Bantu tabaleki pe kulibuzya kuti, “Nkamboonzi nizyachitika eezi?” kuti kwachitika mapenzi. Zibotezya nzyakuti mubuzyo ooyu ulasandulwa muBbayibbele.

1. Niinzi nzyaakachita Saatani zyakapa kuti munyika mube mapenzi?

Saatani Dyabbulosi wakapapila Leza. Saatani wakali kuyanda kweendelezya bantu, eezi zyakapa kuti ayene Adamu aEva kuti ambabo bapapile Leza. Saatani wakazuzikizya makanze aakwe kwiinda mukweena Eva. (Matalikilo 3:1-5) Nzyaakaamba Saatani zyakapa kuti Eva abonaanga Jehova kuli zintu nzyaakali kubayima. Mulaamwi majwi, wakali kwaamba kuti bantu balakonzya kubotelwa kuti teebendelezegwa aaLeza. Saatani wakasaanguna kubejela Eva kuti takozoofwa pe. Bbayibbele lyaamba kuti Saatani “mubeji alimwi ngousyi wabubeji.”—Johane 8:44.

2. Adamu aEva bakasala kuchitaanizi?

Jehova wakabapa baAdamu aEva zyoonse nzibakali kuyanda. Wakababuzya kuti balakonzya kulya michelo yamisamu yoonse ili mumuunda, kunze kwawumwi luzutu. (Matalikilo 2:15-17) Pesi bakasala kulya muchelo wamusamu ngubakakasigwa. Eva wasaanguna kuchela “micelo kulincico akulya.” Mpawo Adamu “awalo wakalya.” (Matalikilo 3:6) Boonse kabali babili teebakamuswiilila pe Leza. Mbukunga Adamu aEva teebakali achibi pe, teekwakali kubayumina pe kuchita zilikabotu. Pesi bakasala kutaswiilila Leza achaali, kuchita oobo kwakali kumubisizya akumukaka kuti abe mweendelezi wabo. Kutaswiilila ooku kwakapa kuti banjile mumapenzi.—Matalikilo 3:16-19.

3. Kutaswiilila kwaAdamu aEva kutujatikizya biyeni?

Chiindi Adamu aEva nibakabisya bakaba achibi alubo bakayinzya chibi kubana babo boonse. Bbayibbele lyaamba kuti: “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse.”—Baroma 5:12.

Kuli twaambo twiingi tupa kuti tuswaanane aamapenzi. Chimwi chiindi nga twanjila mumapenzi akaambo kakutasala kabotu nkutuchita. Chimwi chiindi akaambo kakutasala kabotu kuchitwa abamwi. Alubo chimwi chiindi tunjila mumapenzi akaambo kakuba abusena butali kabotu achiindi chiteelede.—Bala Mukambausi 9:11.

YIYA ZYIINGI

4. Muntu weeta mapenzi ngituswaana

Bantu biingi basyoma kuti Leza nguuyendelezya nyika. Nisimpe na eeyi? Mweebele KAVIDIYO.

KAVIDIYO: Ngwani Weendeelezya Nyika? (1:24)

Bala Jakobo 1:13 a 1 Johane 5:19, mpawo musandule mubuzyo uutobela:

• Leza nguwe uutweetela mapenzi na?

5. Bona mapenzi akaba akaambo kakweendelezegwa aaSaatani

KAVIDIYO: Nkamboonzi Leza Nazumizya Bubi aMapenzi?—Kapanzi (3:07)

Bala Matalikilo 3:1-6, mpawo musandule mibuzyo iitobela:

• Ngaali manwa ngakaamba Saatani?—Langa vesi 4 a 5.

• Niinzi zitondeezya kuti Saatani wakali kwaamba kuti Jehova kuli zintu zibotu nzyabayima bantu?

• Bantu beelede kweendelezegwa aJehova na kuti babotelwe?

Bala Mukambausi 8:9, mpawo musandule mubuzyo uutobela:

• Niinzi zyakachitika akaambo kakuti Jehova teenguwe pe ulikweendelezya nyika?

