1-3. Mibuzyoonzi bantu njibabuzya atala akufwa, alimwi zimwi zikombelo ziyiisyaanzi?

IBBAYIBBELE litusyomezya kuti bumwi buzuba “takukooyooba limbi lufu.” (Ciyubunuzyo 21:4) Muchaandano 5, twakayiiya kuti chinunuzyo chakachita kuti chikonzeke kuli ndiswe kujana buumi butamani. Pesi nikuba boobo, bantu balafwa. (Mukambausi 9:5) Eezi zipa kuti tubuzye mubuzyo uuyandikana wakuti, Niinzi chichitika kuli ndiswe kuti twafwa?

² Insandulo yamubuzyo ooyu iyandikana loko, ikapati kuti kwafwa chibbululu chesu. Tulakonzya kulibuzya kuti: ‘Niinzi chachitika kuli nguwe? Ulitubwene na? kujana wakonzya na kutugwasya? Kuli nituyoomubona lubo na?’

³ Zikombelo zisandula mibuzyo eeyi munzila zisiyene-siyene. Zimwi ziyiisya kuti, ikuti kuli muntu uuli kabotu uya kujulu, alimwi kuti kuli muntu uuchita zibi uyaakupya mubbibi lyamulilo. Zimwi ziyiisya kuti, ikuti wafwa ngawaba muuya alimwi ngawaakukkala abazibbululu zyako zyakafwa chiindi. Alubo zimwi ziyiisya kuti, ikuti wafwa nga uya kukubetekwa, wazwaa kubetekwa nga wapona lubo pesi kuli aamubili uumbi, chimwi chiindi uba chimwi chintu naa kuti umwi muntu.

4. Zikombelo ziyiisya kali kaambo atala alufu?

⁴ Zikombelo zibonekaanga ziyiisya zintu zisiyene loko. Pesi zyoonse ziboneka kaziyiisya kaambo kamwi biyo. Ziyiisya kuti, chiindi muntu naafwa kuli chimwi chintu chisyaala kachipona. Ndisimpe na eelyo?

NKUUKULI NKUTUYA KUTI TWAFWA?

5, 6. Niinzi chichitika kuti twafwa?

⁵ Jehova ulizi zichitika kuli ndiswe chiindi nitufwa, alimwi wakatubuzya kuti chiindi muntu naafwa, buumi bwakwe bulamana. Lufu nkutapona. Aboobo chiindi muntu nafwa, kulimvwa kwakwe akuyeeya taakwe nizisyaala pe kazipona kuli bumwi busena.a Ikuti twafwa tatukonzyi pe kubona, kumvwa, alubo ngatatuchikonzyi pe kuyeeya.

⁶ Mwaami Solomoni wakalemba kuti “pele bafwide tabezi cintu niciba comwe.” Bafwide tabakonzyi kuyanda nikuba kusulayika, alubo “taakwe milimo niiba miyeeyo neluba luzibo nebuba busongo mukabanda.” (Bala Mukambausi 9:5, 6, 10.) Alimwi muli Intembauzyo 146:4 iBbayibbele litubuzya kuti chiindi muntu naafwa, “makanze aakwe oonse” aalawo alamana.

JESU NZYAKAAMBA ATALA ALUFU

7. Jesu wakaambaanzi atalaa lufu?

⁷ Chiindi Lazaro mweenzinyina waJesu naakafwa, Jesu wakati kuli basikwiiya bakwe: “Mulongweesu Lazaro uloona.” Pesi Jesu taakali kwaamba kuti Lazaro uliikulyookezya. Jesu wakali kwaamba kuti: “Lazaro wazaya [wafwa].” (Johane 11:11-14) Eezi zyaamba kuti Jesu wakali kukozyanisya kufwa mbuli koona. Taakali kwaamba kuti Lazaro wakali kujulu naa kuti wakali kkede abazibbululu bakwe bakafwa chiindi. Alubo taakwe nakaamba kuti Lazaro wakali kupya mumulilo naa kuzyalwa lubo kali uumbi muntu naa kuti munyama. Peepe, Lazaro wakali mbuli kuti uliikoona mung’onzi. Amwi magwalo akozyanisya lufu mbuli koona ng’onzi. IBbayibbele lyaamba kuti Davida wakakombelezya Jehova kati: “Bonya meso aangu, kuti ntaoni mulufu.” (Intembauzyo 13:3) Alimwi Daniele wakalemba kuti “bantu banji baona mubulongo bwaansi bayoobuka.”​—Daniele 12:2.

