MUBUZYO 6
Kujana Ndachita Biyeni Kuti Nditeenwi Abeenzuma?
KUJANA WACHITA BIYENI?
Yeeya eezi: Alanu watalika kumvwa mwida akaambo kakuyoowa, mbabona beenzinyina kabalikuza. Babatubili kabalikumusungilizya kuti afwepe. Ulizi kuti aka kalaba kachitatu.
ulombe wakusaanguna wamubuzya kuti:
“Uchili awulikke? Yimikila ndikulabizye eechi mafana.”
Chiindi nalikuti “mafana” wamutinyina liso mpawo wagwisya chintu munkomo wachitambikizya Alanu.
Alanu wabona kuti nchalikutambikizigwa nkandundu. Eezi zyapa kuti ayindile kuyoowa.
Alanu wamusandula kati: “Tandiyandi pe. Teendakakubuzya kale kuti tandi . . . ”
Mulombe wachibili wati: “Utayoowi!”
Alanu wasandula kalaachibindi wati: “Tandiyoowede pe!”
Mulombe wachibili wajata Alanu aakkwiko mpawo wamubuzya ajwi teteete kuti: “Tambula kabi.”
Mulombe wakusaanguna waswenzya kandundu kuli Alanu mpawo wavwiya-vwiya kalikuti: “Bweza mafana. Taakwe muntu utazizibe pe.”
Kaansinga nduwe Alanu, walikunoochita biyeni?
YEEYA SAANSI!
Balombe aaba bakayeeyesesya na atala anzibakali kuchita? Mbabo bakalisalila na kuchita oobo? Peepe. Kulakonzya kuti balikutobelezya zichitwa abamwi. Bayanda kuti bamwi babayande nkinkaako, balazumina kufumbwa nzibabuzigwa.
Nikuli nduwe walimuchiimo eechi, walikunoochita biyeni kuti uteenwi abaselanyokwe?
YEEYELA ZIKONZYA KUCHITIKA
Bbayibbele lyaamba kuti: “Muntu uucenjede, abona mapenzi, ulayuba, pele bataiyide balaindilila aboobo balapenga.”—Tusimpi 22:3.
Ziindi zyiingi, ulakonzya kubona penzi kalitanachitika. Muchikozyano, ulakonzya kubona kabunga kabasichikolonyokwe kabali kufwepa. Kuyeeyela zikonzya kuchitika kuyookugwasya kuti ulitantamuke penzi eelyo.
YEEYA SAANSI
Bbayibbele lyaamba kuti: “Amube amanjezeezya aasalala.”—1 Petro 3:16.
Libuzye kuti, ‘Niinzi chikonzya kuchitika kuti ndatobelezya zichitwa abamwi?’ Ulakonzya kutambulika kuli mbabo. Pesi, kuyoopa kuti ulimvwe biyeni mukuya kwachiindi? Kujana wasofwaazya zina lyako na akaambo kakuyanda kubotezya basichikolonyokwe?—Kulonga 23:2.
SALA CHABUSONGO
Bbayibbele lyaamba kuti: “Musongo ulayoowa.”—Tusimpi 14:16.
Weelede kusala zyakuchita alimwi kufumbwa nzusala zili ampindu. Bbayibbele litubuzya atala abaalumi bakasala kabotu mbuuli Josefa, Jobu aJesu. Alubo litubuzya atala aKkayini, Esawu aJudasi bakasala munzila iitali kabotu. Uyoosala biyeni?
Bbayibbele lyaamba kuti: ‘Chita kabotu.’ (Intembauzyo 37:3)Kuyeeya atala ampindu zikonzya kujanika akuziba nzweelede kusala, ziyoopa kuti kukuubile kusala munzila igwasya.
Takuyandiki kuti ubapandulwide kuti nkamboonzi nwasala munzila eeyo. Pesi weelede kwaambuula munzila itondeezya kuti ulikwambisya kuti TUYANDI pe. Kuti babone kuti tuchinchi pe kulinzwaamba weelede kwaamba kuti:
“Mutandibali.”
“Nzimulikuchita tandizichiti pe.”
“Mulizizi kuti tandizichiti pe eezyo.”
Ziyandika nkuti usandule munzila itondeezya kuti uli achoonzyo akusala kwako. Kuti wachita oobo, uyoogamba kubona beenzinyokwe kabasiyana anduwe.
MBUKONZYA KULWANA PENZI LYAKUFUBAAZIGWA
Kuti walekela beenzinyokwe kuti bakusalile zyakuchita, uyooba mbuli toyi lyabo
Kujana wachita biyeni kuti baselanyokwe bakufubaazya? Ulachitaanzi kuti bakwaambila kuti, “Wabonaanzi, wayoowa na?” Weelede kuziba kuti bayanda kukweena. Kujana wachita biyeni? Ulakonzya kuchita zintu zibili.
Weelede kuzumina nzibaamba. (“Nichoonzyo ndayoowa!” Mpawo ubabuzye kuti nkamboonzi nwaamba oobo.)
Sandula munzila itape kuti balibone kabali bafuba-fuba. Babuzye kaambo kapa kuti ukake mpawo ubatondeezye kuti nzibachita mbufuba-fuba. (“Ulizi kufwepa takukweeleli pe!”)
Kuti baselanyokwe biinkilila kunembo kabakufubaazya, weelede kweenda ubasiye! Kuti wakkalaabo kwachiindi chilamfu balazumanana kukoongelezya. Kuti wabasiya ngawatondeezya kuti tubapi mweenya wakuti bachinche nzila njusalaayo.
Tukonzyi kukuchija pe kufubaazigwa abeenzinyokwe. Pesi ulakonzya kusala zintu nzuyanda, kwaamba nzwaasala akutondeezya kuti tuyandi kuti bachinche nzusala. Nduwe weelede kulisalila zyakuchita!—Joshua 24:15.