo 6:5-7. Mubale mavesi aaya. Mulugwalo oolu, bazyali basungwaazigwa kuti basaangune kuba aabweenzinyina aJehova, bamuyande akwaabikka mumyoyo majwi aakwe. Eezi zyaamba kuti mweelede kulibala Jwi lyaLeza chiindi choonse akuyeeyesesya atala anzimubala kuchitila kuti mumvwisisisye akuti mumuyande Jehova, njiisyo zyakwe amilawu yakwe. Eezi ziyoopa kuti kasimpe kamuBbayibbele kabe mumyoyo yanu alubo eezi ziyoopa kuti mubotelwe akuti mumuyande loko Jehova. Muyooba azintu zyiingi zibotu nzimuyooyiisya bana banu.—Luka 6:45.
w07 5/15 15-16
Kujana Ndabagwasya Biyeni Bana Bangu Kuti Bajane Lwiiyo Lwachoozyo?
Nzuyanda zilaboneka kutali mumajwi luzutu pesi amuzintu nzuchita. (Baroma 2:21, 22) Bana bayiya zintu zichitwa aabazyali babo. Chiindi chiingi zintu ziyandwa aabazyali nzizyo zinga zyazooyandwa aabana babo. Kuti kuyanda Jehova amoyo wako woonse, bana bako balazibona. Bana balakonzya kuzibona kuti uyandisya kubala Bbayibbele. Alubo balakonzya kuzibona kuti ubikka Bwaami mubusena bwaakusaanguna mubuumi bwako. (Matayo 6:33) Kuti kukkala kunjila miswaangano akukambawuka, bayoozibona kuti zintu zyamubukombi uzibona kaziyandikana loko.—Matayo 28:19, 20; Bahebrayo 10:24, 25.
w05 6/15 21 ¶14
Nibazyali, Amupe Mpuli Zyanu Zintu Ziyandikana
Kweendelana ambulyaamba bbuku lyaDeuteronomo 6:7, kuli ziindi zyiingi nibazyali nimukonzya kwaambuula makani aamubukombi abana banu. Kufumbwa kamuli mulweendo, kamuli kuchita imwi milimu yaang’nda naakuti kulyookezya, mulakonzya kujana chiindi chakuyiisya bana banu zintu zyamubukombi. Pesi eezi tazyaambi kuti mweelede kukkala kamuyiisya bana banu atala aBbayibbele luzutu. Pesi mulakonzya kuzuwa amwi makani aayaka. Muchikozyanyo, magazini yaAmubuke! ilaazimwi zyiiyo zilaamitwe iisiyene-siyene. Zyiiyo eezi zilakonzya kumugwasya kuti mukonzye kwaambuula atala abanyama mbaakalenga Jehova, masena aayebeka amaponeno aabantu. Eezi zilakonzya kugwasya bana kuti babe aachiyandisyo chakubala mabbuku agwisigwa aamuzike uusyomekede.—Matayo 24:45-47.
Kuyanduula Lubono muJwi lyaLeza
Luyando Abululami Muchiindi ChamaIsrayeli
Zyiiyo: Jehova ubona zyiingi kumuntu kutali mbaboneka aanze luzutu. Ulatubona mbutubede choonzyo mumoyo. (1 Sam. 16:7) Taakwe mizeezo, mbutulimvwa naakuti michito njatakonzyi kubona. Ulazibona zibotu nzituchita alubo utusungwaazya kuti katuzichita chiindi choonse. Pesi uyanda kuti tubone akutantamuka mizeezo mibi kayitanaba michito mibi.—2 Mak. 16:9; Mt. 5:27-30.
JUNE 21-27
LUBONO LUZWA MUJWI LYALEZA | DEUTERONOMO 7-8
“Mutakabi Nomukwatana Ambabo Pe”
w12 7/1 29 ¶2
Nkamboonzi Jehova Naakalayilila Kuti Bakombi Bakwe Bakwate Mumwaami Luzutu?
Jehova wakalizi kuti Saatani uyanda kuti bakombi baLeza bakombe baleza bakubeja. Eezi nzizyo zyakapa kuti Jehova achenjezye maIsrayeli kuti bantu batandikombi “bayoopa kuti bana banu baleke kunditobela akutalika kukomba baleza bambi.” Eezi zyakali kuswaanizya zintu zyiingi. Chiindi maIsrayeli nibakali kuyookomba bamwi baleza, teebakali kuyooba aabweenzinyina bulikabotu aLeza alubo Jehova taakali kuyoobakwabilila pe. Eezi zyakali kuyoopa kuti basinkondonyina babazunde. Kaansinga eezi zyakachitika, nikuli Mesiya wakasyomezedwe taakazyalwa pe. Zilaantanganana kuti Saatani wakali kuyanda koongelezya maIsrayeli kuti bakwate bantu bayimwi misyobo.
w15 3/15 30-31
Mulawu Wakukwata “Buyo mu Mwami” Uchibeleka Na Mazubaano?
