Mwalizi Na?
Nkamboonzi nikwakali kugwasya kuzumizya maIsrayeli kuti bapayizye nziba ankwilimba?
MULAWU wakali kuzumizya kuti nziba ankwilimba zipayizigwe kuli Jehova. Bayuni aaba kabali babili balaambidwe mumilawu iili atala azipayizyo alubo muntu wakali kuzumizigwa kupayizya nkwilimba kuti katakwe nziba. (Lev. 1:14; 12:8; 14:30) Nkamboonzi nikwakali kugwasya kuchita oobo? Kamwi kaambo nkakuti, nziba teezyakali kujanika pe chiindi choonse. Nkamboonzi?
Nziba
Nziba zyakali kujanika muIsrayeli muchiindi chakupya pesi zyakali kulonga akuya kulizimwi ndawu zipya kuti kwasaanguna kutontola. Alubo zyakali kubweeda kuIsrayeli kuti kwasaanguna kupya lubo. (Lwi. 2:11, 12; Jer. 8:7) Akaambo kazeezi, kwakali kuyumu kuti maIsrayeli bakonzye kupayizya nziba muchiindi champeyo.
Nkwilimba
Kusiyana anziba, nkwilimba tazilongi-longi pe. Eezi zyaamba kuti nkwilimba zyakali kujanika mulsrayeli chiindi choonse. Kuyungizya waawo, nkwilimba zyakali kuvubwa. (Kozyanisya a Johane 2:14, 16) Kweendelana abbuku litegwa Bible Plants and Animals, “mumyuunzi yoonse amumadolopo aamuPalestine mwakali kuvubwa nkwilimba. Mumuunzi umwi awumwi mwakali chilugu naakuti mwakali muduli wakali aampako yakali kukkala nkwilimba.”—Kozyanisya a Isaya 60:8.
Nkwilimba ili muchilugu
Jehova wakatondeezya kuti ulaaluyando alubo ulabikkila maanu kwiinda mukuzumizya maIsrayeli kuti bapayizye bayuni bakali kujanika munyaka woonse.