Matayo
10 Aboobo wakaita basikwiiya bakwe bali kkumi ababili akubapa nguzu zyakuzunda myuuya iisofweede, kutegwa bacikonzye kwiitanda akuponya malwazi aamisyobo yoonse.
2 Ngaaya mazyina aabatumwa bali kkumi ababili: Kuli Simoni, ooyo uutegwa Petulo a Anduleya, imunyina; Jakobo mwana wa Zebedayo a Johane, imunyina; 3 Filipo a Batolomayo; Tomasi a Matayo simutelo; Jakobo mwana wa Alifayo a Tadayo; 4 Simoni musungu; a Judasi Isikaliyote ooyo iwakamwaaba.
5 Jesu wakabatuma aaba bali kkumi ababili akubapa malailile aaya: “Mutaunki kubantu bamasi, alimwi mutanjili mumunzi wabana Samaliya, 6 pele kamuya buyo kumbelele zisweekede zyaŋanda ya Isilayeli. 7 Nomuunka, kamuya bukambauka kuti: ‘Bwami bwakujulu bwaswena afwaafwi.’ 8 Amuponye bantu baciswa, amubusye bafwide, amusalazye basicinsenda, amutande madaimona. Mwakapegwa cabuyo, amupe cabuyo. 9 Mutabwezi ngolida niiba nsiliva nouba mukuba mumpotomona zyanu, 10 niiba nkomo yazilyo zyamu lweendo noziba zisani zyobilo noziba mpato niiba nkoli, nkaambo similimo uleelede kupegwa zilyo.
11 “Kufwumbwa mumunzi naa mukanzi momwanjila, amuyandaule muntu weelela akukkala oomo kusikila mukazwe. 12 Nomunjila muŋanda, amubaanzye bali mumo. 13 Ikuti ŋanda eeyo kayeelela, luumuno lwanu alube alinjiyo, pele ikuti kaiteeleli, luumuno lwanu alupilukile kulindinywe. 14 Kufwumbwa ooko nkobatakamutambuli naa kuswiilila majwi aanu, mwaakuzwa muŋanda eeyo naa mumunzi ooyo, amukakunkumune lusuko kumaulu aanu. 15 Masimpe ndimwaambila kuti: Mu Buzuba bwa Lubeta, cisubulo camunzi ooyo cinooli cipati kwiinda ca Sodoma a Gomola.
16 “Amubone! Ndamutuma mbuli mbelele akati kabaumpe; aboobo amucenjele mbuli nzoka, pele batakwe lweeno mbuli nziba. 17 Amukabacenjelele bantu, nkaambo bayoomutola kunkuta akumukwibbaula muzikombelo zyabo. 18 Muyooabwa kubeendelezi abami akaambo kandime kuti bukabe bumboni kuli mbabo akuli bamasi. 19 Pele ciindi nibamutola, mutalibiliki kuti muyooamba buti naa muyooamba nzi, nkaambo nzyomweelede kwaamba muyoopegwa aciindi eeco, 20 nkaambo tamuli ndinywe mwaambaula, pele muuya wa Uso nguwaambaula kwiinda mulindinywe. 21 Alimwi munyina uyooaba munyina kulufwu, ausyi uyooaba mwanaakwe, abana bayoobukila bazyali akubapa kuti bajaigwe. 22 Muyoosulwa abantu boonse akaambo kazyina lyangu, pele ooyo uuliyumya kusikila kumamanino nguuyoofwutulwa. 23 Ciindi nobamupenzya mumunzi umwi, amutijile kuli umbi, nkaambo masimpe ndimwaambila kuti: Tamukamanizyi kuzinguluka minzi ya Isilayeli katanasika Mwana wamuntu.
24 “Sikwiiya tali mupati kwiinda mwiiyi wakwe, amuzike tali mupati kwiinda simalelaakwe. 25 Cileelede kuti sikwiiya abe mbuli mwiiyi wakwe, amuzike abe mbuli simalelaakwe. Ikuti bantu baita mwiniŋanda kuti Belezebule, ino basiŋanda yakwe bayoobaita buti? 26 Aboobo mutabayoowi pe, nkaambo kunyina civwumbidwe citakavwumbulwi, acisisidwe citakazyibwi. 27 Nzyondimwaambila mumudima, mukazyaambe mumumuni, anzyomwaambilwa cakupetekezya, mukazikambaukile aziluli zyamaanda. 28 Alimwi mutabayoowi aabo bajaya mubili pele tabakonzyi kujaya buumi; pele kamuyoowa yooyo uukonzya kujaya buumi amubili mu Gehena. 29 Sena tutiiti tobilo tatusambalwi kakkobili komwe kajisi mpindu nsyoonto? Nokuba boobo, kunyina nokaba komwe kayoowida ansi Uso katakonzyi kuzyiba. 30 Pele naaba masusu aakumutwe wanu alibalidwe oonse. 31 Aboobo, mutayoowi pe: nywebo mulayandika kwiinda tutiiti tunji.
32 “Lino kufwumbwa uuzumina kubantu kuti ulikamantene andime, ambebo ndiyoozumina kuti ndilikamantene anguwe kumbele lya Taata uuli kujulu, 33 pele kufwumbwa uundikaka kubantu, ambebo ndiyoomukaka kumbele lya Taata uuli kujulu. 34 Mutayeeyi kuti ndakaboolela kuleta luumuno anyika; ndakaboolela kuleta panga ikutali luumuno. 35 Nkaambo ndakaboolela kuleta lwaandaano akati kamwana musankwa abausyi, mwana musimbi abanyina, amukamwana abanyinazyala. 36 Masimpe, bantu bamuŋanda yakwe mbabayooba basinkondo bakwe. 37 Ooyo uuyanda bausyi naa banyina kwiinda ndime teelede kuba wangu, ayooyo uuyanda mwanaakwe musankwa naa musimbi kwiinda ndime teelede kuba wangu. 38 Alimwi kufwumbwa uutazumini kunyamuna cisamu cakwe cakupenzyezya akunditobela, teelede kuba wangu. 39 Ooyo uukwabilila buumi bwakwe uyoobusweekelwa, ayooyo uusweekelwa buumi bwakwe akaambo kandime uyoobujana.
40 “Ooyo uumutambula wanditambula andime, awoonse uunditambula ulamutambula ayooyo wakandituma. 41 Ooyo uutambula musinsimi akaambo kakuti musinsimi, uyoopegwa bulumbu bwamusinsimi, ayooyo uutambula muntu mululami akaambo kakuti mululami, uyoopegwa bulumbu bwamuntu mululami. 42 Alimwi kufwumbwa uupa nkomeki yamaanzi aakunywa kuli umwi wabaniini aaba akaambo kakuti ngusikwiiya, ndimwaambila masimpe kuti: Kunyina nayoosweekelwa bulumbu bwakwe.”