Aajanika Makani aaKabbuku Kamuswaangano waBuumi Amulimu Wesu
JANUARY 3-9
LUBONO LUZWA MUJWI LYALEZA | BABETESI 15-16
“Kuuzya Bamwi Takuli Kabotu Pe”
w12 4/15 8 ¶4
Kuuzya Bamwi Nchitondeezyo Chamazuba Aamamanino
4 Chakusaanguna, atulange-lange nkani yaDelila, mwanakazi wakazooyandwa aaMubetesi Samsoni. Samsoni wakalwana aamaFilisti kalwanina bakombi baLeza. Kulakonzeka kuti baami bamaFilisti bali 5 bakabona kuti Delila tamuyandi kazizwaansi aamoyo pe Samsoni, mpawo bakamupa chisinkamulomo chakuti aambe nkwaakali kujana manguzu kuchitila kuti bamujeye. Delila wakachitambula chisinkamulomo eecho, mpawo wakeezya kumubuzisisya Samsoni pesi taakwe naakazwidilila pe kwaziindi zitatu. Akaambo kakuti “buzuba abuzuba [Delila] wakali kumukatazya amajwi aakwe alimwi akumusungilizya,” kumamanino “moyo [waSamsoni] wakapenga calufwu.” Samsoni wakabuzya Delila kuti masusu ngawo aakali kumupa manguzu, nkinkaako manguzu aakwe akali kumana kuti wagelwa. Mbaakaziziba luzutu, Delila wakagela masusu aaSamsoni chiindi naakali koona. Kuzwa waawo, wakaakwiita basinkondonyina baSamsoni kuti bamuchite kufumbwa nzibakali kuyanda kumuchita. (Bab. 16:4, 5, 15-21) Nzyaakachita Delila, wakali moyo mubi. Kuyandisya zintu kwakapa kuti Delila awuzye muntu wakali kumuyanda.
w05 1/15 27 ¶5
Makani Aazwa Mubbuku lyaBabetesi
14:16, 17; 16:16. Kusungilizya muntu kwiinda mukulila akumukataazya kulakonzya kupambanisya lukwatano.—Tusimpi 19:13; 21:19.
w12 4/15 11-12 ¶15-16
Kuuzya Bamwi Nchitondeezyo Chamazuba Aamamanino
15 Niinzi chikonzya kugwasya bantu bakwetene kuti basyomeke mulukwatano lwabo? Jwi lyaLeza lyaamba kuti: “Kokkomana amukaintu [naakuti amulumi] wakubukubusi bwako” alubo liyungizya kuti: “Kokkomana mubuumi amukaintu [naakuti amulumi] ngoyandisya.” (Tus. 5:18; Muk. 9:9) Nikuba nibayabukomena, bantu bakwetene beelede “kusyomeka muzintu zyoonse” mulukwatano lwabo. Eezi zyaamba kuti, beelede kuswiilizyania, kujana chiindi chakubaamwi alubo beelede kuzibana kabotu. Beelede kubikkila maanu kulukwatano lwabo akubweenzinyina mbubalaabo aJehova. Kuti bakonzye kuzichita eezi, bantu bakwetene beelede kubala Bbayibbele kabalaamwi, kuya kukukambawuka kabalaamwi alubo beelede kukombela chilongezyo chaJehova kabalaamwi.
KKALA KUSYOMEKA KULI JEHOVA
16 Kulibamwi mumbungano bakachita zibi zipati bakasinswa “canguzu kutegwa bayume mulusyomo.” (Tit. 1:13) Pesi bamwi bakachita zibi zyakapa kuti bagwisigwe mumbungano. Pesi kuli “baabo ibakayiisyigwa andulo,” lulayo lwakabagwasya kuti babambulule bweenzinyina mbubalaabo aJehova. (Heb. 12:11) Kutegwani kuti katuli aabbululu naakuti mweenzuma wakagwisigwa mumbungano? Aawa nga zyayanda kuti tutondeezye kuti tulasyomeka kuli Leza kutali kumuntu. Jehova nga ulikutulanga luzutu kuti abone kuti tulawuswiilila na mulawu wakwe wakutaliswaanizya aamuntu wakagwisigwa mumbungano.—Bala 1 Bakorinto 5:11-13.