1. Adamu aEva teebakalikwe chibi pe alubo bakali kukkala muParadayizi. Pesi bakazooswiilila Saatani mpawo bakapapila Jehova

2. Kupapila ooku, kwakapa kuti bantu babe aachibi, baswaanane aamapenzi akuti bafwe

3. Jehova uzoomaninsya chibi, mapenzi alufu. Aachiindi eecho, bantu bayooba aamibili iitakwe chibi alubo bayookkala muParadayizi

6. Jehova ulaandaba amapenzi ngituswaana

Leza umvwa biyeni chiindi nituswaanana amapenzi? Mvwa nzyaakaamba Mwaami Davida amwaapostolo Petro. Bala Intembauzyo 31:7 a 1 Petro 5:7, mpawo musandule mubuzyo uutobela:

• Kuziba kuti Jehova ulaabona mapenzi ngituswaana akuti tabotelwi pe chiindi nituli mumapenzi kupa kuti ulimvwe biyeni?

CHIFWIINSYO

Saatani Dyabbulosi aAdamu aEva mbabo bakapa kuti munyika kube mapenzi. Jehova tabotelwi pe chiindi nituswaanana aamapenzi alubo lino-lino uzoowagwisya.

Mibuzyo Yakwiindulula

• Ngaali makani aakubeja Saatani Dyabbulosi ngaakabuzya Eva?

• Nziizili mpindu zyakaba akaambo kakupapila kwaAdamu aEva?

• Tuzizi biyeni kuti Jehova tabotelwi pe chiindi nituswaanana amapenzi?

YANDUULISISYA

Bona kuti Bbayibbele lyaamba kuti chibi niinzi.

“Chibi Niinzi?” (Chiiyo chijanika aaIntaneti)

Bona zintu nzyaakaamba Saatani Dyabbulosi mumuunda waEdeni.

“Nkamboonzi Leza Nazumizya Mapenzi?” (Ngaziyakulinda, January 1, 2014)

Bona nsandulo zyuumbulizya zyamubuzyo ooyu uukataazya.

“Nkamboonzi Leza Naakazumizya Kuti Bantu Bajayane? Nkamboonzi Naatakabakasya?” (Chiiyo chijanika aaIntaneti)

Bona kuti umwi mwaalumi kwakamugwasya biyeni kuziba kuti mapenzi azwa kuli.

Ndakachincha (5:09)

Tulaachibi, tuswaanana aamapenzi alubo tulafwa akaambo kakuti Adamu aEva teebakamuswiilila pe Leza.a Pesi zintu zizoobota kunembo. Jehova wakatunununa kuzwa kuchibi alufu kwiinda muMwanaakwe, Jesu Kristu. Bbayibbele lyaamba kuti lufu lwaJesu, nchinunuzyo chesu. Chinunuzyo nimbadalo iigwisigwa kuti kwaangununwe muntu. Mbadalo njaakapa Jesu mbuumi bwakwe butakwe chibi. (Bala Matayo 20:28.) Chiindi Jesu naakalipeda kwaaba buumi bwakwe, wakajula nzila yakuti tukajane zintu nzyaakasweekelwa Adamu aEva. Nzyaakachita Jesu, zitondeezya mbatuyanda aJehova mbatuyanda. Chiiyo eechi, chiyookugwasya kuti ubone mbuluyandikana lufu lwaJesu.

1. Lufu lwaJesu lutugwasya biyeni mazubaano?

Akaambo kakuti tulaachibi, nzyiingi zintu nzitubisizya Jehova. Pesi kuti twaleka kuchita zibi mpawo twakumbila Jehova kuti atulekelele kabelesya Jesu Kristu akuti twabeleka changuzu kuti tutayindululi lubo kuchita zintu zibi, tulakonzya kuba beenzinyina baLeza. (1 Johane 2:1) Bbayibbele lyaamba kuti: “Kristo wakafwa ciindi comwe buyo kukabe kutamani kujatikizya zibi, muntu uululeme kufwida bantu bataluleme, kutegwa amusololele kuli Leza.”—1 Petro 3:18.

2. Lufu lwaJesu luyootugwasya biyeni muchiindi chilikunembo?

Jehova wakatuma Jesu kuti azoowabe buumi bwakwe bumaninide kuti “muntu uuli woonse uumusyoma atanyonyoonwi, pele abe abuumi butamani.” (Johane 3:16) Zintu zyakachitwa aaJesu ziyoopa kuti Jehova akagwisye zintu zyoonse zitali kabotu zyakeetwa akaambo kakutaswiilila kwaAdamu. Eezi zyaamba kuti, kuti twaba aalusyomo muchinunuzyo chaJesu tuyoopona kukabe kutamani muparadayizi aanyika.—Isaya 65:21-23.

