Jehova Utugwasya Biyeni Kuti Tulisimye?

1. Nkamboonzi nikuyandikana kuti tulisimye alubo niinzi chikonzya kutugwasya kuti tuchite oobo? (1 Petro 5:10)

MUMAZUBAANO aakumamanino, bakombi baJehova beelede kulisimya. Bamwi baba aachiindi chilamfu kabali kuchiswa. Bamwi bakafwidwa alubo bamwi balikukazigwa abamumpuli zyabo naakuti abalupati-pati bamfulumende. (Mt. 10:​18, 36, 37) Baachoonzyo chakuti kufumbwa penzi ndulikuswaana, Jehova ulakonzya kukugwasya kuti ulisimye.—Bala 1 Petro 5:10.

2. Niinzi chikonzya kutugwasya kuti tulisimye?

² Kulisimya, nkukonzya kukakatila akukkala kuli aabulangilizi nwaaswaana mapenzi, kupenzegwa naakuti nwaasunkwa. MaKkristu tabakonzyi pe kulisimya kababelesya manguzu aabo, pesi manguzu aabo azwa kuli Jehova ooyo uutupa “manguzu aayinda manguzu eesu.” (2 Kor. 4:7) Muchiiyo eechi, tulalanga-langa zintu zili 4 Jehova nzyatupede zikonzya kutugwasya kuti tulisimye alubo tulabona nzitweelede kuchita kuti tugwasigwe aazintu eezyo.

NKOMBYO

3. Nkamboonzi nitukonzya kwaamba kuti nkombyo nchigambyo?

³ Jehova wakatuchitila chintu chigambya loko chitugwasya kuti tulisimye. Wakapa kuti kukonzeke kuti twaambuule aanguwe nikuba kuti tuli aachibi. (Heb. 4:16) Tulakonzya kukomba kuli Jehova kufumbwa chiindi alubo katumubuzya kufumbwa chintu. Uliimvwa milaka yoonse kazitakwe ndaba kuti tuli kuli nikuba katuli kubusena buli kule loko naakuti nikuba katuli mujele. (Jon. 2:​1, 2; Mil. 16:​25, 26) Kuti twakataazikana loko zyakuti twabula majwi aakwaamba munkombyo, Jehova ulazimvwisisisya nzituyanda kwaamba. (Rom. 8:​26, 27) Nichoonzyo, nkombyo nchigambyo.

4. Tuzizi biyeni kuti Jehova ulakonzya kutugwasya kuti tulisimye kuti twamukumbila?

⁴ MuJwi lyakwe, Jehova utusyomezya kuti “kufumbwa chintu nchitukumbila cheendelana akuyanda kwakwe, ulatumvwa.” (1 Joh. 5:14) Zilachita na kuti tukumbile Jehova kuti atugwasye kuti tulisimye? Iiyi zilachita! Kuchita oobo kweendelana aakuyanda kwakwe. Tuzizi biyeni? Chiindi nitulisimya kumasunko, nga tulikupa Jehova mweenya wakuti asandule Saatani Dyabbulosi. (Tus. 27:11) Bbayibbili lyaamba kuti Jehova uyanda “kutegwa atondezye nguzu zyakwe ikugwasya baabo bamusyoma camoyo woonse.” (2 Mak. 16:9) Nkinkaako, tulakonzya kuba aachoonzyo chakuti Jehova ulaamanguzu achiyandisyo chakutugwasya kuti tulisimye.—Is. 30:18; 41:10; Lk. 11:13.

5. Kukomba kujana kwatugwasya biyeni kuti tube aaluumuno lwamumizeezo? (Isaya 26:3)

⁵ Bbayibbili lyaamba kuti chiindi nitukomba kuli Jehova katumubuzya zitukataazya, “luumuno lwaLeza lwiinda kumvwisisisya koonse, lulakwabilila myoyo [yesu] amizeezo [yesu].” (Flp. 4:7) Tulachilumba chipo eechi. Bantu batakombi Jehova baswaanana aamapenzi alubo ngabeezya kuyanduula nzila zyakuti bajane luumuno lwamumizeezo. Muchikozyano, bamwi nga bachita zintu ziteendelani aamagwalo kuti bagwisye mizeezo iitali kabotu. Kuchita oobo, kupambanisya bweenzinyina mbubalaabo aJehova. (Yezyanisya Mateyo 12:​43-45.) Pesi luumuno ndwatupa Jehova chiindi nitukomba kulinguwe, lusumpukide loko kwiinda kufumbwa nzila nzibeezya kubelesya bantu. Chiindi nitukomba kuli Jehova, nga tulikutondeezya kuti tulamusyoma chakumaninina akuti utupa “luumuno lutamani.” (Bala Isaya 26:3.) Imwi nzila Jehova njatugwasyaayo nkutuyeezya kasimpe kamuBbayibbili nkitwakayiya chiindi. Kasimpe aako kapa kuti tubatame mumizeezo nkaambo nga tulizi kuti Jehova ulaandaba andiswe akuti uyanda kuti tuzwidilile.—Int. 62:​1, 2.