8. Tuzi biyeni kuti Leza taakwe naakalenga bantu kuti kabafwa?

⁸ Ani Leza wakalenga Adamu aEva kuti mukuya kwachiindi bazoofwe na? Peepe! Jehova wakabalengela kuti babotelwe buumi bumaninide butamani. Chiindi Jehova naakalenga bantu, wakabapede chiyandisyo chakupona kutamani. (Mukambausi 3:11) Mbuli bazyali mbubatabotelwi kubona bana babo kabachembala akufwa, alakwe Jehova mbalimvwa notuchembala akufwa. Ikuti Jehova wakatulengela kuti tupone kukabe kutamani, nkaamboonzi nitufwa?

NKAAMBOONZI NITUFWA?

9. Nkaamboonzi mulawu Jehova ngwaakapa Adamu aEva niwakatali muyumu kuutobela?

⁹ Mumuunda waEdeni, Jehova wakabuzya Adamu aEva kuti: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.” (Matalikilo 2:9, 16, 17) Mulawu ooyu tewakali muyumu kuuswiilila, alubo Jehova wakalaa cheelelo chakubabuzya chintu chibotu achibi. Kwiinda mukuswiilila Jehova, bakali kunotondeezya kuti balemeka bweendelezi bwakwe. Alubo bakali kunotondeezya kuti balalumba kuzintu zyoonse nzyaakabachitila.

10, 11. (a) Saatani wakabeena biyeni baAdamu a Eva? (b) Nkaamboonzi baAdamu nibatakwe chitamizyo kuli zezyo nzibakachita?

¹⁰ Chiwusisya nchakuti, Adamu aEva bakasala kutaswiilila Jehova. Saatani wakati kuli Eva: “Sa ncobeni Leza wakaamba kuti, tamweelede kulya misamu yoonse yamumuunda?” Elyo mwanakazi wakaambila nzoka kuti, “Micelo yamisamu yamumuunda tulailya, pele micelo yamisamu oyo uuli mukati kamuunda, Leza waamba kuti, ‘tamweelede kulya njiyo pe, alimwi tamweelede kwiiguma, kuti mutafwi.’”​—Matalikilo 3:1-3.

¹¹ Mpawo Saatani wakati: “Ne! tamukonzyi kufwa pe. Nkaambo Leza ulizi kuti mubuzuba obo mbubonya mbomuyooulya, meso anu ayoojuka [julika], lino muyooba mbuli Leza, muyooziba bubotu abubi mbububede.” (Matalikilo 3:4, 5) Saatani wakali kuyanda kuti Eva alisalile chibotu a chibi. Muchiindi eecho, Saatani wakabeja zyakali kuyoochitika aawo Eva naakali kuzooleka kuswiilila Leza. Saatani wakati Eva taakali kuzoofwa pe, aboobo Eva wakalya imwi yamichelo mpo wasikupa mulumaakwe. Adamu a Eva bakalizi kuti Jehova wakali wabaambila kuti batalyi muchelo. Nibakalya, bakasala kutaswiilila mulawu wakali muuba. Kwiinda mukulya, bakatondeezliya kutalemeka Wisi wabo wakujulu. Taakwe chakutamizya atala anzibakachita!

12. Nkaamboonzi nizichisa kuziba kuti Adamu aEva bakatondeezya kutaswiilila Jehova?

¹² Yeeya kuti zyakamunyeemya biyeni Mulengi wabo azezyo bazyali besu bakusaanguna nzibakachita! Wali kunoomvwa biyeni chiindi nubeleka changuzu kukukomezya mwana musimbi amulombe, mpawo bakupapila akuchita zisiyene kulizezyo nzwaakababuzya kuti kabachita? Teezyakali kunookuchisya moyo na?

