Matayo
1 Ibbuku lyamakani aamba zya Jesu Kilisito, mwana wa Davida, mwana wa Abulahamu:
2 Abulahamu wakazyala Izaka;
Izaka wakazyala Jakobo;
Jakobo wakazyala Juda abanabokwabo;
3 Juda wakazyala Pelezi a Zela kuli Tamala;
Pelezi wakazyala Heziloni;
Heziloni wakazyala Lamu;
4 Lamu wakazyala Aminadabu;
Aminadabu wakazyala Nasoni;
Nasoni wakazyala Salamoni;
6 Jese wakazyala Davida imwami.
Davida wakazyala Solomoni kumukaintu wa Uliya;
7 Solomoni wakazyala Lehobowamu;
Lehobowamu wakazyala Abija;
Abija wakazyala Asa;
8 Asa wakazyala Josafati;
Josafati wakazyala Jolamu;
Jolamu wakazyala Uziya;
9 Uziya wakazyala Jotamu;
Jotamu wakazyala Ahazi;
Ahazi wakazyala Hezekiya;
10 Hezekiya wakazyala Manase;
Manase wakazyala Amoni;
Amoni wakazyala Josiya;
11 Josiya wakazyala Jekoniya abanabokwabo ciindi nobakatolwa ku Babuloni.
12 Nobakatolwa ku Babuloni, Jekoniya wakazyala Salatiyeli;
Salatiyeli wakazyala Zelubabeli;
13 Zelubabeli wakazyala Abiyudi;
Abiyudi wakazyala Eliyakimu;
Eliyakimu wakazyala Azolo;
14 Azolo wakazyala Zadoki;
Zadoki wakazyala Akimu;
Akimu wakazyala Eliyudi;
15 Eliyudi wakazyala Eliyaza;
Eliyaza wakazyala Matani;
Matani wakazyala Jakobo;
16 Jakobo wakazyala Josefa, imulumi wa Maliya ooyo iwakazyala Jesu uutegwa Kilisito.
17 Aboobo mazyalani oonse kuzwa kuli Abulahamu kusikila kuli Davida akali kkumi aane, ikuzwa kuli Davida kusikila kuciindi cakutolwa ku Babuloni akali kkumi aane, mpoonya kuzwa kuciindi cakutolwa ku Babuloni kusikila kuli Kilisito akali mazyalani aali kkumi aane.
18 Lino kuzyalwa kwa Jesu Kilisito kwakali boobu. Iciindi Maliya, banyina naakasinkilidwe kuli Josefa, wakajanwa kuti ulimitide kwiinda mumuuya uusalala kabatanakwatana. 19 Nokuba boobo, akaambo kakuti Josefa mulumi wakwe wakali mululami alimwi tanaakali kuyanda kumuusya nsoni kubantu, wakayeeya kuti amuleke kumbali. 20 Pele naakamana kuyeeya makani aaya, mungelo wa Jehova wakalibonya kulinguwe muciloto akwaamba kuti: “Josefa, omwana wa Davida, utayoowi kumubweza Maliya mukaintu wako akumutola kuŋanda, nkaambo eeco ncamitide ncamuuya uusalala. 21 Uyoozyala mwana musankwa alimwi weelede kumuulika zyina lyakuti Jesu, nkaambo uyoofwutula bantu bakwe kuzibi zyabo.” 22 Zyoonse eezyi zyakacitika kuzuzikizya ceeco cakaambwa a Jehova kwiinda mumusinsimi wakwe kuti: 23 “Amubone! Nakalindu uyoomita akuzyala mwana musankwa eelyo bayoomuulika zyina lyakuti Imanuweli,” lyasandululwa ilyaamba kuti, “Leza Uli Andiswe.”
24 Mpoonya Josefa wakabuka akucita mbwaakamulailila mungelo wa Jehova, aboobo wakabweza mukaintu wakwe akumutola kuŋanda. 25 Pele kunyina naakaswaangana* anguwe kusikila naakatumbuka mwana musankwa, eelyo wakamuulika zyina lyakuti Jesu.