Kuyanduula Lubono muJwi lyaLeza
w05 3/15 27 ¶6
Samsoni Wakazwidilila Akaambo Kamanguzu Ngaakapegwa aJehova
Samsoni wakali kubikkila maanu kuchintu chimwi, kulwana maFilisti. Kukkala kung’anda yawuule kuGaza nkwaakachita, kwakali kwakuti akonzye kuzuzikizya makanze aakwe aakulwana basinkondonyina baLeza. Samsoni wakali kuyanda busena bwakukkala mansiku mumuunzi wabasinkondonyina, mpawo busena oobo wakabujana kung’anda yawuule. Samsoni taakalikwe muzeezo wakuchita bwaamu pe. Samsoni wakazwa mung’anda yawuule aakati kamansiku mpawo wakajata zijazyo zyamuunzi aminsende yazyo iibili akuzinyukula kazilaamwi aminkulu. Kuzwa waawo, wakazibweza akuzitola aajulu aachilundu aafwiifwi akuHebroni, kuyoosika kubusena oobu kweendwa makkilomita aasika ku60. Samsoni wakachita zintu eezi akaambo kamanguzu ngaakapedwe aaLeza.—Babetesi 16:1-3.
JANUARY 10-16
LUBONO LUZWA MUJWI LYALEZA | BABETESI 17-19
“Kutaswiilila Milawu yaLeza Kunjizya Mumapenzi”
it-2 390-391
Mika
1. Mwaalumi wakuEfrayimu. Mika wakatyola mulawu wachi8 muMilawu Iili 10 chiindi naakabweza 1 100 mali yansiliva yabanyina. (Ku 20:15) Mika naakazumina mulandu wakwe akubweedezya mali eeyo bayina bakati: “Aaya mali aansiliva aali mujanza lyangu ndilaapa kuli Jehova kuti abe cintu cisalala akaambo kamwanaangu, kutegwa kupangwe cikozyanyo cibezedwe acikozyanyo cifwulidwe. Lino ndiyakwiipilusya nsiliva eeyi kulinduwe.” Banyina bakabweza mali yansiliva iili 200 akupa sikufula mpawo sikufula wakapanga “cikozyanyo cakubeza acikozyanyo cifwulidwe,” mpawo zyakabikkwa mung’anda yaMika. Mika “wakalijisi ŋanda yabaleza” alubo wakapanga kabaki kabupayizi amituni, mpawo wakapa mwanaakwe umwi nguzu zyakuti abe mupayizi wakwe. Nikuba kuti mabambe aaya akali aakutembawula Jehova pesi taakali kabotu pe nkaambo akali kutyola mulawu waLeza wakutantamuka kukomba zibumbwa. (Ku 20:4-6) Alubo zintu eezi wakazichitila aanze aatente lyakukombela alubo taakabelesya bapayizi mbaakasalide pe Jehova. (Bab 17:1-6; Dt 12:1-14) Kuzwa waawo, Mika wakabweza Jonatani mwana waGerisomu wamusyobo waLevi kuti abe mupayizi wakwe. (Bab 18:4, 30) Chakulyeena, naakabona kuti wakkutisikana anzyaakachita, Mika wakati: “Lino ndazyiba kuti Jehova unoondicitila kabotu.” (Bab 17:7-13) Jonatani taakali wabbanti lyaAroni pe alubo taakali kweelela pe kuba mupayizi. Nzyaakachita Mika kwakali kuyungizya kubisya.—My 3:10.
it-2 391 ¶2
Mika
Kuzwa waawo, Mika abaalumi mbaakalaabo bakatobela bana baDani. Nibakabeenzya bana baDani bakabuzya nchibakali kubatobelela, mpawo Mika wakati: “Mwandibwezela baleza bangu mbondakapanga, alimwi awalo mupaizi mwamubweza. Ino ndilasyaala anzi?” Kuzwa waawo, bana baDani bakachenjezya Mika kuti, kuti wazumanana kubatobela kwakali kukonzya kubuka musindo. Mika naakabona kuti bana baDani bakali aamanguzu kwiinda nguwe, wakabweeda kulimbabo. (Bab 18:22-26) Kuzwa waawo, bana baDani bakanyonyoona muunzi waLayisi akuuwumpa mpawo bakawuyakulula lubo kuti bakkale mumo. Jonatani abana bakwe bakaba bapayizi babana baDani, mpawo “bakaimika cikozyanyo cibezedwe eeco Mika ncaakapanga, alimwi cakaliimvwi ooko mazuba oonse ciindi ŋanda ya Leza mwini-mwini [tente lyakukombela] niyakali ku Silo.”—Bab 18:27-31.