13. Jehova wakali kwaambaanzi naakati “kubulongo nkoelede kupiluka”?

¹³ Chiindi baAdamu nibakataswiilila Jehova, bakasweekelwa choolwe chakupona kutamani. Jehova wakabuzya Adamu kuti: “Nkaambo uli bulongo buyo akooko kubulongo nkoelede kupiluka.” (Bala Matalikilo 3:19.) Eezi zyaamba kuti Adamu wakali kuzooba bulongo lubo, mbuli kuti taakwe naakalengedwe pe. (Matalikilo 2:7) Kuzwa naakabisya Adamu, wakafwa alimwi taakwe naakapona lubo pe.

14. Nkaamboonzi nitufwa?

¹⁴ Kaansinga Adamu a Eva bakamuswiilila Leza, nikunga bachipona ambuli sunu. Pesi chiindi nibakatamuswiilila, bakabisya, mpawo bakazoofwa. Chibi chili mbuli bulwazi bubi loko mbutwakakona kuzwa kubazyali besu bakusaanguna. Toonse tulazyalwa katulaa chibi, alimwi nkikaambo nchitufwa. (BaRoma 5:12) Pesi aaya tee ngimakanze pe Leza ngalaawo kubantu. Leza taakwe naakayandide kuti bantu kabafwa, alimwi nchichicho iBbayibbele nchilyaamba lufu kuti ngu “sinkondonyina.”​—1 BaKorinto 15:26.

KASIMPE KALATWAANGUNUNA

15. Kasimpe kali atala lufu katwaangununa biyeni?

¹⁵ Kasimpe kali atala alufu kalatwaangununa kutwaambo twakubeja. IBbayibbele lituyiisya kuti bafwide tabamvwi kuchisa nikuba kuumbaala. Tatukonzyi pe kwaambuula ambabo, alubo tabakonzyi pe kwaambuula andiswe. Tatukonzyi pe kugwasya bafwide, alubo abalabo bafwide tabakonzyi pe kutugwasya. Tabakonzyi pe kutuchisa, nkikaako tatweelede kubayoowa pe. Aboobo, zikombelo zyiingi ziyiisya kuti, bafwide balapona kuli bumwi busena akuti tulakonzya kubagwasya kuti twabbadala mali kubapayizi bazikombelo naa kuli babo baambwa kuti mbasalali. Pesi kuti twaziba kasimpe atala alufu, taakwe nituyooyenwa pe akubeja kuli boobo.

16. Nkuukuli kubeja zikombelo zyiingi nkuziyiisya atala abakafwa?

¹⁶ Saatani ubelesya zikombelo zyakubeja kukutubejela akutuchitya kuti tuyeeye aanga bafwide bachipona. Muchikozyano, zikombelo zimwi ziyiisya kuti, chiindi nitufwa chimwi chibeela chamubili wesu chilasyaala kachipona kuli bumwi busena. Chikombelo chako chiyiisya oobo na? naa kuti chikuyiisya eezyo iBbayibbele nzilyaamba atala abakafwa? Mbuli mbaakachita kuli Eva, ambuli sunu Saatani uchibelesya kubeja kutegwa apambule bantu kuzwa kuli Jehova.

17. Nkaamboonzi ikaambo kakuumpa bantu mubbibi lyamulilo nikali kakusampuula Jehova?

¹⁷ Zikombelo zyiingi nchiziyiisya zilayoosya. Muchikozyano, zimwi ziyiisya kuti bantu batali kabotu bayaakupya mubbibi lyamulilo uutamani. Ooku nkutukila Jehova. Taakwe nanga ulazumina kuti bantu bapenzegwe munzila iili boobu! (Bala 1 Johane 4:8.) Umvwa biyeni atala amuntu uupenzya mwana kwiinda mukumuumpa maboko mumulilo? Nisimpe kuti ulamusulayika muntu uuli boobo. Taakwe niwali kunooyanda kumvwa azyamuntu ooyo. Eezi nzinzizyo loko Saatani nzyayanda kuti tumvwe atala aJehova!

