Kwiiya Bbayibbele aBakamboni baJehova kwakapa kuti umvwisisisye kasimpe. Nzwaakayiya zyakakugwasya kuti ube abweenzinyina aLeza akuti ube abulangilizi bwakuyoojana buumi butamani azimwi zilongezyo munyika yaparadayizi iyooyeendelezegwa aBwaami bwaLeza. Lusyomo lwako muJwi lyaLeza lwasimisigwa alubo wajana zilongezyo zyiingi loko kwiinda mukuliswaanizya ambungano yachiKristu. Waziba nzila Jehova njazulwidaayo bakombi bakwe mazubaano.—Zek. 8:23.

Mbwaanga ulikulibambila kubbabbatizigwa, uyoowaambuuzyania abaalu bamumbungano kwiinda mukulanga-langa njiisyo zyamaKristu. (Heb. 6:1-3) Jehova alongezye chiyandisyo chako chakumuziba, alubo akupe chisyomezyo nchaakakusyomezya.—Joh. 17:3.

1. Nkamboonzi nuyanda kubbabbatizigwa?

2. Jehova ngwani?

• “Jehova ngo Leza mwini-mwini kujulu aanyika. Taakwe uumbi pe.”—Dt. 4:39.

• “Yebo, oojisi zina lyakuti Jehova, yebo olikke ndonduwe Mupatikampatila atala aanyika yoonse.”—Int. 83:18.

3. Nkamboonzi nikuyandikana kuti ubelesye zina lyaLeza?

• “Aboobo mboobu mbomweelede kupaila: ‘Taateesu ooli kujulu, alisalazyigwe zina lyako.’”—Mt. 6:9.

• “Muntu woonse wiita muzina lyaJehova uyoofutuka.’—Rom. 10:13.

4. Ngaali mazina aakulemeka Jehova aabelesedwe muBbayibbele?

• “Jehova, Mulengi wamagolelo aanyika, ngu Leza walyoonse alyoonse.”—Is. 40:28.

• “Taateesu ooli kujulu.”—Mt. 6:9.

• “Leza nduyando.”—1 Joh. 4:8.

5. Niinzi nzukonzya kupa Jehova Leza?

• “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.”—Mk. 12:30.

• “Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.”—Lk. 4:8.

6. Nkamboonzi nitweelede kusyomeka kuli Jehova?

• “Kosongwaala mwanaangu, ukkomanisye moyo wangu, kutegwa ndikonzye kumuvwiila ooyo uundisampaula.”—Tus. 27:11.

7. Tukomba kulini alubo tukomba kwiinda muzina lyani?

• “Ncobeni ndimwaambila [Jesu] masimpe kuti, ikuti mwamulomba cintu cili coonse Taata, uyoomupa ncico muzina lyangu.”—Joh. 16:23.

8. Nziizili zimwi nzweelede kukombela?

• “Aboobo mboobu mbomweelede kupaila: ‘Taateesu ooli kujulu, alisalazyigwe zina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu. Kotupa sunu cakulya cesu cabuzuba obuno; alimwi kotulekelela zibi zyesu, mbubonya andiswe mbotubalekelela batubisyila. Alimwi utatunjizyi mumasunko, pele utuvwune kumubi.’”—Mt. 6:9-13.

• “Oolu ndolusyomo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.”—1 Joh. 5:14.

9. Nkamboonzi Jehova naataziswiilizyi nkombyo zyabamwi bantu?

• “Bayookwiilila Jehova kuti abagwasye, pele takabavwiili pe . . . akaambo kamicito yabo mibyaabi.”—Mik. 3:4.

• “Meso aa Jehova alangide balulami, amatwi aakwe alaswiilila mipailo yabo yakukombelezya, pele busyu bwa Jehova mbukali kulibaabo bacita zibi.”—1 Pet. 3:12.

10. Jesu Kristu ngwani?

• “Simoni Petro wakaingula kuti: ‘Nduwe Kristo, Mwana wa Leza muumi.’”—Mt. 16:16.

11. Nkamboonzi Jesu naakaza anyika?

• “Mwanaamuntu mbwaakaboola, ikutali kuzoobelekelwa, pele kuzoobeleka akupa buumi bwakwe kuti bube cinunuzyo cakununuzya banji.”—Mt. 20:28.

