Matayo
15 Lino ba Falisi abalembi bakasika kuli Jesu kuzwa ku Jelusalemu akwaamba kuti: 2 “Ino nkaambo nzi basikwiiya bako ncobasotoka tunsiyansiya twabasikale? Mucikozyanyo, tabasambi kumaanza ciindi nobayanda kulya cakulya.”
3 Aboobo wakabaingula kuti: “Ino nkaambo nzi anywebo ncomusotoka mulawo wa Leza akaambo katunsiyansiya twanu? 4 Mucikozyanyo, Leza wakaamba kuti ‘Lemeka bauso abanyoko,’ alimwi ‘Ooyo uusampaula bausyi naa banyina ajaigwe.’ 5 Pele nywebo mwaamba kuti, ‘Kufwumbwa waambila bausyi naa banyina kuti: “Kufwumbwa ncejisi icikonzya kumugwasya ncipego caabidwe kuli Leza,” 6 teelede kulemeka bausyi naaceya.’ Aboobo mwapa kuti jwi lya Leza libe lyabuyo akaambo katunsiyansiya twanu. 7 Nobasikuupaupa ameso, Izaya wakaliluzi naakasinsima kwaamba ndinywe kuti: 8 ‘Aaba bantu balandilemeka amilomo yabo, pele myoyo yabo ili kule andime. 9 Kundikomba kwabo nkwabuyo, nkaambo bayiisya milawo yabantu kuba njiisyo zya Leza.’” 10 Aboobo wakaita nkamu yabantu afwaafwi akubaambila kuti: “Amuswiilile akumvwisya caambwa: 11 Tacili cintu cinjila mumuntu cimusofwaazya pe, pele icizwa kumulomo wakwe ncecisofwaazya muntu.”
12 Mpoonya basikwiiya bakaboola kulinguwe akumwaambila kuti: “Sena ulizyi kuti ba Falisi bacimwa nobamvwa nzyowaamba?” 13 Wakaingula kuti: “Cisyango cili coonse ncaatakasyanga Taata wakujulu ciyoozyulwa. 14 Amubaleke buyo. Mbasololi boofwu. Ikuti moofwu keenzya moofwunyina, boonse bobilo bayoowida mumulindi.” 15 Mukwiingula, Petulo wakati kulinguwe: “Kotupandulwida cikozyanyo eeci.” 16 Aboobo wakabuzya kuti: “Sena andinywe tamunamvwisya? 17 Sena tamuzyi kuti cintu cili coonse cinjila kumulomo cilainda mwida camana cilazwa anze? 18 Pele zyintu izizwa kumulomo zizwa mumoyo, eelyo zyintu eezyo zilamusofwaazya muntu. 19 Mucikozyanyo, mumoyo mulazwa mizeezo mibi, bujayi, bumambe, bwaamu, bubbi, bumboni bwakubeja akusampaula. 20 Eezyi nzyezyintu zisofwaazya muntu, pele kulya cakulya kakunyina kusamba kumaanza takusofwaazyi muntu pe.”
21 Lino naakazwa ooko, Jesu wakaunka mucooko ca Tulo a Sidoni. 22 Lino mukaintu muna Fonike iwakazwa kuzyooko eezyo wakaboola akoompolola kuti: “Ndifwide luse Mwami, O Mwana wa Davida. Mwanaangu musimbi unjidwe daimona limupenzya kapati.” 23 Pele kunyina naakaamba cili coonse kulinguwe. Aboobo basikwiiya bakwe bakaboola akumukumbila kuti: “Komwaambila aunke nkaambo uzyaaboompolola musyule lyesu.” 24 Aboobo wakaingula kuti: “Tiindakatumwa kumbelele zyoonse pe, pele kumbelele zisweekede zyamuŋanda ya Isilayeli.” 25 Lino mukaintu naakaboola afwaafwi wakamufwugamina akwaamba kuti: “Mwami, ndigwasye!” 26 Jesu wakaingula kuti: “Tacili cibotu kubweza cinkwa cabana akuciwaalila tubwa.” 27 Mukaintu wakati: “Inzya Mwami, pele tubwa tulalya bufwefwelenga buloka kutebulu lyabasimalelo.” 28 Mpoonya Jesu wakamwiingula kuti: “O Mukaintu, lusyomo lwako ndupati; acicitike kulinduwe mbuli mboyanda.” Aboobo mwanaakwe musimbi wakapona aciindi nciconya eeco.
29 Lino Jesu naakazwa kooko, wakasika afwaafwi a Lwizi lwa Galilaya, eelyo naakatanta acilundu wakakkala aawo. 30 Mpoonya makamu aabantu akamusikila aakaletelezya bantu balema, boofwu, basyaataambi abamwi banji akubatula kumaulu aakwe, eelyo wakabaponya, 31 cakuti makamu aabantu akagambwa kubona basyaataambi kabaambaula abalema kabeenda aboofwu kababona, aboobo akalemeka Leza wa Isilayeli.
32 Pele Jesu wakaita basikwiiya bakwe akwaamba kuti: “Bandeetezya bantu aaba, nkaambo aba kale mazuba otatwe ngobakkala andime alimwi tabajisi cakulya cili coonse, pele tandiyandi kubaleka kuti baunke anzala. Nkaambo inga banetuka munzila.” 33 Nokuba boobo, basikwiiya bakamwaambila kuti: “Ino nkukuli kuno musyokwe nkotutiijane zinkwa zikonzya kukkwana nkamu iili boobu?” 34 Lino Jesu wakabaambila kuti: “Ino mujisi zinkwa zyongaye?” Bakati: “Zili ciloba atuswi tusyoonto.” 35 Aboobo naakamana kulailila nkamu yabantu kuti bakkale ansi, 36 wakabweza zinkwa zili ciloba atuswi, eelyo naakamana kulumba Leza, wakazikomoona akutalika kupa basikwiiya, mpoonya abalo basikwiiya bakapa makamu aabantu. 37 Eelyo boonse bakalya akukkuta, alimwi bakazuzya mitaanga mipati iili ciloba yabufwefwelenga bwakacaala. 38 Pele akati kabaabo bakali kulya kwakali baalumi bali 4,000, ikutabalilizya abamakaintu abana. 39 Naakamana kwaambila makamu aabantu kuti baunke, wakatanta mubwato akuunka kuzyooko zya Magada.