18. Nkaamboonzi nituteelede kuyoowa bafwide?

¹⁸ Zimwi zikombelo ziyiisya kuti chiindi bantu nibafwa baba myuuya. Zikombelo zili bobo ziyiisya kuti tweelede kulemeka alimwi akuyoowa myuuya eeyo, nkaambo ilakonzya kuba beenzuma balaanguzu nikuba kuti basinkondoma bayoosya. Bantu biingi balakusyoma kubeja ooku. Balabayoowa bafwide, nkikaako balabakomba mubusena bwakukomba Jehova. Yeeya kuti bantu bafwide tabakonzyi kumvwa, aboobo tatweelede kubayoowa. Jehova Mulengi wesu. NguLeza wakasimpe, nguwe alikke ngutweelede kukomba luzutu.​—Ciyubunuzyo 4:11.

19. Kuziba kasimpe atala alufu kutugwasyaanzi?

¹⁹ Ikuti twakaziba kasimpe atala abafwide tulaangununwa kuzwa kutwaambo twakubeja twazikombelo. Alimwi kasimpe aaka katugwasya kuti tumvwisisisye izisyomezyo zigambya eezyo Jehova nzyaakatuchitila atala abuumi bwesu abwajuunza.

20. Tuyooyiiyaanzi muchaandano chitobela?

²⁰ Kwaminyaka miingi loko yakiinda mubelesi waLeza wazina lyaJobu wakabuzya kuti: “Ikuti naa muntu wafwa, sena inga wapona alimwi?” (Jobu 14:14, NW) Zilakonzeka na choonzyo kuti muntu wafwa ulakonzya kupona lubo? Eezyo Leza nzyatubuzya muBbayibbele zilabotezya. Tuyoobona kuti nkaamboonzi nichili boobo muchaandano chitobela.

1-3. Niinzi nchitubikkide mubuzike toonse, alimwi Jehova uyootwaangununa biyeni?

YEEYELA kuti wapegwa chisubulo chakukkala muntolongo akaambo kamulandu ngutezi. Taakwe bulangilizi bwakuti uzoowangununwa. Buumi bwako bubonekaanga tukwe bulangilizi pe, pesi taakwe chintu nchukonzya kuchita. Chiindi nutakwe bulangilizi ujana kuti umwi muntu ulaanguzu ukusyomezya kukugwasya! Kujana wamvwa biyeni?

² Toonse tulibazike balufu. Nikuba kuti niinzi nzituchita tatukonzyi kuluchija. Pesi Jehova ulaanguzu zyakutwaangununa kuzwa kulufu. Alubo wakasyomezya kuti “sinkondonyina musyaalizi uuyoolobezegwa ndufu.”​—1 BaKorinto 15:26.

³ Yeeyela nzila njumvwaayo chiindi nutalikataazyi atalaa lufu! Jehova takagwisyi lufu pe alulikke. Pesi uuyoobusya aabo bakafwa chiindi. Yeeya kuti eezi zyaambaanzi kuli nduwe. Wakasyomezya kuti aabo “bazundidwe alufu” bayoopona lubo. (Isaya 26:19) Eechi nchichicho iBbayibbele nchilyaamba kuti mbubuke.

AAWO MUNTU NGUTUYANDA NAAFWA

4. (a) Niinzi chinga chilatuumbulizya kuti umwi wamumpuli yesu naa mweenzuma wafwa? (b) Mbaani bamwi bakali beenzinyina baJesu?

