Aajanika Makani aaKabbuku Kamuswaangano waBuumi Amulimu Wesu
MARCH 7-13
LUBONO LUZWA MUJWI LYALEZA | 1 SAMUELE 12-13
“Kulisumpula Kupa Kuti Utalemekwi”
w00 8/1 13 ¶17
Kulisumpula Kupa Kuti Utalemekwi
17 Kumasaangunino, zintu nzyaakachita Sawulu zilakonzya kubonekaanga zilikabotu. Kuyungizya aalizeezi, bakombi baLeza “bakali mumapenzi nkaambo bakafwundilizyigwa” alubo bakali kuyoowa akaambo kachiimo chabo. (1 Samuele 13:6, 7) Teekubisya pe kufwambaana kubweza ntaamu chiindi zyiimo nizyabija. Mutalubi kuti, Jehova ulakonzya kubona zili mumoyo alubo ulakonzya kuziba makanze aamuntu. (1 Samuele 16:7) Kulakonzeka kuti kuli buntu butali kabotu mbwaakabona muli Sawulu butalembedwe pe muBbayibbele. Muchikozyano, kulakonzeka kuti Jehova wakabona kuti Sawulu wakakachilwa kubaamoyo mulamfu akaambo kakulisumpula. Alubo kulakonzeka kuti Sawulu wakali kubona kuti tazichiti pe kuti mwaami wachisi chamaIsrayeli choonse alindile kubuzigwa zyakuchita amupolofita wakali wachembaala. Kufumbwa zyakachitika, kunonoka kwaSamiyele kwakapa kuti Sawulu achite zintu zyakazwa mumutwe wakwe akuleka kutobelezya malayilile aamvwisisika ngaakapedwe. Njiili mpindu njaakajana? Samiyele taakabotelwa pe anzyaakachita Sawulu. Samiyele wakamunyemena Sawulu mpawo wakamubuzya kuti: “Bwami bwako tabukazumanani pe . . . nkaambo yebo tiiwatobela ncaakakulailila Jehova.” (1 Samuele 13:13, 14) Eezi zitondeezya aantanganana kuti kulisumpula kwakapa kuti atalemekwi.
w07 6/15 27 ¶8
Jehova Ukubona Kakuyandikana Loko Kuswiilila
8 Lwaano lwaMwaami Sawulu lutondeezya mbukuyandikana kuswiilila. Kumasaangunino, mwaami Sawulu wakali kulibombya nkaambo wakali ‘kulitenga mumeso aakwe mwini.’ Mukuya kwachiindi, kulisumpula akuyeeya kutali kabotu kwakali kwatalika kumweendelezya muzintu zyoonse nzyaakali kusala. (1 Samuele 10:21, 22; 15:17) Kuli chimwi chiindi, Sawulu wakeelede kulwana aamaFilisti. Samiyele wakabuzya mwaami kuti amulindile kuti azoope Jehova chipayizyo akumubuzya amwi malayilile. Nikuba oobo, Samiyele wakanonoka kusika mpawo bantu bakasaanguna kusansaana. Eezi zyakapa kuti Sawulu ‘atuule cipaizyo cuumpwa.’ Ooku kwakali kubisya kupati kuli Jehova. Chiindi Samiyele naakasika, mwaami wakalipa zilitamizyo zyakutaswiilila kwakwe, kwiinda mukwaamba kuti kunonoka nkwaakachita Samiyele kwakapa kuti Sawulu ‘alimvwe keelela’ kutuula chipayizyo chuumpwa kuchitila kuti Jehova abachebe. Sawulu wakakubona kakuyandikana loko kuti ape chipayizyo kwiinda kuti aswiilile malayilile aakuti alindile Samiyele kuti azoope chipayizyo. Samiyele wakamubuzya kuti: “Wacita cabufwubafwuba. Tiiwatobela mulawo wa Jehova Leza wako ngwaakakupa.” Kutaswiilila Jehova nkwaakachita Sawulu kwakapa kuti anyanzigwe bwaami.—1 Samuele 10:8; 13:5-13.
