CHIIYO 49
Niinzi Chikonzya Kupa Kuti Mubotelwe Mumpuli?—Chipanzi 1
Bantu bachikwatana-kwatana nga balangilila kuti banobotelwa chiindi choonse mbuli mbubabotelwa mubuzuba nibachada. Alino balakonzya kubotelwa. MaKristu babaachiindi chilamfu kabakwetene alubo babelesya malayilile amuBbayibbele balazumina kuti eezi zilakonzeka.
1. Bbayibbele lyaamba kuti niinzi zyeelede kuchitwa aamwalumi?
Jehova wakasala mwaalumi kuti abe mutwe wampuli. (Bala Baefeso 5:23.) Jehova ulangilila kuti mwaalumi asale zintu zikonzya kugwasya mpuli yakwe. Bbayibbele lisungwazya baalumi kuti: “Amuzumanane kubayanda bakaintu banu.” (Baefeso 5:25) Eezi zyaambaanzi? Mwaalumi ulaaluyando umujata kabotu mwanakazi wakwe nibali aang’anda anibali abantu biingi. Ulamukwabilila mwanakazaakwe kuzintu zikonzya kumuchisa alubo ubeleka changuzu kuti amupe zintu zyoonse nzyayanda. (1 Timoteyo 5:8) Kwiinda zyoonse ulamugwasya muzintu zyabukombi. (Matayo 4:4) Muchikozyano weelede kukomba akubala Bbayibbele kalaamwi amwanakazi wakwe. Kuti mwaalumi wamujata kabotu mwanakazi wakwe, ulaba abweenzinyina bulikabotu aJehova.—Bala 1 Petro 3:7.
2. Bbayibbele lyaamba kuti niinzi zyeelede kuchitwa aamwanakazi?
Jwi lyaLeza lyaamba kuti mwanakazi “weelede kumulemeka kapati mulumaakwe.” (Baefeso 5:33) Kujana wazichita biyeni eezi? Weelede kuyeeya atala abuntu bubotu mbwalaabo mulumaakwe akubeleka changuzu nkwachita kuti abape nzibayanda mumpuli. Ulakonzya kutondeezya kuti ulamulemeka kwiinda mukubelekelaamwi muzintu zisalwa aamulumaakwe. Alubo weelede kwaambuula zintu zilikabotu atala anguwe nikuba katakombi.
3. Niinzi zikonzya kugwasya bakwetene kuti basimye lukwatano lwabo?
Bbayibbele nilyaambuula atala abantu bayanda kukwatana, litii: “Aaba bobilo bayooba mubili omwe.” (Matayo 19:5) Eezi zyaamba kuti tabeelede kuzumizya chimwi chintu kuti chibaanzaanie. Bachita oobo kwiinda mukujana chiindi chakubaamwi kuti babuzyanie nzibayeeya ambubalimvwa. Tabazumizyi kufumbwa chintu naakuti muntu, kutali Jehova kuti ayandikane loko kwiinda muntu ngubakwetenaawe. Babeleka changuzu kuti batantamuke kumvwanana kwiindililide amuntu ngubatakwetenaawe.
YIYA ZYIINGI
Bona malayilile aamuBbayibbele aakonzya kusimya lukwatano lwanu.
4. Nibaalumi amuyande banakazi banu akubalangania
Bbayibbele lyaamba kuti baalumi “beelede kuyanda bakaintu babo mbuli mbobayanda mibili yabo beni.” (Baefeso 5:28, 29) Eezi zyaambaanzi? Mweebele VIDIYO, mpawo musandule mubuzyo uutobela.
Nziizili zintu zyeelede kuchitwa aamwaalumi kuti atondeezye kuti ulamuyanda mwanakazi wakwe?
Bala Bakolose 3:12, mpawo musandule mubuzyo uutobela:
Kujana mwaalumi wabutondeezya biyeni buntu oobu mulukwatano?