YIYA ZYIINGI

3. Lufu lwaJesu lulatwaangununa kuchibi alufu

KAVIDIYO: Jesu Wakafwidaanzi?—Chipanzi 1 (2:01)

• Wakasweekelwaanzi Adamu akaambo kakutaswiilila Leza?

Bala Baroma 5:12, mpawo musandule mubuzyo uutobela:

• Kubisya kwaAdamu kwakapa kuti tujane mpindu zili biyeni?

Bala Johane 3:16, mpawo musandule mubuzyo uutobela:

• Jehova wakamutuminaanzi Mwanaakwe aanyika?

1. Adamu taakalikwe chibi pe pesi taakamuswiilila pe Leza mpawo wakapa kuti bantu babe aachibi akuti bafwe

2. Jesu taakalikwe chibi pe pesi wakaswiilila Leza mpawo wakapa kuti bantu bazookonzye kuba aamibili iitakwe chibi akuti bazoopone kukabe kutamani

4. Lufu lwaJesu lugwasya bantu boonse

KAVIDIYO: Jesu Wakafwidaanzi?—Chipanzi 2 (2:00)

• Lufu lwamuntu uumwi kujana lwabagwasya biyeni bantu boonse?

Bala 1 Timoteyo 2:5, 6, mpawo musandule mubuzyo uutobela:

• Adamu taakalikwe chibi pe pesi nguwe wakapa kuti bantu babe aachibi akuti bafwe. Jesu anguwe taakalikwe chibi pe. Wakazichita biyeni kuti ape “cinunuzyo ceelene”?

5. Chinunuzyo nchipo chako chizwa kuli Jehova

Beenzinyina baJehova babona chinunuzyo kachili chipo chabo. Muchikozyano, bala Bagalatiya 2:20, mpawo musandule mubuzyo uutobela:

• Mwaapostolo Pawulu wakatondeezya biyeni kuti chinunuzyo wakali kuchibona kachili chipo chakwe kumupalama?

Adamu naakabisya, wakapa kuti we abana bakwe boonse kabafwa. Pesi Jehova wakatuma Mwanaakwe kuti azootufwide kuchitila kuti tuzoojane buumi butamani.

Wanoobala mavesi aaya, yezya kubona mbaakalimvwa Jehova chiindi naakali kubona mwanaakwe kali mumapenzi. Bala Johane 19:1-7, 16-18, mpawo musandule mubuzyo uutobela:

• Zintu nzyaakachita Jehova aJesu zipa kuti umvwe biyeni?

CHIFWIINSYO

Lufu lwaJesu lupa kuti Jehova akonzye kutulekelela zibi zyesu akuti tuzoopone buumi butamani.

Mibuzyo Yakwiindulula

• Jesu wakafwidaanzi?

• Nkamboonzi Jesu naakali kweelela kuti abe chinunuzyo?

• Lufu lwaJesu lukugwasya biyeni?

YANDUULISISYA

Bona kuti nkamboonzi kufwa kwaJesu nikwaambwa kuti nchinunuzyo.

“Nkamboonzi Lufu lwaJesu Niluli ‘Cinunuzyo Cakununuzya Banji’?” (Chiiyo chijanika aaIntaneti)

Bona kuti niinzi nzitweelede kuchita kuti tukafutuke.

“Jesu Utufutula Biyeni?” (Chiiyo chijanika aaIntaneti)

Jehova ulakonzya na kulekelela muntu wachita zibi zipati loko?

“Mibuzyo yamuBbayibbele Ilasandulwa” (Ngaziyakulinda, May 1, 2013)

Bona kuti umwi mwaalumi wakali aazintu zyakali kumukataazya mumizeezo kuti wakagwasigwa biyeni naakaziba mbuchibeleka chinunuzyo chaKristu.

“Kuyeeya Mbundakatondeezegwa Luyando Kwakandigwasya Kuti Ndilisimye” (Ngaziyakulinda, May 15, 2015)