Kuyanduula Lubono muJwi lyaLeza
w11 7/15 13 ¶15
Ulazumina Na Kuzulwidwa aaJehova?
15 Bantu aabo bakali kuyeeya kuti mwaami wanyama ulagwasya na kwiinda Jehova? Kuti bakali kuyeeya oobo, bakali kulyeena! Alubo bakali kukonzya kunjila mumapenzi aameeneeno aaSaatani. Baami banyama bakali kukonzya kupa kuti bakombe zibumbwa. Bantu bakomba zibumbwa balalyeena kwiinda mukuyeeya kuti, baleza baboneka bapangidwe aazisamu naakuti mabwe balagwasya kwiinda Jehova, Leza uutaboneki wakalenga zintu zyoonse. Pesi mbuli mbwaakaamba mwaapostolo Pawulu, zibumbwa ‘taakwe mbuzibede pe.’ (1 Kor. 8:4) Zibumbwa taziboni pe, tazimvwi pe, tazyaambuuli pe nikuba kuchita chimwi chintu. Ulakonzya kuzibona akuzijata pesi kuti wazikomba nga ulikuchita zintu zyabuyo zikweetela mapenzi luzutu.—Int. 115:4-8.
MARCH 14-20
LUBONO LUZWA MUJWI LYALEZA | 1 SAMUELE 14-15
“Kuswiilila Kulayandikana Kwiinda Chipayizyo”
w07 6/15 26 ¶4
Jehova Ukubona Kakuyandikana Loko Kuswiilila
4 Zintu zyoonse nzitulaazyo zyakazwa kuli Jehova, Mulengi wesu. Kuti kakuli boobo, kuli nchitukonzya kumupa na? Iiyi, tulakonzya kumupa chintu chiyandikana loko. Niinzi chintu eecho? Nsandulo tulayijana mumalayilile aaya: “Kosongwaala mwanaangu, ukkomanisye moyo wangu, kutegwa ndikonzye kumuvwiila ooyo uundisampaula.” (Tusimpi 27:11) Chintu nchitukonzya kupa Jehova, nkumuswiilila. Nikuba kuti tulaazyiimo amaponeno aasiyene, kuswiilila kwesu kwaabikka aantanganana manwa aaSaatani Dyabbulosi aakuti bantu tabakonzyi pe kuzumanana kusyomeka kuli Leza chiindi nibali mumapenzi. Eechi nchilongezyo chipati loko!
it-2 521 ¶2
Kuswiilila
Kuswiilila teenkani yakulisalila pe alubo muntu takonzyi pe kumvwanana aLeza kuti kataswiilili. Mbuli Samiyele mbaakabuzya Mwaami Sawulu: “Sena Jehova ulazikkomanina kapati zituuzyo zyuumpwa alimwi azipaizyo kwiinda kuswiilila jwi lya Jehova? Bona! Ikumvwida nkubotu kwiinda cipaizyo, akuswiilila nkubotu kwiinda mafwuta aabagutu.” (1Sa 15:22) Kutaswiilila kutondeezya kuti tulisyomi pe Jwi lyaJehova kuswaanizya anguwe lwakwe kumugama. Muntu uutaswiilili taakwe mpasiyene pe amuntu uuchita zyamyuuya awukomba zibumbwa. (1Sa 15:23; kozyanisya a Ro 6:16.) Kwaambuula amulomo takugwasyi pe kuti kakutakwe michito; kutaswiilila kutondeezya kuti tukwe lusyomo pe naakuti tumulemeki pe muntu wakupa malayilile. (Mt 21:28-32) Bantu bagolela aakumvwa akutambula kasimpe kamuJwi lyaLeza kabatachiti nzilyaamba nga balikulyeena akuyeeya kutagwasyi pe alubo taakwe zilongezyo nzibajana pe. (Jak 1:22-25) Mwana waLeza wakazibikka aantanganana kuti bantu bachita zintu zyeendelana anzyaakalayilila pesi kabazichita munzila iitali kabotu amakanze aatali kabotu, tabakanjili pe muBwaami bwaLeza alubo bayookakwa.—Mt 7:15-23.
