Mujwaa Paulo Wakali Sicamba

Atwiiye atalaa mulombe wakafutula buumi bwawisilenzi. Ooyo wisilenzi wakali mwaapostolo Paulo. Tatulizi pe zina lyamulombe ooyo, pesi ncituzi ncakuti kuli cimwi cintu ncaakacita cabusicamba. Ulayanda na kuziba nzyaakacita?—

Paulo wakali muntolongo kuJerusalemu. Wakalaangidwe nkaambo wakali kukambawuka atalaa Jesu. Bamwi baalumi babi, bakalimusulide Paulo, nkinkaako bakacita makanze mabi. Bakati: ‘Atukumbile mweendelezi wampi kuti abuzye basilumamba bakwe kuti batole Paulo kunkuta. Tuyoyuba mumbalaa nzila, alimwi ciindi Paulo nayiinda tulamujaya!’

Mujwaa Paulo wakaamvwa makanze aaya. Niinzi ncaakacita? Wakiinka kuntolongo alimwi wakakwaambila Paulo atalaa makanze aayo. Muciindi nciceeco, Paulo wakamubuzya kuti ayiinke akaambile mweendelezi wampi atalaa makanze aayo mabi. Ubonaanga cakali cuuba na kumujwaa Paulo kuyoowambuula amweendelezi ooyo?— Teecakali cuuba pe, nkaambo mweendelezi ooyo wakali mwaalumi ulemekwa. Nikuba boobo, mujwaa Paulo wakalaa busicamba alimwi wakakwaambulaa mweendelezi ooyo.

Mweendelezi wampi wakaziba nzyakeelede kucita. Wakabweza basilumamba basika ku 500 kuti bakakwabilile Paulo. Wakabaambila kuti batole Paulo kuKaisareya busiku mbuboobo. Buumi bwaPaulo bwakafutulwa na?— Masimpe, bwakafutulwa nkaambo baalumi babi teebakamujaya pe! Makanzaabo mabi taakazwidilila pe.

Wiiyaanzi kuzwa kulwaano oolu?—Ayebo ulakonzya kubaa busicamba mbuli mujwaa Paulo. Tweelede kubaa busicamba ciindi notwaambuula abamwi atalaa Jehova. Uyobaa busicamba na alimwi akwinkilila kunembo kwaambuula atalaa Jehova?— Ikuti wacita oobo, uyoofutula buumi bwabantu.