Kuyanduula Lubono muJwi lyaLeza
w15 12/15 10 ¶6
Busanduluzi bwaJwi lyaLeza Bwachoonzyo
6 Kuli bukamboni bwiingi butondeezya kuti zina lyaLeza lili kubweedezegwa muBbayibbele. MuBbayibbele lyaBusanduluzi bwa Nyika Mpya lyamu2013, zina lyaLeza lijanika kwaziindi zili 7 216 alubo mundawu zili 6 talijaniki pe muBbayibbele lyamu1984. Mundawu zili 5 mpulyakabweedezegwa mulugwalo lwa 1 Samuele 2:25; 6:3; 10:26; 23:14, 16. Zina eeli lyakabweedezegwa mumavesi aaya akaambo kakuti maBbuku Aakupeta aakajanwa kuLwizi Lufwide aakalembedwe muchiHebrayo muminyaka yiinda ku1 000 akali aazina lyaLeza. Alubo aandawu yachi6 mpulyakabweedezegwa muuli Babetesi 19:18, chiindi nikwakali kuchitwa kuyanduulisisya kwakajanwa kuti zina lyaLeza lyakaliwo mumalembe aachiindi muvesi eeyi.
JANUARY 17-23
LUBONO LUZWA MUJWI LYALEZA | BABETESI 20-21
“Kkala Kubuzya Makani Kuli Jehova”
w11 9/15 32 ¶2
Weelede Kuba Mbuli Fineyasi Kuti Waswaanana Aamapenzi
Chiindi baalumi bakuGibbiya, bamusyobo waBbenjamini nibakavumpila akujaya mwanakasuwa wamuLevi, imwi misyobo yamaIsrayeli yakalwana musyobo waBbenjamini. (Bab. 20:1-11) Imwi misyobo yamaIsrayeli, bakasaanguna kukomba kuli Jehova kabakumbila kuti abagwasya munkondo pesi bakazundwa kwaziindi zibili alubo kwakafwa bantu biingi loko. (Bab. 20:14-25) Bakachinka kabayeeya kuti na nkombyo zyabo taakali kuzimvwa pe Leza? Kubweedezya chibi nkubakachita kwakamubotezya na Jehova?
w05 1/15 27 ¶9
Makani Aazwa Mubbuku lyaBabetesi
20:17-48—Nkamboonzi Jehova naakalekela musyobo waBbenjamini kuti uzunde imwi misyobo yamaIsrayeli nikuba kuti musyobo waBbenjamini nguwo wakali kweelela kusubulwa? Chiindi naakazumizya kuti misyobo yakali kusyomeka ijayigwe munkondo, Jehova wakali kuyanda kuti maIsrayeli bagwisye zintu zibi aakati kabo.
w11 9/15 32 ¶4
Weelede Kuba Mbuli Fineyasi Kuti Waswaanana Aamapenzi
Zituyiisyaanzi eezi? Amwi mapenzi aaba mumbungano alakonzya kuzumanana kaaliwo nikuba kuti baalu babeleka changuzu biyeni kuti baabambulule akukomba kuli Jehova kuti abagwasye. Kuti eezi zyachitika, baalu beelede kuyeeya majwi aaJesu aakuti: “Amuzumanane kulomba [naakuti kukomba], eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa. (Luka 11:9) Nikuba kuti chimwi chiindi nsandulo ngayabonekaanga yanonoka, balangizi beelede kubaachoonzyo chakuti Jehova ulasandula aachiindi chakwe cheelede.
Kuyanduula Lubono muJwi lyaLeza
w14 5/1 11 ¶4-6
Mwalizi Na?
Nkwisyo naakuti ngwiima zyakali kubelesegwa biyeni munkondo chiindi?
Davida wakabelesya nkwisyo kuti ajaye Goliyati. Kulakonzeka kuti Davida wakayiila kubelesya chilwanisyo eechi kachili muniini naakali kweembela.—1 Samuele 17:40-50.
Chiindi muntu naakali kubelesya nkwisyo wakali kwiizyungulusya aajulu aamutwe mpawo wakali kulekela ntambo kumwi kubbazu kuchitila kuti bbwe lizwe aanguzu akululama mpayanda kuuma.
Basikuyanduulisisya bakajana nkwisyo zyiingi loko kuMiddle East nzibakali kubelesya munkondo chiindi. Kulakonzeka kuti masooja bakawuzi kabotu mulimu ooyu, bakali kuwaala nkwisyo zyakali kweenda aaspiidi yamakkilomita aasika ku160 kusika ku240 mu-awa.