Kuyanduula Lubono muJwi lyaLeza
it-1 493
Kufwida luzyalo
Kufwida muntu luzyalo kuti kakuteendelani akuyanda kwaLeza kweeta mapenzi. Zyakachitikila Mwaami Sawulu, zikabikka aantanganana kaambo aaka. Chakasika chiindi chakuti Jehova abeteke maAmalekki, bantu bakasaanguna kulwana maIsrayeli kabachizwaazwa muEgepita. Sawulu wakalayililwa kuti atabafwidi luzyalo pe. Akaambo kakutobela zyaakambwa abantu mbaakali kuzulwida Sawulu wakaleka kuswiilila malayilile ngaakapedwe aaJehova. Eezi zyakapa kuti Jehova amukake Sawulu akumunyanzya chuuno chabwaami. (1Sa 15:2-24) Kuswiilila Jehova kulakonzya kupa kuti muntu atambulike kulinguwe akuti atachiti zintu zyakachitwa aSawulu.
MARCH 21-27
LUBONO LUZWA MUJWI LYALEZA | 1 SAMUELE 16-17
“Nkondo Njiya Jehova”
wp16.5 11 ¶2-3
“Nkondo Njiya Jehova”
Davida wakayeezya Sawulu zyakachitika chiindi naakalwana aamulavu abbeya. Wakali kulisumpula na Davida? Peepe. Davida wakalizi kuti niinzi chakamugwasya kuti azunde banyama aaba. Wakaamba kuti: “Jehova, iwakandivwuna kumala aasyuumbwa aacibbeya ngonguwe uutiindivwune kujanza lyamu Filisiti ooyu.” Kuzwa waawo, Sawulu wakasandula Davida kati: “Mbubo koya, Jehova abe anduwe.”—1 Samuele 17:37.
Ulayanda na kubaalusyomo luli mbuli lwaDavida? Weelede kuziba kuti, lusyomo lwaDavida teelwakali mumizeezo pe naakuti kulombozya luzutu. Davida wakali aalusyomo akaambo kakuti wakamuzi kabotu Leza alubo wakali kuyeeya mbaakamugwasya. Wakalizi kuti Jehova Muvuni akuti ulazizuzikizya zisyomezyo zyakwe. Kuti tube aalusyomo luli boobu, tweelede kuzumanana kwiiya atala aLeza kwiinda mukubala Bbayibbele. Kupona kweendelana anzitubala, kuyoopa kuti tube aalusyomo lusimide.—Bahebrayo 11:1.
wp16.5 11-12
“Nkondo Njiya Jehova”
Nsandulo yaDavida ichitondeezya kuti wakali aalusyomo lusimide nikuba mazubaano. Amuyeeyele Davida kalikubuzya Goliyati kuti: “Yebo waboola kulindime apanga, sumo amuumba, pele mebo ndiboola kulinduwe muzina lya Jehova wamakamu, Leza wabasikalumamba bana Israyeli, ooyo ngoosampaula.” Davida wakalizi kuti nguzu zyamuntu azilwanisyo zipangwa aabantu tazigwasyi pe. Goliyati wakasampawula Jehova Leza alubo Jehova wakeelede kunjilila. Mbuli mbakaamba Davida, “nkondo njiya Jehova.”—1 Samuele 17:45-47.