• “Pele [Jesu] wakabaambila kuti: ‘Akwalo kuminzi iimbi ndileelede kwaambilizya makani mabotu aa Bwami bwa Leza, nkaambo eeci ncindakatuminwa.’”—Lk. 4:43.

12. Kujana watondeezya biyeni kuti ulachilumba chinunuzyo chaJesu?

• “Wakafwida boonse kutegwa aabo bapona kabataciliponeni beni, pele kabaponena yooyo iwakabafwida alimwi iwakabusyigwa.”—2 Kor. 5:15.

13. Nguuli mulimu Jesu ngwaakapegwa?

• “Ndapegwa nguzu zyoonse kujulu alimwi aanyika.”—Mt. 28:18.

• “Leza wakamusumpula akumupa cuuno caatala azina liinda mazina oonse.”—Flp. 2:9.

14. Ulazumina na kuti Kabunga Keendelezya kaBakamboni baJehova “muzike uusyomeka alimwi uucenjede” wakasalwa aaJesu?

• “Ino mubwini, nguni muzike uusyomeka alimwi uucenjede ooyo simalelaakwe ngwaakasala kulanganya babelesi bamuŋanda yakwe, kuti kabapa cakulya cabo aciindi ceelede?”—Mt. 24:45.

15. Muuya uusalala muntu na?

• “Mukwiingula imungelo wakamwaambila kuti: ‘Muuya uusalala uyookusikila alimwi nguzu zya Mupatikampatila ziyooba alinduwe. Aboobo ooyo uyoozyalwa uyakwaambwa kuti uusalala, Mwana wa Leza.’”—Lk. 1:35.

• “Aboobo ikuti nywebo nokuba kuti muli babi, mulicizyi kubapa zipego zibotu bana banu, nkokuti Taata uuli kujulu uyakwiinda kubapa muuya uusalala aabo ibamulomba!”—Lk. 11:13.

16. Jehova wakawubelesya biyeni muuya wakwe uusalala?

• “Kwiinda mujwi lya Jehova majulu akapangwa, alimwi kwiinda mumuya wamukanwa lyakwe zyoonse izili mulingawo.”—Int. 33:6.

• “Pele muyootambula nguzu muuya uusalala waakusika alindinywe, eelyo muyooba bakamboni bangu . . . mane kusikila kumasena aakulamfwu kapati aanyika.”—Mil. 1:8.

• “Mulizyi kuti, kunyina businsimi bwamu Magwalo buzwa kubupanduluzi bwamuntu. Nkaambo kunyina ciindi ibusinsimi nobwakaba akaambo kakuyanda kwamuntu, pele bantu bakaambaula zyakazwa kuli Leza kwiinda mukusololelwa amuuya uusalala.”—2 Pet. 1:20, 21.

17. Bwaami bwaLeza niinzi?

• “Leza wakujulu uyoobikka bwami ibutakanyonyoonwi pe. Bwami oobo tabukapegwi kubantu bambi pe. Buyoopwayaula akumanizya mami aaya oonse, mpoonya bwalo bulikke buyakwiima nji mane kukabe kutamani.”—Dan. 2:44.

18. Bwaami bwaLeza buyookuchitilaanzi?

• “Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—Ciy. 21:4.

19. Uzi biyeni kuti zilongezyo ziyooyetwa aaBwaami bwaLeza zyaba aafwiifwi?

• “Basikwiiya bakamusikila kumbali akumubuzya kuti: ‘Kotwaambila, ino ndilili zintu eezyi noziyooba alimwi ncinzi ciyooba citondezyo cakubako kwako acamamanino aabweende bwazintu?’ Eelyo mukwiingula Jesu wakabaambila kuti: ‘. . . Cisi ciyoobukila cisinyina abwami buyoobukila bwaminyina, alimwi kuyooba nzala amizuzumo yanyika mumasena aaindene-indene. Alimwi makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.’”—Mt. 24:3, 4, 7, 14.

• “Kumazuba aamamanino kuyooba ziindi zikatazya ncobeni. Nkaambo bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batasyomeki, batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza, ibalibonya mbuli kuti balilyaabide mubukombi, pele nguzu zyambubo balazikazya.”—2 Tim. 3:1-5.