JANUARY 24-30
LUBONO LUZWA MUJWI LYALEZA | RUTE 1-2
“Amube Aaluyando Lutamani”
w16.02 14 ¶5
Atutobelezye Chikozyano Chabeenzinyina baJehova
5 Kulakonzeka kuti Rute wakali kunooyeeya kuti muMowabbu mwakali bamumpuli yakwe, baswaanizya bayina abamwi babbululu bakwe bakali kukonzya kumubweza akumupa nzyayanda. Rute wakali wamuMowabbu. Wakalituzi tunsiya-nsiya twamulimbabo, mulaka wakali kwaambuulwa abantu bakkona. Nawomi wakamubuzya kuti zintu eezi taakali kukonzya pe kuyoozijana kuBbetelehemu. Nawomi wakabuzya Rute kuti asyaale muMowabbu. Nawomi wakali kuyoowa kuti taakali kuyookonzya pe kugwasya bamukabana bakwe kuti bakwatwe naakuti bajane aakukkala. Rute wakasala kuchitaanzi? Amubone musiyano uuliwo aakati kaRute aOpa, ooyo wakabweeda “kubantu bakwe akuli baleza bakwe.” (Rut. 1:9-15) Rute wakabweeda kuli baleza bakubeja na bakali kukombwa abakulimbabo? Peepe, taakabweeda pe.
w16.02 14 ¶6
Atutobelezye Chikozyano Chabeenzinyina baJehova
6 Kweelede kuti Rute wakayiya atala aJehova Leza kumulumaakwe naakuti kuli Nawomi. Jehova wakalisiyene abaleza bakuMowabbu. Rute wakalizi kuti wakeelede kuyanda Jehova akumukomba. Rute taakeelede kugolela aakuba aaluzibo luzutu. Rute wakeelede kubweza ntaamu. Wakali kuyoosala kuti Jehova abe Leza wakwe na? Rute wakasala munzila yabusongo. Wakabuzya Nawomi kuti: “Bantu bako bayooba bantu bangu, alimwi Leza wako uyooba Leza wangu.” (Rut. 1:16) Rute wakali kumuyanda Nawomi pesi ngwaakali kuyandisya loko nguJehova. Mukuya kwachiindi, Bbowazi wakalumbayizya Rute akaambo kakuyubila mumababa aaJehova. (Bala Rute 2:12.) Eezi zituyeezya zichitwa aatwana twatuyuni tunga twayuba mumababa aabanyina. (Int. 36:7; 91:1-4) Jehova wakaba mbuli muzyali kuli Rute. Jehova wakamulongezya Rute akaambo kalusyomo lwakwe alubo taakwe naakalisola pe akaambo kakusala nkwaakachita.
Kuyanduula Lubono muJwi lyaLeza
w05 3/1 27 ¶1
Makani Aazwa Mubbuku lyaRute
1:13, 21—Jehova nguwe wakapa kuti buumi bumuyumine na Nawomi? Peepe alubo Nawomi taakwe naakaamba kuti Leza nguwe wakapa kuti aswaanane aamapenzi pe. Naakabona zintu zyoonse zyakamuchitikila, Nawomi wakabonaanga Jehova wakali wamulekelezya. Wakalimvwa katachigwasyi pe. Kuyungizya waawo, muchiindi eecho kuba aabana kwakali kutondeezya kuti muntu walongezegwa aLeza mpawo kutazyala, lwakali lutuko. Nawomi wakayeeya kuti Jehova wakali kumusampula nkaambo taakalikwe bazukulu pe alubo bana bakwe bakali bafwa.
JANUARY 31–FEBRUARY 6
LUBONO LUZWA MUJWI LYALEZA | RUTE 3-4
“Kkala Kuli Aampuwo Mbotu”
w12 10/1 22 ¶5
“Mukaintu Uuli Kabotu Kapati”
Zilaantanganana kuti majwi aasungwaazya ngakaamba Bbowazi akamuumbulizya loko Rute. Wakati: “Jehova akulongezye mwanaangu. Luno lweendo, luyando lwako lutamani walutondezya kapati kwiinda mulweendo lwakusaanguna mukuti tiiwaunka kubalombwana, babe bacete naa bavwubi.” (Rute 3:10) Bbowazi naakati “mulweendo lwakusaanguna” wakali kwaamba chiindi Rute naakatondeezya luyando lutamani kwiinda mukusindikila Nawomi kuIsrayeli kuti akamulanganie. Alubo naakati “luno lweendo” wakali kwaamba nzyaakachita Rute aachiindi eecho. Bbowazi wakabona kuti Rute wakali kukonzya kukwatwa aamuntu uuchili muniini uunotede naakuti uufwaba. Pesi Rute wakali kuyanda kuchitila Nawomi zintu zibotu akupa kuti zina lyawisizyala litafwidilili. Zilaantanganana kuti Bbowazi zyakamujata-jata naakabona kuti Rute taakali kuliyeeya lwakwe pe.