6. Niinzi nzweelede kuswaanizya munkombyo zyako? (Langa chifanikisyo.)

⁶ Nzukonzya kuchita. Chiindi nulikulisimya kupenzi lyako, “kowaala mukuli wako uuminya mumaanza aa Jehova” mpawo ukombele kuti akupe luumuno. (Int. 55:22) Alubo kombela kuti ube aabusongo bwakuti uzibe nzweelede kuchita muchiimo chako. (Tus. 2:​10, 11) Utalubi pe kulumba Jehova munkombyo zyako. (Flp. 4:6) Yanduula zintu zitondeezya kuti Jehova ulikukugwasya nikuba kuti ulimupenzi alubo umulumbe akaambo kakuti ulikukugwasilizya. Utalekeli penzi lyako kuti likukachizye kubona zilongezyo nzulaazyo kale.—Int. 16:​5, 6.

JWI LYALEZA

7. Kubala Bbayibbili kutugwasya biyeni kuti tulisimye?

⁷ Jehova wakatupa Jwi lyakwe kuti litugwasye kuti tulisimye. MuBbayibbili muli mavesi aatondeezya kuti Jehova ulakonzya kutugwasya. Muchikozyano, lugwalo lwa Mateyo 6:8 lwaamba kuti: “Wuso ulizizi nzimuyanda nikuba kamutanamukumbila pe.” Majwi aaya akaambwa aaJesu alubo Jesu umuzi kabotu loko Jehova kwiinda mbutumuzi swe. Nkinkaako, taakwe kaambo pe keelede kupa kuti tuzumbuuzye kuti Jehova ulakonzya kutugwasya chiindi nituli mumapenzi. MuBbayibbili mulaamwi mavesi aakonzya kutugwasya kuti twiinkilile kunembo katulisimya.—Int. 94:19.

8. (a) Ngaali malayilile ngitukonzya kujana muBbayibbili aakonzya kutugwasya kuti tulisimye? (b) Niinzi chikonzya kutugwasya kuti kutuubile kuyeeya malayilile aayo?

⁸ Malayilile aali muBbayibbili alakonzya kutugwasya kuti tulisimye. Ali aabusongo bukonzya kutugwasya kuti tusale munzila iilikabotu. (Tus. 2:​6, 7) Muchikozyano, Bbayibbili litusungwaazya kuti tutakataazikani loko pe atala abuumi bwakunembo, pesi tusyome Jehova buzuba bumwi abumwi. (Mt. 6:34) Kuti twakkala katubala Magwalo akuyeeyesesya atala angawo, kulakonzya kutuubila kuti tuyeeye malayilile ngitukonzya kubelesya kuti twaswaanana aachimwi chiimo.

9. Nkani zili muBbayibbili zitugwasya biyeni kuti tube aachoonzyo chakuti Jehova ulakonzya kutugwasya?

⁹ Alubo muBbayibbili muli nkani zyabantu bakali kusyoma Jehova ambaakabagwasya. (Heb. 11:​32-34; Jak. 5:17) Chiindi nituyeeyesesya atala ankani eezyo, nga zyapa kuti tube aachoonzyo chakuti Jehova “mayubilo eesu alimwi ninguzu zyesu, mugwasyi ngotukonzya kujana lyoonse muziindi zyamapenzi.” (Int. 46:1) Chiindi nitulanga-langa atala abuumi bwabakombi baJehova basyomeka bachiindi, nga zyapa kuti tuyande kutobelezya lusyomo lwabo akuti tulisimye mbuli mbubakalisimya.—Jak. 5:​10, 11.