20. Kujana watondeezya biyeni kuti ububona kabuyandikana Bwaami?

• “Amuzumanane kusaanguna kuyandaula Bwami abululami bwakwe, eelyo zintu zimbi zyoonse eezyi ziyooyungizyigwa kulindinywe.”—Mt. 6:33.

• “Jesu wakaambila basikwiiya bakwe kuti: ‘Ikuti umwi kayanda kunditobela, aliimye akunyamuna cisamu cakwe cakupenzyezya akuzumanana kunditobela.’”—Mt. 16:24.

21. Saatani amadimoni mbaani?

• “Muzwa kuli uso Diabolosi . . . Ooyo wakali mujayi kuzwa naakatalika.”—Joh. 8:44.

• “Wakawaalwa ansi simwaaba ooyo mupati, imuzoka ooyo wakaindi, uutegwa Diabolosi a Saatani, ooyo weena nyika yoonse; wakawaalwa ansi, anyika, abalo bangelo bakwe bakawaalwa ansi antoomwe anguwe.”—Ciy. 12:9.

22. Ngaali manwa Saatani ngakaamba atala aJehova abakombi bakwe?

• “Mpoonya mukaintu wakati kunzoka: ‘Tulakonzya kulya micelo yazisamu zyoonse izili mumuunda. Pele Leza wakaamba boobu kujatikizya micelo yacisamu icili akati kamuunda: “Tamweelede kulya kulincico pe, nokuba kuciguma; buyo-buyo muyoofwa.”’ Mpoonya nzoka yakati kumukaintu: ‘Tamukonzyi kufwa pe. Nkaambo Leza ulizyi kuti buzuba mbomuyoolya kulincico, meso aanu ayoojaluka alimwi muyooba mbuli Leza, muyoozyiba bubotu abubi.’”—Matl. 3:2-5.

• “Saatani wakavwiila Jehova kuti: ‘Lukanda kulukanda. Muntu uyoopa zintu zyoonse nzyajisi kutegwa avwune buumi bwakwe!’”—Job. 2:4.

23. Kujana watondeezya biyeni kuti nzyaakaamba Saatani nkubeja?

• ‘Belekela [Leza] camoyo woonse.’—1 Mak. 28:9.

• “Kusikila ndikafwe, tandikaleki kusyomeka pe!”—Job. 27:5.

24. Nkamboonzi bantu nibafwa?

• “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.”—Rom. 5:12.

25. Bafwide bali muchiimo chili biyeni?

• “Baumi balizyi kuti bayoofwa, pele bafwide tabazyi cintu nociba comwe.”—Muk. 9:5.

26. Mbuubuli bulangilizi mbutulaabo atala abantu bafwide?

• “Kuyooba bubuke bwabantu baluleme abataluleme.”—Mil. 24:15.

27. Mbangane bantu batakeendelezye aaJesu kujulu?

• “Ndakalanga akubona Mwanaambelele kaimvwi aa Cilundu ca Ziyoni, alimwi wakali antoomwe abali 144,000 ibalembedwe zina lyakwe alimwi azina lya Bausyi ankumo zyabo.”—Ciy. 14:1.

Kwiiya Bbayibbele kwakugwasya kuziba zintu Jehova nzyayanda kuti uzichite ambukonzya kupona kweendelana azyeelelo zyakwe ziluleme. Kubelesya nzwaakayiya kwapa kuti uchinche maponeno aako akubona kuti buumi nchintu chiyandikana. Mbukunga wakalibambila kupona kweendelana azyeelelo zyaJehova ziluleme, weelela kuchita mulimu uyandikana wakwaambilizya makani mabotu.

Kulanga-langa mibuzyo iitobela kuyookugwasya kuti zyeelelo zyaJehova zikkalilile mumiyeeyo yako alubo zilakonzya kukuyeezya zimwi zintu nzweelede kuchita kutegwa ube mubelesi wakwe uutambulika. Makani aaya ayookugwasya kuti uchite zintu kuli amoyo uutakupi mulandu kuchitila kuti Jehova alemekwe.—2 Kor. 1:12; 1 Tim. 1:19; 1 Pet. 3:16, 21.