5. Nibanakazi, amuyande balumi banu akubalemeka
Bbayibbele lisungwaazya banakazi kuti balemeke balumi babo nikuba kuti bakomba Jehova naakuti pe. Bala 1 Petro 3:1, 2, mpawo musandule mibuzyo iitobela:
Kuti kukwetwe aamuntu uutakombi Jehova, zilaantanganana kuti uyanda kuti azookombe Jehova. Ubonaanga niinzi chikonzya kumuchincha, nkukkala kumukambawukila na naakuti nkulijata munzila iilikabotu alubo komulemeka? Nkamboonzi?
Mwaalumi amwanakazi balakonzya kusala zyakuchita kabalaamwi. Pesi chimwi chiindi, mwanakazi ulakonzya kutazuminana aazyasalwa aamulumaakwe. Muchiimo chili boobu, mwanakazi ulakonzya kwaamba maboneno aakwe munzila yabulemu kazi kuti Jehova wakapa mulumaakwe mulimu wakusala zintu zikonzya kugwasya mpuli. Weelede kubelekelaamwi azyasalwa aamulumaakwe. Kuti wachita oobu, zilapa kuti mumpuli babotelwe. Bala 1 Petro 3:3-5, mpawo musandule mubuzyo uutobela:
Jehova umvwa biyeni kuti wabona mwanakazi kalemeka mulumaakwe?
6. Mulakonzya kuzunda mapenzi aakonzya kuba mulukwatano lwanu
Bantu bakwetene balaachibi. Nkinkaako, bakwetene beelede kubelekelaamwi kuti bazunde mapenzi ngibaswaana. Mweebele VIDIYO, mpawo musandule mibuzyo iitobela.
Niinzi chitondeezya kuti mwaalumi amwanakazi ooyu teebakachili kumvwanana pe?
Niinzi nzibakachita kuti basimye lukwatano lwabo?
Bala 1 Bakorinto 10:24 a Bakolose 3:13. Nimwazwa aakubala vesi imwi ayimwi, musandule mubuzyo uutobela:
Kubelesya malayilile aaya kulusimya biyeni lukwatano?
Bbayibbele lyaamba kuti tweelede kulemekana. Kulemeka muntu kuswaanizya kujata muntu munzila iilikabotu. Bala Baroma 12:10, mpawo musandule mibuzyo iitobela:
Mwaalumi naakuti mwanakazi weelede kulindila muntu ngwakwetenaawe na kuti asaangune kumulemeka? Nkamboonzi?
BAMWI BAAMBA KUTI: “Ime amuntu ngundikwetenaawe tatuchimvwanani pe mbuli mbutwakali kuchita chiindi.”
Kujana wabapandulwida biyeni kuti ubatondeezye kuti Bbayibbele lilakonzya kubagwasya?
CHIFWIINSYO
Mwaalumi amwanakazi balakonzya kubotelwa kuti bayandana, balemekana akuti babelesya malayilile aamuBbayibbele.
Mibuzyo Yakwiindulula
Niinzi zyeelede kuchitwa aamwaalumi kuti babotelwe mulukwatano?
Niinzi zyeelede kuchitwa aamwanakazi kuti babotelwe mulukwatano?
Kuti kuli mulukwatano, ngaali malayilile aamuBbayibbele ngukonzya kubelesya kuti usimye lukwatano lwanu?
YANDUULISISYA
Bona zimwi zikonzya kumugwasya kuti mubotelwe mumpuli.
Mweebele lwiimbo lwakavidiyo lutondeezya zilongezyo nzimukonzya kujana kuti mwabelesya malayilile aaLeza mulukwatano lwanu.
Bona kuti chaambaanzi kulibombya kumulumaako.
“Banakazi Nkamboonzi Nibeelede Kulibombya Kubalumi Babo?” (Ngaziyakulinda, May 15, 2010)
Bona mbulikonzya kumugwasya Bbayibbele mulukwatano lwanu.