w12 10/1 23 ¶1
“Mukaintu Uuli Kabotu Kapati”
Kulakonzeka kuti Rute wakabotelwa loko naakayeeyesesya atala amajwi ngaakaamba Bbowazi aakuti bantu boonse bakalizi kuti “mukaintu uuli kabotu kapati.” Zilaantanganana kuti chiyandisyo nchaakalaacho Rute chakuziba akukomba Jehova nchicho chakamugwasya kuti abe aampuwo mbotu. Alubo wakatondeezya kuti ulaaluzyalo kuli Nawomi ababbululu baNawomi, kwiinda mukutobelezya zintu nzibakali kuchita atunsiya-nsiya ntwaakatazi pe. Kuti twatobelezya chikozyano chaRute, tuyoobajata kabotu bamwi akulemeka maponeno aabo. Kuti twachita oobo, andiswe tuyooba aampuwo mbotu.
w12 10/1 24 ¶3
“Mukaintu Uuli Kabotu Kapati”
Bbowazi wakazookwata Rute. Bbayibbele lyaamba kuti: “Jehova wakamupa kuti amite mpoonya wakazyala mwana musankwa.” Banakazi bamuBbetelehema bakalongezya Nawomi alubo bakalumbayizya Rute kuti wakachita zintu zibotu loko kuli Nawomi zyiinda zintu zikonzya kuchitwa aabana bachaalumi bali 7. Alubo, mwana waRute wakazooba syaanyinakulu waMwaami mupati Davida. (Rute 4:11-22) Kuzwa waawo, Davida wakazooba syaanyinakulu waJesu Kristu.—Matayo 1:1.
Kuyanduula Lubono muJwi lyaLeza
w05 3/1 29 ¶3
Makani Aazwa Mubbuku lyaRute
4:6—Zichitika biyeni kuti sikunununa ‘anyonyoone’ lukono lwakwe kuti wanununa? Chakusaanguna, kuti muntu wafwaba zyakuti wasika mpawuzya lukono lwanyika yakwe, sikumunununa weelede kugwisya mali yakuula nyika yeendelana aaminyaka iisyeede kuti kube Munyaka Walwaangunuko. (Levitiko 25:25-27) Kuchita oobo kwakali kupa kuti muunda wakwe utaduli. Kuyungizya waawo, mwana waRute ngwaakali kuzoozyala nguwe wakali kuzoobweza lukono lwamuunda kutali babbululu baafwiifwi basikunununa.
FEBRUARY 7-13
LUBONO LUZWA MUJWI LYALEZA | 1 SAMUELE 1–2
“Komba Kubuzya Jehova Zili Mumoyo Wako”
ia 55 ¶12
Wakabuzya Leza Zyakali Mumoyo Wakwe Naakali Kukomba
12 Hana wakabasiila chikozyano chibotu loko bakombi baLeza kunkani yakukomba. Jehova utamba bakombi bakwe kuti baangunuke kwaambuula aanguwe kabamubuzya zintu zili aansi aamyoyo yabo mbuli mbachita mwana kumuzyali wakwe. (Bala Intembauzyo 62:8; 1 Batesalonika 5:17.) Mwaapostolo Petro wakazulwidwa kuti alembe majwi aasungwaazya atala anzitweelede kuchita chiindi nitukomba kuli Jehova, wakati: “Kamuwaala makatazyo aanu oonse kulinguwe, nkaambo ulamubikkila maano.”—1 Pet. 5:7.
w07 3/15 16 ¶4
Hana Mbaakajana Luumuno
Twiiyaanzi kunkani eeyi? Chiindi nitukomba kuli Jehova katumubuzya zintu zitukataazya, tweelede kumubuzya mbutulimvwa akwaamba zyoonse zili aansi aamyoyo yesu. Kuti twabona kuti penzi eelyo tatukonzyi pe kulibambulula, tweelede kulisiila mumaboko aaJehova. Taakwe chimbi pe chiinda aawa.—Tusimpi 3:5, 6.