Kubona zintu munzila iili boobu kuyookugwasya kuti ulibombye kubweendelezi bwaJehova akuti ube aakati kabakombi baJehova bali mumbunga yakwe. Mibuzyo amagwalo aabikkidwe ziyookugwasya kuti ubone kuti nkamboonzi nweelede kulibombya kumabambe aaJehova, mumbungano, mumpuli naakuti kumfulumende. Kuchita oobo, kuyookugwasya kubona nzila Jehova njabayiisyaayo bakombi bakwe. Nzila eeyi iswaanizya kunjila miswaangano akutola lubazu kumiswaangano.

Kuyungizya waawo, chipanzi eechi chitondeezya mbukuyandikana kukambawuka makani mabotu aaBwaami akugwasya bantu kuti bazibe Jehova akubabuzya nzyayoochitila bantu. (Mt. 24:14; 28:19, 20) Kumamanino, uyoobona mbukuyandikana kulipeda kuli Jehova Leza akubbabbatizigwa kwako. Uyooba aachoonzyo chakuti Jehova ulabotelwa akaambo kakuzumina kugwasigwa aaluzyalo lwakwe lupati.

1. Mulawuunzi uli atala alukwatano maKristu ngubeelede kutobela? Nkaakali kaambo kamuBbayibbele kazumizya kulekana?

• “Sena tiimwakabala kuti ooyo wakabalenga kuzwa kumatalikilo, wakalenga mwaalumi amukaintu. alimwi wakati: ‘Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe’? Nkokuti tabacili bobilo, pele baba mubili omwe. Aboobo aabo Leza mbaaswaanganya kutabi muntu uubaandaanya. . . . Kufwumbwa uuleka mukaintu wakwe ikutali akaambo kabwaamu, akukwata umbi, wacita bumambe.”—Mt. 19:4-6, 9.

2. Nkamboonzi mwaalumi amwaanakazi nibeelede kukwatana zili mumulawu? Ikuti kukwete naakuti kukwetwe, ulaachoonzyo na kuti lukwatano lwanu lulimumulawu akuti lulizibinkene kumfulumende?

• “Kozumanana kubayeezya kuti kabalibombya akuti kabazimvwida mfwulumende abaabo bajisi nguzu zyabweendelezi.”—Tit. 3:1.

• “Cikwati acilemekwe abantu boonse, alimwi bulo bwacikwati butasofwaazyigwi pe, nkaambo Leza uyoobabeteka basibwaamu abasimamambe.”—Heb. 13:4.

3. Ulamulimuunzi mumpuli?

• “Mwanaangu, swiilila lulayo lwabauso, alimwi utaubyi-ubyi mulawo wabanyoko.”—Tus. 1:8.

• “Mulumi ngomutwe wamukaintu wakwe mbubonya Kristo mbwali mutwe wambungano . . . Nobalumi, amuzumanane kubayanda bakaintu banu, mbubonya awalo Kristo mbwaakayanda mbungano.”—Ef. 5:23, 25.

• “Nomausyi, mutanoobanyemyi bana banu pe, pele amuzumanane kubalela mululayo alwiiyo lwa Jehova.”—Ef. 6:4.

• “Nywebo nobana, amubamvwide bazyali banu muzintu zyoonse, nkaambo eeci cilakkomanisya mu Mwami.”—Kol. 3:20.

• “Nobakaintu, amulibombye kubalumi banu.”—1 Pet. 3:1.

4. Nkamboonzi nitweelede kulemeka buumi?

“[Leza] nguupa bantu boonse buumi, muya alimwi azintu zyoonse. . . . walo nguutupa buumi, kweenda akupona.”—Mil. 17:25, 28.

5. Nkamboonzi nituteelede kujaya muntu kuswaanizya amwana uutanazyalwa?

• “Ikuti baalumi balwana akucisa mukaintu uulaada kumane . . . kwacitika ntenda, nkokuti uyoolunga buumi kubuumi.”—Kul. 21:22, 23.

• “Meso aako akandibona nindakacili nsalalila; zizo zyangu zyoonse zyakalilembedwe mubbuku lyako; amazuba nozyakabambwa, kakutanaba cizo nociba comwe akati kazyo.”—Int. 139:16.

• Chimwi chintu nchasulide Jehova “maanza aatila bulowa bwabantu banyina mulandu.”—Tus. 6:16, 17.

