Kuziba mbubede kuyookugwasya kuzunda guwo pati
ZIGWASYA BACHIKULA
9 Kuziba Mbubede
CHAMBAANZI?
Kuziba mbubede kuswaanizya zyiingi kutali zina lyako ambuboneka luzutu. Kuswaanizya mbulijata, nzusyoma abube bwako. Alubo mbubede kuswaanizya zintu zyoonse zili atala anduwe mukati aanze.
NKAMBOONZI NIKUYANDIKANA?
Kuziba mbubede kuyookugwasya kuti ukonzye kupandulwida bamwi nzusyoma kutali kuzumina kweenwa abeenzinyokwe.
“Bantu biingi bali mbuuli zidooli zizwaatikwa zigogo muzintoolo. Tabalisalili nzibayanda kuzwaata pesi basalilwa biya.”—Adrian.
“Ndakaziba mbundikonzya kuchita zilikabotu nikuba kakuli kuyumu kuchita oobo. Eezi zindigwasya kuziba beenzuma balikabotu akaambo kazintu nzibachita anzindichita nindili aabo.”—Courtney.
NZILYAAMBA BBAYIBBELE: “Mutakozyanizigwi aziyanza zyaciindi ecino, pele amusanduke kukucitululwa kwamyoyo yanu.”—BaRoma 12:2.
NZUKONZYA KUCHITA
Ziba mbubede lino ambuyanda kuzooba kwiinda mukulanga-langa zintu nzukonzya kuchita, nzutakonzyi anzusyoma. Ulakonzya kuchita oobo kwiinda mukusandula mibuzyo iitobela.
Nzindikonzya: Nziizili zipo nzindilaazyo? Mpaali mpundichita kabotu? (Muchikozyano, ndilachijata na chiindi? ndilalinyona na? ndili musungu na? ndili abuuya na?) Nziizili nzintu zibotu nzindichita?
ZIKONZYA KUKUGWASYA: Kulakuyumina na kubona zintu zibotu nzuchita? Kumbila muzyali naakuti mweenzinyokwe ngusyoma kuti akubuzye zibotu nzyabona kulinduwe akuti nkamboonzi.
NZILYAAMBA BBAYIBBELE: “Muntu umwi aumwi alingule milimo yakwe mwini, aboobo ulajana cintu cakulikankaizizya mwini, citali camweenzinyina.”—BaGalatiya 6:4.
Nzinditakonzyi: Mbuubuli bube mbundeelede kubambulula? Nziizili zyiimo zindisunka kuti ndichite chibi? Nziizili zyiimo mundeelede kulinyona?
NZILYAAMBA BBAYIBBELE: “Na twaamba kuti tatujisi zibi, twalyeena lwesu tubeni.”—1 Johane 1:8.
Nzindisyoma: Nziizili zyeelelo nzinditobela alubo nkamboonzi? Ndilasyoma na kuti Leza mpali? Niinzi chindipa kusyoma kuti Leza mpali? Nziizili zintu nzindibona kuti tazilikabotu alubo nkamboonzi? Ndisyoma kuti mazuba aali kunembo anooli biyeni?
NZILYAAMBA BBAYIBBELE: “Maanu alakubamba, bupampu bulakutabilila.”—Tusimpi 2:11.