Davida wakalizibwene kuti Goliyati ndibbabbani akuti ulaazilwanisyo. Pesi eezi teezyakapa kuti Davida amane manguzu pe akuyoowa. Davida taakaba mbuli Sawulu amasooja bamaIsrayeli pe. Davida taakalyeezyanisya aaGoliyati pe. Pesi wakayezyanisya Goliyati aJehova. Naakali kwiimikila Goliyati wakali mulamfu loko kwiinda bamwi baalumi, pesi wakali mupati biyeni kuti twamweezyanisya aaSinguzuzyoonse? Mbuli bantu boonse, wakali mbuli kanyenyeene zyakuti Jehova wakali kuyanda kumujaya!
wp16.5 12 ¶4
“Nkondo Njiya Jehova”
Mazubaano, bakombi baLeza tabachiinki pe kunkondo. Chiindi eecho chakayinda. (Matayo 26:52) Pesi, tweelede kutobelezya lusyomo lwaDavida. Tweelede kusyoma kuti Jehova mpali choonzyo mbuli zyakali kuchitwa aaDavida alubo tweelede kukomba nguwe alikke. Chimwi chiindi, tulakonzya kubonaanga mapenzi eesu atukomenena loko, pesi mapenzi aayo taakwe mbaabede pe kuti twaayezyanisya aanguzu nzyalaazyo Jehova. Kuti twakomba Jehova akumusyoma mbuli mbaakali kuchita Davida, taakwe buyumu-yumu, naakuti penzi likonzya kutumana manguzu. Taakwe chintu chikachila Jehova pe!
Kuyanduula Lubono muJwi lyaLeza
it-2 871-872
Sawulu
Muuya waJehova wakazwa muli Sawulu chiindi Davida naakananikwa kuti azoobe mwaami wamaIsrayeli. Kuzwa aachiindi eecho, kwakamusikila “muuya mubi kuzwa kuli Jehova iwakamupenzya.” Chiindi Jehova naakagwisya muuya wakwe aali Sawulu, wakapa kuti muuya mubi umunjile Sawulu zyakuti wakapa kuti abule luumuno lwamumizeezo akuti asaangune kuyeeya munzila iitali kabotu. Kutaswiilila Jehova nkwaakachita Sawulu, kwakatondeezya aantanganana kuti, zintu zyakali mumizeezo amumoyo wakwe teezyakali kabotu pe alubo eezi zyakapa kuti muuya waLeza utachimukwabilili pe Sawulu. Akaambo kakuti Jehova wakazumizya “muuya mubi” kuti unjile muli Sawulu akumupenzya, nzizyo zipa kuti kwaambwe kuti “muuya mubi kuzwa kuli Jehova.” Alubo babelesi baSawulu bakali kwaamba kuti “muuya mubi uuzwa kuli Leza.”—1Sa 16:14-23; 17:15.
MARCH 28–APRIL 3
LUBONO LUZWA MUJWI LYALEZA | 1 SAMUELE 18-19
“Kkala Kulibombya Nikuba Kuti Wazwidilila”
w04 4/1 15 ¶4
Zumanana Kuzulwidwa Amuuya Uusalala Zyiimo Nizyachincha
4 Chakali chaba aafwiifwi chiindi chakuti mweembeli wachiniini abaampuwo. Wakakumbilwa kuti kayinka kumwaami kuti akamubelekele akuti kamuumina kantimbwa. Wakajeya Goliyati bbabbani lyakali kuyoowegwa aamasooja bamaIsrayeli. Davida wakazunda maFilisti. Bantu bakamuyanda loko. Bakapanga nyimbo zyakumulumbayizya. Umwi sikupa lulayo waMwaami Sawulu wakapandulula Davida kuti ‘ulicibwene kumutwe kulizya kantimbwa’ alubo “mwaalumi sicamba alimwi ngusikalumamba singuzu, ulicizyi kubandika kabotu, uleebeka.”—1 Samuele 16:18; 17:23, 24, 45-51; 18:5-7.
Kusiyana Kwabakombi baLeza Abamwi Bantu
6 Bamwi bantu balalisumpula akaambo kampuwo, mbubaboneka, kuziba kwiimba, luzibo lwakuchita milimu isiyene-siyene akuba achuuno chilaajulu. Davida wakali azipo zyoonse zyaambidwe aajulu pesi wakali kulibombya. Naakajaya Goliyati wakapegwa mwana waMwaami Sawulu kuti akwate pesi wakati: “Ino mebo ndimeni? Buumi bwangu buli buti? Awalo mukowa wataata uli buti? Sa ndakonzya kuba mukwe wamwami na?” (1 Sam. 18:18) Niinzi chakagwasya Davida kuti atalisumpuli? Wakalizi kuti Leza ‘wakalibombya’ kuti ajane zilongezyo azintu nzyaakali aazyo. (Int. 113:5-8) Davida wakalizi kuti zintu zyoonse zibotu nzyaakalaazyo wakazipedwe aJehova.—Kozyanisya a1 BaKorinto 4:7.