10. Niinzi nzitweelede kuchita kuti tugwasigwe aaBbayibbili?

¹⁰ Nzukonzya kuchita. Bala Bbayibbili buzuba abuzuba alubo ulembe mavesi ngubona kuti alakugwasya. Biingi bakabona kuti kubala lugwalo lwabuzuba kubagwasya kuti bayeeyesesye atala avesi yamuBbayibbili mubuzuba oobo. Eezi nzizyo nzyaakaamba muchizi uutegwa Mariea chiindi bazyali bakwe nibakajatwa bulwazi bwakkensa. Niinzi chakamugwasya kuti alisimye chiindi naakali kulangania bazyali bakwe? Wakaamba kuti: “Kuseeni buzuba abuzuba, ndakali kubala lugwalo lwabuzuba mukabbuku kategwa Kulanga-langa Magwalo Buzuba Abuzuba akuyeeyesesya atala alugwalo oolo. Kuchita oobo, kwakandigwasya kuti kandiyeeyesesya atala azintu zyamubukombi. Eezi zyakandigwasya kuti nditabikkili maanu kupela kupenzi lyangu.”—Int. 61:2.

BAKOMBIMA

11. Nkamboonzi nikusungwaazya kuziba kuti teendiswe pe atulikke nituli kulisimya kumapenzi?

¹¹ Jehova wakatupa bakombima bali munyika yoonse kuti batugwasye kuti tulisimye. Kuziba kuti ‘ambabo bakombima bamunyika yoonse balikuswaana mapenzi aakozyenie aangitulikuswaana,’ kutupa choonzyo chakuti tatuli aatulikke pe. (1 Pet. 5:9) Tulakonzya kubaachoonzyo chakuti kufumbwa chiimo nchitukonzya kuswaana, bamwi ambabo bakachiswaana alubo bakalisimya muchiimo eecho. Eezi zyaamba kuti andiswe tulakonzya kulisimya.—Mil. 14:22.

12. Bakombima kujana batugwasya biyeni alubo niinzi nzitukonzya kuchita kuti tubagwasye? (2 Bakkorinte 1:​3, 4)

¹² Chiindi nitulisimya, bakombima balakonzya kutusungwaazya. Mwaapostoli Pawulu wakasungwaazigwa aabakombinyina. Wakali kukkala kabalumba aabo bakamugwasya chiindi naakasungidwe mung’anda, kabayita aamazina. Bakamugwasya Pawulu kwiinda mukumuumbulizya, kumusungwaazya akumugwasilizya chiindi naakali kuyanda kugwasilizigwa. (Flp. 2:​25, 29, 30; Kol. 4:​10, 11) Mazubaano, andiswe tulakonzya kugwasigwa aabakombima. Chiindi nituyanda kugwasigwa kuti tulisimye, bakwesu abachizi nga batusimya. Alubo chiindi nikuyandikana kuti tubagwasye nga twabagwasya.—Bala 2 Bakkorinte 1:​3, 4.

13. Niinzi chakagwasya muchizi uutegwa Maya kuti alisimye?

¹³ Bakwesu abachizi bamunyika yoonse bakamusungwaazya loko muchizi wakuRussia uutegwa Maya. Ng’anda yakwe yakasechwa mu 2020 alubo mukuya kwachiindi, nkani yakwe yakazootolwa kunkuta akaambo kakuti wakali kubuzya bamwi nzyasyoma. Maya wakaamba kuti: “Chiindi nindakakataazikene loko, bakwesu abachizi bakali kundifoonena, kundilembela mameseji akundilembela magwalo aatondeezya mbubakali kundiyanda. Eezi zyakali kundigwasya kuti ndikkale kandizi kuti ndilaampuli mpati iindiyanda. Kuzwa mu 2020, ndakalibonena chachoonzyo kuti bakwesu abachizi balandiyanda.”

14. Niinzi nzitukonzya kuchita kuti bakombima batugwasye kuti tulisimye? (Langa chifanikisyo.)

¹⁴ Nzukonzya kuchita. Chiindi nulisimya, utaanzaani aabakombinyokwe pe. Yanduula lugwasyo kubaalu. Balakonzya kuba “busena bwakutijila muwo, busena bwakuyubila mvwula mpati yamuwo.” (Is. 32:2) Utalubi kuti bakombinyokwe ambabo balikulisimya kumapenzi. Kuchitila umwi muntu chintu chilikabotu, kukugwasya kuti ukkale kubikkila maanu kuzintu zilikabotu kumwi kuli kulisimya kupenzi lyako.—Mil. 20:35.