6. Ngaali malayilile Leza ngaakatupa ali atala abulowa?

• ‘Muzumanane kutantamuka, . . . bulowa, azintu zisinidwe.’—Mil. 15:29.

7. Nkamboonzi nitweelede kuyanda bakwesu abachizi?

• “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Joh. 13:34, 35.

8. Kuti atatabukizyi bamwi malwazi, nkamboonzi muntu uuli abulwazi oobo, natayelede (a) kukumbata bamwi naakuti kubamyonta? (b) kunyema kuti bamwi teebamutamba kumaandaabo? (c) Nkamboonzi muntu uli abulwazi butabukila nayelede kusala kuya kukulangwa-langwa bulowa katanatalika kuyandana awumwi muntu? (d) Nkamboonzi muntu uli abulwazi butabukila nayelede kubuzya mulangizi wakabunga kabaalu katanabbabbatizigwa?

• “Mutabi acikwelete nociba comwe kumuntu uuli woonse, ccita buyo cikwelete cakuyandana. . . . ‘Weelede kuyanda simukobonyoko mbubonya mbuli mboliyanda omwini.’ Uuyanda simukobonyina takonzyi kumubisizya.”—Rom. 13:8-10.

• “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Flp. 2:4.

9. Nkamboonzi Jehova nayanda kuti tulekelele bamwi?

• “ Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo.”—Kol. 3:13.

10. Weelede kuchitaanzi kuti mukombinyokwe wakubejelezya naakuti wakuchitila chintu chitali kabotu?

• “Ikuti munyoko wakubisizya, koya ukamwaambile ncaalubizya kamuli nyobilo. Ikuti wakuswiilila, nkokuti wamupilusya munyoko. Pele kuti takuswiilili, utolelezye muntu omwe naa bobilo, kutegwa kubumboni bwabakamboni bobilo naa botatwe makani oonse akasinizyigwe. kuti naa tabaswiilili, ambila mbungano. Ikuti naa taiswiilili noiba mbungano, aabe kulinduwe mbubonya mbuli muntu wamasi alimwi ambuli simutelo.”—Mt. 18:15-17.

11. Jehova uzibona zibi zitobela?

▪ Bwaamu

▪ Kukomba zifanikisyo

▪ Koonana kwabantu bakozyenie zizo

▪ Kubba

▪ Kubbeja

▪ Kukolwa

• “Mutalyeeni pe. Basibwaamu, basikukomba mituni, basimamambe, baalumi boonwa abaaluminyina, baalumi boona baaluminyina, babbi, basyaacivwulemwangu, bakolwi, basimatusi alimwi azigwebenga, tabakanjili mu Bwami bwa Leza.”—1 Kor. 6:9, 10.

12. Niinzi nzuyoochita kuti waswaanana aachiimo chikusunka kuti uchite bwaamu kutali mulukwatano pe?

• “Amubutije bwaamu!”—1 Kor. 6:18.

13. Nkamboonzi nituteelede kubelesya minsamu iikola itabelesegwi mukusilika, inyongania mizeezo naakuti iichita kuti muntu atakonzyi kupona katakwaayo?

• “Mutuule mibili yanu kaili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano Alimwi amuleke kutobela ziyanza zyabweende bwazintu obuno, pele amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.”—Rom. 12:1, 2.

14. Njiili imwi michito yabudimoni Leza njaakasya?

• “Takweelede kujanwa . . . muŋanga, simasalamuzi, sibusangu, mulozi, simabibo, muntu uubuzya makani kubaŋanga, simaloto naa muntu uubuzya makani kubafwu.”—Dt. 18:10, 11.

15. Ikuti muntu wachita chibi chipati mpawo wayanda kubweeda kuli Jehova, niinzi nchayelede kuchita chakufwambaana?

• “Ndakalyaambilila cibi cangu kulinduwe; Tiindakausisa mulandu wangu. Ndakati: ‘Ndilalyaambilila nsotoko zyangu kuli Jehova.’”—Int. 32:5.

• “Sena kuli uuciswa akati kanu? Aite baalu bambungano, eelyo abamupailile akumunanika mafwuta muzina lya Jehova. Eelyo mupailo walusyomo ulamuponya ooyo uucisidwe, alimwi Jehova ulamubusya. Kunze lyaboobo, ikuti naa wakacita zibi, ulalekelelwa.”—Jak. 5:14, 15.