Kuyanduula Lubono muJwi lyaLeza
w05 3/15 21 ¶5
Makani Aazwa Mubbuku lya1 Samuele
2:10—Nkamboonzi Hana naakakomba kabuzya Jehova kuti ape “nguzu kumwami wakwe” kakuli aachiindi eecho teebakalikwe mwaami pe muIsrayeli? Mulawu wakapedwe maIsrayeli wakali kutondeezya kuti maIsrayeli bakali kuzooba aamwaami. (Deuteronomo 17:14-18) Chiindi naakali waba aafwiifwi kufwa, Jakkobo wakati: “Nkoli yabwami taikazwi kuli Juda.” (Matalikilo 49:10) Kuyungizya waawo, Jehova naakali kwaambuula atala aSara, wakati: “Bami bamisyobo bayoozwa mulinguwe.” (Matalikilo 17:16) Eezi zitondeezya kuti Hana wakali kukombela mwaami wakali kuzooba kunembo.
FEBRUARY 14-20
LUBONO LUZWA MUJWI LYALEZA | 1 SAMUELE 3-5
“Jehova Ulabikkila Maanu”
NguSinguzuzyoonse Pesi Ulatubikkila Maanu
3 Samiyele wakatalisya “kumanina Jehova milimo” kachili muniini loko. (1 Sam. 3:1) Limwi zuba mansiku Samiyele kalede, kwakachitika chimwi chintu chigambya. (Bala 1 Samuele 3:2-10.) Wakamvwa jwi lyakali kumwiita. Samiyele wakabonaanga wakali kwiitwa aMupayizi Mupati Eli nkinkaako wakafwambaana kuya kulinguwe akwaamba kuti: “Mpendi, nkaambo wandiita.” Eli wakaamba kuti taakali kumwiita pe. Samiyele naakayitwa kachitatu, Eli wakaziba kuti nguJehova wakali kwiita Samiyele. Kuzwa waawo, Eli wakabuzya Samiyele mbaakeelede kuvwiila mpawo Samiyele wakachita mbaakabuzigwa. Nkamboonzi Jehova naakataamba kabelesya mungelo kuti nguwe wakali kwiita Samiyele naakasaanguna kumwiita? Bbayibbele talyaambi pe pesi kulakonzeka kuti Jehova wakasala kuchita oobo nkaambo wakali kumubikkila maanu Samiyele kuti atayoowi mbukunga wakachili muniini. Munzilaanzi?
NguSinguzuzyoonse Pesi Ulatubikkila Maanu
4 Bala 1 Samuele 3:11-18. Mulawu waJehova wakali kwaamba kuti bana beelede kulemeka bantu bapati, kapati beendelezi. (Kul. 22:28; Lev. 19:32) Ubonaanga kwakali kuuba na kuli Samiyele kwiinka kuli Eli nibwakacha kuti akamubuzye mulumbe walubeta uuyoosya wakali kuzwa kuli Leza? Peepe! Bbayibbele lyaamba kuti, “Nkabela Samuele wakali kuyoowa kwaambila Eli cilengano.” Leza wakazibikka antanganana kuli Eli kuti nguwe wakali kwiita Samiyele. Eli wakatola ntaamu alubo wakaambila Samiyele kuti aambe nzyakabuzigwa. Eli wakaambila Samiyele kuti: “Utasisi kulindime pe.” Kuzwa waawo, Samiyele “wakamwaambila makani oonse.”
Kuyanduula Lubono muJwi lyaLeza
w05 3/15 21 ¶6
Makani Aazwa Mubbuku lya1 Samuele
3:3—Samiyele wakali kulala muBusena Busalalisya na? Peepe, teemwakali kulala pe. Samiyele wakali muLevi wakatali wabbanti lyabupayizi pe. (1 Makani 6:33-38) Akaambo kazeezi, taakali kuzumizigwa pe ‘kunjila kuti abone zintu zisalala.’ (Myeelwe 4:17-20) Ndawu njaakali kuzumizigwa kunjila Samiyele mpaalubuwa lwatente lyakukombela. Kulakonzeka kuti mpawo mpaakali kulala. Kulakonzeka kuti nikuba Eli anguwe wakali kulala kulilimwi bbazu lyalubuwa. Eezi zitondeezya kuti majwi aakuti “imwakali Bbokesi lya Leza” aamba ndawu yaatente lyakukombela.