7 Mazubaano bakombi baJehova baleezya amanguzu woonse kuti balibombye mbuuli mbaakali kuchita Davida. Tuchita oobo akaambo kakuti Jehova talisumpuli pe nikuba kuti Mupati kwiinda zilenge zyoonse. (Int. 18:35) Tweelede kukkala katuyeeya lulayo lwakuti “amulisamike moyo waluzyalo, buuya, lulifwiinsyo, lubombo, abusicamba.” (Kol. 3:12) Alubo luyando “talulikankaizyi, talulisumpuli.” (1 Kor. 13:4) Kuti twalibombya ziyoopa kuti bantu bayande kuziba zyiingi atala aJehova. Mbukunga baalumi batakombi balakonzya kuchincha akaambo kanzila banakazi babo njibalijataayo, mbukubede kuti twalibombya bantu balakonzya kuyanda kuziba zyiingi atala aJehova.—1 Pet. 3:1.
Kuyanduula Lubono muJwi lyaLeza
it-2 695-696
Mupolofita
Chiindi Sawulu naakali kuyanduula Davida kuti amujaye, wakachita “mbuli musinsimi,” kwiinda mukuzapuula zigogo zyakwe alubo “wakoona ooko kali mantanda buzuba oobo boonse amasiku,” mpawo Davida wakachija. (1Sa 19:18–20:1) Bbayibbele litondeezya kuti, teechiindi choonse pe bapolofita nibakali kweenda kabatazweete. Munkani zibili zilembedwe muBbayibbele, kweenda nkubakali kuchita bapolofita kabatazweete kuli nchikwakali kwiiminina. (Is 20:2-4; Mik 1:8-11) Bbayibbele taakwe nilyaamba pe kaambo kakapa kuti Sawulu agwisye zigogo zyakwe.
APRIL 4-10
LUBONO LUZWA MUJWI LYALEZA | 1 SAMUELE 20-22
“Mbukonzya Kuba Mweenzuma Uulikabotu”
Atusimye Bweenzuma Mbutulaabo Abakombima Mamanino Kaatanasika
18 Mazubaano, bakwesu abachizi balikuswaanana abuyumu-yumu. Muchikozyano, bamwi baswaanana amapenzi aali mbuuli nkondo amapenzi aalichitikila. Kuti bakombima baswaanana azyiimo zili boobu, tweelede kubatambula mumaanda eesu. Kuti katukonzya, tweelede kubagwasya kwiinda mukubapa mali pesi toonse tulakonzya kubagwasya kwiinda mukukumbila Jehova munkombyo kuti abagwasye. Kuti twamvwa kuti mukwesu naakuti muchizi uli mubuyumu-yumu, kulakonzya kutuyumina kumubuzya naakuti kumuchitila chimwi chintu. Nikuba boobo, kuli zintu zyiingi nzitukonzya kuchita. Muchikozyano, tulakonzya kujana chiindi chakubaamwi anguwe. Tulakonzya kumuswiilisisya chiindi naali kwaambuula. Kuyungizya waawo, tulakonzya kumubalila lugwalo luumbulizya. (Is. 50:4) Chintu chiyandikana nkutondeezya kuti tulilibambilide kubagwasya beenzuma muchiindi chamapenzi.—Bala Tusimpi 17:17.