16. Niinzi nzweelede kuchita kuti waziba kuti umwi muKristu wakachita chibi chipati?

• “Ikuti muntu wabisya mukuti tanaamba cibi ncaakacita muntu umwi, ciindi naamvwa kwaambilizya kubuleya kwakuti muntu umwi acitile bumboni kukaambo aaka, kakuli mubwini walo ngukamboni naa wakalibonena ameso naa kuli ncazyi kujatikizya cibi eeco, nkokuti uyoosubulwa akaambo kamulandu wakwe.”—Lev. 5:1.

17. Kuti kwambilizigwa kuti umwi mukwesu naakuti muchizi tachili Kamboni waJehova, niinzi nchitweelede kuchita?

• “Muleke kuyanzana amuntu uuli woonse uutegwa mukwesu pele sibwaamu, syaacivwulemwangu, sikukomba mituni, simatusi, mukolwi, naa cigwebenga, alimwi mutasoli nokuba kulya amuntu uuli boobo.”—1 Kor. 5:11.

• “Ikuti umwi waboola kulindinywe alimwi kataleti njiisyo eeyi, mutasoli pe kumutambula mumaanda aanu naa kumwaanzya.”—2 Joh. 10.

18. Nkamboonzi nitweelede kusala beenzuma bakomba Jehova?

• “Ooyo weenda abasongo ulaba musongo, pele ooyo uuyanzana abafwubafwuba ulajana mapenzi.”—Tus. 13:20.

• “Muteenwi pe. Kuyanzana abantu babyaabi kunyonganya zilengwa zibotu.”—1 Kor. 15:33.

19. Nkamboonzi Bakamboni baJehova nibatatoli lubazu mupolitikisi?

• “Tabali banyika mbubonya andime [Jesu] mbonditali wanyika.”—Joh. 17:16.

20. Nkamboonzi nitweelede kulemeka mfulumende?

• “Muntu uuli woonse kalibombya kubeendelezi, nkaambo kunyina bweendelezi bukonzya kuba ccita kuti bwazumizyigwa a Leza; ibeendelezi aabo ibali muzyuuno zyaandeene-andeene balizumizyidwe a Leza.”—Rom. 13:1.

21. Niinzi nzuyoochita kuti milawu iibikkwa aabantu yakazyania aamilawu yaLeza?

• “Tweelede kumvwida Leza mbwali mweendelezi kutali bantu.”—Mil. 5:29.

22. Ngaali magwalo aakonzya kukugwasya kuti utachiti zichitwa aabantu bakunyika chiindi nusala mulimu?

• “ Cisi tacikanyamuni panga kulwana cisinyina, alimwi tabakaiyi limbi nkondo pe.”—Mik. 4:3.

• “Amuzwe mulinguwe, nobantu bangu, ikuti kamutayandi kujatikizyigwa azibi zyakwe, alimwi ikuti kamutayandi kusikilwa zipenzyo zyakwe zimwi.”—Ciy. 18:4.

23. Weelede kusala akutantamuka zyakulikondelezya zili biyeni?

• “Kufwumbwa muntu uuyanda nkondo [Jehova] ulimusulide.”—Int. 11:5.

• “Amusesemwe acintu cibi; amukakatile kucibotu.”—Rom. 12:9.

• “Kufwumbwa zintu zyamasimpe, kufwumbwa zintu ziyandika kapati, kufwumbwa zintu ziluleme, kufwumbwa zintu zisalala, kufwumbwa zintu ziyandwa, kufwumbwa zintu zilaampuwo mbotu, kufwumbwa zintu zili kabotu, alimwi kufwumbwa zintu zyeelela kutembaulwa, kamuzumanana kuziyeeyesya zintu eezyi.”—Flp. 4:8.

24. Nkamboonzi Bakamboni baJehova nibatanjili zimwi zikombelo?

• “Tamukonzyi kunoolida ‘atebulu lya Jehova’ alimwi aatebulu lyamadaimona.”—1 Kor. 10:21.

• ‘‘ Amulyaandaanie,’ mbwaamba Jehova, ‘alimwi amuleke kuguma cintu cisofweede’; ‘eelyo ndiyoomutambula.’’—2 Kor. 6:17.

