MUBUZYO 5

Kujana Ndachita Biyeni Kuti Kandilikupenzegwa Kuchikolo?

ZIGWASYAANZI?

Nzila njuchitaayo ilakonzya kupa kuti penzi limane naakuti lyiindilile kubija.

**KUJANA WACHITA BIYENI?**

Yeeya eezi: Makani tayandi kwiinka kuchikolo sunu nikuba juunza. Tachiyandi kukulyata. Penzi lyakatalika myeezi itatu yakiinda aawo basichikolonyina nibakaamba makani akubeja atala anguwe. Mpawo bakamuuzika tuzina twakumuninda. Chimwi chiindi, umwi wakamuguzula achaali mpawo Makani wakawisya mabbuku alubo umwi mukabunga wakamutonta pesi naakachebuka bakachitaanga taakwe zyachitika. Mpawo jilo basichikolonyina bakamutumina meseji yakuti bakali kuyoomuma kuti wabweeda lubo kuchikolo.

Kaansinga nduwe Makani walikunoochita biyeni?

YEEYA SAANSI!

Tazyaambi kuti tukwe manguzu. Ulakonzya kubalwana bakupenzya pesi kutabachisi pe. Kujana wabalwana biyeni?

UTANYEMI. Bbayibbele lyaamba kuti: “Mufubafuba ulaamba bukali bwakwe boonse, pele musongo ulabukasya akubutontozya.” (Tusimpi 29:11) Kuti watondeezya kuti tunyemede, bakupenzya balakonzya kusiyana anduwe.
UTABWEEDEZYI CHIBI. Bbayibbele lyaamba kuti: ‘Mutabweedezyi bubi kububi.’ (BaRoma 12:17) Kubweedezya kupa kuti penzi lyiindilile kubija.
UTALINJIZYI MUMAPENZI. Bbayibbele lyaamba kuti: “Muntu uucenjede, abona mapenzi, ulayuba.” (Tusimpi 22:3) Yezya kutantamuka bantu bakupenzya alubo utalinjizyi muzyiimo zikonzya kukweetela mapenzi.
SANDULA MUNZILA NJIBATAYEEYELI. Bbayibbele lyaamba kuti: “Kuvuwa kabotu kulalesya bukali.” (Tusimpi 15:1) Ulakonzya kubasesya. Muchikozyano, kuti basikukupenzya bakubuzya kuti ulichivuvu ulakonzya kwaamba kuti, “Nichoonzyo ndeelede kuchesya mubili wangu.”
KOZWA MPUBABEDE. Umwi musimbi uuchikula utegwa Tusyome ulaaminyaka iili 19 wakati, “Kuumuna kutondeezya kuti wakomena akuti ulaamaanu kwiinda muntu ulikukupenzya. Kulinyona mbube butondeezya kuti ulisiyene abasikukupenzya.”—2 Timoteo 2:24.
UTABAYOOWI PE. Basikupenzya balafwambaana kubona kuti muntu ngubali kupenzya uliyoowede akuti taakwe nchakonzya kuchita. Pesi balakonzya kuleka kukupenzya kuti babona kuti tubayoowi pe.
BUZYA UMWI MUNTU. Umwi wakali muyiisi wakaamba kuti: “Bantu bapenzegwa tabeelede kufwida mukaango pe. Kwaamba kulagwasya nkaambo kupa kuti basikupenzya baleke kupenzya bamwi.”

Mulombe uuchikula utondeezya kutamuyoowa sikumupenzya — Kutayoowa kuyookugwasya kuti ube amanguzu kwiinda sikukupenzya

WALIZI NA?

Kupenzegwa kuswaanizya zintu zyiingi mbuli:

Kutukilwa. Celine uli aminyaka iili 20 wakati: “Tandizootulubi pe tuzina ntubakanduuzikide azintu zibi nzibakali kwaamba atala andime. Zipa kuti ndilimvwe kanditagwasyi, kanditayandwi alubo ndisala kuti muntu anduume kwiinda kunditukila.”
Kutantamukwa abeenzinyokwe. Haley ulaaminyaka iili 18 wakaamba kuti: “Mbindiiyaabo bakasaanguna kunditantamuka. Chiindi chalunch bakali kutondeezya kuti tabayandi kukkala andime kwiinda mukundijalila akukkala. Munyaka woonse ndakali kulya andilikke kumwi kandilila.”
Kwaambuula zintu zitali kabotu kababelesya kkompiyuta naakuti fooni. Daniel ulaaminyaka iili 14 wakati: “Kusenda meseji iimwi iitali kabotu kulakonzya kusofwaazya mpuwo yamuntu. Majwi aaya alakonzya kubonekaanga ngakubeja pesi nzizyo zichitika.”

**KUJANA WASANDULA BIYENI?**
NICHOONZYO NA NAAKUTI NKUBEJA	NSANDULO
1 Kupenzegwa kwakasaanguna chiindi.	1 Nichoonzyo. Muchikozyano, muchiindi chaNowa kwakali bantu bakali kupenzya bamwi alubo Bbayibbele libaamba kuti ‘Mabbabbani.’—Matalikilo 6:4.
2 Kupenzegwa nkukongwa luzutu. Alubo takuchisi pe.	2 Nkubeja. Bachikula biingi balalijaya akaambo kakupenzegwa.
3 Ulakonzya kukumana kupenzegwa kwiinda mukubweedezya.	3 Nkubeja.
4 Kuti wabona umwi kalikupenzegwa weelede kuumuna.	4 Nkubeja. Kuumuna takugwasyi pe. Kuti wabona umwi kalikupenzegwa mpawo wawumuna ngawatondeezya kuti uyanda kuti bamwi kabapenzegwa kutali kuti penzi eelyo limane.
5 Nikuba kuti basikupenzya babonekaanga balaamanguzu, pesi balayoowa.	5 Nichoonzyo. Nikuba kuti basikupenzya balalisumpula pesi bamwi bachita oobo akaambo kakuti balaazintu zibakataazya.
6 Basikupenzya balakonzya kuchincha.	6 Nichoonzyo. Basikupenzya balakonzya kuchincha kuti bagwasigwa.