CHIIYO 52
Nkamboonzi Nitweelede Kuzwaata Akuboneka Kabotu?
Umwi awumwi ulalisalila nzyayanda kuzwaata. Kutobelezya malayilile aamuBbayibbele kulakonzya kutugwasya kuti tusale zyakuzwaata zilikabotu alubo zibotezya Jehova. Atulange-lange malayilile aayo.
1. Ngaali malayilile aayelede kutugwasya chiindi nitusala zyakuzwaata ambutuboneka?
Tweelede kuzwaata “kabotu, cabulemu alimwi acakulibatamika” akuboneka kabotu munzila iitondeezya kuti ‘tulilyaabide kuli Leza.’ (1 Timoteyo 2:9, 10) Atulange-lange malayilile aali 4: (1) Tweelede kuzwaata “kabotu.” Mbuli mbuwakabona kumiswaangano yambungano, bakombi baJehova bazwaata munzila zisiyene-siyene pesi nzwaatilo yesu ambutubamba masusu zitondeezya kuti tulemeka Leza. (2) Tweelede kuzwaata “cabulemu,” eezi zyaamba kuti nzila njituzwaataayo tayeelede kweeta muzeezo wakoonana pe naakuti kupa kuti bantu kabayabutucheba. (3) Tutondeezya kuti ‘tulalibatamika’ kwiinda mukutatobelezya mafashoni aatali kabotu aaba munyika. (4) Mbutuboneka kweelede kutondeezya kuti ‘tulilyaabide kuli Leza,’ eezi ziyootondeezya bantu kuti tukomba Leza wakasimpe.—1 Bakorinto 10:31.
2. Nkamboonzi nitweelede kubikkila maanu kunzila njituzwaataayo?
Nikuba kuti tulaalwaangunuko lwakulisalila zyakuzwaata pesi tweelede kubikkila maanu kuti nzila njitubonekaayo italebyi bamwi. Tuleezya amanguzu eesu woonse kuti “umwi aumwi wesu aakkomanisye mweenzinyina muzintu zibotu alimwi izimupa kuyakwa.”—Bala Baroma 15:1, 2.
3. Kujana nzila njitubonekaayo yabagwasya biyeni bamwi kuti baze mukasimpe?
Nikuba kuti tuzwaata kabotu muzyiimo zyoonse, pesi tubikkila maanu kunzwaatilo yesu chiindi nituli kumiswaangano anituli kukukambawuka. Tatuyandi pe kuchita zintu zipa kuti bantu baleke kutambula mulumbe uuyandikana loko. Nzila njitubonekaayo ilakonzya kupa kuti bantu batambule kasimpe akuti batembawule “kuyiisya kwa Mufwutuli wesu.”—Tito 2:10.
YIYA ZYIINGI
Bona mbukonzya kubona kuti mbuboneka ambuzwata zileelela na kumaKristu.
Mbutuzwaata kulakonzya kutondeezya kuti tulazilemeka na nkume-nkume. Nikuba kuti Jehova ulabona zili mumyoyo yesu, pesi mbutuboneka kweelede kutondeezya kuti tulamulemeka
4. Kuboneka kabotu kutondeezya kuti tulemeka Jehova
Nkaakali kaambo kayandikana keelede kupa kuti katuboneka kabotu? Bala Intembauzyo 47:2, mpawo musandule mibuzyo iitobela:
Kuziba kuti wiiminina Jehova kweelede kupa kuti uzwaate biyeni?
Ubonaanga kulayandikana na kuti tuzwaate kabotu chiindi nituli kumiswaangano anituli kukukambawuka? Nkamboonzi?
5. Mbukonzya kusala zyakuzwaata zilikabotu
Kufumbwa zigogo nzituula zyeelede kuba abulemu kazyeendelana akuti tulaali. Bala 1 Bakorinto 10:24 a 1 Timoteyo 2:9, 10. Kuzwa waawo, mwaambuuzyanie atala akuti nkamboonzi nituteelede kuzwaata zigogo . . .
zilaadoti alubo zitakwe shayini.
zimbambatila, zibalangala naakuti zibusya muzeezo wakoonana.
Nikuba kuti maKristu tabachili aansi aMulawu wakapedwe maIsrayeli, pesi utondeezya maboneno aaJehova. Bala Deuteronomo 22:5, mpawo musandule mubuzyo uutobela:
Nkamboonzi nituteelede kuzwaata munzila iipa kuti baalumi babonekaanga mbanakazi, naakuti banakazi babonekaanga mbaalumi?
Bala 1 Bakorinto 10:32, 33 a 1 Johane 2:15, 16, mpawo musandule mibuzyo iitobela:
Nkamboonzi nitweelede kuchincha kuti nzwaatilo yesu kayilebya bamwi nkutukkala naakuti mumbungano?
Nkukkala bantu bazwaata biyeni alubo baabamba biyeni masusu?
Ubonaanga nzwaatilo eeyo ileelela na kumaKristu? Nkamboonzi?
Nzwaatilo yesu ilakonzya kusiyana-siyana pesi kayibotezya Jehova
BAMWI BAAMBA KUTI: “Ndeelede kuzwata kufumbwa mbundiyanda.”
Zilikabotu na eezi? Nkamboonzi?
CHIFWIINSYO
Kuboneka munzila iilikabotu kutondeezya kuti tulemeka Jehova abamwi.
Mibuzyo Yakwiindulula
Nkamboonzi nzila njituzwaataayo ambutubamba masusu niyandikana kuli Jehova?
Ngaali malayilile aakonzya kutugwasya chiindi nitusala zyakuzwaata ambutubamba masusu?
Nzila njitubonekaayo ipa kuti bantu babubone biyeni bukombi bwakasimpe?
YANDUULISISYA
Bona kuti nzwaatilo yako ipa kuti bamwi bakubone biyeni.
Bona kuti nkamboonzi nikuyandikana kuyeeya saansi kutana lilembuula amubili.
“Bbayibbele Lityeni Atala Amatattoo?” (Chiiyo chijanika aaIntaneti)
Bona malayilile aakonzya kutugwasya atala anzitusala.
“Nzwaatilo Yako Ilamulemeka Na Leza?” (Ngaziyakulinda, September 2016)
Niinzi chakagwasya umwi mwanakazi kuti abe amaboneno aalikabotu atala anzibasala bamwi?
“Nzwaatilo Yabamwi Yakali Kundilebya” (Amubuke!, December 22, 2003)