25. Ngaali magwalo akonzya kukugwasya kuti usale kuleka naakuti kwiinka kuli limwi pobwe?

• “Pele bakayanzana abamasi akutalika kutobela zilengwa zyabo. Bakali kubelekela mituni yabo, eelyo eeyi yakababeda kakole.”—Int. 106:35,36.

• “Bafwide tabazyi cintu nociba comwe.”—Muk. 9:5.

• “Tabali banyika mbubonya andime mbonditali wanyika.”—Joh. 17:16.

• “Nkaambo musyule oomu mwakajisi ciindi cinji cakucita kuyanda kwabamasi nimwakali kweenda mubukkale busesemya, muluunyaunya lwakutalijata, mukuciindizya kunywa makoko, mumapobwe aateendelezyeki, mukuzundana kunywa makoko amukukomba mituni kukasyidwe amulawo.”—1 Pet. 4:3.

26. Zikozyano zili muBbayibbele zikugwasya biyeni kuti utasekeleli mazuba aakuzyalwa?

• “Lino buzuba bwatatu bwakali buzuba bwakusekelela kuzyalwa kwa Farao alimwi wakabacitila pobwe babelesi bakwe boonse, eelyo wakaangununa silutwe uutola zyakunywa kumwami asilutwe uupanga zinkwa kabalangilila babelesi bakwe. Aboobo wakapilusya silutwe uutola zyakunywa kumwami acuuno cakwe cakutola zyakunywa . . . Pele silutwe uupanga zinkwa wakamwaanzika acisamu.”—Matl. 40:20-22.

• “Pele nobakali kusekelela buzuba bwakuzyalwa kwa Heroda, mwana musimbi wa Herodiya wakabazyanina kabotu beenzu akumukkomanisya kapati Heroda cakuti wakamusyomezya kwiinda mukukonka kuti ulamupa kufwumbwa ncatiilombe. Mpoonya walo mukutobela nzyobakamwaambila banyina wakati: ‘Amundipe lino aawa mutwe wa Johane Mubbapatizi mumutiba.’ Aboobo wakatuma bantu ibakaunka kuyoomukosola mutwe Johane muntolongo.”—Mt. 14:6-8, 10.

27. Nkamboonzi nitweleede kuswiilila malayilile aazwa kubaalu?

• “Kamubamvwida aabo basololela akati kanu alimwi kamulibombya, nkaambo balanganya ndinywe kabali baabo ibayoobuzyigwa makani, ikutegwa kabacita oobu cakukondwa ikutali cakuusa pe, nkaambo eeci inga camuletela mapenzi.”—Heb. 13:17.

28. Nkamboonzi nikuyandikana kuti mube aachiindi chakubala Bbayibbele kamuli mpuli?

• “Pele ukkomanina mulawo wa Jehova, alimwi ulabala mulawo wakwe caansaansi syikati amasiku. Uyooba mbuli cisamu cisimpidwe kumbali aatulonga twamaanzi, icisamu cizyala micelo muciindi ceelede, icijisi matuvwu aataneti. Zyoonse nzyacita ziyoozwidilila.”—Int. 1:2, 3.

29. Niinzi chipa kuti uyande kunjila miswaangano akutola lubazu?

• “Ndiyakwaambilizya zina lyako kubakwesu; akati kambungano ndiyookutembaula.”—Int. 22:22.

• “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katukulwaizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.”—Heb. 10:24, 25.

30. Nguuli mulimu uuyandikana Jesu ngwaakatupa?

• “Aboobo kamuya mukayiisye bantu bazisi zyoonse kuti babe basikwiiya, akubabbapatizya . . . , mukabayiisye kutobela zintu zyoonse nzyondakamulailila.”—Mt. 28:19, 20.

31. Ngaali maboneno aamubotezya Jehova chiindi nitusanga mali kumulimu uusumpula Bwaami naakuti nitugwasya bakombima?

• “Kolemeka Jehova azintu zyako ziyandisi.”—Tus. 3:9.

• “Umwi aumwi acite mbuli mbwaasala mumoyo wakwe, ikutali kupa kumoyo kakusiya naa cakusinikizyigwa buya, nkaambo Leza uyanda muntu uupa kumwi kakkomene.”—2 Kor. 9:7.