BULANGILIZI

15. Bulangilizi bwakamugwasya biyeni Jesu alubo butugwasya biyeni mazubaano? (Mahebberu 12:2)

¹⁵ Jehova wakatupa bulangilizi kuti butugwasye kuti tulisimye. (Rom. 15:13) Utalubi kuti bulangilizi bwakagwasya Jesu kuti alisimye mubuzuba bwamamanino bwabuumi bwakwe bwaanyika. (Bala Mahebberu 12:2.) Jesu wakalizi kuti kusyomeka kwakwe kwakali kuyoopa kuti zina lyaJehova lisalazigwe kumanwa aaSaatani. Alubo Jesu wakali kulangilila kuti abweede kuli Wisi kujulu akuti azooyendelezye aamwi amaKkristu bananikidwe bali 144 000 muBwaami bwakujulu. Munzila iikozyenie, bulangilizi bwakuzoopona kukabe kutamani munyika mpya yaLeza kutugwasya kuti tulisimye kumapenzi woonse ngituswaana munyika yaSaatani.

16. Bulangilizi bwakamugwasya biyeni umwi muchizi kuti alisimye alubo twiiyaanzi kuzintu nzyaakaamba?

¹⁶ Atubone bulangilizi mbubwakagwasya umwi muchizi wakuRussia uutegwa Alla ulaamulumi wakaangwa mpawo wakabikkwa muchitookesi. Eezi nizyakachitika, Alla wakaamba kuti: “Kukombela buumi mbutuyoobaabo kunembo akuyeeyesesya atala ambubo, kundigwasya kuti nditamani manguzu loko pe. Alubo ndilizi kuti, nikuba kuti ndaswaana zyiimo ziyumu lino, kuli zintu zibotu zilikunembo. Jehova uzoobanyonyoona basinkondonyina, andiswe tuyoozunda.”

17. Kujana twatondeezya biyeni kuti tulamulumba Jehova akaambo kakutupa bulangilizi? (Langa chifanikisyo.)

¹⁷ Nzukonzya kuchita. Jana chiindi chakuyeeyesesya atala azisyomezyo Jehova nzyaakatusyomezya. Libone kuli munyika mpya kulaamwi abeenzinyokwe, abamumpuli alubo kamulikubotelwa moonse. Alubo kufumbwa mapenzi ngulikuswaana lino, azooba ‘aachiindi chifwiifwi alubo mawuba.’ (2 Kor. 4:17) Yezya kusikila mpugolela kuti ubuzye bamwi atala azisyomezyo Leza nzyatusyomezezye kunembo. Yeeyela kuti buumi bulikubayumina biyeni nibalikuswaana mapenzi aalikweetwa aaSaatani akaambo kakuti tabaazi pe makanze aaLeza atala abuumi bwakunembo. Ulakonzya kubabuzya zintu ziche nzibuyoochita Bwami bwaLeza.

18. Nkamboonzi nitukonzya kusyoma zisyomezyo zyaJehova?

¹⁸ Naakazwaakulisimya kumapenzi miingi, Jobu wakabuzya Jehova kuti: “Lino ndazyiba kuti yebo ulakonzya kucita zintu zyoonse akuti kunyina cintu ncokanza kucita icikonzya kukwaalila.” (Job. 42:2) Mbuli mbaakayiya Jobu, taakwe chintu pe chikonzya kukachizya Jehova kuti azuzikizye makanze aakwe. Kasimpe aaka kapa kuti tulisimye. Muchikozyano, atuteedi umwi mwanakazi uulikuchiswa wamana manguzu akaambo kakuti madokotela miingi bamubuzya kuti tabakonzyi pe kusilika bulwazi bwakwe. Pesi umwi dokotela uulaaluzibo alubo uuzibinkene kuti ulasilika wabona bulwazi mbwalaabo mwanakazi ooyo mpawo wamupandulwida kuti ulabusilika bulwazi bwakwe. Mwanakazi ooyo ulamukkala moyo nikuba kuti unoozi kuti zilatola chiindi chilamfu kuti bulwazi bwakwe bumane. Ulakonzya kulisimya nkaambo unoozi kuti muchiindi chilikunembo uzoopona. Munzila iikozyenie, bulangilizi bwakuti tuzookkala muParadayizi bulakonzya kutugwasya kuti tulisimye.

19. Niinzi nzitweelede kuchita kuti tulisimye?

¹⁹ Mbuli mbutwabona, Jehova ulatugwasya kuti tulisimye kumapenzi eesu kwiinda munkombyo, muJwi lyakwe, mubakombima abulangilizi. Kuti twazibelesya zintu eezi, Jehova unootugwasya mumapenzi eesu woonse kusikila nyika eeyi yaSaatani izoonyonyoonwe.—Flp. 4:13.