Niinzi Nzweelede Kuchita Kuti Ukapone Munyika Mpya?

Zyiiyo zyayinda zyatondeezya kuti Leza uzoonyonyoona bantu boonse bachita zintu zibi akugwisya zintu zibi zili munyika. Tulakonzya kusyoma kuti eezi zizoochitika. Nkamboonzi? Nkaambo Jwi lyaLeza, Bbayibbele lyakatusyomezya kuti:

“Inyika ilamana.”—1 JOHANE 2:17.

Tulakonzya kubaachoonzyo chakuti kuli bantu batakafutuke nkaambo chipanzi chavesi ilaajulu aawa chitusyomezya kuti:

“Ooyo uucita kuyanda kwa Leza unooliko lyoonse mane kukabe kutamani.”

Nkinkaako kuti tukakonzye kuyoofutuka tweelede kuchita kuyanda kwaLeza. Kuti tuzibe kuti Leza uyanda kuti tuchiteenzi, tweelede kusaanguna kumuziba.

‘KUZIBA LEZA’ KUYOOKUGWASYA KUTI UKAFUTUKE

Chifanikisyo: 1. Nesi ukkede aansi kakatede. 2. Nalikulyookezya wabona mweenzinyina kalikubotelwa nalikubala magazini. 3. Mweenzinyina wamubalila vesi yamuBbayibbele mpawo wamupa kakkaadi kajw.org.

Jesu wakati: “Eeci caamba buumi butamani, ikuti bakuzyiba yebo O Leza mwini-mwini ooli olikke.” (Johane 17:3) Tweelede kusaanguna kuziba Leza kuti tukaakufuke yaakunyonyoonwa nyika eeyi akuti tukapone kukabe kutamani. Eezi tazyaambi kuti tweelede kujinkila aakusyoma kuti Leza mpali luzutu akuziba zintu ziche atala anguwe. Tweelede kuba beenzinyina. Kuti bweenzuma bwesu aLeza busime, tweelede kujana chiindi chakumuziba kabotu. Mbuli mbutuchita kale kubeenzuma boonse. Bona kamwi kasimpe kali muBbayibbele katugwasya kuti tube aabweenzuma busimide aLeza.

Kasimpe nkitujana muBbayibbele

Leza wakali kuyanda kuti tukkale muParadayizi.

Wakalenga bantu bakusaanguna Adamu aEva mpawo wakababikka mumuunda mubotu loko wakali kwiitwa kuti muunda waEdeni. Teebakalikwe chibi pe alubo Leza wakabapede zintu zyoonse zyakali kukonzya kupa kuti babotelwe mubuumi. Bakali kuzoopona kukabe kutamani. Kaansinga bakasala kuzumanana kabali beenzinyina baLeza, teebakali kuzoofwa pe. Pesi bakasala kutamuswiilila Leza achaali.

Tulizi kuti nkamboonzi nitulikuswaanana aamapenzi.

Kutaswiilila Leza nkwaakachita Adamu kwakapa kuti we abantu boonse basweekelwe buumi butamani. Bbayibbele lyaamba kuti: “Cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse.” (Baroma 5:12) Bana baAdamu boonse bakakona chibi kuzwa kuli Adamu mbuli mwana mbatabukilwa aabulwazi bwabazyali bakwe. Eezi zipa kuti tuchembaale akuti tufwe.

Tulizi kuti Leza kuli nzyaakachita kuti atugwasye.

Bbayibbele lyaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Johane 3:16) Leza wakatuma Jesu aanyika kuti azootufwide. Umwi mwaalumi uulaaminyaka iili 86 wakuIndia uutegwa Prabhakar naakali kwaambuula atala aluyando ndwalaalo Leza wakaamba kuti: “Eezi zitondeezya kuti Jehovaa undiyandisya loko. Luyando ndwalaalo lwakapa kuti ndibe aabulangilizi bwakuzoopona kukabe kutamani.”

Tubona mbutweelede kutondeezya kulumba akaambo kazintu nzitwakachitilwa aLeza.

Bbayibbele litondeezya kuti tulakonzya kutondeezya kuti tulamulumba Leza akaambo kazintu nzyaakatuchitila kwiinda ‘mukubamba milawo yakwe.’ (1 Johane 2:3) Jehova wakatutondeezya zintu nzitukonzya kuchita kuti tubotelwe nikuba lino. (Isaya 48:17, 18) Leza tayandi pe kuti tuswaanane aamapenzi. Wakatusyomezya kuti, kuti twaswiilila milawu yakwe, tulabotelwa lino mpawo tukabotelwe kukabe kutamani.

BALA BBAYIBBELE BUZUBA ABUZUBA

Nesi walanga kujulu naazwa aakubala Bbayibbele. — Kukomba kuli Jehova kukumbila kuti akugwasye akuchita kuyanda kwakwe kuyookugwasya kuti ukafutuke

Tulalya buzuba abuzuba kuchitila kuti tuzumanane kupona. Jesu wakati: “Muntu teelede kuponena acinkwa cilikke pe, pele weelede kuponena amajwi oonse aazwa kumulomo wa Jehova.”—Matayo 4:4.

Mazubaano Jwi lyaLeza lijanika muBbayibbele. Kuti wabala Bbayibbele uyooziba kasimpe kali aatala azintu Leza nzyaakachitila bakombi bakwe bachiindi, nzyalikuchitila bakombi bakwe lino anzyayoobachitila kunembo.

KOMBA KULI LEZA KUTI AKUGWASYE

Niinzi nzweelede kuchita kuti kakulikukuyumina kutobelezya milawu yaLeza akaambo kakuti kulikukuyumina kusiya zintu nzyazonda? Kuti kuli muchiimo chili boobu, kuti wamuziba kabotu Leza ziyookugwasya kuti uzileke zintu nzyatayandi.

Atubone zyakaambwa awumwi mwanakazi uutegwa Sakura wakali kupona buumi bwakutalijata. Chiindi naakasaanguna kwiiya Bbayibbele wakayiya atala amulawu waLeza wakuti: “Amubutije bwaamu!” (1 Bakorinto 6:18) Sakura wakakomba kuli Leza kuti amugwasye mpawo wakazookonzya kusiya bwaamu. Pesi talikukkalila maboko pe kusunko eeli. Wakati: “Kuti mizeezo yabwaamu yandizida nga ndakomba kuli Leza kuti andigwasye nkaambo ndilizi kuti tandikonzyi pe kulizunda penzi eeli andikke. Kukomba kwakandigwasya kuti ndibe aabweenzuma busimide aJehova.” Mamiliyoni aabantu balikumuziba kabotu Leza mbuli mbaakachita Sakura. Leza ulikubagwasya kuti bachinche maponeno aabo kuchitila kuti bapone munzila njayanda Jehova.—Bafilipi 4:13.

Kuti ‘wamuziba kabotu Leza’ anguwe uyookuziba kabotu. (Bagalatiya 4:9; Intembauzyo 25:14) Kuti wachita zintu eezi uyoofutuka mpawo uyoopona munyika mpya yaParadayizi. Ani munyika mpya kunooli biyeni? Mubuzyo ooyu ulasandulwa muchiiyo chitobela.

a Jehova ndizina lyaLeza mbuli mbulitondeezya Bbayibbele.