⁴ Chiindi umwi wamumpuli naa kuti mweenzuma wafwa, kulila abuumba kulakonzya kutumana nguzu. Nga twamaninwa. Taakwe nchitukonzya kuchita kuti tubaboozye kuzwa mulufu. Pesi iBbayibbele lilatuumbulizya. (Bala 2 BaKorinto 1:3, 4.) Ngatulange-lange chimwi chikozyano chitoondeezya kuti Jehova aJesu bayanda kubusya bazibbululu besu aabo bakafwa kuti bakapone lubo. Chiindi Jesu naakali munyika, chiindi chiingi wakali kuswaya Lazaro abachizi bakwe Marta aMariya. Boonse kabali batatu bakali beenzinyina baJesu. IBbayibbele lyaamba kuti: “Eno Jesu wakali kuyanda Marta, amwanaakwabo, awalo Lazaro.” Mpawo bumwi buzuba, Lazaro wakafwa.​—Johane 11:3-5.

5, 6. (a) Niinzi Jesu nchaakachita aawo naakabona mpuli yabaLazaro abeenzinyina kabalila? (b) Nkaamboonzi nikuumbulizya kuziba inzila Jesu njaakalimvwaayo atalaa kufwidwa?

⁵ Jesu wakayinka kuyoowumbulizya Marta aMariya. Chiindi Mariya naakamvwa kuti Jesu uzobuza, wakayaanze amunzi kuyoomutambula. Wakabotelwa loko kubona Jesu, pesi wakaamba kuti kulinguwe: “Kuti nowakali kokuno, mwanaakwesu naatakafwa.” Marta wakayeeya kuti Jesu wakali wanonoka. Chiindi Jesu naakabona mwanikaakwe Mariya, kalookulila, zyakamuchisa loko, zyakapa kuti alakwe alile. (Johane 11:21, 33, 35) Wakamvwa kuchisa kwamoyo kweetwaa kaambo kakufwidwa muntu ngutuyanda.

⁶ Kuziba kuti Jesu wakalimvwa mbuli mbutulimvwa andiswe atala akufwidwa kulatuumbulizya. Jesu uli mbuli Wisi. (Johane 14:9) Jehova ulaamanguzu aakugwisya lufu mane kukabe kutamani, alimwi nzizyo nzyatakachite lino-lino.

“LAZARO, KOZWA OMO!”

7, 8. Nkaamboonzi Marta naakatali kuyanda kuti bbwe ligwisigwe, alimwi niinzi Jesu nchaakachita?

⁷ Aawo Jesu nakaya kukabanda ooko Lazaro nkwaakazikkidwe, mulyango wakali wajalwa abbwe pati. Jesu wakati: “Amugwisye bbwe.” Pesi Marta taakali kuyanda pe kuti bachite oobo. Mubili waLazaro wakali wakkala mukabanda “kwamazuba one.” (Johane 11:39) Taakazi pe Jesu nchaakali kuyanda kuchita kutegwa agwasye munyaandumi wakwe.

⁸ Jesu wakati kuli Lazaro: “Kozwa omo!” Nzibakabona kuzwaawo baMarta aMariya zyakali kugambya. “Oyo uwakafwide wakazwa, ulizambaidwe kumaboko akumaulu ezisani.” (Johane 11:43, 44) Lazaro wakaboozegwa kukupona lubo! Wakakkala abamumpuli yabo abeenzinyina. Bakali kukonzya kumukumbata, kumujata, akwaambulaawe. Yeeya kuti nchigambyo chili biyeni eecho! Jesu wakali wamubusya Lazaro.

WAKAAMBA KUTI “KASIMBI BUKA!”

9, 10. (a) Ngwani wakapa Jesu nguzu zyakubusya bantu? (b) Nkaamboonzi zikozyano zyabaabo bakabusigwa nizitugwasya?

