Rebeka Wakali Kuyanda Kubotezya Jehova

Rebeka wakali mwanakazi wakali kuyanda Jehova. Mulumaakwe wakali kutegwa Izaka. Alakwe wakali kumuyanda Jehova. Rebeka wakazibana biyeni aIzaka? Rebeka wakatondezya biyeni kuti wakali kuyanda kubotezya Jehova? Atwiiye zyiingi atalaa nguwe.

Bazyali baIzaka bakali baAbrahamu aSara. Bakali kukkala munyika yaKanana, ooko kwakali bantu bakatali kukomba Jehova. Pesi Abrahamu wakali kuyanda kuti mwanaakwe akwate mwanakazi wakali kukomba Jehova. Wakatuma mubelesi wakwe, kuyeeyelwa kuti nguEliezeri, kuti akayandwiide Izaka mwanakazi kubusena bwakali kutegwa Harani, ooko kwakali kukkala zimwi nzubo zyaAbrahamu.

Eliezeri wakiinka abamwi babelesi baAbrahamu. Lwakali lweendo lulamfu loko. Bakiinka ankamele zili kkumi kazinyampwide cakulya azipo. Lino Eliezeri wakali kuyoomuziba biyeni mwanakazi wakusalila Izaka? Ciindi Eliezeri abamwi babelesi nibakasika kuHarani bakiimikila acikala, nkaambo bakalizi kuti muciindi cifwiifwi bantu bakali kuzoosika kukuteka maanzi mpawaawo. Eliezeri wakakomba kuli Jehova kati: ‘Ikuti ndaambila musimbi kuti, ince maanzi ndinywe alimwi ooyo musimbi aambe kuti nywa nkabela njootekela ankamele zyako azilazyo, mbuboobo mbunjooziba kuti nguwe ngosalide.’

Lino musimbi utegwa Rebeka wakasika kucikala. IBbaibbele lyaamba kuti wakali mubotu loko. Eliezeri wakamukumbila maanzi aakunywa, mpawo Rebeka wakati: ‘Masimpe ndilakupa maanzi, alimwi ndilabweda lubo kuyotekela aankamele zyako.’ Lino koyeeyesya atalaa nzizyo! Inkamele zilaanyota zinywa maanzi miingi loko, nkinkaako Rebeka wakeelede kubweeda twiingi kukuteka maanzi kucikala. Ulimubwene na mucifwanikisyo kalokubeleka canguzu?— Eliezeri wakagamba kubona nzila Jehova njakasandulaayo nkombyo yakwe.

Eliezeri wakapa Rebeka zipo zyiingi zibotu. Rebeka wakaambila Eliezeri ababelesinyina kuti bayinkaamwi kulimbabo. Nibakasika, Eliezeri wakapandulwida mpuli yakuli baRebeka kuti nkamboonzi Abrahamu ncaakamutuminide akuti Jehova wakiisandula biyeni nkombyo yakwe. Impuli yakuli baRebeka yakabotelwa kuti Rebeka akakwatwaa Izaka.

Ubonaanga Rebeka wakalikuyanda na kukwatwaa Izaka?— Rebeka wakalizi kuti Jehova nguwe wakatumide Eliezeri. Ciindi bazyali bakwe nibakamubuzya kuti wakali kuyanda na kuya kuKanana kuti akakwatwaa Izaka, wakati: ‘Iiyi, ndilayanda kwiinka.’ Wakiinkaa Eliezeri mpawaawo. Nibakasika kuKanana, wakakwatwaa Izaka.

Akambo kakuti Rebeka wakacita ziyandwaa Jehova, eelyo Jehova wakamulongezya. Muminyaka yakatobela, Jesu wakazyalwa kuluzubo lwaRebeka! Ikuti wabotezya Jehova mbuli Rebeka, Jehova uyookulongezya.