Adamu aEva bakaba abana biingi nibakazwa mumuunda waEdeni. Mwanaabo mutaanzi, Kkayini wakaba mulimi mpawo wabili, Abbelo wakaba mweembezi.

Bumwi buzuba Kkayini aAbbelo bakatuula zituuzyo kuli Jehova. Ulizi na kuti chituuzyo niinzi? Nchipo chiyandikana chikonzya kupegwa Leza. Jehova wakachitambula chipo chaAbbelo, pesi taakachitambula pe chaKkayini. Eezi zyakamunyemya loko Kkayini. Pesi Jehova wakachenjezya Kkayini kuti kunyema kwakwe kwakali kuyoopa kuti achite chintu chitali kabotu. Pesi Kkayini taakwe naakaswiilila.

Kuzwa waawo, Kkayini wakabuzya Abbelo kuti: ‘Atwiinke mulusaka.’ Chiindi nibakali abalikke mulusaka, Kkayini wakabukila mwanike wakwe akumujaya. Jehova wakachita biyeni? Wakatanda Kkayini kuti akakkale kule alikke. Kkayini wakakasigwa kuti abweede kunzubo zyakwe.

Kuli nzitwiiya na aawa? Ikuti zintu teezyeenda mbuli mbutuyanda, tulakonzya kunyema. Ikuti twatalika kunyema mpawo bantu bazibona alimwi batuchenjezya, tweelede kuchincha chakufwambaana, tutazumizyi kuti kunyema kukkalilile mumyoyo yesu.

Jehova takamulubi pe Abbelo nkaambo wakali kuyanda Jehova akuti wakali kuchita zintu zibotu. Chiindi Leza aakuchita kuti nyika ibe paradayizi, uyoobusya Abbelo.

Mukuya kwachiindi bantu bakavula munyika. Biingi bakali kuchita zintu zibi. Bamwi bangelo abalabo bakasaanguna kuchita zintu zibi. Bakasiya busena bwabo bwakukkala kujulu akuza anyika. Ulizi na kuti nkamboonzi nibakachita oobo? Nkaambo bakali kuyanda kuba amibili iili mbuli yabantu kuchitila kuti bakwate banakazi.

Bangelo aabo bakaba abana balombe abanakazi aaba. Bana aaba bakali amanguzu miingi alimwi bakali kupenzya bamwi. Bakali kuuma bantu. Jehova taakalekela kuti zintu zyiinkilile kunembo kazili boobu. Nkinkaako, wakayeeya kunyonyoona bantu bachita zintu zibi kabelesya zambangulwe.

Nikuba boobo, kwakali mwaalumi wakasiyene abantu aaba. Wakali kumuyanda Jehova. Zina lyakwe nguNowa. Wakali amwanakazi abana balombe batatu. Mazina aabo nguShemu, Hamu aJafeti alimwi boonse bakalikwete. Jehova wakabuzya Nowa kuti ayake bwaato bupati, kuchitila kuti afutuke kuZambangulwe ampuli yakwe. Bwaato ndibbokesi pati lipangidwe amapulanga likonzya kwiibuka mumaanzi. Alubo, Jehova wakabuzya Nowa kuti anjizye banyama biingi mubwaato kuchitila kuti bafutuke.

Chakufwambaana, Nowa wakasaanguna kuyaka bwaato. Nowa ampuli yakwe zyakabatolela minyaka iili 50 kuyaka bwaato. Bakayaka bwaato kweendelana aJehova mbaakababuzizye. Alubo, Nowa wakali kuchenjezya bantu atala aZambangulwe. Pesi, taakwe nibakamuswiilila pe.

Nibakamaninsya kuyaka bwaato, bakanjila mukati. Atubone kuti niinzi zyakachitika kuzwa waawo.