w08 2/15 8 ¶7
Yenda Munzila zyaJehova
7 Leza uyanda kuti tusyomeke kubeenzuma. (Tus. 17:17) Jonatani mwana waMwaami Sawulu wakaba mweenzinyina waDavida. Chiindi Jonatani naakamvwa kuti Davida wajaya Goliyati, “Jonatani wakatalika kumuyanda Davida mbubonya mbwaliyanda mwini.” (1 Sam. 18:1, 3) Jonatani wakachenjezya Davida chiindi Sawulu naakali kuyanda kumujaya. Chiindi Davida naakachija, nibakazooswaanana aJonatani bakapangana chizuminano. Sawulu wakasiyande kujaya Jonatani chiindi naakaamba zyaDavida kunembo aakwe, pesi Jonatani aDavida bakazoozumanana kumvwanana. (1 Sam. 20:24-41) Nibakajinka kubonana, Jonatani wakasimya Davida “muli Jehova.”—1 Sam. 23:16-18.
w09 10/15 19 ¶11
Amuzumanane Kumvwanana Munyika Iitakwe Luyando
11 Syomeka. Solomoni wakalemba kuti: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.” (Tus. 17:17) Kweelede kuti chiindi Solomoni naakali kulemba majwi aaya wakali kuyeeya kumvwanana kwaDavida wisi aJonatani. (1 Sam. 18:1) Mwaami Sawulu, wakali kuyanda kuti Jonatani abe nguwe uzooba simulyazina wakwe mubwaami. Pesi Jonatani wakalizi kuti Jehova wakasala Davida kuti azoobe mwaami wamaIsrayeli. Kusiyana aSawulu, Jonatani taakamuchitila bbivwe pe Davida. Taakamunyemena pe Davida chiindi bantu nibakali kumulumbayizya alubo taakawumuna pe chiindi Sawulu naakali kwaamba zintu zitali kabotu atala aDavida. (1 Sam. 20:24-34) Tuli mbuli Jonatani na? Tulabotelwa na kuti beenzuma bapegwa zilongezyo? Kuti baswaana mapenzi tulabawumbulizya na akubagwasya? Kuti twamvwa makani aatali kabotu atala amweenzuma, tulafwambaana na kwaasyoma? Nga twachita mbuli Jonatani na kwiinda mukumwiiminina mweenzuma?
Kuyanduula Lubono muJwi lyaLeza
w05 3/15 24 ¶4
Makani Aazwa Mubbuku lya1 Samuele
21:12, 13. Jehova uyanda kuti tubelesye maanu chiindi nitwaswaanana aazyiimo ziyumu mubuumi. Wakatupa Jwi lyakwe kuti litupe busongo, luzubo alubo litugwasya kuti tubelesye nguzu zyesu zyakuyeeya. (Tusimpi 1:4) Alubo tulakonzya kugwasigwa aabaalu.
APRIL 18-24
LUBONO LUZWA MUJWI LYALEZA | 1 SAMUELE 23-24
“Lindila Jehova”
w04 4/1 16 ¶8
Zumanana Kuzulwidwa Amuuya Uusalala Zyiimo Nizyachincha
8 Davida wakakaka kuchisa Sawulu. Kuba aalusyomo amoyo mulamfu, kwakapa kuti asiye nkani eeyi mumaboko aaJehova. Chiindi mwaami naakazwa mumpangala mwaakabede, Davida wakoompolola akumubuzya kuti: “Jehova abeteke akati kanduwe andime, alimwi Jehova abe nguwe undipilusizya cibi kulinduwe, pele janza lyangu talikookuguma pe.” (1 Samuele 24:12) Nikuba kuti wakalizi kuti Sawulu nguwe wakali kubisya, pesi taakabweedezya chibi kuchibinyina alubo taakwe naakamutukila pe Sawulu naakuti kwaambuula zintu zibi atala anguwe. Kwaziindi zyiingi Davida taakali kuchita zintu zyakali kuzwa mumutwe wakwe pe. Pesi wakali kulindila Jehova kuti alulamike zintu.—1 Samuele 25:32-34; 26:10, 11.
w04 6/1 22-23
Weendelezegwa Azyiimo Zyako Na?