Nikuba boobo, Jehova wakapa kuti malayilile aali atala akukwata naa kukwatwa biyo muMwaami alembwe muJwi lyakwe. Nkamboonzi? Nkaambo ulizizi zintu zikonzya kubagwasya bantu bakwe. Tayandi kuti bakombi bakwe bakwabililwe kumapenzi aba akaambo kakuchita zintu chabufuba-fuba, pesi uyanda kuti babotelwe. Mumazuba aaNehemiya, chiindi maJuda nibakali kukwatana abamuzwakule ibatakali kukomba Jehova, Nehemiya wakaambuula atala achikozyano chibi chaSolomoni. Nikuba kuti Solomoni “wakali kuyandwa kuli Leza wakwe,. . . bamakaintu beenzu bakamupa kubisya.” (Neh. 13:23-26) Aboobo, kutegwa bakombi bakwe bagwasigwe, Leza wakalayilila kuti katukwatana biyo abakombi bakasimpe. (Int. 19:7-10; Is. 48:17,18) MaKristu bakasimpe balamulumba alubo bayanda kuswiilila malayilile aakwe akaambo kakuti ulabayanda. Aboobo, kwiinda mukulibombya kuli Leza mbuli Mweendelezi, batondeezya kuti Mweendelezi waNyika yoonse.—Tus. 1:5.
w15 8/15 26 ¶12
Sala Beenzinyokwe Balikabotu Mumazubaano Aakumamanino
Kwaamba choonzyo, maKristu batakwete naakuti batakwetwe bayanda kukwata naakuti kukwatwa beelede kusala beenzinyina balikabotu. Jwi lyaLeza litupa lulayo lwakuti: “Mutanjili mujoko lyomwe abantu batasyomi. Nkaambo ino bululami buswaangene buti abubi? Naa, ino mumuni uswaangene buti amudima?” (2Kor. 6:14) Bbayibbele lilaya bakombi baLeza bayanduula wakukwatanaawe kuti beelede kukwata naakuti kukwatwa “buyo mu Mwami,” eezi zyaamba kuti beelede kukwatana aamukombi waJehova wakalipeda akubbabbatizigwa alubo uupona kweendelana anjiisyo zyamuMagwalo. (1Kor. 7:39) Kwiinda mukukwatana buyo abakombinyina, maKristu bajana beenzinyina balipedelede kuli Jehova alubo babagwasya kuti bazumanane kusyomeka kulinguwe.
Kuyanduula Lubono muJwi lyaLeza
w04 2/1 13 ¶4
Jehova Ulatupa Nzituyanda Buzuba Abuzuba
Nkombyo zyesu zyakukumbila chakulya chabuzuba zyeelede kutuyeezya kuti chakulya chamubukombi chilayandikana. Nikuba kuti yakali mujeede nzala akaambo kakuliimya kwachiindi chilamfu, Jesu wakamukakila Saatani naakamusunka kuti asandule mabwe kuti abe chinkwa. Wakati: “Kulilembedwe kuti: ‘Muntu teelede kuponena acinkwa cilikke pe, pele weelede kuponena amajwi oonse aazwa kumulomo wa Jehova.’” (Matayo 4:4) Jesu wakazubulula majwi aamupolofita Mozesi, ooyo wakabuzya maIsrayeli kuti: “[Jehova] wakamubombya akumulekela kuti mufwe nzala mpoonya wakamusanina mana, cakulya eeco nywebo alimwi abamauso ncomwatakazyi, kutegwa amuzyibye kuti teensi cinkwa cilikke ncaponena muntu, pele ulapona amajwi oonse aazwa kumulomo wa Jehova.” (Deuteronomo 8:3) Nzila Jehova njaakali kubapa mana maIsrayeli tiiyakabagwasya kuti bajane chakulya chakumubili luzutu, pesi yakabagwasya kuti bajane zyiiyo zyamubukombi. Chimwi chiiyo chamubukombi nchibakajana nchakuti bakeelede bakeelede kubweza mana yabuzuba bumwi. Kuti babweza nyingi, mana yakali kutalika kununka akuzwa nkonye. (Kulonga 16:4, 20) Pesi teeyakali kupambanika pe mubuzuba bwachi 6 nibakeelede kubweza mana nyingi kuti bakayilye mubuzuba bwaSabata. (Kulonga 16:5, 23, 24) Aboobo mana yakali kubayeezya kuti bakeelede kuba bantu baswiilila akuti buumi bwabo tiibwakayeeme buyo aachinkwa pe, pesi kwiinda mumajwi “oonse aazwa kumulomo wa Jehova.”