⁹ Jesu wakabusya bantu kabelesya nguzu zyakwe na? Peepe. Katana busya Lazaro, Jesu wakakomba kuli Jehova alubo Jehova wakamupa nguzu zyakubusya Lazaro. (Bala Johane 11:41, 42.) Lazaro teenguwe pe alikke wakabusigwa. IBbayibbele litwaambila atala akasimbi kakalaa minyaka iili12 ikakali kuchiswa. Jairo, wisi wakasimbi aaka, wakali wamaninwa, alimwi wakakumbila Jesu kuti aponie mwanaakwe. Nguwe wakali mwaanakwe luzutu. Chiindi naakali kwaambuula aJesu, bamwi baalumi bakasika kuli nguwe akwaamba kuti: “Mwanaako wafwa kale! Uchimupenzezyanzi Mufundisi?” Pesi Jesu wakati kuli Jairo: “Utayoowi, kosyoma buyo, musimbi ulapona.” Kuzwaawo bakiinkaamwi kung’anda yaJairo. Nibakasika aafwiifwi ang’anda, Jesu wakabona akumvwa bantu kabalila. Jesu wakababuzya kuti: “Mutalili, nkaambo tafwide pe, uloona.” Kweelede kuti zyakabagambya bazyali bamusimbi ooyu eezyo Jesu nzyaakali kwaamba. Jesu wakabuzya bantu boonse kuti bazwe, pesi wakanjila antomwe abazyali bamusimbi mung’anda oomo mwanaabo mwaakalazikidwe. Jesu wakamujata kuboko akumubuzya kuti: “Kasimbi buka!” Yeeyela kubotelwa kwabazyali bakwe nkubakabaako chiindi mwanaabo naakabuka akutalisya kweenda! Jesu wakali wabusya mwanaabo musimbi. (Marko 5:22-24, 35-42; Luka 8:49-56) Kuzwa buzuba oobo nibakabona mwanaabo musimbi, bakali kuyeeya Jehova nzyaakabachitila kwiinda muli Jesu.a

¹⁰ Aabo Jesu mbaakabusizye bakazoofwa lubo. Pesi nzitubala zilatalaa bantu aaba zilagwasya nkaambo zitupa bulangilizi. Jehova uyanda kubusya bantu, Chachoonzyo uzoochita oobo.

NZITUYIIYA KUZWA KUZIKOZYANO ZYAKUBUSIGWA

11. Lugwalo lwaMukambausi 9:5 lutuyiisyaanzi atala aLazaro?

¹¹ IBbayibbele litubuzya kuti “bafwide tabezi ncintu niciba comwe.” Eechi chakali choonzyo atalaa Lazaro. (Mukambausi 9:5) Mbubonya mbuli Jesu mbaakambide, kwakali mbuli kuti Lazaro wakali koona. (Johane 11:11) Chiindi naakali mukabanda, Lazaro ‘taakwe cintu niciba comwe ncaakazi.’

12. Tuzi biyeni kuti kubusigwa kwaLazaro kwakachitika choonzyo?

¹² Chiindi Jesu naakabusya Lazaro, bantu biingi bakazibona. Nibaba basinkondonyina baJesu bakalizi kuti wakaachita malele aali bobu. Lazaro wakali muumi, alimwi eezi zyakatondeezya kuti bubuke bwakachitika choonzyo. (Johane 11:47) Alubo, bantu biingi bakayinka kuyooswaya Lazaro, alimwi impindu yakaba njakuti bakatalika kusyoma kuti Jesu wakatumidwe aaLeza. Pesi chuusisya nchakuti basinkondoonyina teebakali kuziyanda pe eezyo, mpawo bakabamba kuti boonse Jesu aLazaro bajayigwe.​—Johane 11:53; 12:9-11.

13. Nkaamboonzi nitulaa choonzyo chakuti Jehova uyoobabusya bakafwa?

¹³ Jesu wakaamba kuti “boonse abali muzyuumbwe” bayoobusigwa. (Johane 5:28) Eechi chaamba kuti boonse bali mumizeezo yaJehova bayooboozegwa kubuumi. Pesi kuti Jehova akabusye umwi awumwi, uyooyeeya zyoonse zili atala amuntu ooyo. Kujana wazichita na choonzyo eezyo? Mbubo mbuli mabbiliyoni aanyenyeezi zili mujulu. IBbayibbele lyaamba kuti Jehova ulaazi mazinaa nyenyeezi imwi ayimwi. (Bala Isaya 40:26.) Ikuti kakonzya kuyeeya mazinaa nyenyeezi imwi ayimwi, nisimpe kuti nchuubawuba kuli nguwe kuyeeya zyoonse zili atala ababo boonse mbatakaboozye kubuumi. Chiinda kugwasya nchakuti, Jehova nguwe wakalenga zintu zyoonse, aboobo tulizi kuti ulaawo manguzu aakuboozya bantu bakafwa kubuumi.