Chiiyo chachitatu, tweelede kulindila Jehova kutali kuchita ziteendelani aamagwalo kuti tubambulule zyiimo zyesu. Sikwiiya Jakobo wakalemba kuti: “Kuliyumya amukulekele kuti kumanizye mulimo wankuko, ikutegwa mulondoke akuzulila mumbazu zyoonse, mutabi acintu cili coonse ncomubula.” (Jakobo 1:4) Tweelede kuzumizya kulisimya kuti “kumanizye mulimo wankuko” kwiinda mukutachita zintu ziteendelani aamagwalo katuyanda kufwaambana kumanisya penzi. Kuchita oobo kuyoopa kuti lusyomo lwesu lusunkwe alubo luyoosima. Josefa aDavida nzikozyano zilikabotu zyakulisimya. Teebakeezya kubambulula mapenzi aabo kwiinda mukuchita zintu zitayandwi aaJehova. Pesi bakalisimya nikuba kuti bakali muzyiimo ziyumu. Bakalindila Jehova kuti abambulule mapenzi aabo, eezi zyakapa kuti bajane zilongezyo. Jehova wakababelesya kuti avune bakombi bakwe.—Matalikilo 41:39-41; 45:5; 2 Samuele 5:4, 5.
Andiswe tulakonzya kuswaanana azyiimo zikonzya kupa kuti tuchite zintu ziteendelani aamagwalo. Muchikozyano, ulikukataazikaana na akaambo kakuti tunamujana pe muntu wakukwatanaawe? Kuti kakuli boobo, toyeelede kuchita zintu zitape kuti utyole mulawu waJehova wakuti mukwatane “buyo mu Mwami.” (1 Bakorinto 7:39) Mulikuswaanana aabuyumu-yumu na mulukwatano lwanu? Muchiindi chakuti mutobelezye muuya wanyika uusumpula kwaanzana akulekana, amubeleke changuzu kuti mubambulule buyumu-yumu. (Malaki 2:16; Baefeso 5:21-33) Ulikukachilwa na kusanina mpuli yako akaambo kapenzi lyakubula mali? Lindila Jehova kwiinda mukutachita zintu zitali kabotu kuti ujane mali. (Intembauzyo 37:25; Bahebrayo 13:18) Atubeleke changuzu kuti tulisimye akuchita zintu zitape kuti Jehova atulongezye. Atulindile Jehova kuti azoomanisye mapenzi munzila iimaninide.—Mika 7:7.
Kuyanduula Lubono muJwi lyaLeza
Utazumizyi Kufumbwa Chintu Kuti Chikukachizye Kuyoojana Bulumbu
11 Kuba aluyando aluzyalo kulakonzya kutugwasya kuti tutabi abbivwe. Jwi lyaLeza lyaamba kuti: “Luyandisyo lulakazika moyo akufwa luzyalo. Luyandisyo talukwe ibbivwe.” (1 Kor. 13:4) Kuti tutabi abbivwe, tweelede kubona bakwesu abachizi mbuli mbababona Leza, nkaambo ubabona mbuli mubili omwe. Eezi ziyoopa kuti tubayande bamwi mbuli mbulyaamba Bbayibbele kuti: “Kuti cizo cimwi calemekwa, zizonyina zyoonse zilakondwa aco.” (1 Kor. 12:16-18, 26) Tweelede kubotelwa kuti bamwi bajana zilongezyo mumbungano. Atulange-lange nzyaakachita Jonatani, mwana waMwaami Sawulu. Davida nakasalwa kuti abe Mwaami, Jonatani taakaba abbivwe pe. Nikuba boobo, wakamusungwaazya Davida. (1 Sam. 23:16-18) Tweelede kutondeezya bamwi luzyalo aluyando mbuli mbaakachita Jonatani?
