Niinzi Chikonzya Kupa Kuti Mubotelwe Mumpuli?—Chipanzi 2

Bana nzipo zizwa kuli Jehova. Uyanda kuti bazyali bazibambe kabotu zipo eezyo. Jehova upede bazyali malayilile aakonzya kubagwasya kuti bachite oobo. Malayilile aaJehova alakonzya kugwasya bana kuti ambabo bape kuti mumpuli kube kubotelwa.

1. Ngaali malayilile Jehova ngaakapa bazyali?

Jehova uyanda kuti bazyali bayande bana babo akuti bajane chiindi chakubaamwi ambabo. Alubo Jehova uyanda kuti bazyali bakwabilile bana babo kuzintu zikonzya kubachisa akuti babayiisye kababelesya malayilile aamuBbayibbele. (Tusimpi 1:8) Ubuzya mawisi kuti: “Amuzumanane kubalela [bana banu] mululayo alwiiyo lwa Jehova.” (Bala Baefeso 6:4.) Jehova ulabotelwa kuti bazyali baswiilila malayilile aaya chiindi nibakomezya bana babo kutali kuti bape umwi muntu kuti abalele.

2. Ngaali malayilile Jehova ngaakapa bana?

Jehova ubuzya bana kuti: “Amubamvwide bazyali banu.” (Bala Bakolose 3:20.) Chiindi bana nibalemeka akuswiilila bazyali babo, bapa kuti Jehova abazyali babo babotelwe. (Tusimpi 23:22-25) Jesu wakabasiila chikozyano chibotu loko bana. Nikuba kuti taakalikwe chibi pe wakali kubalemeka akubaswiilila bazyali bakwe.—Luka 2:51, 52.

3. Kujana mwachita biyeni kuti muswene aafwiifwi aJehova kamuli mpuli?

Kuti kuli muzyali, zilaantanganana kuti uyanda kuti bana bako bayande Jehova mbuli mbuchita. Kujana wazichita biyeni eezi? Kwiinda mukuchita zyaambwa aaBbayibbele, litii: “Mweelede kwaayiisya bana banu [majwi aaJehova] akubandika ngawo ciindi nomukkede muŋanda yanu, aciindi nomweenda munzila, aciindi cakoona, alimwi aciindi cakubuka.” (Deuteronomo 6:7) “Kwaayiisya” kulikwaambwa aawa chaamba kuyiisya kulikwiindulula-yindulula chintu chimwi. Chiindi nimuyiisya bana banu mweelede kwiindulula chintu eecho kuchitila kuti bachiyeeye. Vesi eeyi itondeezya kuti mweelede kuyanduula myeenya yakuti mujane chiindi chakwaambuula aabana banu atala aJehova. Mweelede kujana chiindi chakuchita kukomba kwampuli mviki amviki. Kuti kamutakwe bana, andinywe mulakonzya kujana chiindi chakuti mubale Jwi lyaLeza.

YIYA ZYIINGI

4. Mweelede kuyiisya bana banu munzila yaluyando

Kuyiisya mwana teekuuba pe. Kujana Bbayibbele lyamugwasya biyeni? Bala Jakobo 1:19, 20, mpawo musandule mibuzyo iitobela:

• Kujana bazyali batondeezya biyeni kuti balaaluyando chiindi nibaambuula aabana babo?

• Nkamboonzi muzyali natayelede kulaya mwana chiindi nanyemede?a

5. Amukwabilile bana banu

Kuti mukwabilile bana banu, kulayandikana kuti mwaambuule aabo atala amakani aazyakoonana. Kuchita oobu teekuuba pe. Mweebele KAVIDIYO, mpawo musandule mibuzyo iitobela.

KAVIDIYO: Amukwabilile Bana Banu Kuzintu Zibi (2:58)

• Niinzi chipa kuti bamwi bazyali kubayumine kwaambuula atala amakani aakoonana abana babo?

• Nziizili zimwi nzila nzibakabelesya bamwi bazyali kuti baambuule aabana babo atala azyakoonana?

Mbuli mbulyakaamba Bbayibbele, nyika yaSaatani ilikwiindilila kubija. Bala 2 Timoteyo 3:1, 13, mpawo musandule mubuzyo uutobela:

• Bamwi bantu babi baambidwe muvesi 13 bajata bana changuzu mumakani aakoonana. Nkinkaako, nkamboonzi nikuyandikana kuti bazyali bayiisye bana babo atala amakani aakoonana ambubakonzya kulikwabilila kubantu bakonzya kubavumpila?