32. MaKristu beelede kulangilila kuswaanana aabuyumu-yumu buli biyeni?

• “Balikkomene aabo bapenzyegwa akaambo kabululami, nkaambo Bwami bwakujulu mbubwabo. Mulikkomene nywebo ciindi bantu nobamusampaula akumupenzya akumubejelezya zintu zibi ziindene-indene akaambo kandime. Amukondwe akusekelela, mbwaanga bulumbu bwanu mbupati kujulu, nkaambo mbubonya oobo mbubakabapenzya basinsimi ibakamusaangunina.”—Mt. 5:10-12.

33. Nkamboonzi nichili chilongezyo chipati kubbabbatizigwa kuti ube Kamboni waJehova?

• “Ijwi lyako lyakandipa kusekelela akukondwa mumoyo wangu, nkaambo ndiitwa azina lyako, O Jehova Leza.”—Jer. 15:16.

Chiindi chiingi, kubbabbatizigwa kuchitwa kumiswaangano mipati yaBakamboni baJehova. Kumamanino ankani yakubbabbatizigwa, sikwaambuula ulakumbila aabo bayanda kubbabbatizigwa kutegwa banyampuke akusandula mibuzyo iibili iitobela mujwi limvwika:

1. Wasiya na zibi zyako alubo walipeda na kuli Jehova akutambula nzila yakwe yakufutula bantu kwiinda muli Jesu Kristu?

2. Ulamvwisisisya na kuti kulipeda akubbabbatizigwa kwako kutondeezya kuti waba Kamboni waJehova, uukomba ambunga yaJehova?

Kusandula mibuzyo eeyi ajwi limvwika kwababo bayanda kubbabbatizigwa, ‘nkwaambilizya chaantanganana amilomo yabo’ kuti bali alusyomo kuchinunuzyo akuti balipeda kuli Jehova amoyo woonse. (Rom. 10:9, 10) Kakuchili chiindi aabo bayanda kubbabbatizigwa balakonzya kukomba akuyeeyesesya atala amibuzyo eeyi, kuchitila kuti basandule kweendelana anzibalisalila.

Wakalipeda na kuli Jehova kwiinda munkombyo, kumusyomezya kuti uyanda kumukomba akubikka kuyanda kwakwe mubusena bwakusaanguna mubuumi bwako?

Walipeda chachoonzyo na kuti uyanda kubbabbatizigwa?

Babbabbatizigwa beelede kuzwaata biyeni? (1 Tim. 2:9, 10; Joh. 15:19; Flp. 1:10)

Tweelede ‘kuzwaata zisamo zilikabotu alubo zyabulemu’ iitondeezya kuti ‘tulilyaabide kuli Leza.’ Aabo bayanda kubbabbatizigwa tabeelede kuzwaata zigogo zibalangala zilembedwe naa zilamasilogani asiyene-siyene. Pesi beelede kuzwaata zigogo zilikabotu, zitakwe doti alubo zyabulemu.

Muntu ubbabbatizigwa weelede kulijata biyeni chiindi naabbabbatizigwa? (Lk. 3:21, 22)

Jesu wakasiila maKristu chikozyano chili kabotu atala akubbabbatizigwa. Jesu wakatondeezya kuti kubbabbatizigwa nchintu chiyandikana, alubo eezi wakazitondeezya kwiinda mumilimu yakwe. Busena bwakubbabbatizigwa tabweelede kuba busena bwakudubbwa nikuba kuchitila imwi misobano. Takuyandikani pe kuti muKristu wazwa kukubbabbatizigwa achitaanga wazunda mumusobano. Nikuba kuti kubbabbatizigwa nchintu chibotezya, pesi kubotelwa ooku kweelede kutondeezegwa munzila yabulemu.

Kunjila miswaangano chiindi choonse akujana chiindi chakuzibana aabantu mbukombaabo kuyookugwasya biyeni kuti upone kweendelana akulipeda kuli Jehova?

Nikuba kuti wabbabbatizigwa, nkamboonzi nweelede kuba achiindi chibambidwe chakuchita chiiyo chako awulikke akutola lubazu kumulimu wakukambawuka chiindi choonse?