JUNE 28–JULY 4
LUBONO LUZWA MUJWI LYALEZA | DEUTERONOMO 9-10
“Ino Jehova Leza Wanu Uyanda Nzi Kulindinywe?”
w09 10/1 10 ¶3-4
Jehova Uyanda Kuti Tuchiteenzi?
Niinzi zyeelede kupa kuti tuswiilile Leza? Mozesi wakaamba kamwi kaambo naakati: “[Amuyoowe] Jehova Leza wanu.” (Vesi 12) Kuyoowa ooku teekuyoowa kwakuti ulatusubula pe, pesi nkutondeezya kuti tulamuyanda amilawu yakwe. Kuti katumuyoowa Jehova, tatukooyoochita zintu zimunyemya.
Nkaakali kaambo kapati keelede kupa kuti tuswiilile Leza? Mozesi wakati: ‘Kumuyanda alimwi akumubelekela Jehova Leza wanu amoyo wanu woonse abuumi bwanu boonse.’ (Vesi 12) Kuyanda Leza kuswaanizya zyiingi. Limwi bbuku lyakaamba kuti: “Kuyanda chimwi chintu kuswaanizya zintu nzituchita akaambo kakuti chintu eecho tulachiyanda.” Alubo lyakaamba kuti kuyanda Leza chaamba “kuchita” zintu zitondeezya kuti tulamuyanda. Mulaamwi majwi, kuti katumuyanda Leza tuyoochita zintu zimubotezya.—Tusimpi 27:11.
w09 10/1 10 ¶6
Jehova Uyanda Kuti Tuchiteenzi?
Kuswiilila Jehova kazizwa aansi aamoyo kweeta zilongezyo. Mozesi wakati: ‘Amubambe milawo amalailile aa Jehova ngendimulailila sunu, kuti zintu zimweendele kabotu.’ (Vesi 13) Malayilile woonse Jehova ngatupa agwasya ndiswe. Nkamboonzi nitwaamba oobo? Bbayibbele lyaamba kuti “Leza nduyando.” (1 Johane 4:8) Jehova utupa malayilile aaya kayanda kuti zintu zitweendele kabotu mubuumi. (Isaya 48:17) Kuswiilila malayilile aaJehova kuyootugwasya kuti tutanjili mumapenzi akuti tukapone kukabe kutamani nibwaakweendelezya Bwaami bwakwe.
cl 16 ¶2
Zilachita Na Kuti ‘Tusweene Kuli Leza’
Abrahamu nguumwi wabantu bakali beenzinyina baLeza. Jehova wakaamba kuti Abrahamu ‘mulongwe wangu.’ (Isaya 41:8) Nisimpe kuti Jehova wakali kubona Abrahamu mweenzinyina wachoonzyo. Abrahamu wakaba abweenzinyina buli boobo akaambo kakuti “wakasyoma Jehova.” (Jakobo 2:23) Ambuli sunu, Jehova uyanduula nzila ‘yakuyanda’ aabo bamubelekela chaluyando. (Deuteronomo 10:15) Jwi lyakwe litusungwaazya kuti: “Amuswene kuli Leza, eelyo awalo ulaswena kulindinywe.” (Jakobo 4:8) Mumajwi aaya muli zintu zibili, kutamba achisyomezyo.
Kuyanduula Lubono muJwi lyaLeza
it-1 103
Anakkimu
Musyobo wabantu aaba, bakali mabbabbani bakali kukkala mumalundu akumasena aatandabete aakuKkenani nkwiili kumusanza. Aali chimwi chiindi, bamwi maAnakkimu bakazibinkene loko bakali kukkala kuHebroni bakali Ahimani, Sesayi aTalimayi. (My 13:22) Chiindi basikutwela bali 12 bachiHebrayo nibakabona maAnakkimu kakusaanguna, basikutwela bali 10 bakaamba kuti bantu aaba mbana bamaNefilimu akuti bakali kulibona mbuli “nsozi” kuti balyeezyanisya aambabo. (My 13:28-33; Dt 1:28) Bupati bwabantu aaba bwakali kupa kuti bantu bapati bakozyanisigwe aambabo mbuli bantu bakuEmi akuRefayimu. Manguzu ngibakali aawo akapa kuti kwaambwe kuti: “Nguni uunga walwisya bana ba Anaki?”—Dt 2:10, 11, 20, 21; 9:1-3.