Walizi na?

Bakamboni baJehova balaazibelesyo zyiingi loko zigwasya bazyali kuti bayiisye bana babo atala amakani aakoonana ambubakonzya kubakwabilila. Muchikozyano, bona:

• Amukwabilile Bana Banu (kavidiyo)

• Amwiiye ku Mwiiyi Mupati, zyaandaano 10 a 32

• “Kuyiisya Bana Banu Atala Amakani Aakoonana” (Amubuke! No. 5 2016)

6. Amulemeke bazyali banu

KAVIDIYO: Kujana Ndaambuuzyania Biyeni Abazyali Bangu? (2:19)

• Nkamboonzi nikuyandikana kuti uuchikula alemeke bazyali bakwe chiindi nalikwaambuulaabo?

• Kujana uuchikula wachita biyeni kuti aambuule aabazyali bakwe munzila yabulemu?

Bala Tusimpi 1:8, mpawo musandule mubuzyo uutobela:

• Uuchikula weelede kuchitaanzi kuti bazyali bakwe bamubuzya zyakuchita?

7. Amukombe Jehova kamuli mpuli

Mpuli zyaBakamboni baJehova bakasala chiindi mviki amviki nchibachita kukomba kwampuli. Nga bachitaanzi mukukomba kwampuli? Mweebele VIDIYO, mpawo musandule mibuzyo iitobela.

VIDIYO: Kukomba Kwampuli—Buyumu-yumu Azilongezyo (8:04)

• Kujana bachita biyeni mumpuli kuti babe aapulogilamu yaKukomba Kwampuli?

• Kujana bachita biyeni bazyali kuti kukomba kwampuli kunoneezye?—Langa chifanikisyo chili kumatalikilo aachiiyo eechi.

• Niinzi chikonzya kupa kuti kumuyumine kuti muchite kukomba kwampuli?

Muchiindi chamaIsrayeli, Jehova wakali kuyanda kuti bamumpuli bakkale kabajana chiindi chakwaambuula atala aMagwalo. Bala Deuteronomo 6:6, 7, mpawo musandule mubuzyo uutobela:

• Kujana mwaabelesya biyeni malayilile aaya?

Nzimukonzya kuchita mukukomba kwampuli:

• Mulibambile miswaangano yambungano.

• Mubale mpawo mwaambuuzyanie atala alwaano lwamuBbayibbele ndubayandisya bamumpuli.

• Kuti kamuli aabana baniini, mudawunilode mavidiyo atubbuku twabana aajanika aa jw.org.

• Kuti kamuli aabana bachikula, mulakonzya kwaambuuzyania atala azyiiyo zyabachikula zili aa jw.org.

• Amuchite madrama aalwaano lwamuBbayibbele abana banu.

• Amweebele akwaambuuzyania atala ayimwi vidiyo iijanika aa jw.org.

CHIFWIINSYO

Jehova uyanda kuti bazyali bayande bana babo, babayiisye akubakwabilila; uyanda kuti bana baswiilile akulemeka bazyali babo alubo uyanda kuti bamumpuli bamukombe kabalaamwi.

Mibuzyo Yakwiindulula

• Niinzi nzibeelede kuchita bazyali kuti bayiisye akukwabilila bana babo?

• Kujana bana batondeezya biyeni kuti balabalemeka bazyali babo?

• Mbuubuli bubotu bukonzya kuba kuti mviki amviki mpuli yajana chiindi chakuchita kukomba kwampuli?

YANDUULISISYA

Nziizili zyiiyo zikonzya kugwasya bana banu kuti bakomene kabotu?

“Zintu Zili 6 Bana Nzibeelede Kuyiisigwa” (Amubuke! No. 2 2019)

Bona malayilile aamuBbayibbele aali atala akulangania bachembeede.

“Bbayibbele Lityeni Atala Akulangania Bazyali Bachembeede?” (Chiiyo chijanika aaIntaneti)

Bona mbaakazwidilila umwi mwaalumi wakali kukachilwa kukomezya bana.

Jehova Wakatuyiisya Nzila Mbotu Yakukomezya Bana (5:58)

Bona mawisi mbubakonzya kumvwanana aabana babo.

“Mawisi Beelede Kuchitaanzi Kuti Bamvwanane Aabana Babo?” (Ngaziyakulinda, November 1, 2011)