FEBRUARY 21-27
LUBONO LUZWA MUJWI LYALEZA | 1 SAMUELE 6-8
“Ngwani Mwaami Wako?”
it-2 163 ¶1
Bwaami bwaLeza
Bakakumbila Mwaami. Kakuli kwasyaala mbichaani kuti basisye minyaka iili 400 kuzwa nibakalonga alubo kakuli kwayinda minyaka yiinda ku800 kuzwa chiindi Jehova naakapanga chizuminano aAbrahamu, maIsrayeli bakakumbila mwaami wakuti abazulwide mbuli mbuzyakali kuchita zimwi zisi. Chikumbizyo chabo chali kutondeezya kuti teebakali kuyanda pe kuti Jehova abeendelezye. (1Sa 8:4-8) Nisimpe kuti bantu bakali kulangilila kuti Leza ulabapa mwaami nkaambo wakali wasyomezya Abrahamu aJakkobo. Bakali aachoonzyo ankani eeyi akaambo kamajwi aakaambwa aaJakkobo kali waba aafwiifwi kufwa ngaakabuzya Juda (Mtl 49:8-10), majwi Jehova ngaakabuzya maIsrayeli nibakazwa aaKulonga (Ku 19:3-6), zyakalembedwe muchizuminano chaMulawu (Dt 17:14, 15), kuswaanizya amulumbe Leza ngwaakabuzya Bbalamu kuti awuwambe (My 24:2-7, 17). Hana, banyina aaSamiyele bakatondeezya kuti bakali aabulangilizi oobu munkombyo yabo. (1Sa 2:7-10) Aachiindi eecho, Jehova taakayinayiyubununa pe nsiswa iili atala aBwaami alubo taakwe naakaamba pe kuti bwakali kuzootalika lili kweendelezya akuti bwakali kuzooba aanyika na naakuti kujulu. Kulilila mwaami nkubakachita maIsrayeli kwakatondeezya kuti balalisumpula.
w11 1/1 27 ¶1
Wakalisimya Nikuba Kuti Wakaswaanana Aabuyumu-yumu
Amubone Jehova mbaakasandula chiindi Samiyele naakakomba kamubuzya atala ankani eeyi, wakati: “Swiilila majwi oonse bantu ngobakwaambila; nkaambo toli nduwe ngobakaka pe, pele ndime ngobakaka kuba mwami wabo.” Makani aaya akamuumbulizya Samiyele nikuba kuti chikumbizyo eechi chakali kusampawula Leza Singuzuzyoonse. Jehova wakabuzya Samiyele kuti achenjezye maIsrayeli atala amapenzi ngibakali kuyooswaana akaambo kakulilila mwaami wanyama. Chiindi Samiyele naakababuzya, bakasandula kabati: “Peepe, swebo tuyanda mwami kuti atweendelezye.” Samiyele wakaswiilila Leza, kwiinda mukunanika mwaami wakali wasalwa aaJehova.—1 Samuele 8:7-19.
w10 1/15 30 ¶9
Bweendelezi bwaJehova Bwasumpulwa
9 Makani aachiindi atondeezya kuti nchenjezyo njaakaamba Jehova njachoonzyo. MaIsrayeli bakaswaanana aamapenzi miingi loko akaambo kakweendelezegwa aamwaami wanyama, kapati chiindi mwaami ooyo naakatali kusyomeka kuli Jehova. Katuchiyeeyede zyakachitikila maIsrayeli, tazitugambyi pe kuti kuzwa chiindi, mfulumende zyabantu zilikukachilwa kumaninsya mapenzi aali munyika. Nisimpe kuti bazyapolitikisi ngabakombela kuti Leza abalongezye kuzintu nzibachita kuti kube luumuno akulyiiba, pesi zilachita na kuti Leza alongezye bantu batayandi kweendelezegwa aanguwe?—Int. 2:10-12.
Kuyanduula Lubono muJwi lyaLeza
w02 4/1 12 ¶13
Nkamboonzi Nitubbabbatizigwa?
13 Kweempwa kweelede kuchitwa katutanabbabbatizigwa kuti tube Bakamboni baJehova. Kweempwa nkulipeda chamoyo woonse nkwachita muntu kuti atobele Jesu Kristu. Muntu ooyo nga waleka michito yakwe mibi njaakali kuchita chiindi akukanza kuchita zintu zibotezya Leza. MuMagwalo aachiHebbrayo aachiGrikki, bbala lyakasandululwa kuti kweempwa lilakonzya kwaamba kusanduka, kuchenguluka naakuti kuchincha. Eezi zyaamba kuchengulukila kuli Leza kuzwa kunzila mbi. (1 Bami 8:33, 34) Kusanduka chaamba kuchita “milimo yeendelana akweempwa.” (Milimo 26:20) Tweelede kuzwa mubukombi bwakubeja akuchita zintu zyeendelana aakuyanda kwaLeza akulipeda chakumaninina kuli Jehova. (Deuteronomo 30:2, 8-10; 1 Samuele 7:3) Kweempwa kupa kuti tuchinche nzila njituyeeyaayo, makanze abuntu bwesu. (Ezekieli 18:31) ‘Tulasanduka’ chiindi nituba aabuntu bupya akusiya buntu bwachiindi butali kabotu.—Milimo 3:19; Baefeso 4:20-24; Bakolose 3:5-14.