14, 15. Majwi aaJobu atuyiisyaanzi atala akubusigwa?

¹⁴ Mwaalumi uusyomeka Jobu wakali kubusyoma bubuke. Wakabuzya kuti: “Ikuti naa muntu wafwa, sena inga wapona alimwi?” Mpawo wakaamba kuti kuli Jehova: “Uyakwiita, eelyo mebo ndiyookuvwiila. Yebo uyooyandisya milimo yamaanza aako.” Nisimpe, Jobu wakalizi kuti Jehova ulangilila kunembo aawo nayoobusya bakafwa.​—Job 14:13-15, NW.

¹⁵ Bulangilizi bwabubuke bukupa kuti ulimvwe biyeni? Ulakonzya kulibuzya kuti, ‘Bayoobusigwa na abalabo bamumpuli yesu abeenzuma bakafwa chiindi?’ Nichoonzyo zilatuumbulizya kuziba kuti Jehova ulayanda kuboozya bakafwa kubuumi. Kwalino atulange-lange Bbayibbele nzilyaamba atala ankubayookkala akuti mbaani bayoobusigwa.

‘BAYOOMVWA IJWI LYAKWE AKUZWA MUZYUUMBWE’

16. Bantu bayoobusigwa bayoobotelwa kupona buumi buli biyeni?

¹⁶ Chiindi, aabo bakali kubusigwa bakali kuswaanana lubo abampuli yabo abeenzinyina aano aanyika. Eezi nzizyo ziyoochitika kunembo, pesi zinooli kabotu kwiinda chiindi. Nkaamboonzi nitwaamba oobo? Nkaambo aabo batakabusigwe aanyika bayoobaa choolwe chakupona kukabe kutamani alimwi taakwe nibachiyoofwa pe. Alubo bayookkala munyika iisiyene loko ayeyi njitukkala mazuba aano. Taakwe nikuyooba nkondo, milandu alimwi takuchikabi limbi kuchiswa.

17. Mbaani bayoobusigwa?

¹⁷ Mbaani bayoobusigwa? Jesu wakaamba kuti “ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya.” (Johane 5:28, 29) Alimwi lugwalo lwaCiyubunuzyo 20:13 lutubuzya kuti: “Nkabela lwizi lwakabweedezya bafu bali muli ndulo, alwalo lufu acikalilo cabafu zyoonse zyakabweedezya bafu bali mulinzizyo.” Masimpe, mabbiliyoni aabantu bayoopona lubo. Alubo mwaapostolo Paulo wakaambila boonse kuti “kulaba kubuka kwabaluleme akwabataluleme.” (Bala Incito 24:15.) Zyaambaanzi eezi?

18. Mbaani “baluleme” bayoobusigwa?

¹⁸ “Baluleme” baswaanizya babelesi baJehova basyomekede bakapona chiindi Jesu katanaaza anyika. Bantu bali mbuli Nowa, Abrahamu, Sara, Musa alimwi aEsita bayoobusigwa anyika. Ulakonzya kubala atala abaalumi abanakazi mubbuku lyaBaHebrayo muchaandano 11. Kutegwani ababelesi baJehova basyomekede ibafwa muchiindi chesu? Bachitegwa ‘mbalulami,’ aboobo bayoobusigwa.

19. Mbaani “bataluleme”? Nguuli mweenya Jehova ngwayoobapa?

¹⁹ “Bataluleme” baswaanizya mabbiliyoni aabantu bakatajana choolwe chakuziba Jehova. Nikuba kuti bakafwa, Jehova tabalubide pe. Uyoobabusya, mpawo bayoojana choolwe chakwiiya atala aJehova alimwi akumubelekela.

