Kabbokesi Kaniini Kagwasya Bantu Kuti Babe Aalusyomo Lusimide

Bakamboni baJehova balikujana mavidiyo amabbuku kababelesya intaneti kwiinda chiindi. Pesi munyika zyiingi, bakwesu abachizi tabakonzyi pe kunjila aaIntaneti. Bamwi nkubakkala ilakataazya kujata naakuti tayiwope.

Nikuba boobo, bakwesu abachizi biingi baabukonzya kudawuniloda mabbuku amavidiyo kabatakwe Intaneti pe. Bazichita biyeni?

JW Box nkabbokesi kaniini katumizigwa kumbungano zili mundawu Intaneti mwiikataazya. Kabbokesi aaka kali aachintu chijata Intaneti chitegwa router alubo kabbokesi aaka kakabikkwa software abantu babeleka kuDipatimenti lyamaKkompiyuta kuBbeteli alubo kali aamabbuku amavidiyo aajanika aajw.org. Kabbokesi kamwi kalakonzya kuchita mali iisika ku$75 U.S.

KuNg’anda yaBwaami, bakwesu abachizi balakonzya kukkonekita mafooni aabo aakabbokesi aaka alubo badawunilode mabbuku amavidiyo. Nikuba aabaya bali aamafooni aachiindi naakuti aataduli balakonzya kukkonekita. Kuti mbungano kayili kundawu iitakwe intaneti, nga zyachitika biyeni kuti muJW Box mukkale kamuli zintu zipya? Chiindi aachiindi wofesi yamutabi ilatumizya mbungano eeyo USB iinga ilaazintu zipya zyakazwa aajw.org kuti zibikkwe mukabbokesi aaka. Alubo USB iimwi ilakonzya kuchita $4 U.S.

Kabbokesi aaka kakabagwasya biyeni bakwesu? Mukwesu Nathan Adruandra uukkala kuDemocratic Republic of Congo wakaamba kuti: “Ndakali kweezya kwachiindi chilamfu kudawuniloda vidiyo iiti ‘O Jehova, . . . Nduwe Ngondisyoma’ ayakuti Amuyeeye mukaLoti. Pesi teendakazwidilila pe, eezi zyakandimana manguzu. Lino ndaabukonzya kwaadawuniloda mavidiyo aaya afooni yangu alubo zilatugwasya eezi mbuli bazyali kuti tuzwidilile kuyiisya bana besu.”

Mukwesu wakuNigeria uugwasilizya bakwesu abachizi kuti bakonzye kubelesya tubbokesi ootu wakaamba kuti: “Bakwesu abachizi babona tubbokesi ootu kachili chipo chizwa kuli Jehova. Balikubotelwa kuti lino baabukonzya kudawuniloda mabbuku amavidiyo aali muZibelesyo Nzitubelesya Kuyiisya Bantu.”

Kusikila lino, kwakatumizigwa tubbokesi twiinda ku1 700 kubakwesu bali kuAfrica, Oceania, akuSouth America. Alubo kuli kuchitwa mabambe aakuti tukonzye kutumizya tumwi kumbungano zimbi. Ijanika kuli mali yakuchita mulimu ooyu? Izwa kumali iisangwa kumulimu uuchitwa munyika yoonse alubo nyingi yakkona isangwa kakubelesegwa donate.jw.org. Tulamulumba akupa amoyo woonse nkumuchita.