FEBRUARY 28–MARCH 6
LUBONO LUZWA MUJWI LYALEZA | 1 SAMUELE 9-11
“Sawulu Wakali Kulibombya Kumasaangunino”
Ba Muntu Uulibombya Alubo Uuzi Mpagolela
11 Atulange-lange zyakachitikila Mwaami Sawulu. Kumasaangunino, wakali kulibombya alubo wakalizi mpakeelede kugolela zyakuti kwakamuyumina kutambula mulimu wakuba mwaami. (1 Sam. 9:21; 10:20-22) Pesi mukuya kwachiindi Sawulu wakasaanguna kulisumpula. Wakasaanguna kutondeezya buntu oobu bubi naakaba mwaami. Ali chimwi chiindi wakakachilwa kuba amoyo mulamfu naakali kulindila mupolofita Samiyele. Sawulu wakakachilwa kusyoma kuti Jehova wakali kuyoogwasya maIsrayeli zyakuti wakawumpa chipayizyo nikuba kuti taakali kuzumizigwa pe. Eezi zyakapa kuti Jehova amukake mpawo mukuya kwachiindi wakamunyeya bwaami. (1 Sam. 13:8-14) Chikozyano eechi chituyiisya kuti tatweelede kulisumpula pe.
w14 3/15 9 ¶8
Mbutukonzya Kuzumanana Kuba Aamuuya Wakulipeda
8 Mwaami Sawulu nchikozyano chilikabotu kulindiswe chitondeezya kulisumpula mbukumana muuya wakulipeda. Naakaba mwaami Sawulu wakali kulibombya. (1 Sam. 9:21) Sawulu wakakaka kusubula maIsrayeli bakaambuula zintu zitali kabotu atala abwaami bwakwe, nikuba kuti wakali aamanguzu aakubasubula akaambo kachuuno nchaakapedwe aLeza. (1 Sam. 10:27) Mwaami Sawulu wakazumina kuzulwidwa aamuuya uusalala chiindi naakali kulwana aabantu bakuAmoni, mpawo wakazunda munkondo eeyo. Kuzwa waawo, Sawulu wakalibombya kwiinda mukulumbayizya Jehova kuti nguwe wakapa kuti bazunde.—1 Sam. 11:6, 11-13.
w95 12/15 10 ¶1
Bantu bakuAmoni Bakalyeetela Mapenzi Kunze Kwakuti Bafwidwe Luzyalo
Bantu bakuAmoni bakayindulula lubo kulyeetela mapenzi kunze kwakuti Jehova abafwide luzyalo. Jehova taakakulanga aameso luzutu pe kuyoosezya kutali kabotu. Bbayibbele lyaamba kuti: “Lino muuya wa Leza wakamupa nguzu Saulo ciindi naakamvwa majwi aaya [aaNahasi], alimwi wakanyema kapati.” Kazulwidwa aamuuya uusalala, Sawulu wakabungania baalumi basinkondo bali 330 000 bakalwana aabantu bakuAmoni zyakuti “kunyina bantu bobilo bakasyaala antoomwe.”—1 Samuele 11:6, 11.
Kuyanduula Lubono muJwi lyaLeza
w05 3/15 22 ¶8
Makani Aazwa Mubbuku lya1 Samuele
9:9—Majwi aakuti “muntu uutegwa musinsimi mazuba aano, kaindi wakali kwiitwa kuti muntu uubona zyakumbele” atondeezyaanzi? Majwi aaya atondeezya kuti chiindi bapolofita nibakali kuyobuzibikana muchiindi chakapona Samiyele amuchiindi chabaami bamaIsrayeli, bbala lyakuti “muntu uubona zyakumbele” lyakalyidwa busena abbala lyakuti “musinsimi.” Samiyele nguwe uuwambwa kuti ngwakusaanguna mumulongo wamapolofita.—Milimo 3:24.