APRIL 25–MAY 1
LUBONO LUZWA MUJWI LYALEZA | 1 SAMUELE 25-26
“Nga Wachita Zintu Na Kutayeeyede?”
ia 78 ¶10-12
Wakachita Munzila Yabupampu
10 Masooja bakali kubeleka changuzu bakabajata biyeni basimpongo? Basimpongo aaba, bakagwasigwa aamasooja kulangania mbelele zyabo pesi taakwe chintu chibotu pe nchibakabachitila. Masooja aaya, akali mbuli muduli wakali kukwabilila lubono ababelesi baNabbala. (Bala 1 Samuele 25:15, 16.) Mbelele abasimpongo bakali kuswaanana aamapenzi miingi loko. Kwakali banyama biingi loko alubo kumugaano waIsrayeli nkwiili kumusaanza, kwakali masosi miingi aakali kuzwa kulizimwi nyika.
11 Kweelede kuti kwakali kuyumu loko kuti masooja aaya ajane chakulya munkanda. Limwi zuba, Davida wakatuma baalumi bakwe bali 10 kuli Nabbala kuti bakakumbile lugwasyo. Davida wakasala chiindi chili kabotu loko. Chakali chiindi chakugela boya bwambelele alubo bantu muchiindi eecho, bakali aachiyanza chakuchita mapobwe akupana zipo. Alubo Davida wakasala majwi aalikabotu aatondeezya bulemu. Wakabelesya majwi aabulemu mbuli aakuti, ‘mwanaako Davida,’ katondeezya mbaakali kumulemeka Nabbala akaambo kakuti wakali wakomena. Nabbala wakasandula katyeni?—1 Sam. 25:5-8.
12 Wakabila biya akubilila! Mbuli zyaambwa aamulombe waambwa kumasaangunino, wakali kupandulwida Abbigayeli zyakachitika, wakaamba kuti, “wabakalalila kapati.” Nabbala wakabaambwiida atala achinkwa chakwe, maanzi anyama yakwe. Wakasampawula Davida alubo wakamukozyanisya aamubelesi wachija kuli simalelo wakwe. Nabbala wakali kozyenie aSawulu wakali kuzonda Davida. Boonse aaba, taakwe wakali aamaboneno aaJehova pe. Leza wakali kumuyanda Davida alubo taakali kumubona kuti muzike uupapila pe, pesi wakali kumubona kuti uzooba mwaami wamaIsrayeli.—1 Sam. 25:10, 11, 14.
ia 80 ¶18
Wakachita Munzila Yabupampu
18 Wakabweza mulandu ooyo kuti ube wakwe mpawo wakakumbila Davida kuti amulekelele. Abbigayeli wakaamba kuti mulumaakwe wakali dulentule mbuli zyaambwa aazina lyakwe, kulakonzeka kuti wakali kwaamba kuti Davida wakali kukonzya kuubuka kuti wasubula muntu uuli boobo. Wakatondeezya kuti ulamusyoma Davida akuti wakali mwiiminini waJehova alubo wakaamba kuti Davida ulwana “nkondo zya Jehova.” Alubo Abbigayeli wakalichizi chisyomezyo chaJehova chakuti Davida wakali kuzooba mwaami, kwiinda mukwaamba kuti: “Jehova . . . uyoomubikka kuba mweendelezi wabantu bakwe.” Kuyungizya waawo, wakakumbila Davida kuti atachiti zintu zyakali kunoopa kuti abaamulandu waganzi naakuti zintu zyakali kuzoopa kuti azoolilye mumoyo kunembo. (Bala 1 Samuele 25:24-31.) Majwi aabusongo choonzyo aaya!
Kuyanduula Lubono muJwi lyaLeza
ia 80 ¶16
Wakachita Munzila Yabupampu
16 Eezi zyaamba kuti Abbigayeli wakali kupapila busilutwe bwamulumaakwe na? Peepe; mutalubi kuti Nabbala wakachita chabufuba-fuba kwiinda mukumujata munzila iitali kabotu munanike waJehova. Alubo eezi zyakali kukonzya kujezya bantu biingi bamung’anda yaNabbala bakatalikwe mulandu. Kaansinga Abbigayeli taakabweza ntaamu, wakali kunoojatikizigwa mumulandu wamulumaakwe. Munkani eeyi, wakeelede kulibombya kuli Leza kutali kumulumaakwe.