Luka
17 Mpoonya wakaambila basikwiiya bakwe kuti: “Masimpe zyintu zilebya zileelede kuboola. Nokuba boobo, maawe kumuntu ooyo uubelesyegwa kuti zicitike! 2 Inga cainda kubota kulinguwe ikuti waangililwa ziyo munsingo akusowelwa mulwizi kwiinda kuti atyompye umwi wabaniini aaba. 3 Amucenjele. Ikuti munyoko wabisya, komutapatila, alimwi ikuti weempwa, komulekelela. 4 Nokuba kuti wakubisizya ziindi zili ciloba mubuzuba bomwe alimwi waboola kulinduwe ziindi zili ciloba kati, ‘Ndeempwa,’ weelede kumulekelela.”
5 Lino batumwa bakaambila Mwami kuti: “Kotuyungizizya lusyomo.” 6 Mpoonya Mwami wakati: “Nomwalijisi lusyomo lweelene anseke yamusitada, nomwali kukonzya kwaambila mulubbeni ooyu kuti, ‘Zyuka awa akusimpwa mulwizi!’ Eelyo inga wamumvwida.
7 “Nguni wanu uujisi muzike uulima naa weembela mbelele ampongo uunga aboola kuzwa kumuunda ulamwaambila kuti, ‘Fwambaana boola kuno ukkale akulya’? 8 Muciindi caboobo, sena takamwaambili kuti, ‘Kondibambila cilalilo, alimwi sama kalembo kakukutaukila undikutaukile kusikila ndimanizye kulya akunywa; eelyo ndamana ayebo inga walya akunywa’? 9 Sena uyoomulumba muzike ooyo akaambo kakuti wakacita ncaakalaililwa? Nsisyomi oobo pe. 10 Mbubonya oobo andinywe, mwamana kucita zyintu zyoonse nzyomwalaililwa, amwaambe kuti, ‘Tuli bazike buyo. Twacita nzyotweelede kucita.’”
11 Alimwi naakali kuya ku Jelusalemu, wakainda akati ka Samaliya a Galilaya. 12 Eelyo naakali kunjila mumunzi umwi, basicinsenda bali kkumi bakamubona, pele bakaimina alaale. 13 Bakoompolola akwaamba kuti: “Jesu, O Mufwundisi, tufwide luse!” 14 Lino naakababona, wakabaambila kuti: “Kamuya mukalitondezye kubapaizi.” Mpoonya nobakali kuunka, bakasalazyigwa. 15 Umwi akati kabo naakabona kuti waponesyegwa, wakapiluka kaya butembaula Leza ajwi ipati. 16 Eelyo wakavwuntama kumaulu aa Jesu, wamulumba. Alimwi muntu ooyu wakali muna Samaliya. 17 Mpoonya Jesu wakabuzya kuti: “Sena tiibali kkumi basalazyigwa? Aboobo, ino bamwi bali fwuka bali kuli? 18 Sena kunyina umbi wapiluka kuzyootembaula Leza ccita buyo muntu ooyu wamasi?” 19 Mpoonya Jesu wakati kulinguwe: “Nyamuka uunke; lusyomo lwako lwakuponya.”
20 Buzuba bumwi ba Falisi bakamubuzya nobwakali kuyooboola Bwami bwa Leza, eelyo wakabaingula akwaamba kuti: “Bwami bwa Leza tabukabooli munzila iilibonya kubantu boonse; 21 alimwi bantu kunyina nobayooamba kuti, ‘Amulange okuno!’ naa ‘Okuya!’ Nkaambo amubone! Bwami bwa Leza buli akati kanu.”
22 Mpoonya wakaambila basikwiiya bakwe kuti: “Ayoosika mazuba nomuyoolombozya kubona bumwi bwamazuba aa Mwana wamuntu, pele tamukabuboni. 23 Alimwi bantu bayoomwaambila kuti, ‘Amulange okuya!’ naa ‘Amulange okuno!’ Mutakainki nokuba kubatandila. 24 Nkaambo mbubonya mbuli lulabo mbolumweka kuzwa kubbazu limwi lyajulu kusikila kubbazu limbi, oobo mbwayooba awalo Mwana wamuntu. 25 Pele kusaanguna weelede kwiinda mumapenzi manji akukakwa azyalani eeli. 26 Kuyungizya waawo, mbubonya mbocakacitika kumazuba aa Nowa, mbokuyooba oobo akwalo kumazuba aa Mwana wamuntu: 27 Bakali kulya, bakali kunywa, baalumi bakali kukwata, bamakaintu bakali kukwasyigwa, kusikila buzuba oobo Nowa naakanjila mubwato, eelyo Zambangulwe lyakasika akubanyonyoona boonse. 28 Ncimwi buyo, mbubonya mbocakacitika kumazuba aa Loti: Bakali kulya, bakali kunywa, bakali kuula, bakali kusambala, bakali kusyanga, bakali kuyaka. 29 Pele ibuzuba Loti naakazwa mu Sodoma, kwakaloka mulilo asulufa kuzwa kujulu akubanyonyoona boonse. 30 Mbokuyooba oobo ibuzuba oobo Mwana wamuntu aakuyubununwa.
31 “Ibuzuba oobo imuntu uuli aciluli caŋanda pele zyintu zyakwe kazili muŋanda atakaseluki kuti azibweze, mbubonya buyo imuntu uuli mumuunda atakapilukili zyintu zili musyule. 32 Amuyeeye muka Loti. 33 Kufwumbwa uusoleka kukwabilila buumi bwakwe uyoobusweekelwa, pele kufwumbwa uusweekelwa buumi bwakwe uyoobuyobola. 34 Ndimwaambila kuti: Imasiku aayo bantu bobilo banoolede abulo bomwe; omwe uyootolwa pele umwi uyoosiigwa. 35 Kunooli bamakaintu bobilo ibaziya aziyo lyomwe; omwe uyootolwa pele umwi uyoosiigwa.” 36 — 37 Aboobo mukumwiingula bakamubuzya kuti: “Ikuli O Mwami?” Wakabaambila kuti: “Ikuli mutunta, nkukonya ooko nkobayoobungana basikwaze.”