Mibuzyo Yabasikubala
Mulimu wakukambawuka uzoomana lili?
Jesu wakaamba kuti: “Makani mabotu aaBwaami, azookambawukwa munyika yoonse kuti bube bukamboni kuzisi zyoonse, mpawo mamanino azoosika.” (Mt. 24:14) Bbala lyaChigrikki lyakasandululwa kuti “mamanino” muvesi eeyi amuvesi 6 a 13, liti teʹlos. Lyaamba mamanino aabwiime bwanyika yaSaatani lya-Amagedoni. (Chi. 16:14, 16) Eezi zyaamba kuti tuzooyinkilila kunembo kukambawuka makani mabotu kusikila bwiime bwanyika yaSaatani buzoonyonyoonwe. Eezi zibambulula nzila njitwakali kwiimvwisisisyaayo nkani eeyi chiindi.
Chiindi twakali kumvwisisisya kuti tuzooleka kukambawuka makani mabotu mapenzi mapati naazoosaanguna, Bbabbiloni Mupati naakali kuzoonyonyoonwa. (Chi. 17:3, 5, 15, 16) Twakali kusyoma kuti lyamapenzi mapati ngawo mamanino aategwa “mwaka wakukkomaninwa a Jehova” munzila yakukozyanisya. (Is. 61:2) Alubo twakali kusyoma kuti bakali kuzoofutuka lyamapenzi mapati bakali kuzootondeezya kuti balasyomeka kuli Jehova mapenzi mapati kaatanasaanguna. Twakali kukozyanisya bantu aabo amaJuda bakafutuka niyakanyonyoonwa Jerusalema mu 607 B.C.E. MaJuda aabo bakafutuka akaambo kakuti bakali basala kukomba Jehova akuti bakali kubuzonda bubi. (Ezk. 5:11; 9:4) Chikozyano eechi tacheendelani pe amajwi aakaambwa aaJesu aali muli Mateyo 24:14, aatondeezya kuti bantu balakonzya kuzoojana mweenya wakumvwa makani mabotu Amagedoni kayili yaba aafwiifwi kusaanguna.
Kumvwisisisya kupya kwalugwalo lwa Mateyo 24:14 kubambulula nzila njitwakali kuumvwisisisyaawo mulumbe wachivulamabwe waambidwe muli Chiyubunuzyo 16:21. Nikwakachitwa kuyanduulisisya, kwakajanika kuti magwalo aaya aabili aamba chintu chimwi. Nkamboonzi nitwaamba oobo? Nsandulo iyeeme aanzila bantu njibawutambulaawo mulumbe waBwaami. Mwaapostoli Pawulu wakaamba kuti ‘aabo balikufutulwa,’ mulumbe ooyu makani mabotu, “bweema bwabuumi.” Pesi kuli basinkondonyina baLeza, makani mabi, “mununko walufu.” (2 Kor. 2:15, 16) Balawuzonda mulumbe waBwaami akaambo kakuti utondeezya kuti nyika njibayanda nimbi, yeendelezegwa aaSaatani alubo yaba aafwiifwi kunyonyoonwa.—Joh. 7:7; 1 Joh. 2:17; 5:19.
Chivulamabwe chaambidwe muli Chiyubunuzyo 16:21 kulakonzeka kuti chinooli “chipati loko.” Eezi zilakonzya kwaamba kuti, muchiindi chamapenzi mapati, mulimu wakukambawuka uzooyandikana loko akaambo kakuti zina lyaJehova lizoozibinkana kwiinda chiindi. (Ezk. 39:7) Aachiindi eecho, Bbabbiloni Mupati kali wanyonyoonwa, bamwi bazooyanda kuswiilila mulumbe waBwaami na? Kulakonzeka. Amwi bamwi bazooyeeya kuti Bakamboni baJehova bakali kwaambuula atala akunyonyoonwa kwabukombi bwakubeja
Eezi zilikozyenie azyakachitika ku-Ijipita nibakasikilwa Zipenzyo Zili Kkumi. Chiindi Jehova ‘naakabeteka baleza boonse bamu-Ijipita,’ “nkamu mpati yabantu basiyene-siyene” bakatali ma-Israyeli yakaba kubbazu lyabakombi baJehova. (Kul. 12:12, 37, 38) Kulakonzeka kuti bantu bakulizimwi nyika bakaba kubbazu lyaJehova nibakabona nchenjezyo Mozesi njaakababuzya yaZipenzyo Zili Kkumi kayilikuzuzikizigwa.
Boonse batazoobe kubbazu lyaJehova Bbabbiloni Mupati kali wanyonyoonwa, balakonzya kuzoojana chilongezyo chakuzoogwasilizya maKkristu bananikidwe bachinooli aanyika. (Mt. 25:34-36, 40) Chilongezyo chakuti muntu abetekwe kali kubbazu lyambelele chizoomana Amagedoni kayili yaba aafwiifwi kuti isaangune chiindi maKkristu bananikidwe banoochili aanyika nibatazoojane bulumbu bwabo bwakujulu.
Kumvwisisisya ooku kupya kutondeezya luyando lupati aluzyalo ndwalaalo Jehova. Jehova “taakwe ngwayanda kuti anyonyoonwe pe, pesi uyanda kuti boonse basanduke.”—2 Pet. 3:9.