Mbutukonzya Kugwasya Aabo Bali Aabulwazi Bwakukataazikana

Eezi Zyaamba Kuti

Tulakonzya kukataazikana loko kuti mweenzuma kali aabulwazi bwakukataazikana mumizeezo. Pesi tulakonzya kutondeezya kuti tuli andaba anguwe kwiinda mukumugwasya kuti akonzye kulwana aapenzi lyakwe. Kujana twamugwasya biyeni?

Zitugwasya Biyeni?

“Weelede kufwambaana kuswiilila.”—JAKKOBO 1:19.

Imwi nzila njukonzya kubelesya kuti ugwasye mweenzinyokwe nkumuswiilila chiindi nalikwaambuula. Utabonaanga weelede kusandula zintu zyoonse nzyaamba. Weelede kutondeezya kuti ulikumuswiilila akuti ulaandaba anguwe. Yezya kumumvwisisisya, utayeeyeli zintu zitali nzizyo alubo utamubeteki pe. Utalubi kuti chimwi chiindi ulakonzya kwaambuula zintu nzyatayandi kwaamba zipa kuti azoolisole.—Jobu 6:2, 3.

“Muumbulizye bawuside.”—1 BATESALONIKKA 5:14.

Kulakonzeka kuti mweenzinyokwe ulikukataazikana naakuti ulikulimvwa katagwasyi. Kuti wamutondeezya kuti ulaandaba anguwe, ulakonzya kumuumbulizya akumusungwaazya nikuba kutakwe majwi akwaamba.

“Mulongwe mwini-mwini ulatondezya luyando ciindi coonse.”—TUSIMPI 17:17.

Gwasya mweenzinyokwe. Kwiinda kuti uyeeyele kuti ulizizi zintu nzyayanda, weelede kubuzya kuti nziizili nzyayanda kuti umuchitile. Kuti kakumuyumina mweenzinyokwe kwaamba nzyayanda ulakonzya kumubuzya kuti muchite chimwi chintu kamuli aamwi, mbuli kweendeenda. Alubo ulakonzya kumugwasya kwiinda mukumuulila zintu nzyayanda, kumusalazizya aang’anda azimwi.—Bagalatiya 6:2.

“Mube aamoyo mulamfu.”—1 BATESALONIKKA 5:14.

Chimwi chiindi mweenzinyokwe nga tayandi pe kwaambuula. Buzya mweenzinyokwe kuti ulilibambilide kumuswiilila chiindi nayanda kwaambuula. Akaambo kakuchiswa, mweenzinyokwe ulakonzya kwaamba naakuti kuchita zintu zikonzya kukunyemya. Ulakonzya kutachita zintu nzimwazuminana naakuti kunyema. Ba aamoyo mulamfu alubo ube muntu uumvwisisisya chiindi nuli kumugwasya.—Tusimpi 18:24.

Kulipeda Kugwasya Mweenzinyokwe Kulakonzya Kupa Kuti Alimvwe Kabotu

“Ndileezya kuba muntu waangunukide kuchitila kuti mweenzuma andibuzye atala apenzi lyakwe. Nikuba kuti tandikonzyi kubambulula mapenzi aakwe pesi ndileezya kuswiilila nalikwaambuula. Chimwi chiindi kumuswiilila kupela kulakonzya kupa kuti alimvwe kabotu.”—Farrah,a ulaamweenzinyina ulaapenzi lyakulya akukataazikana zyiindilide.

“Umwi mweenzuma unditondeezya luzyalo alubo ulandisungwaazya. Wakanditamba kung’anda yakwe kuti tukalyaamwi. Wakanditondeezya luyando alubo zyakapa kuti zinduubile kumubuzya mbundakali kulimvwa. Eezi zyakandisungwaazya loko!”—Ha-eun ulaapenzi lyakukataazikana zyiindilide.

“Kuba amoyo mulamfu kulayandikana. Kuti mwanakazi wangu wachita chintu chindinyemya, nga ndalibuzya kuti kuchiswa nkuko kwapa kuti achite oobo kutali kuti mbubo mbabede. Eezi zindigwasya kuti nditamunyemeni pesi ndimubikkile maanu.”—Jacob ulaamwanakazi ulaapenzi lyakukataazikana zyiindilide.

“Mwanakazi wangu ulikundigwasya loko akunduumbulizya. Chiindi nindikataazikene loko tandisungilizyi kuti ndichite zintu nzinditayandi. Chimwi chiindi eezi ngazyaamba kuti mwanakazi wangu weelede kuleka kuchita zintu nzyayandisya. Ndibuyandisisya loko buntu bwakwe bwakulipeda akupa.”—Enrico ulaapenzi lyakukataazikana.