Marko
8 Kumazuba aayo, alimwi kwakali nkamu yabantu mpati pele kabanyina cakulya, eelyo wakaita basikwiiya bakwe akubaambila kuti: 2 “Bandeetezya bantu aaba nkaambo aba kale mazuba otatwe ngobakkala andime, alimwi tabajisi cakulya cili coonse. 3 Ikuti ndibaambile kuti baunke mwabo-mwabo anzala, balanetuka munzila, alimwi bamwi bazwa kulamfwu.” 4 Pele basikwiiya bakwe bakamwiingula kuti: “Nkuli kuno kusyokwe muntu nkwakonzya kujana zinkwa zikonzya kukkwana bantu aaba?” 5 Pele wakababuzya kuti: “Ino mujisi zinkwa zyongaye?” Bakati: “Zili ciloba.” 6 Aboobo wakalailila nkamu yabantu kuti bakkale ansi. Mpoonya wakabweza zinkwa zili ciloba, wapaila, wazikomoona akutalika kupa basikwiiya bakwe kuti baabanye bantu, mpoonya bakazyaabanya nkamu yabantu. 7 Alimwi bakalijisi atuswi tusyoonto, mpoonya naakamana kulumba Leza, wakabaambila kuti baabanye bantu. 8 Aboobo bakalya akukkuta, alimwi bakabweza mitaanga mipati iili ciloba iizwide bufwefwelenga bwakacaala. 9 Nokuba boobo, kwakali baalumi batandila ku 4,000. Kumane wakabaleka kuti baunke.
10 Ndilyonya wakatanta bwato abasikwiiya bakwe akuboola kucooko ca Dalimanuta. 11 Ooko ba Falisi bakaboola akutalika kukazyanya anguwe, kabayanda kuti abape citondezyo kuzwa kujulu, ikumusunka. 12 Aboobo wakapenga kapati mumoyo, eelyo wakabuzya kuti: “Nkaambo nzi izyalani eeli ncoliyanda citondezyo? Ncobeni ndati: Kunyina citondezyo ciyoopegwa kuzyalani eeli.” 13 Naakamana kwaamba boobo, wakatanta bwato akuya mutala eliya.
14 Pele bakaluba kubwezelezya zinkwa, alimwi kwakali buyo cinkwa comwe ncobakajisi mubwato. 15 Cakulomya wakabalailila kuti: “Amulangisye; amucenjele abumena bwaba Falisi abumena bwa Heloda.” 16 Aboobo bakatalika kukazyanya nkaambo tiibakajisi zinkwa. 17 Naakabona boobo, wakababuzya kuti: “Nkaambo nzi ncomukazyanya kumakani aakubula zinkwa? Sena aino tamunazyiba akumvwisya caambwa? Sena myoyo yanu icikatazyigwa kumvwisya? 18 ‘Nokuba kuti mulijisi meso, sena tamuboni, alimwi nokuba kuti mulijisi matwi, sena tamumvwi?’ Alimwi sena tamuyeeyi 19 nindakakomoona zinkwa zyosanwe kusanina baalumi bali 5,000, kuti yakali yongaye mitaanga yakazwide bufwefwelenga njomwakabweza?” Bakamwiingula kuti: “Yakali kkumi aibili.” 20 “Nindakakomoona zinkwa zili ciloba kusanina baalumi bali 4,000, ino yakali yongaye mitaanga mipati yakazwide bufwefwelenga njomwakabweza?” Bakamwiingula kuti: “Yakali ciloba.” 21 Kumane boobo wakababuzya kuti: “Sena aino tamunamvwisya caambwa?”
22 Lino bakasika ku Betesaida. Okuya bantu bakamuletela mwaalumi moofwu, alimwi bakamukombelezya kuti amujate. 23 Mpoonya wakamujata kujanza mwaalumi ooyo moofwu akumutola kunze aamunzi. Naakamuswida mate mumeso wakamujata akumubuzya kuti: “Sena kuli ncobona?” 24 Eelyo muntu ooyu wakabbanuna meso akwaamba kuti: “Ndibona bantu, nkaambo ndibona zilibonya mbuli zisamu alimwi zileendeenda.” 25 Mpoonya wakamujata lwabili muntu ooyu mumeso, eelyo muntu ooyu wakabona kabotu-kabotu, wakaponesyegwa alimwi wakali kuzibona zyintu zyoonse mbozibede. 26 Aboobo wakamuleka waunka kuŋanda akumwaambila kuti: “Utajokeli mumunzi.”
27 Lino Jesu abasikwiiya bakwe bakaya kuminzi yaku Kaisaleya Filipi, alimwi munzila wakatalika kubuzya basikwiiya bakwe kuti: “Ino bantu baamba kuti ndime ni?” 28 Bakamwiingula kuti: “Johane Mubbapatizi; alimwi bamwi balati, Elija; kakuli ibamwi baamba kuti, umwi wabasinsimi.” 29 Mpoonya wakababuzya kuti: “Ino nywebo mwaamba kuti ndime ni?” Petulo wakamwiingula kuti: “Nduwe Kilisito.” 30 Kumane wakabalailila kuti batasoli kwaambila muntu uuli woonse kuti ngu Kilisito. 31 Alimwi wakatalika kubayiisya kuti Mwana wamuntu weelede kwiinda mumapenzi manji akukakwa abapati abasilutwe babapaizi abalembi akujaigwa akubuka kwaakwiinda mazuba otatwe. 32 Masimpe, wakali kubaambila kaambo aako cakutainda mumbali. Pele Petulo wakamutola ambali akutalika kumukalalila. 33 Wakacenguluka, wabalanga basikwiiya bakwe, akumukalalila Petulo akwaamba kuti: “Koya kusyule lyangu, Saatani! Nkaambo uli amizeezo yabantu ikutali ya Leza.”
34 Lino wakaita nkamu yabantu antoomwe abasikwiiya bakwe akubaambila kuti: “Ikuti umwi kayanda kunditobela, aliimye akunyamuna cisamu cakwe cakupenzyezya akuzumanana kunditobela. 35 Nkaambo kufwumbwa uuyanda kufwutula buumi bwakwe uyoobusweekelwa, pele kufwumbwa uusweekelwa buumi bwakwe akaambo kandime amakani mabotu uyoobufwutula. 36 Mubwini, nimpindu nzi njajana muntu ikuti wavwuba nyika yoonse pele wasweekelwa buumi bwakwe? 37 Ncinzi mubwini muntu ncakonzya kupa kuti anunune buumi bwakwe? 38 Nkaambo kufwumbwa uufwa bweemya akaambo kandime amajwi aangu muzyalani eeli lyabasimamambe abasizibi, awalo Mwana wamuntu uyoofwa bweemya kumuntu ooyo aakuboola mubulemu bwa Bausyi abangelo bakwe basalala.”