20. Nkaamboonzi nibatali boonse bayoobusigwa?

²⁰ Pesi eezi zyaamba kuti boonse bakafwa bayoobusigwa na? Peepe. Jesu wakaamba kuti bamwi bantu tabakoyoobusigwa pe. Ngwani uyoosala kuti mbaani batakabusigwe abatakaleke kubusigwa? Jehova ngunguwe Mubetesi wamamanino, pesi wakapa Jesu nguzu “kuti ngonguwe uwakabikwa Leza kuti abe mubetesi wabaumi abafwide.” (Incito 10:42) Kufumbwa uutakabetekwe kali sizibi alimwi uutayandi kusanduka takabusigwi pe.​—Langa Makani Aakumamanino 19.

KUBUSIGILWA KUYA KUJULU

21, 22. (a) Kubusigilwa kuya kujulu zyaambaanzi? (b) Ngwani muntu wakasaanguna kubusigwa kuyoopona kujulu?

²¹ IBbayibbele litubuzya kuti bamwi bantu bayoopona kujulu. Ikuti umwi wabusigilwa kuya kujulu, takoyoobusigwa kalaa mubili wanyama pe. Pesi ulabusigwa kubuumi bwakujulu kali aamubili wamuuya.

²² Jesu ngwakusaanguna kujana musyobo wabubuke oobu. (Johane 3:13) Nikwakiinda mazuba aatatu Jesu nibakamujeya, Jehova wakamubusya. (Intembauzyo 16:10; Incito 13:34, 35) Jesu taakabusigwa kali aamubili wanyama. Mwaapostolo Petro upandulula kuti Jesu “wakajayigwa kumubili, pele wakabusigwa kunguzu zya-Muuya.” (1 Petro 3:18) Jesu wakabusigwa kukupona kali muntu wamuuya uuli aanguzu! (1 BaKorinto 15:3-6) Pesi iBbayibbele lyaamba kuti teenguwe pe alikke uyoopona kalimuntu wamuuya.

23, 24. Mbaani bategwa “nkatanga kaniini” Jesu mbaakaamba, alimwi banooli bangani?

²³ Naakazwa kukufwa, Jesu wakabuzya basikwiiya bakwe basyomeka kuti: “Ndiya kukumubambila busena.” (Johane 14:2) Eezi zyaamba kuti bamwi basikumutobela bayoobusigwa kuti bakapone kujulu antomwe anguwe. Banooli bangani? Jesu wakati banooli bache, zyaamba kuti ‘nkatanga kaniini.’ (Luke 12:32) Mwaapostolo Johane wakaamba mweelwe mbuli mbuubede aawo naakabona Jesu ‘kayimvwi acilundu ca-Zioni, wakali abantu abali zyuulu zili mwaanda amakumi one azine [144 000].’​—Ciyubunuzyo 14:1.

²⁴ Ndiilili maKristu aali 144 000 nibayoobusigwa? IBbayibbele litubuzya kuti eezi ziyoochitika chiindi Kristu kali watalisya kulela kujulu. (1 BaKorinto 15:23) Lino tulookupona kuchiindi eecho, alimwi bamwi babali 144 000 bakabusigilwa kale kububuke bwakujulu. Aabo bachipona aanyika lino, chiindi nibafwa mpawaawo balabusigwa kububuke bwabuumi bwakujulu. Aboobo, bantu bamwi boonse bayoobusigwa kukupona munyika iili paradayizi aansi aano.

25. Tuyooyiiyaanzi muchaandano chitobela?

²⁵ Lino-lino, Jehova uyoowangununa bantu kuzwa kulufu akugwisya lufu kukabe kutamani! (Bala Isaya 25:8.) Pesi aabo bayinka kujulu bayoochitaanzi? IBbayibbele litupandulwida kuti bayoolela aJesu mumfulumende yaBwaami bwakwe. Muchaandano chitobela tuyooyiiya zyiingi atala amfulumende eeyo.